Jasegíkena Jehová ehémplo ha ñaneumílde

1. Jehová iñumildeterei, ¿mbaʼérepa jahecharamoite upéva hese?

ÑAPENSAMÍNA umi hénte orekóvare podér ko múndope, ¿iñumíldepa hikuái? Provávlemente nahániri. Péro ñapensamína Jehová rehe, haʼe ningo Ñandejára Todopoderóso péro haʼe iñumílde (Sal. 113:​5-8). Entéro mbaʼe Jehová ojapóvape ojekuaa iñumildeha, pe orgúllo mombyry voi oĩ chugui. Ko artíkulope jahecháta mbaʼéichapa Jehová ohechauka 4 hendáicha iñumildetereiha, avei jahecháta mbaʼéichapa Jesús osegi Itúa ehémplo ha iñumílde. Jastudiávo koʼã mbaʼe ñañemoag̃uivéta Jehová rehe ha la ñaaprendéva ñanemomýita ñaneumildeve hag̃ua.

NDAHASYIETE ÑAÑEMOAG̃UI HAG̃UA JEHOVÁRE

2. ¿Mbaʼépa ohechauka ñandéve Salmo 62:8? (Ehecha pe taʼanga).

² Normálmente ndaikatúi voi ni ñañemoag̃ui ñañeʼẽ hag̃ua umi hénte oñemombaʼeguasúvandi. Haʼekuéra ojekreeterei rupi naiñamávlei jepi ha upévare la hénte noñanimái oñemoag̃ui hesekuéra, térã oñemomombyry voi chuguikuéra. ¡Ajépa idiferentete Jehová! Ñande Ru yvagapegua iñumildeterei rupi ombohapepa voi ñandéve ikatu hag̃uáicha ñañemboʼe chupe ha ñamombeʼu entéro mbaʼe ñapensáva ha ñañandúva (elee Salmo 62:8). Peteĩ túa oporohayhúva ohenduse voi ifamíliape omombeʼu jave mbaʼépa oipyʼapy chupekuéra. Péicha avei Jehová ohenduseterei isiervokuéra oñemboʼe jave chupe, upévare voi oñenkarga opyta hag̃ua la Bíbliape unos kuánto isiervokuéra yma guare ñemboʼe. Upéva ohechauka Jehová oipotaha ñañemoag̃ui hese ha ñañemboʼe chupe (Jos. 10:​12-14; 1 Sam. 1:​10-18). Péro sapyʼánte ikatu ñañandu nañamereseiha voi Jehová ohendu ñane ñemboʼe. ¿Mbaʼépa ikatu ñanepytyvõ péicha jave?

3. ¿Mbaʼérepa ikatu reĩ segúro Jehová oipotaha eñemboʼe meme chupe?

³ Ñañandúramo jepe nañamereseiha Jehová ñanderayhu, lomímonte ikatu ñañemboʼe chupe. Ñaĩ hag̃ua segúro upévagui, ñanemanduʼamína peteĩ istória Jesús omombeʼu vaʼekuére. Jesús okompara vaʼekue Jehovápe peteĩ Túa oporohayhúvare orekóva peteĩ itaʼýra ofalla vaʼekue. Upéi pe taʼýra oñarrepenti vaʼekue, péro oñandu nomereseiha ojeasepta jey chupe ihentekuéra apytépe. ¿Mbaʼépa ojapo vaʼekue pe túa ohechárõ guare itaʼýra ou jeyha hógape? Jesús heʼi pe túa ohecha hague mombyry guive ouha itaʼýra, ha upepete osẽ hague “odipara hendápe, hatã oañuã itaʼýrape ha ohetũ chupe” (Luc. 15:​17-20). Jehová ningo ojogua upe túape. Ikatu oime ñañemboʼe chupe ñañekevrantaiterei rupi, térã ñañeñandu vai rupi jajapo haguére álgo noĩporãiva. Péicha jave Jehová ohendúre ñañemboʼeha chupe, ojapysaka porãma voi ñanderehe pórke haʼe iñumílde (Lam. 3:​19, 20). Jehová ñandeporiahuvereko ha upévare haʼete voi odiparáva ñane rendápe ñanekonsola hag̃ua ha oasegura hag̃ua ñandéve ñanderayhuha (Is. 57:15). ¿Mbaʼéichapa Jehová ojapo upéva koʼág̃arupi? Haʼe ojevale jepi umi ansiánore, ñane hentekuéra oservívare chupe ha avei ñane ermáno ha ermanakuérare (Sant. 5:​14, 15). Jehová ñanepytyvõ oipotaiterei rupi ñañemoag̃ui hese.

