Jahechaukákena japororrespetaha

1. ¿Mbaʼérepa iñimportánte ñandéve g̃uarã umi hénte ñanderrespeta? (Proverbios 22:1).

¿MBAʼÉICHAPA reñeñandu oĩ jave ohechaukáva ndéve nemombaʼeha? Katuete ningo upéva ojapo porãiterei nderehe ha nembovyʼa. Añetehápe entéro persóna tekotevẽ oñandu ojerrespetaha chupe. Ndareíri ningo la Biblia heʼi: “Iporãve umi hénte nderrespeta, rereko rangue heta óro ha pláta” (elee Proverbios 22:1).

2, 3. ¿Mbaʼérepa sapyʼánte ijetuʼu jepi japororrespeta, ha mbaʼépa jahecháta ko artíkulope?

² Sapyʼánte ndahaʼéi la ifasilpáva jahechauka japororrespetaha. ¿Mbaʼérepa? Primeroite voi pórke jahechakuaa umi ótro orekoha defékto. Avei ko múndope ndaiporivéi la rrespéto. Péro ñande ningo ñanediferénte vaʼerã. ¿Mbaʼérepa? Pórke Jehová oipota ñamombaʼe ha jarrespeta “entéro yvypórape” (1 Ped. 2:17).

³ Ko artíkulope jahecháta mbaʼépa heʼise japororrespeta, ha mbaʼéichapa ikatu jahechauka ñamombaʼeha 1) ñane hentekuérape, 2) umi ermáno ha ermanakuérape, ha 3) umi ndahaʼéivape Testígo. Ha iñimportanteveha ñaanalisáta mbaʼéichapa ikatu jahechauka japororrespetaha ijetuʼúramo jepe.

¿MBAʼÉPA HEʼISE JAPORORRESPETA?

4. ¿Mbaʼépa heʼise japororrespeta ha ñamombaʼe ótrope?

⁴ ¿Mbaʼépa heʼise ndéve g̃uarã jarrespeta ha ñamombaʼe ótrope? Algúno idiómape koʼã palávra ojojoguaiterei ha ojepuru jepi voi oñondive. Jarrespeta ha ñamombaʼe heʼise mbaʼépa ñapensa peteĩ persónare ha mbaʼéichapa jatrata chupe. Ñande jahecha jave peteĩ persóna orekoha umi kualida iporãva, ohupytyha heta mbaʼe térã orekoha autorida jarrespeta ha ñamombaʼe chupe. Upéva ojekuaa porã pe jatrata lájare upe persónape, péro iñimportanteterei jajapo upéva ñande pyʼaite guive (Mat. 15:8).

5. ¿Mbaʼépa la ñanemomýi vaʼerã jarrespeta hag̃ua ótrope?

⁵ Jehová oipota jarrespeta ótrope. Por ehémplo haʼe heʼi ñandéve jarrespeta vaʼerãha umi ‘autoridápe’ (Rom. 13:​1, 7). Péro ikatu algúno heʼi: “Che nacheprovlémai arrespeta hag̃ua ótrope, péro ojapo vaʼerã álgo omerese hag̃ua upéva”. ¿Iporãpa ñapensa upéicha? Nahániri. Ñande jaservíva Jehovápe jaikuaa porã jarrespeta vaʼerãha ótrope ndahaʼéi umi mbaʼe ojapóvarente, síno jahayhúgui Jehovápe ha ñambovyʼaségui chupe (Jos. 4:14; 1 Ped. 3:15).

6. ¿Ikatúpa ñamombaʼe peteĩ persóna nañanderrespetáivape? Emyesakã. (Ehecha pe taʼanga).

⁶ Ikatu algúno oñeporandu: “¿Ikatu piko amombaʼe peteĩ persóna ndacherrespetáivape?”. Si ikatu, upearã jahechamína unos kuánto ehémplo. Rréi Saúl oapoʼi vaʼekue itaʼýra Jonatánpe ótro rovake (1 Sam. 20:​30-34). Upéicharõ jepe, Jonatán osegi orrespeta itúape ha oipytyvõ chupe gerrahápe ipahaite peve (Éx. 20:12; 2 Sam. 1:23). Pe súmo saserdóte Elí oakusa reiete vaʼekue Ánape heʼívo chupe okaʼuha (1 Sam. 1:​12-14). Hiʼarive Israélpe entéronte oikuaa vaʼekue Elí nokumpliporãi hague irresponsavilida de súmo saserdóte ndokorrehíri haguére itaʼyrakuérape. Upéicharõ jepe Ana oñeʼẽrõ guare Elípe ohechauka vaʼekue orrespetaha chupe (1 Sam. 1:​15-18; 2:​22-24). Unos kuánto kuimbaʼe Atenasgua heʼi vaʼekue Pablo ‘oñeʼẽmba reiha’ (Hech. 17:18). Péro Pablo ohechauka vaʼekue orrespetaha umi kuimbaʼépe pe oñeʼẽ lájare chupekuéra (Hech. 17:22). ¿Mbaʼépa ñanemboʼe koʼã ehémplo? Ikatuha japororrespeta ijetuʼúramo jepe, pórke jarrespeta Jehovápe ñande pyʼaite guive ha ndajajaposéi mbaʼeve ivaíva chupe g̃uarã. Jahechamína koʼág̃a mávapepa la jarrespeta vaʼerã ha mbaʼérepa.

