¿Mbaʼéichapa japredikáta avei koʼág̃arupi?

1. ¿Mbaʼéichapa opredika vaʼekue umi kristiáno síglo primérope?

¹ Síglo primérope umi kristiáno opredika vaʼekue ogahárupi, péro avei umi lugár hetahápe hénte (Hech. 20:20). Por ehémplo, oho hikuái pe témplope oikuaa rupi upépe ojuhutaha heta héntere (Hech. 5:42). Aténaspe, apóstol Pablo opredika vaʼekue káda día pe plásape (Hech. 17:17). Koʼág̃arupi japredika meme ogahárupi, péro japredika jepi avei negosiohápe, plásape, kállere térã ambue lugár oĩhápe heta hénte. Jehová organisasión ñanemokyreʼỹ meme voi japredika hag̃ua ijahápe ñandéve, péro koʼág̃a oĩta heta orekóva oportunida opredikave hag̃ua mokõi hendáicha. Jahechamína umíva.

2. ¿Mbaʼéichapa ojepredika noviembre 2011 guive ojehecha hag̃ua oikótapa?

² Predikasión oorganisáva sukursál umi siuda tuichaháre. Anuario 2013 páhina 16 ha 17-pe ohechauka noviembre 2011 guive Nueva Yórkpe (Estados Unidos) oñeñepyrũ hague ojepredika umi lugár hetahápe hénte, ojehecha hag̃ua oikótapa. Umi lugár ojeguatavehárupi upe suidápe oñemoĩ mesa ha estanteʼi orekóva kartél iporãva ha ñane puvlikasionkuéra diferénte idiómape. Káda día hetaiterei hénte ohecha chupekuéra, umíva apytépe umi oikóva edifísio ndaikatuihápe ojeike térã umi ndojetopáiva voi hesekuéra hógape. Oñehaʼarõ haguéicha heta mbaʼe porã ojehupyty, un méspente oñemosarambi 3.797 rrevísta ha 7.986 lívro. Avei heta ohasáva upérupi ojerure estúdio vívliko, ha ikatu hag̃uáicha ojevisita chupekuéra oñemondo héra ha idireksión umi kongregasión oĩvape ag̃ui hogakuéragui.

3. ¿Mbaʼéichapa ojepredikáta avei koʼág̃arupi?

³ Ojehupytýgui heta mbaʼe porã ojepredika rupi péicha, ko yvy tuichakuére oñeñepyrũ ojejapo ko tembiapo umi suida tuichaháre. Káda sukursál oiporavo umi lugár opyta porãvetahápe ojepredika péicha. Upearã oiporavo hikuái umi siuda tuicháva heta hénte ohasahápe, por ehémplo, terminálpe, oĩhápe heta edifísio orekóva ofisína térã apartaménto. Upéi, pe sukursál omondo informasión ohechaukáva mbaʼéichapa ojejapo vaʼerã ko tembiapo umi kongregasión oiporavo vaʼekuépe. Oiporavóramo jepe hikuái umi prekursór rregulár ha espesiálpe ojapo hag̃ua ko tembiapo, sapyʼánte oiporavo avei umi prekursór auxiliárpe oipytyvõ hag̃ua chupekuéra.

4. ¿Mbaʼéichapa opredika prekursorkuéra umi lugár pe sukursál oiporavo vaʼekuépe?

⁴ Mbaʼéichapa ojepredika hína koʼã lugárpe. Umi prekursór ohaʼarõ umi hénte oñemboja raẽ pe mesa térã pe estanteʼi oĩháme, ha upéi heʼi chupekuéra ikatuha ogueraha umi puvlikasión oipotavéva. Avei ombohovái chupekuéra la Biblia rupive umi mbaʼe oikuaaséva. Ha oguerahátaramo umi puvlikasión ndeʼíri chupekuéra omeʼẽ hag̃ua kontrivusión. Péro oporandúramo mbaʼéichapa ojepaga umi puvlikasión ojejapo hag̃ua ha omeʼẽse ikontrivusión, ikatu ojeʼe chupekuéra omondo hag̃ua pe direksión oĩvape upe puvlikasiónpe. Ha opyta porãramo katu oporandu chupekuéra: “¿Reipotápa peteĩ Testígo ndevisita nde rógape?” térã “¿Mbaʼépa ere peteĩ Testígo ohóramo nde rogaitépe pestudia hag̃ua la Biblia gratiete?”.

