¿Ndépa rehechakuaa mbaʼeichagua persónapa Ñandejára?

¿Ñapensápa Ñandejárare jahecha jave peteĩ yvoty iporãitereíva, umi estrélla ojajaipáva yvágare térã jahecha jave peteĩ kataráta? Umi mbaʼe Ñandejára ojapo vaʼekue ñanepytyvõ ‘jahecha’ hag̃ua mbaʼeichaguápa haʼe, ndaikatúiramo jepe jahecha chupe (Ro 1:20). Ñañemotiémporamo jajepyʼamongeta hag̃ua umi mbaʼe oĩvare ñande jerére, jahecháta Ñandejára ipoderóso, ñanderayhu, ihústo ha ipojeraitereiha (Sl 104:24).

Umi mbaʼe Jehová okrea vaʼekue apytépe, ¿mbaʼe mbaʼépa nde rehecha káda día? Reikóramo jepe siudápe lomímonte ikatu rehecha umi guyra ha yvyramáta. Jajepyʼamongetáramo pe kreasiónre, ñanepytyvõta ani hag̃ua jajepyʼapyeterei, ñañekonsentra hag̃ua umi mbaʼe iñimportantevévare ha jajeroviave hag̃ua Jehová oñangarekotaha ñanderehe opa árare (Mt 6:25-32). Oiméramo reguereko mitã, eipytyvõkena chupekuéra ohechakuaa hag̃ua pe kreasión rupive umi kualida porãite Jehová orekóva. Amáske ñamombaʼeve umi mbaʼe Jehová okrea vaʼekue, ñañemoag̃uivéta hese (Sl 8:3, 4).

EHECHA PE VIDÉO UMI KREASIÓN OHECHAUKA ÑANDEJÁRA IPODEROSOITEREIHA: PE LUS HA UMI KOLÓR, HA UPÉI ERRESPONDE KOʼÃ PORANDU:

• ¿Mbaʼépa ñanepytyvõ jahecha hag̃ua umi kolór?

• ¿Mbaʼéicha rupípa algúna kósa okambia de kolór asegún moõguio ládopa ñamaña hese?

• ¿Mbaʼéicha rupípa pe yvágare ojekuaa jepi diferénte kolór?

• ¿Mbaʼe kolór iporãitereívapa rehecha jepi nde reikohárupi?

• ¿Mbaʼérepa iñimportánte ñañemotiémpo jajesareko hag̃ua pe naturalésare?