4. ¿Mbaʼérepa ifásil vaʼekue la héntepe oñemoag̃ui hag̃ua Jesúsre?

⁴ Jesús osegi Itúa ehémplo. Jesús ojoguaiterei Itúape, upévare haʼe iñumílde. Oĩrõ guare ko yvy ape ári, la hénte ikatu vaʼekue oñemoag̃ui Jesúsre kyhyjeʼỹme ha naiprovlemaiete vaʼekue hikuái ombaʼeporandu hag̃ua Jesúspe (Mar. 4:​10, 11). Jesús voi ombaʼeporandúmi vaʼekue chupekuéra mbaʼépa opensa peteĩ mbaʼére, ha umi hénte trankiloite heʼi vaʼekue chupe la opensáva (Mat. 16:​13-16). Avei haʼekuéra ojavy sapyʼárõ ndopytái vaʼekue oryrýi osusũ, pórke oikuaa Jesús imbaʼeporã, oporoporiahuvereko ha ipasiensiaha (Mat. 17:​24-27). Jesús ojoguaiterei rupi Itúape, umi isegidorkuéra ou vaʼekue oikuaa porãve Jehovápe (Juan 14:9). Haʼekuéra ohechakuaa vaʼekue Jehová ndojoguaiha ni michĩmi umi líder rrelihióso ipyʼahatãva ha oñemombaʼeguasúvape. Upéva rangue ohechakuaa hikuái Jehová iñumildeha ha ndahasyieteha ñañemoag̃ui hag̃ua hese.

5. ¿Mbaʼérepa ifásilta ótrope oñemoag̃ui hag̃ua ñanderehe ñaneumílderamo?

⁵ ¿Mbaʼéichapa ñande ikatu jasegi Jehová ehémplo? Ñaneumílderamo ifasilvéta umi ótrope oñemoag̃ui hag̃ua oñeʼẽ ñanendive. ¿Mbaʼérepa jaʼe upéva? Pórke ñaneumílderamo ndajaikomoʼãi ñaenvidia ótrope, ñañemombaʼeguasu ni ñandepyʼaro. Koʼã mbaʼe ningo omomombyry la héntepe ñandehegui. Péro ñaneumílderamo ñanembaʼeporãta, ñanepasiénsiata ha ñaporoperdonáta. Jarekóramo koʼã kualida umi ermanokuéra oñemoag̃uiséta voi ñanderehe (Col. 3:​12-14). Koʼýte umi ansiáno oñatende vaʼerã oimépa umi ermanokuéra oñeñandu porã hendivekuéra. Péro umi ermanokuéra ojepokuaa hag̃ua oñeʼẽ umi ansiánondi, tekotevẽ ohecha meme chupekuéra. ¿Mbaʼe mbaʼépa ikatu ojapo umi ansiáno upearã? Umi ansiáno oñehaʼãta oho rreunionhápe en persóna, ha ndahaʼemoʼãi oimeraẽ mbaʼérentema opytátava ohecha pe rreunión por videokonferénsia. Avei iposivilida omeʼẽháicha, umi ansiáno osẽta opredika ogahárupi umi ermáno ha ermánandi. Ojapóramo koʼã mbaʼe umi ermáno ojepokuaáta umi ansiánore, ha tekotevẽ jave naiprovlemamoʼãi oñeʼẽ hag̃ua hendivekuéra.

JEHOVÁ NOÑEMOHATÃI HAʼE HEʼÍVAPENTE

6, 7. Emombeʼu umi ehémplo ohechaukáva Jehová noñemohatãi hague haʼe heʼívapente.