5. ¿Mbaʼépa heʼi peteĩ matrimónio opredika vaʼekue umi lugár ohasahápe heta hénte?

⁵ Ovyʼaiterei umi opredikáva péicha, peteĩ matrimónio heʼi: “Roñemboʼývo pe estanteʼi ykére, rohecha umi ohasáva ha romombaʼeterei mbaʼeichaitépa oñeñehaʼã oñemog̃uahẽ umi notísia porã opaichagua héntepe ko yvy tuichakuére. Ha rohechakuaa mbaʼeichaitépa Jehová ojepyʼapy hesekuéra, upéva orepytyvõ romombaʼe ha romotenondeve hag̃ua ore rekovépe pe predikasión. Oĩ jave ohasáva pe mesa térã estanteʼi renondérupi, ropensa ha roʼe: ‘Oiméne Jehová ohecha hína umi hénte pyʼapy oikuaa hag̃ua mávapa omombaʼe imensáhe’. Péicha jave ningo rohecha porãiterei mbaʼéichapa umi ánhel orepytyvõ”.

6. a) ¿Mbaʼeichagua predikasiónpa oorganisa avei koʼág̃a umi kongregasión, ha mbaʼépepa idiferénte pe predikasión oorganisávagui pe sukursál? b) ¿Mbaʼéichapa oñopytyvõ vaʼerã umi kongregasión ojepredika hag̃ua umi lugár hetahápe hénte?

⁶ Predikasión oorganisáva kongregasión umi lugár oĩhápe heta hénte. Heta kongregasiónpe umi ansiáno oorganisa avei peichagua predikasión. Upearã umi maranduhára omoĩ peteĩ mesa térã estanteʼi pe kongregasión territóriope umi lugár ohasahápe jepi heta hénte. Péro pe predikasión oorganisáva sukursál idiferénte pe oorganisávagui umi kongregasión. ¿Mbaʼérepa jaʼe upéva? Pe sukursál oiporavo umi prekursór diferénte kongregasióngui ha avei pe lugár opredika hag̃ua hikuái (ehecha pe rrekuádro heʼihápe “Umi kongregasión oñopytyvõ vaʼerã”).

7. ¿Mbaʼépa ojapo vaʼerã umi ansiáno ohecháramo tekotevẽha ojepredika umi lugár ohasahápe heta hénte?

⁷ Umi ansiáno ohecha vaʼerã oĩpa iterritoriopekuéra umi lugár ohasahápe heta hénte, ha opyta porãramo ikatu oorganisa hikuái ojepredika hag̃ua umi lugárpe. Upearã ikatu oñemoĩ mesa térã estanteʼi terminálpe, plásape, kálle ojehasavehárupi, universidápe, aeropuértope, umi supermerkádo térã ambue negósio tuichávape ha ambue lugár ijaty hetahápe hénte. Japredikáramo koʼãichagua lugárpe, iporãta ñamoĩramo pe mesa térã estanteʼi peteĩ hendápe meménte ha ani ñakambia pe día ni pe óra. Ojehechakuaa iporãveha oñemoĩ pe mesa térã estanteʼi umi negósio tuicháva ryepýpe, oñemoĩ rangue henondépente, umi hénte ou rupi ombaʼejogua ha oho jeýma. Ñañemoĩramo okápe umi hénte ndopytái omaña ñane puvlikasiónre. Ha umi veréda ojehasavehápe katu iporãvéta jaiporu peteĩ estanteʼi mesa rangue. Jajapo porã hag̃ua ko tembiapo ojeprepara voi kartél ñanepytyvõtava upearã, koʼãvare oĩ rrevísta Ñemañaha, ¡Despertad! ha lívro Mbaʼépa omboʼe la Biblia? raʼanga, ha umi ansiáno ikatúta omboguejy ñande sítio oĩvagui Internétpe. Umi oñatendéva koʼã lugárpe, ojapo vaʼerã avei umi prekursór opredikáva umi siuda tuichaháre ojapoháicha, ha pe superintendénte de servísio heʼihaichaite. Ha oĩramo peteĩ oikuaasevéva la Biblia omboʼéva ha ndoikói pe kongregasión territóriope, pyaʼe omyenyhẽ vaʼerã pe formulário Sírvase visitar (S-43) ha omeʼẽ pe sekretáriope.

