Eñembokatupyryvékena: eipytyvõkena ne irũme

Mbaʼérepa iñimportánte. Jesús oikuaa vaʼekue tuichaiterei ñanepytyvõha jarekóramo peteĩ ñanemoirũva japredika hag̃ua. Upéicha rupi, omondórõ guare umi 70 disípulope opredika hag̃ua heʼi chupekuéra oho hag̃ua mokõi mokõi (Luc. 10:1). Sapyʼánte ningo predikasiónpe ikatu oñeporandu ñane irũme peteĩ mbaʼe ijetuʼúva ha ndoikuaái mbaʼéichapa ombohováita, upéicha jave ñande ikatu tuicha ñaipytyvõ chupe (Ecl. 4:9, 10). Ikatu avei ñamombeʼu ñane irũme mbaʼépa jajapo jepi oñepresentáramo ñandéve peichagua situasión térã jaʼe umi mbaʼe oipytyvõtava chupe ikatupyryve hag̃ua predikasiónpe (Prov. 27:17). Avei ñamokyreʼỹetereíta ñane irũme ñañemongetávo hendive umi mbaʼe iñimportántevare ñaime aja predikasiónpe (Filip. 4:8).

Mbaʼéichapa jajapo vaʼerã:

Ani rejesareko ótro ládo ne kompañéro opredika jave (Sant. 1:19). Ha oleétarõ peteĩ téxto, eheka avei nde Bíbliape. Péicha reipytyvõ porãvéta chupe ojecha vai jave.
Eñehaʼãkena rehechakuaa mbaʼe moméntopepa iporãvéta reipytyvõ ne irũme (Prov. 25:11). Rehóramo rejapo estúdio peteĩ maranduhárandi, katuete ovyʼáta epartisipa mimíramo pe estúdio aja. Ha repredika jave ogahárupi, eheja vaʼerã ne kompañérope toñeʼẽ otoka vove chupe. Péro rehechakuaáramo ndoikuaaveimaha mbaʼépa heʼíta térã resẽrõ peteĩ maranduhára pyahúndi, katuete ovyʼáta reipytyvõramo chupe oikotevẽ jave. Upéicharõ, remoirũramo peteĩ ermánope predikasiónpe, pejapo hag̃ua irrevisíta térã ijestúdio, ndovaléi reñeʼẽjoko chupe, rejagarrapa térã reñepyrũ reñeʼẽ ótro témare.
Oiméramo tekotevẽ reipytyvõ ne irũme ikatupyryve hag̃ua predikasiónpe, ejapo vaʼerã upéva (Prov. 3:27). Ikatu remombeʼu chupe mbaʼépa rejapo jepi oñepresenta jave ndéve predikasiónpe peteĩ mbaʼe ijetuʼúva. Upearã erekuaa: “Mbaʼépa nde repensa, ¿ikatúnepa raʼe ñambohovái porãve chupe?” térã “¿Ikatúpa amombeʼumi ndéve mbaʼépa ikatu rejapo péicha jave?” térã ere “Oñepresenta jave peichagua situasión che añehaʼã...”. Katuete ningo ñane irũ oagradeséta ñandéve ñaipytyvõ mimíramo chupe ikatupyryve hag̃ua, péro jaikóramo manterei jaʼe chupe mbaʼépa ojapo vai, ikatu oñeñandu vai.

Eñehaʼãkena ejapo ko mbaʼe un mes aja:

Resẽ rire peteĩ maranduhárandi predikasiónpe, emombeʼu chupe mbaʼépa heʼi térã ojapo raʼe nepytyvõva ndekatupyryve hag̃ua.