Peteĩ vidéo pyahu ñanepytyvõtava ñamoñepyrũ hag̃ua estúdio vívliko

Hetaiterei héntema ohecha ñande sítio jw.org-pe pe vidéo hérava ¿Mbaʼérepa restudia vaʼerã la Biblia? Ko vidéo ojeprepara ikatu hag̃uáicha omomýi umi héntepe ostudiase hag̃ua la Biblia, hiʼarive ndopagamoʼãi mbaʼevete. Ko vidéo ikatu jatopa pe párte heʼihápe “Ejerure peteĩ estúdio vívliko”, oĩva pe páhina de inísio guyetépe. Ikatu avei jajuhu ñaeskaneávo pe kódigo QR (código de respuesta rápida) oĩva umi tratádo pyahu atukupépe. Jahechamína mbaʼéichapa ikatu jaiporu porã ko vidéo.

• Javisita jeývo umi héntepe ikatu jaʼe: “Oĩ ningo peteĩ vidéo mbykyʼi omombeʼúva mbaʼéichapa ikatu rembohovái umi mbaʼe reikuaaséva la Bíbliagui, ¿ikatúpa ahechaukami ndéve?”. Pe ogajára oaseptáramo, ikatu jahechauka chupe pe vidéo ñande selulárpe térã ambue aparáto elektrónikope, térã ikomputadórape.

• Ñameʼẽ jave umi tratádo pyahu japredikávo kállere térã ambue hendápe ỹrõ umi lugár oñemoĩhápe jepi mesa térã karríto, jahechaukakuaa pe persónape pe kódigo QR ha jaʼe chupe toeskanea iselulárpe térã ambue aparáto elektrónikope, ikatu avei ñandete jahechauka chupe pe vidéo. Ñaeskaneávo pe kódigo QR oĩva umi tratádore ñandegueraháta direktoite pe vidéope. Ko vidéo oĩ hetaiterei idiómape.

• Ikatu avei ñamombeʼu ñane kompañéro de traváho, de koléhio, ñane hénte térã ñane konosídope oĩha peteĩ vidéo iporãva jahechaukaséva chupe. Ikatu voi ñamondo chupekuéra korréo elektróniko rupive pe enláse térã direksión oipytyvõtava chupekuéra otopa hag̃ua pe vidéo, ikatu hag̃uáicha ohecha haʼekueraite voi.

Jaiporu porãramo ko vidéo porãite ikatúta ñamoñepyrũ estúdio vívliko. Péicha ñaipytyvõta “opavave oñehaʼãvape ohupyty jeikove opaveʼỹva” (Hech. 13:48).