JARRESPETÁKENA ÑANE HENTEKUÉRAPE

7. ¿Mbaʼérepa ikatu jepi ijetuʼu peteĩ famíliape ojorrespeta hag̃ua?

⁷ ¿Mbaʼérepa ikatu ijetuʼu? Ñande ningo jahasa jepi heta tiémpo umi ñande rogayguándi. Upévare jaikuaa umi kualida orekóva hikuái péro avei la idefektokuéra. Algúno ikatu oreko ihénte hasýva térã orekóva ansieda, ha upévare ijetuʼueterei oñeñangareko hag̃ua hesekuéra. Ikatu oĩ avei ñane hénte heʼíva térã ojapóva álgo ñanemoñeñandu vaietereíva. Ñande ningo javyʼa vaʼerã ñande rogapýpe, péro algúno famíliape oĩ rupi umi ndojorrespetáiva oiko vaipa hikuái. Entéro koʼã mbaʼére ikatu hína peteĩ famíliape ndaiporivéi pyʼaguapy. Ñapensamína peteĩ ehémplore: Peteĩ persóna orekóramo artrítis oiko asýta, ha umi diferénte párte oĩva hetépe ndaikatumoʼãi ombaʼapo porã oñondivepa. Upéicha avei, peteĩ famíliape ndaipóriramo rrespéto oiko asýta hikuái ha ndaikatumoʼãi oiko pyʼaguapýpe oñondivepa. Péro jaikuaaháicha, heta mbaʼasýpe g̃uarã oĩ tratamiénto, upéicha avei umi família ikatu hína ojapo álgo okambia ha ojorrespeta hag̃ua.

8. ¿Mbaʼérepa iñimportánte jahechauka jarrespetaha ñane hentekuérape? (1 Timoteo 5:​4, 8).

⁸ ¿Mbaʼérepa japororrespeta vaʼerã? (Elee 1 Timoteo 5:​4, 8). Pe primera kárta Pablo oskrivi vaʼekuépe Timotéope, omyesakã mbaʼépa peteĩ família ojapo vaʼerã okuida hag̃ua ojuehe. Avei heʼi vaʼekue ñamombaʼe vaʼerãha ñande rogayguápe ndahaʼéi jajapo vaʼerãgui reínte upéva, síno ‘jaadorágui Ñandejárape ñande pyʼaite guive’. Upéicharõ ñamombaʼe vaʼerã ñane famíliape jahayhúgui Jehovápe ha avei péicha jahechaukágui jaadoraha Ñandejárape. Jehová rupive ningo oexisti umi família, upévare ñamombaʼévo umi ñande rogayguápe ñamombaʼe hína avei Jehovápe, haʼéva hína pe família Apohare (Efes. 3:​14, 15). ¡Ajépa iñimportantete ñamombaʼe ñane hentekuérape!

9. ¿Mbaʼéichapa peteĩ ména ha peteĩ tembireko ikatu ohechauka oñomombaʼeha? (Ehecha pe taʼanga).

