¿Mbaʼéichapa Jehová ñanepytyvõ jasegi hag̃ua ñaaguanta?

1. ¿Mbaʼérepa tekotevẽ jasegi ñaaguanta, ha mávapa ñanepytyvõta? (1 Pedro 5:10).

KOʼÃ ára paha ijetuʼueterei, upévare Jehová siervokuéra tekotevẽ osegi oaguanta. Oĩ algúno hasykatúva heta tiémporema, ótrogui katu omano peteĩ ohayhúva ha avei oĩ umi ermáno orekóva umi oñemoĩ mbaretéva hesekuéra, por ehémplo ihentekuéra térã pe goviérno (Mat. 10:​18, 36, 37). Tahaʼe haʼéva la nde rehasáva, ikatu reĩ segúro Jehová katuete nepytyvõtaha resegi hag̃ua reaguanta (elee 1 Pedro 5:10).

2. ¿Mbaʼéicha rupípa jasegi ñaaguanta?

² Ñaneaguánte heʼise jasegiha ñandefiél Jehovápe ñaneprovlémarõ jepe, oĩramo jepe ñandepersegíva ha oñepresentárõ jepe ñandéve umi tentasión. Avei ñaneaguánteramo ndajaperdéi la esperánsa omehorataha pe situasión. ¿Mbaʼéicha rupípa ikatu ñaneaguánte? Upéva ningo ndajajapói ñandejehegui reínte, síno Jehová añoite hína pe omeʼẽva ñandéve “pe podér umi ótra hénte ndorekóiva” (2 Cor. 4:7). Ko artíkulope jahecháta umi mbaʼe Jehová omeʼẽva ñandéve jasegi hag̃ua ñaaguanta. Avei ñaanalisáta mbaʼéichapa ikatu jaaprovecha porã umi mbaʼe.

PE ÑEMBOʼE

3. ¿Mbaʼérepa ikatu jaʼe pe ñemboʼe haʼeha peteĩ milágro?

³ Jehová opermiti ñandéve ñañemboʼe chupe, ha upéva peteĩ mbaʼe ndaijojaháiva ñanepytyvõva ñaaguanta hag̃ua. Ikatu voi jaʼe pe ñemboʼe haʼeha peteĩ milágro, pórke ñaneimperféktoramo jepe ikatu ñañeʼẽ Jehovándi ha haʼe ñanerendu (Heb. 4:16). Ñapensamíntena, ñande ikatu ñañemboʼe Jehovápe oimeha óra ha opa mbaʼére. Avei haʼe ñanerendúta tahaʼe haʼéva pe idióma ñañeʼẽvape chupe ha ñaime ñaimehápe, ñaĩramo jepe ñaneaño vera térã kárselpe (Jon. 2:​1, 2; Hech. 16:​25, 26). Ha jajúramo ñañekevrantaiterei ha ni ndaikatúi ñamombeʼu Jehovápe mbaʼéichapa ñañeñandu, lomímonte haʼe ontende mbaʼépa la jaʼeséva chupe (Rom. 8:​26, 27). Entéro koʼã mbaʼére ikatu jaʼe pe ñemboʼe haʼeha peteĩ milágro.

4. ¿Mbaʼérepa ikatu jajerure Jehovápe tañanepytyvõ ñaneaguánte hag̃ua?

⁴ Iñeʼẽme Jehová oasegura ñandéve ‘oimeraẽ mbaʼe jajeruréva chupe, oĩ porãramo hembipotándi, haʼe ñanerendutaha’ (1 Juan 5:14). Upéicharõ, ¿ikatúpa jajerure Jehovápe tañanepytyvõ ñaaguanta hag̃ua? ¡Kláro ke si! Jehová ningo oipota voi jajapo upéva. ¿Mbaʼérepa? Pórke ñaneaguánte jave ñameʼẽ Jehovápe peteĩ oportunida ombohovái hag̃ua upe odesafiávape chupe, upéva hína Satanás (Prov. 27:11). Avei la Biblia heʼi ñandéve Jehová ‘ohechaukasetereiha ipodér umi ojeroviávape hese ikorasõ mbytete guive’ (2 Crón. 16:9). Upévare, aníkena jaduda Jehová ñanepytyvõsetereiha ha ikatuha omeʼẽ ñandéve ipodér ñaaguanta hag̃ua (Is. 30:18; 41:10; Luc. 11:13).