⁶ Heta hénte oñemombaʼeguasúva oñemohatã jepi la haʼekuéra heʼívapente ha ikaprichóso, péro Jehová ndahaʼeiete upéicha. Haʼe ningo iñarandueteve oimeraẽvagui ha siémpre oikuaa la oĩ porãvéva, upéicharamo jepe noñemohatãi haʼe heʼívapente. Jahechamína mbaʼéichapa otrata vaʼekue Míriampe haʼéva Moisés ermána. Míriam iñermáno Aarón ndive oñepyrũ vaʼekue oñeʼẽ vai Moisés kóntrape, péro Moisés ningo orrepresenta vaʼekue Jehovápe voi. Upévare oñeʼẽ vaívo Moisésre, Míriam ohechauka vaʼekue ndorrespetaiha Jehovápe. Upéicha rupi Jehová orrenegaiterei Míriam rehe ha upévare osẽmbaite hese lépra. ¿Mbaʼépa oiko upéi? Aarón ojerure oñepytyvõ hag̃ua iñermánape ha Moisés ojerure asy Jehovápe omonguera hag̃ua Míriampe. Ñandejára odesidíma kuri ojagarrapaitetaha lépra Míriampe la ojapo vaʼekuére. ¿Oñemohatãpa raʼe Jehová la odesidi vaʼekuépe? Nahániri pórke haʼe iñumílde, upévare ohendu Moiséspe ha omonguera Míriampe (Núm. 12:​1-15).

⁷ Jahechamína ótro káso ojekuaahápe mbaʼeichaite pevépa Jehová iñumílde. Haʼe ojevale vaʼekue iprofétare oavisa hag̃ua rréi Ezequíaspe omanotaha. Ezequías katu oñepyrũ hasẽ ha ojerure asy Jehovápe omongueramínte hag̃ua chupe. Upémarõ Jehová oiporiahuvereko pe rréipe ha opermiti chupe oikove 15 áño mas (2 Rey. 20:​1, 5, 6). Péicha jahecha mbaʼeichaitépa Jehová iñumílde, upévare haʼe ñanentende ha sapyʼánte ikatu voi okambia la odesidi vaʼekue.

8. ¿Mbaʼérepa jaʼekuaa Jesús osegiha Itúa ehémplo? (Marcos 3:​1-6).

⁸ Jesús osegi Itúa ehémplo. Jesús oĩrõ guare ko yvy ape ári noñemohatãi vaʼekue peteĩ mbaʼépente ha oipytyvõ vaʼekue la héntepe ikatúma guive. Por ehémplo haʼe omonguera vaʼekue la héntepe sábadope umi líder rrelihióso oñemoĩ mbaretéramo jepe ikóntrape (elee Marcos 3:​1-6). Koʼag̃aite peve Jesús osegi Jehová ehémplo ha ojekuaa upéva ogia lájare kongregasiónpe ñane tiémpope. Por ehémplo kongregasiónpe oĩ jave opeka vaíva, haʼe ipasiénsia upe persónare ha omeʼẽ voi chupe heta oportunida okambia hag̃ua (Apoc. 2:​2-5).

9. ¿Mbaʼéichapa jahechaukáta jasegiha Jehová ehémplo? (Ehecha pe taʼanga).

⁹ ¿Mbaʼéichapa ñande ikatu jasegi Jehová ehémplo? Jehová noñemohatãi peteĩ mbaʼépente ha naiñexihéntei, ha ñande ñañehaʼã vaʼerã jasegi iñehémplo umi mbaʼe ñapensáva ha jajapóvape (Sant. 3:17). Por ehémplo umi túa osegíva Jehová ehémplo ndoikói iñexihenteterei, ha nohaʼarõi ifamília ojapo umi mbaʼe ndaikatúiva ojapo. Jacob ningo haʼe vaʼekue peteĩ ehémplo upévape. Génesis 33:​12-14-pe jahecha haʼe opensa hague ifamiliakuéra mimíre odesidi mboyve peteĩ mbaʼe. Umi túa iñumílde ha naiñexihénteiva oñehaʼã pono okompara ifamíliape ojuehe. Umi ansiáno avei tekotevẽ ohechauka noñemohatãiha haʼekuéra heʼívapente. Upévare peteĩ ansiáno ndoikomoʼãi oinsisti ojejapo hag̃ua la haʼe heʼíva, upéva rangue haʼe oapojáta la odesidíva la majoría umi ansiáno ndohóima guive la Biblia heʼíva kóntrape (1 Tim. 3:​2, 3). Avei enterovévante ñañehaʼã vaʼerã ñantende la umi ótro opensa lája, jepe ñande nañapensái hína haʼekuéraicha (Rom. 14:1). Upévare enterovéva kongregasiónpe, ñañehaʼãkena jahechauka ‘nañañemohatãiha ñande jaʼévapente’ (Filip. 4:5).