⁹ ¿Mbaʼéichapa ikatu jahechauka japororrespetaha? Peteĩ ména omombaʼéva hembirekópe ohechaukáta ovaloraha chupe oĩ jave hikuái haʼeño térã hénte atýpe (Prov. 31:28; 1 Ped. 3:7). Peichagua ména ni mbaʼevéicharõ nombyepotimoʼãi hembirekópe, ndojapomoʼãi mbaʼeve oapoʼi hag̃ua chupe ha nontendekamoʼãi hembirekópe ndovaleiha mbaʼeverã. Ariela oikóva Argentínape heʼi: “Che rembireko ningo oreko peteĩ mbaʼasy, ha upéicha rupi sapyʼánte heʼi chéve algúna kósa chemoñeñandu vaíva. Péicha jave añehaʼã chemanduʼa la haʼe heʼíva chéve ndahaʼeiha rreálmente la haʼe oñandúva. Avei apensa la heʼívare 1 Corintios 13:​5, péva chepytyvõ añeʼẽ hag̃ua che rembirekóndi pyʼaguapýpe porãnte ha ndahaʼéi pochykue reheve. Péicha pe añeʼẽ lájare ahechauka che rembirekópe amombaʼeha chupe” (Prov. 19:11). Avei peteĩ tembireko omombaʼéva iménape oñeʼẽ porãta hese ótrope (Efes. 5:33). Pe tembireko ndoikomoʼãi oñembohory iménare, ndeʼimoʼãi umi mbaʼe omonátava chupe yvýre, ha ni ñembojaruhápe ndojapomoʼãi mbaʼeve ikatúva oapoʼi iménape. Pe tembireko oikuaa koʼã mbaʼe ikatuha ombyai imatrimónio pe errúmbre ohundiháicha peteĩ mbaʼe iporãva (Prov. 14:1). Peteĩ ermána oikóva Itáliape omombeʼu iména orekoha ansieda. Haʼe heʼi: “Sapyʼánte haʼete chéve haʼe ojepyʼapy rasámava entéro mbaʼére. Péicha jave yma la che rováre ha la haʼévare ojekuaa vaʼekue ndarrespetaiha che ménape. Péro ahechakuaa ajeheʼa rupi umi persóna opororrespetávare tuicha chepytyvõha arrespeta hag̃ua che ménape”.

10. ¿Mbaʼéichapa umi mitãrusukuéra ikatu ohechauka orrespetaha ituakuérape?

¹⁰ Mitãkuña ha mitãrusukuéra, pejapókena umi mbaʼe pende tuakuéra omandáva peẽme (Efes. 6:​1-3). Peñeʼẽ lájare pende tuakuérape pehechaukákena perrespetaha chupekuéra (Éx. 21:17). Pende tuakuéra ijedave vove ohóvo provávlemente oikotevẽvéta penderehe, upévare peñehaʼãmbaitékena pekuida porã hesekuéra. Jahechamína la ohasáva peteĩ ermána hérava María. Itúa ndahaʼéi testígo de Jehová ha upéi ou vaʼekue hasy. María oñepyrũ okuida hese péro ijetuʼueterei vaʼekue upéva pórke itúa otrata vai chupe. María heʼi: “Añemboʼe vaʼekue Jehovápe arrespeta hag̃ua che túape ha ahechauka hag̃ua chupe upéva. Apensa vaʼekue la Jehová ojerurérõ amombaʼe hag̃ua che tuakuérape haʼe chepytyvõtaha avei upearã. Kon el tiémpo antende amombaʼe vaʼerãha che túape haʼe nokambiáiramo jepe chetrata lája”. Upéicharõ sapyʼánte ijetuʼúramo jepe, ñamombaʼe vaʼerã entéro oĩvape ñane famíliape. Péicha jahechaukáta jarrespetaha Jehovápe voi, pórke haʼe rupivénte oexisti entéro umi família.

JARRESPETÁKENA ERMANOKUÉRAPE

11. ¿Mbaʼérepa sapyʼánte ijetuʼu jarrespeta umi ermánope?

¹¹ ¿Mbaʼérepa ikatu ijetuʼu? Umi ermáno ha ermána oñehaʼãmbaite ojapo la Biblia heʼíva. Upéicharõ jepe, sapyʼánte ikatu peteĩ ermáno nañandetrataporãi, opensa vai ñanderehe térã ojapo álgo ñanemorrenegáva. ‘Oĩ jave ñanembopochýva peteĩ mbaʼére’, ijetuʼu jasegi hag̃ua jarrespeta chupe (Col. 3:13). ¿Mbaʼépa ikatu ñanepytyvõ péicha jave?

12. ¿Mbaʼérepa ñamombaʼe vaʼerã ñane ermanokuérape? (2 Pedro 2:​9-12).