5. ¿Mbaʼéichapa pe ñemboʼe ñanepytyvõ ñandepyʼaguapy hag̃ua? (Isaías 26:3).

⁵ La Biblia heʼi ñañemboʼe jave Jehovápe, ‘Ñandejára pyʼaguapy tuichavéva entéro mbaʼe yvyporakuéra ikatúvagui ontende, oñangarekotaha ñane korasõre ha umi mbaʼe ñapensávare’ (Filip. 4:7). Ñapensamíntena mbaʼeichaitépa tuicha mbaʼe ñandéve g̃uarã upéva. Umi persóna ndoservíriva Jehovápe oreko avei heta provléma. Upévare oĩ umi oñehaʼãva otantea heta mbaʼe ipyʼaguapy ha hesarái hag̃ua iprovlemakuéragui. Por ehémplo, algúno oipuru peteĩ téknika de meditasión ha upearã nopensái mbaʼevete asýre oheja peve iménte en vlánko. Péro umi persóna ojapo jave koʼã mbaʼe nodominái umi mbaʼe oĩva iñakãme, ha umi demónio ikatu oaprovecha upéva. Koʼãicha mbaʼe ningo ipeligrosoiterei (ekompara Mateo 12:​43-45 heʼívare). Umi hénte oñandúramo jepe ipyʼaguapyha ojapo rire koʼã mbaʼe, haʼekuéra ndorekói pe pyʼaguapy Jehová omeʼẽva iporãitevéva oimeraẽ mbaʼégui. Ñande ñañemboʼe jave Jehovápe jahechauka jajeroviaha hese ha haʼe ñanepytyvõ jasegi hag̃ua ‘jaiko pyʼaguapýpe’ (elee Isaías 26:3). Por ehémplo Jehová ñanembopyʼaguapy ñanepytyvõvo ñanemanduʼa hag̃ua umi téxto bíblico ñanekonsolávare. Umi téxto bíblico ñanemomanduʼa mbaʼeichaitépa Jehová ñanderayhu ha ñanepytyvõse, ha upéva tuicha ñanetrankilisa (Sal. 62:​1, 2).

6. ¿Mbaʼépa ikatu ere eñemboʼe jave? (Ehecha pe taʼanga).

⁶ ¿Mbaʼépa ikatu rejapo? Rehasa jave umi mbaʼe ijetuʼuetereíva, emombeʼu Jehovápe la reñandúva. “Emoĩ Jehová pópe umi mbaʼe ndepyʼapýva” ha ejerure chupe tanembopyʼaguapy (Sal. 55:22). Ejerure avei Jehovápe tanemoarandu eikuaa hag̃ua mbaʼépa ejapo vaʼerã ne situasiónpe (Prov. 2:​10, 11). Ani nderesarái avei reagradese vaʼerãha Jehovápe umi mbaʼe erekóvare (Filip. 4:6). Eñehaʼã ehecha mbaʼéichapa Jehová nepytyvõ pe situasión rehasávape ha eagradese chupe ndeapoja haguére. Aníkena rehasa haguére umi mbaʼe ijetuʼúva nderehechavéi umi vendisión Jehová omeʼẽmava ndéve (Sal. 16:​5, 6).

ÑANDEJÁRA ÑEʼẼ

7. ¿Mbaʼéichapa la Biblia ikatu ñanepytyvõ jasegi hag̃ua ñaaguanta?

⁷ Jehová omeʼẽ ñandéve Iñeʼẽ ikatu hag̃uáicha ñaaguanta. Heta pártepe la Biblia oasegura ñandéve Jehová ñanepytyvõtaha. Por ehémplo Mateo 6:8 heʼi: “Pende Ru oĩva yvágape oikuaáma voi mbaʼépa peikotevẽ pejerure mboyve jepe chupe”. Jesús voi ningo la heʼi vaʼekue upéva, ha jaikuaa ndaiporiha ótro oikuaa porãvéva Jehovápe. Upévare ndovaléi ni michĩmi jaduda jahasa asy jave Jehová oikuaaha la ñaikotevẽva ha ñanepytyvõtaha. Añetehápe la Biblia henyhẽte umi téxto porã porãgui, umíva ohechauka Jehová ñanemombaretetaha jasegi hag̃ua ñaaguanta (Sal. 94:19).

8. a) ¿Mbaʼe konséhopa omeʼẽ la Biblia ikatúva ñanepytyvõ ñaaguanta hag̃ua? b) ¿Mbaʼépa ikatu jajapo ñanemanduʼa hag̃ua umi konsého bíblicore ñaikotevẽ jave?

