¿Rejepokuaámapa eñekontenta umi mbaʼe rehupytývare?

1. ¿Mbaʼépa heʼise ñañekontentaha umi mbaʼe jarekóvare ha mbaʼépa ndeʼiséi avei?

¿NDÉPA reñekontenta umi mbaʼe erekóvare? Peteĩ persóna oñekontentáva la orekóvare ovyʼa umi mbaʼe Jehová omeʼẽvare chupe ha ipyʼaguapy. Peichagua persóna noñamargái ni ndaipochýi ndohupytýi haguére peteĩ mbaʼe. Péro ñañekontenta avei ndeʼiséi nañaneimportaiha mbaʼeve. Por ehémplo, peteĩ kristiáno oheka vaʼerã mbaʼépa ikatu ojapove Jehová servísiope (Rom. 12:1; 1 Tim. 3:1). Péro avei noñamargái oimérõ noñemeʼẽi gueteri chupe peteĩ priviléhio ohaʼãrõitereíva.

2. ¿Mbaʼérepa ipeligróso jaju ndajavyʼavéi la jahupytývare?

² Umi persóna ndovyʼáiva la ohupytývare ikatu oñepyrũ odesidi vai. ¿Mbaʼépa ikatu oiko? Por ehémplo algúno ikatu oñepyrũ ombaʼapo heta óra éxtra okonsegi hag̃ua umi mbaʼe legálmente noikotevẽiva. Avei ñambyasýramo jepe algúno ermáno omonda pláta térã ótra kósa oipotaiterei vaʼekue. Ikatu oime haʼekuéra opensa raʼe: “Kóva ko chembaʼénte vaʼerã voi kuri, hetáma añehaʼã akonsegi hag̃ua”. Térã ikatu heʼi: “Ajagarráta ko pláta ha upéinte ág̃a amyengovia jeýne”. Tahaʼe haʼeháicha, jajagarra jave ñane mbaʼerã peteĩ mbaʼe ahéno, ñanemanduʼa vaʼerã upéva omongyʼaha Jehová réra ha la jajapóva ndogustaietereiha chupe (Prov. 30:9). Oĩ avei ótro ermáno oñepyrũva oñedesanima noñemeʼẽi haguére chupe peteĩ priviléhio oipota vaʼekue, ha upévare ndoservivéima Jehovápe (Gál. 6:9). ¿Mbaʼéicha rupi ikatu ohasa ñane akãrupi jajapo upéva? Ikatu hína oiko ñanderehe upéva jajúramo mbeguekatúpe ndajavyʼavéi umi mbaʼe jahupytývare.

3. ¿Mbaʼépa ikatu ñaaprende la heʼívagui Filipenses 4:​11, 12?

³ Enterovéva ningo ikatu ñañehaʼã javyʼa umi mbaʼe jahupytývare. Apóstol Pablo heʼi vaʼekue oaprende hague oñekontenta pe orekomívare, tahaʼe haʼéva pe situasión ohasáva (elee Filipenses 4:​11, 12). Apóstol Pablo oskrivi vaʼekue upéva oĩrõ guare kárselpe. Upéicharamo jepe haʼe ndahaʼéi ku ndovyʼavéiva mbaʼe, síno haʼe heʼi vaʼekue oaprende hague “peteĩ mbaʼe naentéroi oikuaáva” ha upéva hína ñañekontenta umi mbaʼe jahupytývare. Oimérõ ijetuʼu ñandéve jajapo upéva, la Pablo ohasa vaʼekue ohechauka ñande ikatuha avei javyʼa la jarekóvare tahaʼe haʼéva la jahasáva. Ndaikatúi ningo ñapensa ifasiltaha javyʼa entéro situasiónpe, upévare tekotevẽ ñaaprende térã jajepokuaa javyʼa umi mbaʼe jarekóvare. ¿Mbaʼéichapa ikatu jajapo upéva? Ko artíkulope jahecháta mbaʼépa ikatu ñanepytyvõ javyʼa hag̃ua umi mbaʼe jahupytývare.