8. ¿Mbaʼépa ikatu pejapo pende territóriope ndaipóriramo peteĩ lugár pemoĩ hag̃ua mesa térã estanteʼi pepredika hag̃ua?

⁸ Mbaʼépa ikatu pejapo pepredika hag̃ua avei umi lugár oĩhápe heta hénte. ¿Mbaʼépa ikatu pejapo pende territóriope ndaipóriramo peteĩ lugár pemoĩ hag̃ua mesa térã estanteʼi pepredika hag̃ua? Upéicharamo jepe, ikatu sapyʼánte peñehaʼã pepredika umi lugár oĩhápe heta hénte. ¿Oĩpa pende territóriope lugár hetahápe negósio, peteĩ supermerkadoʼi térã ambue negósio ohohápe jepi heta hénte? ¿Oñembyatýpa umi hénte plásape térã ambue hendápe? ¿Ojejapópa jepi peteĩ aty pende territóriope ohohápe hetaiterei hénte? Oiméramo upéicha, peaprovecha vaʼerã pepredika hag̃ua umichahápe.

9. ¿Mbaʼérepa ñañehaʼãmbaite vaʼerã ñamombeʼu pe notísia porã umi héntepe mamo oĩhápe?

⁹ Jehová ningo “oipota opaichagua tapicha ojesalva ha oikuaa porã pe añetegua” (1 Tim. 2:4). Upévare, ñañehaʼãmbaitékena ñamombeʼu umi notísia porã oñeʼẽva Ñandejára Rréinore opaichagua héntepe og̃uahẽ mboyve Jehová ára guasu (Mat. 24:14). Heta vése ijetuʼu jatopa hag̃ua umi héntere hógape, péro ikatu hína japredika chupekuéra kállere, supermerkádope, plásape térã ambue hendápe. Oĩ ningo upéicharõ añoite ikatúva ohendu umi notísia porã. Upévare, japredikákena umi héntepe mamo oĩhápe hikuái ha jajapo ñane rembiapo hekoitépe (2 Tim. 4:5).

[Rrekuádro oĩva páhina 5-pe]

Umi kongregasión oñopytyvõ vaʼerã

Oñemombeʼu umi maranduhára heta kongregasionpegua sapyʼánte ohoha opredika ha oheja puvlikasión umi lugár opredikahápe avei ótra kongregasión, por ehémplo kállere, ojehejahápe umi veíkulo, sála de espérape, umi negósio renondépe térã terminálpe. Ojapóramo jepe hikuái upéva diferénte díape, omongueraipáma umi hénte oĩvape upérupi ojepredika pyʼỹi rupi chupekuéra. Upévare japredika jave umi lugár hetahápe hénte, iporãvéta jajapóramo ñane kongregasión territóriopente.

Umi maranduhára opredikaséramo peteĩ lugár hetahápe hénte, péro oĩva ótra kongregasión territóriope oñeʼẽ raẽ vaʼerã pe superintendénte de servísio ikongregasionpeguándi. Ha pe ermáno ojeruréta permíso pe superintendénte de servísio oĩva pe ótra kongregasiónpe. Umi kongregasión oĩva diferénte idiómape opredikáramo peteĩ territóriopente, umi superintendénte de servísio oĩva káda kongregasiónpe oñemongeta meme vaʼerã oñondive ani hag̃ua umi maranduhára omongueraipa umi hénte oĩvape upe territóriope. Péicha oñopytyvõramo umi kongregasión, ojapóta hikuái “opa mbaʼe hekopete ha hendaitépe” (1 Cor. 14:40).

[Taʼanga oĩva páhina 6-pe]

[Taʼanga oĩva páhina 6-pe]