JEHOVÁ IPASIÉNSIA

10. ¿Mbaʼéichapa Jehová ohechaukáma vaʼekue ipasiensiaha?

¹⁰ Oiméne rehechakuaáma raʼe umi oñemombaʼeguasúva ndoikoseiha voi oporohaʼarõ, pórke haʼekuéra naipasiénsiai. Péro ajépa idiferentete Jehová, ndaipóri ningo ótro ipasiensiaitéva haʼéicha. Por ehémplo Noé tiémpope haʼe heʼi kuri ohaʼarõtaha 120 áño ohundi hag̃ua umi hénte añáme (Gén. 6:3). Upéva omeʼẽ tiémpo Noépe omongakuaapa hag̃ua ifamíliape ha upéi oñondivepa ikatu kuri ojapo pe árka. Tiémpo rire Jehová ohechauka vaʼekue ipasiensiaha ohendúvo Abrahánpe. Haʼe ningo oporandu vaʼekue Jehovápe heta mbaʼe ohundítarõ guare Sodoma ha Gomorra. Peteĩ persóna oñemombaʼeguasúva heʼíta kuri Abrahánpe: “¿Ndéiko máva mbaʼe eju hag̃ua ere chéve oĩ vaiha la che adesidímava?”. Péro Jehová ndeʼíri upéicha Abrahánpe, síno haʼe iñumílde ha ipasiénsia hese (Gén. 18:​20-33).

11. Ohechaukaháicha 2 Pedro 3:​9, ¿mbaʼérepa Jehová ipasiénsia koʼág̃a peve?

¹¹ Koʼág̃a avei Jehová ohechauka ipasiensiaha, haʼe ohaʼarõ hína og̃uahẽ pe tiémpo ohunditahápe ko múndo aña. ¿Péro mbaʼére la Jehová ipasiensiaite? “Pórke ndoipotái avave oñehundi, síno oipota enterove oñarrepenti” (elee 2 Pedro 3:9). Péro, ¿reietépa Jehová ohechauka ipasiensiaha? Nahaniriete voi, hetaiterei persónama oikuaa Jehovápe ha oiko iñamígoramo, ha jaipota heta hetave oikuaa chupe. Péro avei Jehová ndoikomoʼãi ohaʼarõ pára siémpre. Ohayhuetereíramo jepe la héntepe, ndohejamoʼãi haʼekuéra siémpre ojapo la ojaposévante, upévare haʼe ohundíta umi hénte añáme (Hab. 2:3).

12. ¿Mbaʼéichapa Jesús osegi Itúa ehémplo?

¹² Jesús osegi Itúa ehémplo. Hetaiterei tiémporema Jesús osegi Itúa ehémplo ha ipasiénsia. Jesús ohecháma mbaʼeichaitépa Satanás omosarambi umi japu ivaietereíva Jehová ha isiervokuéra ifiélva kóntrape (Gén. 3:​4, 5; Job 1:11; Apoc. 12:10). Avei hetáma Jesús ohecha umi hénte ohasaha umi mbaʼe ndevaipa jepéva. Ñañeimahinamíntena mbaʼeichaitépa oiméne haʼe ohundiséma “pe Diablo rembiapokue” (1 Juan 3:8). Péro haʼe ohaʼarõnte Jehová heʼi peve chupe og̃uahẽmaha pe tiémpo ohundi hag̃ua umi mbaʼe pe Diablo ojapo vaʼekue. ¿Mbaʼépa oipytyvõ Jesúspe osegi hag̃ua ipasiénsia? Primeroite voi haʼe iñumílde ha orrekonose Jehová kárgope oĩha odesidi arakaʼépa oúta pe fin (Hech. 1:7).