ÑAÑEHAʼÃKENA ÑANDEAGRADESÍDO

4. ¿Mbaʼérepa jaʼekuaa ñandeagradesídoramo ikatutaha ñañekontenta umi mbaʼe jarekóvare? (1 Tesalonicenses 5:18).

⁴ Umi persóna ijagradesídova normálmente ovyʼa la ohupytývare (elee 1 Tesalonicenses 5:18). Por ehémplo ñandeagradesídoramo jareko haguére umi mbaʼe ñaikotevẽva, ndajaikomoʼãi ñapensaiterei umi mbaʼe jaipotávare péro ndaikatúiva jahupyty. Avei jaagradese vaʼerã Jehovápe umi mbaʼe ikatúvare koʼág̃a jajapo iservísiope. Upéva ñanepytyvõta ñapensa hag̃ua mbaʼéichapa ikatu jajapo porãve pe asignasión jarekóva ha ndajaikomoʼãi ñapensaiterei peteĩ priviléhio noñemeʼẽivare ñandéve. Ajeve voíngo la Biblia heʼi ñandéve jaagradese vaʼerãha Jehovápe umi mbaʼe jarekóvare ñañemboʼe jave chupe. Jajepokuaáramo jajapo upéva ñañandúta “Ñandejára pyʼaguapy tuichavéva entéro mbaʼe yvyporakuéra ikatúvagui ontende” (Filip. 4:​6, 7).

5. ¿Mbaʼe mbaʼe rehepa umi israelita oagradese vaʼerã kuri Jehovápe? (Ehecha pe taʼanga).

⁵ Ñapensamína la oiko vaʼekuére umi israelítare. Heta vése haʼekuéra ojeplagea vaʼekue Jehovápe pórke hoʼuse jey hikuái umi tembiʼu hoʼu vaʼekue oĩrõ guare Egíptope (Núm. 11:​4-6). Jaikuaa ndahaʼéi hague la ifasilpáva chupekuéra oiko pe desiértore, ¿péro mbaʼépa ikatu vaʼekue oipytyvõ umi israelítape oñekontenta hag̃ua umi mbaʼe orekóvare? Haʼekuéra ojepyʼamongeta vaʼerã kuri umi mbaʼe Jehová ojapo vaʼekuére hesehapekuéra ha oagradese chupe umívare. Umi israelita ndahesaráiri vaʼerã kuri heta ojetrata vai hague chupekuéra oĩrõ guare de esklávo Egíptope, péro upéi Jehová omondo hague umi 10 plága osalva hag̃ua chupekuéra. Avei haʼekuéra osẽrõ guare Egíptogui, Jehová oipytyvõ chupekuéra oraha hag̃ua umi kósa de pláta, de óro ha ao orekóva umi Egipcio (Éx. 12:​35, 36). Upéi umi egipcio omuña vaʼekue chupekuéra Mar Rojo peve, péro Jehová ojapo peteĩ milágro ha oavri mbytetépe pe mar umi israelita ohasa hag̃ua. Ha oĩrõ guare hikuái pe desiértope Jehová omeʼẽ umi israelítape káda día pe maná hoʼu hag̃ua. ¿Mbaʼe upéicharõ la provléma rakaʼe? Haʼekuéra ndovyʼái vaʼekue ndahaʼéi ofaltágui chupekuéra tembiʼu, síno ndoagradeséigui Jehovápe umi mbaʼe orekóvare.

6. ¿Mbaʼe mbaʼépa ikatu jajapo ñandeagradesído hag̃ua?