⁸ Umi konsého oĩva la Bíbliape ikatu ñanepytyvõ jasegi hag̃ua ñaaguanta. Umi konsého ñanemoarandúta jadesidi porã hag̃ua (Prov. 2:​6, 7). Por ehémplo, la Biblia heʼi ñandéve ani hag̃ua jajepyʼapy rasa la ikatúvare oiko amo gotyove, upéva rangue ñakonfia vaʼerã Jehováre káda día (Mat. 6:34). Jaleéramo Ñandejára Ñeʼẽ káda día ha jajepyʼamongeta hese, ifasilvéta ñanemanduʼa hag̃ua umi konsého bíblicore káda ke ñaikotevẽ umívare.

9. Jalee jave Ñandejára siervokuéra yma guare ehémplo, ¿mbaʼéichapa upéva ñanemombarete?

⁹ La Biblia omombeʼu ñandéve yma oĩ hague umi hénte ñandeichagua ojerovia vaʼekue Jehováre, ha haʼe ndohejareíri chupekuéra (Heb. 11:​32-34; Sant. 5:17). Jajepyʼamongeta jave iñehemplokuérare ñakonfiave Jehová ‘ñandeprotehe ha ñanemombaretetaha. Haʼe pyaʼe ñanepytyvõta jahasa asy jave’ (Sal. 46:1). Iporãta ñapensa meméramo mbaʼéichapa Jehová siervokuéra yma guare osegi vaʼekue ifiél. Upéva ñanemomýita jasegi hag̃ua iñehemplokuéra ñandefiél ha ñaaguanta hag̃ua (Sant. 5:​10, 11).

10. ¿Mbaʼépa ikatu rejapo ideprovécho hag̃ua ndéve Ñandejára Ñeʼẽ?

¹⁰ ¿Mbaʼépa ikatu rejapo? Eleékena la Biblia káda día, avei ikatu reprepara peteĩ lísta emoĩhápe umi téxto ikatúva nepytyvõ. Oĩ heta ermáno ha ermána oleéva pe téxto diário voi porã pyharevete, ikatu hag̃uáicha opensa peteĩ mbaʼe iporãvare upe día pukukue. Péicha ojapo vaʼekue peteĩ ermána hérava Marie okuidárõ guare ituakuérare.a Mokõivéva ituakuéra oreko vaʼekue kánser al mísmo tiémpo, ha Marie oñatende vaʼerã kuri hesekuéra omano meve hikuái. Haʼe heʼi: “Káda pyhareve aleémi vaʼerã pe téxto diário oĩva ñande folléto Ñahesaʼỹijo Ñandejára Ñeʼẽ ára ha árape. Añehaʼã vaʼekue ajepyʼamongeta upe téxtore ha ahecha mbaʼépa aaprende chugui. Upéva chepytyvõ vaʼekue apensa hag̃ua káda día Jehováre ha umi mbaʼe porãite haʼe ñanemboʼévare Iñeʼẽme. Upéicha rupi ndaikói vaʼekue apensaiterei che provlemakuérare añónte” (Sal. 61:2).

ÑANE ERMANOKUÉRA

11. ¿Mbaʼéichapa ñañeñandu jaikuaávo ñane ermáno ha ermanakuéra ohasaha avei umi mbaʼe ñande jahasáva?

¹¹ Jasegi hag̃ua ñaaguanta, Jehová avei omeʼẽ ñandéve ñane ermanokuéra oĩva ko yvy tuichakuére. Tuicha ñanekonsola jaikuaávo ‘enterove ñane ermáno oĩva ko múndope, oaguantaha avei umi jehasa asy’ ñande ñaaguantáva (1 Ped. 5:9). Upéicharõ tahaʼe haʼéva la jahasáva, jaikuaa ñane ermáno ha ermanakuéra ohasanteha avei umícha mbaʼe ha osegiha ifiél Jehovápe. Upéva ohechauka ñande ikatuha avei jasegi ñaaguanta (Hech. 14:22).

12. ¿Mbaʼéichapa ñane ermanokuéra ikatu ñanepytyvõ, ha mbaʼépa ñande ikatu jajapo hesehapekuéra? (2 Corintios 1:​3, 4).