¹² ¿Mbaʼérepa japororrespeta vaʼerã? (Elee 2 Pedro 2:​9-12). Isegúnda kártape, Pedro omombeʼu mbaʼépa oiko vaʼekue kongregasiónpe upe tiémpope. Upérõ oĩ vaʼekue algúno ndorrespetáiva ha “oñeʼẽ vaíva umi Ñandejára omombaʼévare”, haʼéva hína umi ansiáno. ¿Mbaʼéichapa orreaksiona vaʼekue umi ánhel ohechárõ guare upe situasión? Upe téxto heʼi umi ánhel orrespeta rupi Jehovápe noñeʼẽvaíri hague umi kuimbaʼe hembiapo vaívare hína. Epensamíntena: Umi ánhel perféktoramo jepe, ndeʼíri mbaʼevete ivaíva umi kuimbaʼe ijorgullósovare. Upéva rangue haʼekuéra oheja Jehová ohusga ha okorrehi chupekuéra (Rom. 14:​10-12; ekompara Judas 9 heʼívare). Umi ánhel ehémplo ñanemboʼe álgo iñimportánteva: Tekotevẽramo jarrespeta umi oñemoĩvape ñane kóntrape jepe, koʼytevéntema ñamombaʼe vaʼerã umi ermáno ha ermánape. Ñañehaʼãmbaite vaʼerã ‘púntape ñamombaʼe chupekuéra’ (Rom. 12:10). Jajapóramo upéicha jahechaukáta jarrespetaha Jehovápe.

13, 14. Emombeʼu mbaʼéichapa ikatu jahechauka jarrespetaha umi ermánope. (Ehecha pe taʼanga).

¹³ ¿Mbaʼéichapa ikatu jahechauka japororrespetaha? Ansianokuéra, peñehaʼãkéna siémpre pemboʼe hag̃ua ótrope mborayhúpe (Filem. 8, 9). Tekotevẽramo pemeʼẽ konsého, peñehaʼãkena peneamávle ha ani pejapo upéva rreniegokuére. Ermanakuéra, pemboykékena pe chísme ha ani peiko peñeʼẽ vai ótrore. Péicha tuichaiterei peipytyvõta enterovénte ojorrespeta hag̃ua kongregasiónpe (Tito 2:​3-5). Ha enterovéva ikatu jahechauka jarrespetaha umi ansiánope. ¿Mbaʼéichapa? Upearã jaapoja vaʼerã chupekuéra, ha jaagradese umi ansiánope la ojapóvare odirihi hag̃ua umi rreunión, oorganisa hag̃ua pe predikasión ha oipytyvõ hag̃ua umi ohóvape hína tape vaíre (Gál. 6:1; 1 Tim. 5:17).

¹⁴ Jahechamína la oiko vaʼekue peteĩ ermána héravare Rocío. Peteĩ ansiáno omeʼẽ vaʼekue chupe konsého, ha upéi ijetuʼu vaʼekue Rocíope orrespeta hag̃ua chupe. Pe ermána heʼi: “Chéverõ g̃uarã pe ermáno noñeʼẽi chéve mborayhúpe, upévare ógape añeʼẽ vai vaʼekue hese. Añehaʼã vaʼekue pono ojepilla upéva cherehe, péro che pyʼapýpe apensa vaʼekue pe ermáno ndojepyʼapyiha cherehe, ha ndasegiséi vaʼekue ikonsého”. ¿Mbaʼépa oipytyvõ vaʼekue Rocíope? Haʼe heʼi: “Che lektúra bíblicape alee 1 Tesalonicenses 5:​12, 13. Ahechakuaa kuri ndarrespetaiha aikóvo pe ermánope ha che konsiénsia oñepyrũ chemolesta. Añemboʼe Jehovápe la oikóvare, ha aheka ñane puvlikasionkuérape umi informasión ikatúva chepytyvõ akambia hag̃ua. Kon el tiémpo ahechakuaa pe ansiáno ndahaʼéi hague la provléma, síno che hína pórke añemombaʼeguasu. Koʼág̃a antende tekotevẽha cheumílde arrespeta hag̃ua ótrope. Ofalta gueteri chéve amehorave hag̃ua, péro chepyʼaguapy pórke Jehová oikuaa añehaʼãha apororrespetave”.

JARRESPETÁKENA UMI NDAHAʼÉIVAPE TESTÍGO

15. ¿Mbaʼérepa sapyʼánte ijetuʼu jarrespeta umi ndahaʼéivape Testígo?

¹⁵ ¿Mbaʼérepa ikatu ijetuʼu? Heta vése predikasiónpe jatopa umi hénte ndoikuaaséivare mbaʼeve Ñandejáragui térã la Bíbliagui (Efes. 4:18). Algúno katu nohenduseiete voi ñane mensáhe pórke imitãme oñemboʼe vaʼekue chupe ótra kósa idiferentetéva. Ikatu avei oime jareko umi ñane kompañéro de traváho, de eskuéla térã kolehiopegua nañandetrataporãiva. Ikatu avei oime ñane patrón térã ñande profesór ipyʼahatã, ha núnka voi ndogustái chupekuéra la jajapóva. ¿Mbaʼépa ikatu oiko péicha jave? Kon el tiémpo ikatu jaju ndajarrespetavéi peichagua persónape ha ndajatrataporãvéima chupekuéra.