⁶ ¿Mbaʼépa ikatu ejapo ndeagradesidove hag̃ua? Primero eñemotiémpokena káda día epensa hag̃ua umi mbaʼe porã erekóvare ha nembovyʼáva. Ikatu voi reskrivi mokõi térã mbohapy mbaʼe reagradeseséva (Lam. 3:​22, 23). Segundo, ehechaukákena ndeagradesidoha. Eagradesékena umi ótrope la ojapo vaʼekuére nderehe, ha koʼytevéntema reagradese vaʼerã káda día Jehovápe la ojapóvare nderehehápe (Sal. 75:1). Tercero, eiporavókena ne amigorã umi ijagradesídovape. Ñane amigokuéra ojeplagea meméramo, ñande avei ñañepyrũta jajapo upéva, péro upéicha avei ñane amigokuéra ijagradesídoramo, upéva avei ováta ñanderehe (Deut. 1:​26-28; 2 Tim. 3:​1, 2, 5). Jahekáramo oportunida ñandeagradesído hag̃ua, ifasilvéta ñandéve javyʼa hag̃ua la jahupytývare ha ndajaikomoʼãi ñapensaiterei umi mbaʼe ndajarekóivare.

7. ¿Mbaʼépa oipytyvõ vaʼekue peteĩ ermánape ovyʼa añete hag̃ua?

⁷ Jahechamína la oiko vaʼekue peteĩ ermána héravare Aci oikóva Indonésiape. Pe ermána omombeʼu: “Pe pandémia de COVID-19 aja che situasión káusare añepyrũ vaʼekue añekompara umi ermánore ha upévare aju ndavyʼavéi” (Gál. 6:4). ¿Mbaʼépa oipytyvõ vaʼekue ko ermánape okambia hag̃ua opensa lája? Pe ermána heʼi: “Añepyrũ ajepyʼamongeta umi mbaʼe porã Jehová omeʼẽvare chéve káda día. Avei apensa umi mbaʼe porã ahupytývare aĩ haguére Jehová organisasiónpe. Upéi aagradesémi vaʼerã Jehovápe entéro umi mbaʼére. Upéicha rupi ikatu kuri avyʼa añete umi mbaʼe ahupytývare”. Oimérõ ne situasión káusare eju nderevyʼavéi, ¿ikatúpa rejapo pe ermána ojapo vaʼekue ndeagradesído hag̃ua?

JAJESAREKO LA JEHOVÁ OIPOTÁVARE HA ÑANEUMÍLDEKENA

8. ¿Mbaʼépa oiko vaʼekue Baruc rehe?

⁸ Jeremías sekretário hérava Baruc, un tiémpore ou vaʼekue noñekontentavéi la orekóvare. Baruc asignasión ijetuʼueterei vaʼekue. Haʼe oipytyvõ vaʼerã kuri Jeremíaspe omeʼẽ hag̃ua peteĩ mensáhe ipohýiva umi israelita naiñeʼẽrendúivape. Péro Baruc ojesareko rangue umi mbaʼe Jehová oipotávare haʼe ojapo, Baruc oñepyrũ opensaiterei umi mbaʼe haʼe ojaposévare. Upévare Jeremías rupive Jehová heʼi vaʼekue chupe: “Nde reheka reikóvo umi mbaʼe tuicháva ndéve g̃uarã. Anive reheka umi mbaʼe” (Jer. 45:​3-5). Haʼete voi la Jehová heʼíva chupe: “Baruc, nde revyʼáma vaʼerã umi mbaʼe erekóvare koʼág̃a”. Upéi Baruc oasepta Jehová konsého ha Jehová osegi oguerohory chupe.

9. ¿Mbaʼépa ñanemboʼe la jatopáva 1 Corintios 4:​6, 7-pe? (Ehecha pe taʼanga).

⁹ Sapyʼánte peteĩ kristiáno ikatu opensa oñemeʼẽ vaʼerãha chupe peteĩ priviléhio. Ikatu oime opensa upéicha ivaletereígui, iguápo haguére, oservíma haguére Jehovápe heta áñore térã ikatu oime orekopaite voi koʼã mbaʼe. Péro ikatu hína oñemeʼẽ ótrope pe priviléhio haʼe oipotáva, ¿mbaʼépa ikatu oipytyvõ peteĩ ermánope péicha jave? Iporãta ojepyʼamongetáramo la apóstol Pablo heʼi vaʼekuére 1 Corintios 4:​6, 7-pe (elee). Ikatu oime ñandevaleterei peteĩ mbaʼépe térã jareko peteĩ priviléhio, péro upéva ningo Jehová rupivénte. Jehová nomeʼẽi ñandéve koʼã rregálo ñaneimportantevégui umi ótrogui, síno haʼe omeʼẽnte ñandéve koʼã mbaʼe imbaʼeporãitereígui ñanendive (Rom. 12:​3, 6; Efes. 2:​8, 9).