¹² Ñane ermanokuéra ikatu ñanemokyreʼỹ jasegi hag̃ua ñaaguanta. Apóstol Pablo oikuaa vaʼekue upéva siertoha. Ikartakuérape haʼe pyʼỹinte omensiona vaʼekue máva mávapa oipytyvõ vaʼekue chupe ndaikatúirõ guare osẽ hógagui, ha oagradese chupekuéra la ojapóvare hesehápe. Umi ermáno okonsola vaʼekue Páblope, haʼekuéra omokyreʼỹ ha oipytyvõ vaʼekue chupe heta hendáicha (Filip. 2:​25, 29, 30; Col. 4:​10, 11). ¿Mbaʼépa ikatu jaʼe ñane tiémpore? Koʼág̃arupi avei ñane ermáno ha ermanakuéra ikatu ñanekonsola ha ñanepytyvõ ñaaguanta hag̃ua umi situasión ijetuʼúva. Ñande avei jajapo upéva hesehapekuéra oikotevẽ jave hikuái ñanderehe (elee 2 Corintios 1:​3, 4).

13. ¿Mbaʼépa oipytyvõ vaʼekue peteĩ ermánape oaguanta hag̃ua?

¹³ Jahechamína mbaʼéichapa umi ermanokuéra omokyreʼỹ vaʼekue peteĩ ermána héravape Maya oikóva Rúsiape. Áño 2020-pe, umi polisía Rusiapegua oike vaʼekue mbaretépe derrepentete hógape orrevisa hag̃ua. Upéi Máyape ojegueraha peteĩ trivunálpe ojehusga hag̃ua chupe oñeʼẽ haguére la Bíbliare hapichápe. Maya heʼi: “Upe tiémpope añekevrantaiterei ha nameʼẽvéima kuri. Péro umi ermáno ha ermána cherenói, oskrivi chéve mensáhe ha kárta heʼi hag̃ua chéve mbaʼeichaitépa cherayhu hikuái. Che aikuaáma vaʼekue voi umi ermáno haʼeha che família ha cherayhuha hikuái, péro upe áño guive koʼýte añandu upéva”.

14. Umi ermanokuéra ikatúramo jepe nepytyvõ, ¿mbaʼépa nde rejapo vaʼerã? (Ehecha pe taʼanga).

¹⁴ ¿Mbaʼépa ikatu rejapo? Reaguanta jave peteĩ situasión ijetuʼúva iñimportanteterei resegi reñemoag̃ui ermanokuérare. Avei aníkena reduda ejerure hag̃ua umi ansiánope tanepytyvõ. Umi ansiáno haʼete voi “peteĩ lugár ikatuhápe ñañemoʼã yvytu atãgui. Haʼekuéra haʼetéta peteĩ lugár ikatuhápe ñakañy ama ha torménta vaígui” (Is. 32:2). Nemanduʼa vaʼerã umi ermanokuéra ohasaha avei umi situasión ijetuʼúva, upévare reñehaʼãramo reipytyvõ chupekuéra nde voi revyʼáta. Ha upéva nepytyvõta resegi hag̃ua reaguanta (Hech. 20:35).

ÑANE ESPERÁNSA

15. ¿Mbaʼéichapa pe esperánsa oipytyvõ vaʼekue Jesúspe, ha mbaʼéichapa ikatu ñanepytyvõ ñandéve? (Hebreos 12:2).

¹⁵ Jasegi hag̃ua ñaaguanta ipahaite peve Jehová omeʼẽ ñandéve peteĩ esperánsa isegúrova (Rom. 15:13). Ikatu ñanemanduʼa mbaʼeichaitépa pe esperánsa oipytyvõ vaʼekue Jesúspe oaguanta hag̃ua ohasa asyetérõ guare ko yvy ape ári (elee Hebreos 12:2). Jesús ojesareko vaʼekue umi mbaʼe oĩvare henonderãme. Por ehémplo haʼe oikuaa vaʼekue osegíramo ifiél oñemopotĩtaha Itúa réra. Avei Jesús opensa meme vaʼekue oĩ jeytaha yvágape Itúandi, kon el tiémpo oikotaha chugui Rréi ha ogovernataha iñermanokuéra unhídondi. ¿Mbaʼépa ikatu jaʼe ñande kásope? Ñande avei jareko pe esperánsa jaikóvo pára siémpre Ñandejára múndo pyahúpe, ha upéva ikatu ñanemombarete jasegi hag̃ua ñaaguanta oimeraẽ mbaʼe jahasáva Satanás múndope.