13. ¿Mbaʼéicha javépa Jesús ohechauka vaʼekue ipasiensiaha ijapostolkuérare ha mbaʼérepa?

¹³ Jesús oĩrõ guare ko yvy ape ári ipasiénsia vaʼekue ijapostolkuérare. Por ehémplo haʼekuéra heta vése oiko vai vaʼekue ohechaukaségui mávapa la iñimportantevéva ijapytepekuéra. Péro Jesús nopensái vaʼekue ijapostolkuéra naipohãveimaha, síno osegi vaʼekue ipasiénsia hesekuéra (Luc. 9:46; 22:​24-27). Jesús ndodudái vaʼekue ijapostolkuéra kon el tiémpo okambiáta hague tekotevẽhápe. Ha ñande kásope, ¿jajavýmapa raʼe heta vése la mísma kósape? Oimérõ upéicha, ajépa javyʼaite ha jaagradese jareko haguére peteĩ Rréi iñumílde ha ipasiensiaitéva.

14. ¿Mbaʼéichapa ikatu ñanepasiensiave?

¹⁴ ¿Mbaʼéichapa ñande ikatu jasegi Jehová ehémplo? Ñañehaʼãramo “ñapensa Cristo opensaháicha”, jajoguavéta Ñandejárape umi mbaʼe jajapóva ha ñapensávape (1 Cor. 2:16). ¿Mbaʼépa ñanepytyvõta ñapensa hag̃ua Cristo opensaháicha? Upearã iñimportanteterei jalee la Bíbliape umi lívro omombeʼúva Jesús rekovekue. Upéi ñañemotiémpo vaʼerã jajepyʼamongeta hag̃ua umi mbaʼe Jesús ojapo vaʼekuére ha mbaʼérepa ojapo vaʼekue umíva. Aníkena avei ñanderesarái ñañemboʼe hag̃ua Jehovápe ha jajerure chupe tañanepytyvõ jasegi hag̃ua Jesús ehémplo, péicha ñaneumílde ha ñanepasiénsia hag̃ua haʼéicha. Amáske ñapensa Cristo opensaháicha, jasegi porãvéta Ñandejára ehémplo ha ñanepasiensiavéta ñandejehe ha ñane ermanokuérare (Mat. 18:​26-30, 35).

JEHOVÁ OMOMBAʼE UMI IÑUMÍLDEVAPE

15. Emombeʼu unos kuánto ehémplo ohechaukáva Jehová omombaʼeha umi hénte iñumíldevape (Salmo 138:6).

¹⁵ (Elee Salmo 138:6). Ñapensamíntena, Jehová ningo Ñandejára ogovernáva opa mbaʼe ko univérsope, upéicharõ jepe haʼe oreko enkuénta umi iñumíldevape. Ymaite guive oĩ umi persóna iñumíldeva ha ótrope g̃uarã ndahaʼéiva mbaʼeve, péro Jehová omombaʼe chupekuéra. Jahechamína unos kuánto ehémplo. Algúnope ikatu hína ndajaikuaaporãi, péro Jehová oñenkarga oñemensiona hag̃ua chupekuéra la Bíbliape. Por ehémplo Débora ombaʼapo vaʼekue 125 áñorupi Isaac ha Jacob famíliape g̃uarã. Oĩ heta mbaʼe ndajaikuaáiva ko kuñakarai ifiélvagui, péro Jehová ojasegura Moisés oskrivi hag̃ua iñeʼẽme peteĩ detalleʼi ohechaukáva ojehayhueterei hague Déborape (Gén. 24:59; 35:8). Hetaiterei tiémpo upe rire, Jehová oiporavo vaʼekue peteĩ mitãkariaʼy okuidávape ovecháre oiko hag̃ua chugui rréi de Israel, upe mitãkariaʼy ningo David (2 Sam. 22:​1, 36). Jesús onase riremi, Ñandejára omondo vaʼekue peteĩ ánhelpe oavisa hag̃ua unos kuánto pastórpe onaséma hague Belénpe pe Mesías oñepromete vaʼekue. Upéicha rupi umi pastór raẽvete oikuaa vaʼekue pe notísia porãite. ¡Ajépa tuichaite mbaʼe la Jehová ojapóva hesehapekuéra! (Luc. 2:​8-11). Ha José ha María oguerahárõ guare Jesúspe pe témplope, Jehová oheja Simeón ha Ana ohecha Jesúspe. Haʼekuéra ijedáma kuri upérõ guare, péro Jehová omeʼẽ chupekuéra pe priviléhio porãite (Luc. 2:​25-30, 36-38). Jahechaháicha, “Jehová oĩramo jepe yvatete, oreko enkuénta pe iñumíldevape”.