10. ¿Mbaʼépa nañepytyvõta ñaneumílde hag̃ua?

¹⁰ Jesús ehémplo ikatu ñanepytyvõ ñaneumílde hag̃ua, upévare tekotevẽ jajepyʼamongeta la haʼe ojapo vaʼekuére. Por ehémplo Jesús ojohéi vaʼekue ijapostolkuérape ipy, oikuaáramo jepe haʼeha Ñandejára Raʼy ha orekóramo jepe tuicha autorida. Apóstol Juan oskrivi vaʼekue: ‘Jesús oikuaáma pe Túa omoĩ hague ipoguýpe opa mbaʼe. Haʼe oikuaa avei Ñandejára ombou hague chupe ha oho jeytamaha Ñandejára rendápe. Upéi ojohéi idisipulokuérape ipy’ (Juan 13:​3-5). Jesús ikatu kuri opensa ijapostolkuéra la ojohéi vaʼerãha chupe ipy. Péro haʼe oĩrõ guare ko yvy ape ári núnka nopensái vaʼekue oreko vaʼerãha peteĩ óga tuicháva ha ipláta heta vaʼerãha oiko trankílo hag̃ua (Luc. 9:58). Upéva rangue Jesús iñumílde vaʼekue ha oñekontenta la orekóvare. Péicha haʼe oheja ñandéve peteĩ ehémplo iporãitereíva (Juan 13:15).

11. ¿Mbaʼépa oipytyvõ vaʼekue Dénnispe ovyʼa hag̃ua?

¹¹ Peteĩ ermáno hérava Dennis oikóva Países Bájospe, omombeʼu oñehaʼãmbaiteha osegi Jesús ehémplo iñumílde hag̃ua, péro sapyʼánte ijetuʼu chupe. Haʼe heʼi: “Avése ahechakuaa añepyrũha añemombaʼeguasu térã nañekontentavéi la arekóvare, por ehémplo oñemeʼẽ jave ótrope peteĩ priviléhio che aipota vaʼekue. Upéva oiko jave cherehe, añemoĩ astudia umi informasión oñeʼẽva pe umildáre. Avei pe aplikasión JW Líbrarype añongatupaite umi téxto oñeʼẽva pe umildáre ikatu hag̃uáicha atopa pyaʼe ha alee jey. Che teléfonope avei adeskarga umi diskúrso oñeʼẽva pe umildáre ha pyʼỹinte ahendu umíva.a Che aaprendéma jajapo vaʼerãha entéro mbaʼe ñamombaʼeguasu hag̃ua Jehovápe ha ndahaʼéi ñande ñañembotuicha hag̃ua. Jehová ningo imbaʼeporãguinte omeʼẽ káda únope peteĩ traváho ojapo hag̃ua, péro amo ipahápe haʼe jeýnte oñenkarga osẽ porã hag̃ua la jajapóva”. Oiméramo sapyʼánte nderevyʼavéi noñemeʼẽigui ndéve peteĩ priviléhio reipotáva, eñehaʼãmbaitékena neumildeve hag̃ua, upéva omombaretéta ne amista Jehovándi ha nepytyvõta revyʼave hag̃ua (Sant. 4:​6, 8).

JAJEPYʼAMONGETA JEHOVÁ PROMESAKUÉRARE

12. ¿Mbaʼe esperánsapa ñanepytyvõ javyʼa ha ñandepyʼaguapy hag̃ua? (Isaías 65:​21-25).