16. ¿Mbaʼéichapa pe esperánsa oipytyvõ vaʼekue peteĩ ermánape, ha mbaʼépa ñaaprende chugui?

¹⁶ Pe esperánsa jaikotaha pára siémpre pe múndo pyahúpe oipytyvõ vaʼekue peteĩ ermána héravape Ana oikóva Rúsiape. Iménape ojejagarra vaʼekue ha ojeraha kárselpe pe hués ohecha peve ikáso. Oikórõ guare upéva Ana heʼi vaʼekue: “Pyʼỹinte añemboʼe Jehovápe pe esperánsa haʼe omeʼẽvare chéve ha apensa la haʼe oprometévare. Upéva chepytyvõ ani hag̃ua aju añedesanimaiterei. Aikuaa ohasa rire koʼã mbaʼe ijetuʼuetéva outaha heta mbaʼe porã. ¡Jehová oganáta ha ñande avei!”.

17. ¿Mbaʼéichapa ikatu rehechauka emombaʼeha ne esperánsa? (Ehecha pe taʼanga).

¹⁷ ¿Mbaʼépa ikatu rejapo? Eñemotiémpokena epensa hag̃ua Jehová promesakuérare. Eñeimahina reĩmaha pe múndo pyahúpe ha reikoha vyʼápe ne amigokuéra ha ne hentekuérandi. Umi mbaʼe rehasáva koʼág̃a “ivevýi ha sapyʼami g̃uarãnte” rekomparátarõ umi mbaʼe porãita rehasátavare pe paraísope (2 Cor. 4:17). Avei iñimportánte emombeʼu nde rapichakuérape Ñandejára promésa. Epensamíntena mbaʼéichapa oiko umi hénte ndoservíriva Jehovápe. Haʼekuéra ningo orekónte avei heta provléma, péro haʼekuéra ndoikuaái umi mbaʼe porãite Jehová oprometéva. Eñehaʼãramo mbykymi jepe eñeʼẽ umi héntendi ne esperánsare, ikatu hína emomýi chupekuéra oikuaaseve hag̃ua Ñandejára Rréinogui.

18. ¿Mbaʼérepa ikatu jajerovia Jehová promesakuérare?

¹⁸ Job ohasa vaʼekue heta mbaʼe ijetuʼúva, péro osegi vaʼekue ifiél Jehovápe. Upe rire haʼe heʼi vaʼekue Ñandejárape: “Koʼág̃a aikuaa nde ikatuha rejapo opaite mbaʼe, ha ndaipóri mbaʼeve nde ikatuʼỹva rejapo” (Job 42:2). Job ohechakuaa vaʼekue ndaiporiha mbaʼeve ikatúva ojoko Jehovápe okumpli hag̃ua ipromesakuéra. Jajesareko meméramo upévare ñanembaretevéta jasegi hag̃ua ñaaguanta. Ñapensamína peteĩ ehémplore, ñamoĩ chupe peteĩ kuñakarai heta tiémporema hasykatuha. Haʼe oñedesanima pórke ohóma heta doktórpe ha ni peteĩva noipytyvõi chupe okuera hag̃ua. Péro upeichaháguinte peteĩ doktór ivaléva heʼi chupe mbaʼépa la imbaʼasy ha la ojapo vaʼerã okuera hag̃ua. Ohasátaramo jepe gueteri peteĩ tiémpo pe kuñakarai okuera hag̃ua, lomímonte upepetéma haʼe ovyʼa. Pórke upe guive ifasilvéma chupe oaguanta la imbaʼasy oikuaágui katuete okambiataha la isituasión. Péicha avei ñande ikatu jasegi ñaaguanta jaikuaágui Ñandejára promesakuéra katuete oñekumplitaha.

19. ¿Mbaʼépa jajapo vaʼerã jasegi hag̃ua ñaaguanta?

¹⁹ Ko artíkulope jahecha umi mbaʼe Jehová omeʼẽva ñandéve jasegi hag̃ua ñaaguanta. Umíva hína pe ñemboʼe, Iñeʼẽ la Biblia, umi ermanokuéra ha ñane esperánsa. Jaaprovecha porãramo koʼã mbaʼe, Jehová ñanepytyvõta tahaʼe haʼéva la jahasáva koʼág̃a. Péicha jasegíta ñaaguanta oñehundi peve Satanás múndo ha opa peve umi mbaʼe ñanembohasa asýva (Filip. 4:13).