16. ¿Mbaʼérepa iñimportánte jarrespeta umi ndoservírivape gueteri Jehovápe? (1 Pedro 2:12; 3:15).

¹⁶ ¿Mbaʼérepa japororrespeta vaʼerã? Ñanemanduʼákena Jehová oñatendeha hína la jatrata lájare umi hénte ndoservírivape chupe. Apóstol Pedro omomanduʼa vaʼekue umi kristiánope ikondúkta porã vaʼerãha, pórke upéva ikatu omomýi algúno umi héntepe ‘ombotuicha hag̃ua Ñandejárape’. Upévare heʼi umi kristiánope odefende jave la ogueroviáva, ojapo vaʼerãha upéva pyʼaguapýpe porãnte ha orrespeta vaʼerãha hikuái hapichakuérape ipyʼaite guive (elee 1 Pedro 2:12; 3:15). Upéicharõ ikatu oime peteĩ kristiáno tekotevẽ raʼe odefende la ogueroviáva peteĩ hués renondépe térã oñeʼẽrõ guare oimeraẽ ótra persónandi. Tahaʼe haʼeháicha, pe kristiáno siémpre opororrespeta vaʼerã Ñandejára voi oĩrõguáicha upépe. Legálmente Jehová ohendu voi entéro mbaʼe jaʼéva ha mbaʼéichapa jaʼe. Péicha jahecha iñimportantetereiha jarrespeta umi ndahaʼéivape Testígo.

17. ¿Mbaʼéichapa ikatu jahechauka jarrespetaha umi ndahaʼéivape Testígo?

¹⁷ ¿Mbaʼéichapa ikatu jahechauka japororrespetaha? Predikasiónpe ikatu jatopa umi persóna saʼi oikuaáva térã ndoikuaaietéva voi la Biblia heʼíva. Péro upe haguére ndajaikomoʼãi ñantendeka umi héntepe ñaneimportanteveha chuguikuéra. Upéva rangue ñanemanduʼa vaʼerã Ñandejára omombaʼetereiha chupekuéra, ha ñapensa vaʼerã umi persóna tuichaveha ñandehegui (Ageo 2:7; Filip. 2:3). Oimérõ oĩ raʼe ñandetrata vaíva umi mbaʼe jagueroviávare, aníkena ñande avei jatrata vai chupekuéra. Por ehémplo, ndajaʼemoʼãi mbaʼeve jahechauka hag̃ua guaʼu ñañeʼẽkuaaitereiha, péro peichahápe jaʼe álgo oapoʼíva pe persónape (1 Ped. 2:23). Jaʼe sapyʼárõ peteĩ mbaʼe ivaíva ha upéi ñambyasy, ensegídakena jajediskulpa. ¿Mbaʼéichapa ikatu jahechauka jarrespetaha umi ñane kompañerokuérape? Ñambaʼapo jejopýkena ha ñañehaʼã jahecha iporãva umi ñane kompañéro de traváho ha ñane patrón rehe (Tito 2:​9, 10). Neonrrádo ha rembaʼapo jejopýramo jepe, ikatu hína naentéroi ndeguerohory, péro reĩ vaʼerã segúro rembovyʼataha Jehovápe (Col. 3:​22, 23).

18. ¿Mbaʼérepa iñimportánte jarrespeta ótrope?

¹⁸ Ko artíkulope jahecha mbaʼe mbaʼérepa iñimportánte jarrespeta ótrope. Por ehémplo, jarrespetáramo umi ñande rogayguápe ñamombaʼe hína Jehovápe, pórke haʼe rupivénte oexisti entéro umi família. Avei jarrespetáramo umi ermáno ha ermána ñane kongregasionpeguápe, ñamombaʼe ñande Ru yvagapeguápe. Jarrespetáramo avei umi ndahaʼéivape Testígo, ikatu hína ñaipytyvõ chupekuéra ombotuicha hag̃ua Jehovápe algún día. Jahecha kuri avei oĩramo jepe algúno nañanderrespetáiva, ñande lomímonte ñamombaʼe vaʼerãha chupekuéra. Péicha Jehová ñanevendesíta pórke haʼe voi opromete ñandéve: “Amombaʼéta umi chemombaʼévape” (1 Sam. 2:30).