¹² Katuete javyʼavéta ha ñandepyʼaguapyvéta jajepyʼamongetáramo Jehová oprometévare ñandéve ñane renonderãme g̃uarã. Pe lívro de Isaías rupive Jehová ohechauka ontende porãitereiha umi mbaʼe jahasáva, upévare opromete koʼẽrõitéma oipeʼaitetaha umi provléma (elee Isaías 65:​21-25). Upe tiémpope jaikóta umi óga porã porãme, pe traváho jajapóva ñanembovyʼáta ha jaʼúta umi tembiʼu iñaliméntova ha hetereíva. Avei núnka ndajaikomoʼãvéima jajepyʼapy oikórõ g̃uarã ivaíva ñane famíliare térã ñanderehe (Is. 32:​17, 18; Ezeq. 34:25). Ndaipóri jaduda hag̃ua, la ñaneraʼarõva ningo iporãiterei ha katuete oñekumplíta.

13. ¿Mbaʼéicha javépa koʼýte ñapensa meme vaʼerã ñane esperánsare?

¹³ Koʼág̃arupi koʼytevéntema ñapensa meme vaʼerã ñane esperánsare. ¿Mbaʼérepa? Pórke jaiko “umi ára pahápe” ha entéronte jahasa umi situasión ijetuʼúva (2 Tim. 3:1). Péro Jehová káda día omeʼẽ ñandéve la ñaikotevẽva ñaaguanta hag̃ua, haʼe ñandegia, ñanemombarete ha ñanepytyvõ ñaikotevẽhaichaite (Sal. 145:14). Ñane esperánsa avei ñanepytyvõ jahasa jave umi mbaʼe ijetuʼúva. Por ehémplo ikatu oime ijetuʼueterei ndéve remoĩ hag̃ua ne famíliape la oikotevẽva, ¿heʼisépa upéva siémpre reluchataha péicha? Nahaniriete voi, Jehová opromete pe paraísope omeʼẽtaha ndéve la reikotevẽva, ha omeʼẽ rasapáta voi ndéve (Sal. 9:18; 72:​12-14). Ikatu oime avei káda día reaguanta álgo hasy asýva ndéve, eñedeprimi térã ereko ótro mbaʼasy igravetereíva, ¿heʼisépa upéva núnka ndaikatumoʼãiha reñeñandu porã ha resufritaha pára siémpre? Ni mbaʼevéicharõ, Ñandejára múndo pyahúpe ndaiporimoʼãvéima ni peteĩ hasýva térã omanóva (Apoc. 21:​3, 4). Ñane esperánsa ikatu ñanepytyvõ ani hag̃ua jaiko ñandepochy térã ñañamarga umi mbaʼe oikóvare ñanderehe koʼág̃a. Ñande ikatu jasegi javyʼa ha ñandepyʼaguapy jahasáramo jepe inhustísia, omanóramo jepe ñandehegui peteĩ jahayhúva térã oikórõ jepe ñanderehe oimeraẽ mbaʼe ivaíva. ¿Mbaʼérepa? Pórke tahaʼe haʼéva la jahasáva, jaikuaa upéva ‘sapyʼami g̃uarãnteha’ ha avei jaikuaa koʼẽrõitéma múndo pyahúpe núnka mas ndajahasamoʼãveimaha umi mbaʼe (2 Cor. 4:​17, 18).

14. ¿Mbaʼéichapa ikatu jajeroviave Jehová promesakuérare?