16. ¿Mbaʼéichapa Jesús osegi Itúa ehémplo?

¹⁶ Jesús osegi Itúa ehémplo. Jesús omombaʼe vaʼekue umi hénte iñumíldevape, haʼe oñeʼẽ vaʼekue pe Rréinore ha Ñandejárare umi persóna ‘ilápi mbykýva ha avave nomombaʼéivape’ (Hech. 4:13; Mat. 11:25). Avei Jesús omonguera vaʼekue umi héntepe ha ojapokuévo upéva ojasegura umi hénte oñandu hag̃ua ojehayhuha ha ojerrespetaha chupekuéra (Luc. 5:13). Pe pyhare omano mboyve katu Jesús ojohéi ijapostolkuérape ipy, hiʼarive upéva peteĩ traváho ojapóva normálmente umi sirvientekuéra añoite (Juan 13:5). Ha oho mboyve yvágape Jesús omeʼẽ vaʼekue peteĩ traváho iñimportantetereíva enterove isegidorkuérape, ha upépe jaikéma ñande avei. ¿Mbaʼépa la onkarga vaʼekue ñandéve? Ñaipytyvõ ñande rapichápe ikatu hag̃uáicha oikove pára siémpre. ¡Ajépa tuichaite mbaʼe upe traváho! (Mat. 28:​19, 20).

17. ¿Mbaʼéichapa ikatu jahechauka ñamombaʼeha ótrope? (Ehecha pe taʼanga).

¹⁷ ¿Mbaʼéichapa ñande ikatu jasegi Jehová ehémplo? Jahechauka ñamombaʼeha umi héntepe ñamombeʼúvo umi notísia porã enterovépe, ha ndajaikói ñamaña moõguápa hína pe persóna, ipire kolór, ijestúdio porãpa térãpa nahániri. ¿Ha mbaʼéichapa ikatu jahechauka ñamombaʼeha ñane ermáno ha ermanakuérape? Upearã siémpre ñapensa vaʼerã haʼekuéra iñimportanteveha ñandehegui, oimérõ jepe ñandevale peteĩ mbaʼépe térã jareko peteĩ rresponsavilida Jehová organisasiónpe haʼekuéra ndoguerekóiva (Filip. 2:3). Jehová ovyʼaiterei ohecha jave ñaneumildeha ha ‘púntape ñamombaʼeha ñande rapichápe’ heta hendáicha (Rom. 12:10; Sof. 3:12).

18. ¿Mbaʼérepa eñehaʼãse neumildeve Jehová iñumildeháicha?

¹⁸ Ñande ñañehaʼãmbaite jasegi ñande Ru yvagapegua ehémplo ha ñaneumílde. Jajapo rupi upéva ifasilve umi ótrope oñemoag̃ui hag̃ua ñanderehe, ndajaikói ñañemohatã ñande jaʼévapente ha ñanepasiensiave. Avei ñamombaʼe enterovépe Jehová ojapoháicha. Amáske ñañehaʼã ñaneumílde Jehová iñumildeháicha, haʼe ñanderayhuvétantema (Is. 43:4).