¹⁴ Pe esperánsa jarekóva ñanepytyvõ ñañekontenta hag̃ua. Upévare, ¿mbaʼépa ikatu jajapo jajeroviave hag̃ua umi promésare? Jaikuaa peteĩ persóna ndohechaporãiva, sapyʼánte oipuru vaʼerãha lénte hesakã porã hag̃ua chupe la oĩva mombyry. Upéicha avei, oĩ unas kuánta kósa tekotevẽva jajapo hesakã porã hag̃ua ñandéve umi mbaʼe ñaneraʼarõva amo gotyove. Por ehémplo, ñañekevranta jave jarekógui provléma ekonómiko, ikatu ñañeimahina mbaʼéichapa jaikóta múndo pyahúpe, upépe nañaikotevẽmoʼãvéima plátare ha ndaiporimoʼãvéima imboriahúva. Avei oimérõ ñañedesanima noñemeʼẽi haguére ñandéve peteĩ priviléhio, ikatu ñapensa múndo pyahúpe vyroreitaha la ñañandúva koʼág̃a, pórke upépe ñandeperféktotama ha ikatúta jaadora Jehovápe opa ára g̃uarã (1 Tim. 6:19). Koʼág̃a ningo hetaiterei mbaʼe ñanekevranta, upévare ikatu ijetuʼu ñandéve jajepyʼamongeta la ñaneraʼarõvare amo gotyove. Péro amáske ñañehaʼã ñapensa meme Jehová promesakuérare, ifasilvéta ñandéve jajesareko umívare, jaiko rangue ñapensaiterei umi ñane provlémare.

15. ¿Mbaʼépa nemboʼe Christa ehémplo?

¹⁵ Jahechamína mbaʼéichapa pe esperánsa oipytyvõ peteĩ ermána héravape Christa. Haʼe ningo Dennis rembireko, pe ermáno ñañeʼẽma vaʼekuére. Pe ermána heʼi: “Che areko peteĩ mbaʼasy omokangýva chehegui che múskulo, upévare aipurúmante sílla de rruéda ha haimete tódo el día apyta tupápe. Che ningo káda día aaguanta vaʼerã umi dolór ha hiʼarive che mbaʼasy oempeorave ohóvo. Ndaʼaréi che doktór heʼi chéve ndaikatumoʼãiha ajerrekupera, péro upepete che apensa: ‘Haʼe ndohechái hína umi mbaʼe porã cheraʼarõva amo gotyove’. Che ajesareko meme che esperánsare ha upéva chembopyʼaguapy. Koʼág̃a ningo che aaguanta vaʼerã umi provléma ko múndope, péro koʼẽrõitéma múndo pyahúpe avyʼáta ha aiko porãitereíta”.

“UMI OADORÁVA ÑANDEJÁRAPE NOIKOTEVẼMOʼÃI MBAʼEVE”

16. ¿Mbaʼérepa rréi David heʼi vaʼekue ‘umi oadoráva Ñandejárape noikotevẽmoʼãiha mbaʼeve’?

¹⁶ Javyʼáramo jepe umi mbaʼe jahupytývare ndeʼiséi nañaneprovlemamoʼãveimaha. Por ehémplo rréi Davídgui omano vaʼekue por lo méno mbohapy ifamília. Avei chupe ojeakusa reiete, oñetraisiona ha un tiémpore oiko vaʼekue okañy peteĩ rréi ojukasévagui chupe. Péro ombohováiramo jepe umi mbaʼe, haʼe heʼi vaʼekue: “Umi oadoráva Ñandejárape noikotevẽmoʼãi mbaʼeve” (Sal. 34:​9, 10). ¿Mbaʼérepa David heʼi vaʼekue upéva? Haʼe oikuaa porã vaʼekue jaservíramo jepe Jehovápe ndaikatuiha ñahaʼarõ ndajarekomoʼãiha provléma, péro David oikuaa vaʼekue Jehová nombofaltamoʼãiha chupe umi mbaʼe legálmente oikotevẽva (Sal. 145:16). Ñande avei ikatu ñaĩ segúro Jehová ñanepytyvõtaha ñaaguanta hag̃ua umi pruéva, upévare ikatu javyʼa tahaʼe haʼéva la jahasáva.

17. ¿Mbaʼérepa ejedesidíma eñekontentataha umi mbaʼe ehupytývare?

¹⁷ Jehová ningo oipotaiterei revyʼa (Sal. 131:​1, 2). Upévare eaprendékena eñekontenta hag̃ua umi mbaʼe ehupytývare. Eñehaʼãmbaitékena ndeagradesído, ejesareko la Jehová oipotávare, neumílde ha ejepyʼamongeta Jehová promésare. Péicha rejapóramo upéi ikatúta ere: “Añetehápe avyʼaiterei” (Sal. 16:​5, 6).