Umi ijedáva ideprovechoiterei kongregasiónpe
“Apensávo umi mbaʼe ahasa vaʼekuére, ni che naimoʼãi hetaite mbaʼe ajapo hague yma chemitãvépe. Koʼág̃a katu cheedáma, ha ndaikatuvéima ajapo heta mbaʼe ymave guaréicha” (Connie, orekóva 83 áño).
Ikatu oime nde avei ndeedave rupi ndaikatuvéima rejapo heta mbaʼe ymave guaréicha. Reservíramo jepe Jehovápe nde pyʼaite guive heta áñore, ikatu hína reñedesanima pórke vaicha ndéve saʼietereíma rekaʼapi koʼág̃arupi. Sapyʼánte ikatu hína rekomparase la koʼág̃a rejapóva, umi mbaʼe ymave rejapo vaʼekuére. Oimérõ upéicha, ¿mbaʼépa ikatu nepytyvõ resegi hag̃ua revyʼa?
¿MBAʼÉPA JEHOVÁ OIPOTA REJAPO?
Eñeporandumína: “¿Mbaʼépa Jehová oipota ajapo?”. Deuteronomio 6:5 heʼi: “Rehayhu vaʼerã Jehová nde Járape nde pyʼaite guive, nde rekove kompletoite reheve, ha ne mbaretekue omeʼẽmíva reheve”. Ko téxto heʼíva ikatu tuicha nembopyʼaguapy. ¿Mbaʼérepa?
Ko versíkulo ohechauka Jehová oipotaha emeʼẽ chupe pe iporãvéva ne situasión opermitiha peve ndéve. Upévare natekotevẽi reñekompara ótrore, ni rekompara pe rejapóva koʼág̃a umi mbaʼe rejapo vaʼekuére yma nemitãvépe.
Epensamína ko mbaʼére: Yma nemitãvépe, ¿mbaʼépa remeʼẽ vaʼekue Jehovápe? Katuete oiméne remeʼẽ raʼe chupe pe iporãnguete ne situasión opermitiháicha ndéve upérõ. ¿Péro mbaʼépa koʼág̃a remeʼẽ Jehovápe? Nde resegi hína remeʼẽ Jehovápe pe iporãnguete ne situasión opermitiháicha ndéve koʼág̃a. Rekalkula porãramo, rehechakuaáta koʼág̃a resegiha emeʼẽ Jehovápe la emeʼẽ vaʼekue chupe anteve: Pe iporãnguete.
Nemitãme remeʼẽ vaʼekue Jehovápe iporãnguete, ha koʼág̃a ndeeda rire resegi rejapo upéva
NDE IKATU TUICHAITEREI REIPYTYVÕ ÓTROPE
Ekalkulamína avei ko mbaʼe: Eiko rangue epensaiterei umi mbaʼe ndaikatuvéimavare ejapo, epensa vaʼerã umi oportunida erekóvare reipytyvõ hag̃ua ótrope ndeeda rupi. Ikatu voi rejapo heta mbaʼe yma ndaikatúi vaʼekue rejapo. ¿Mbaʼépa hína umíva?
Ekomparti ne experiénsia ótrondi. Ehechamína mbaʼépa heʼi vaʼekue koʼã Jehová siérvo yma guare:
Rréi David heʼi vaʼekue: “Che chemitã vaʼekue, ha koʼág̃a katu chetujáma, péro núnka ndahecháiva Ñandejára oheja reíramo peteĩ hembiapo porãvape, ni ifamíliape oikórõ ojerure upérupi hoʼumi vaʼerã” (Sal. 37:25).
Josué heʼi vaʼekue: “Koʼág̃a che amano mbotaitéma, ha peẽ peikuaa porã pende pyʼaite guive ha pende rekove kompletoite reheve, entéro umi promésa porãite pende Jára Jehová ojapo vaʼekue umi israelítape oñekumplipaite hague, ni peteĩ ndopytái oñekumpliʼỹre” (Jos. 23:14).
David ha Josué oikuaa la heʼíva, pórke mokõivévante oservíma kuri heta tiémpore Jehovápe ha heta mbaʼéma ohecha ha ohasa hikuái. Ha péichante avei ikatu jaʼe nderehe: Nde ningo rehasáma heta mbaʼe Jehová servísiope, upévare umi mbaʼe eréva ikatu ojegueroviave.
Nde reservíma rupi Jehovápe heta tiémpore, ikatu remombeʼu ótrope umi mbaʼe porã rehupytýva. ¿Nemanduʼápa peteĩ okasión espesiál rehechárõ guare mbaʼéichapa Jehová ovendesi ipuévlope? Oimérõ upéicha, aníkena reguerokirirĩ upéva. Umi ohendúva ne experiénsia tuichaiterei ikyreʼỹta, ha nde avei revyʼáta (Rom. 1:11, 12).
Ikatu avei remokyreʼỹ ótrope rehóramo rreunionhápe en persóna ijáma guive. Reho jave rreunionhápe katuete reipytyvõta ótrope ha nde voi nekyreʼỹvéta. Connie, pe ermána ñamensiona vaʼekue heʼi: “Aha rupi rreunionhápe chembareteve ha nañedesanimái, ¿ha mbaʼéicha voi piko añembyasýta añandúvo mbaʼeichaitépa cherayhu che ermanokuéra aĩ jave Salónpe? Che ameʼẽ jepi rregalíto mimi umi ermánope ahechauka hag̃ua mbaʼeichaitépa amombaʼe chupekuéra. Siémpre añehaʼãmbaite ajapo ikatúva guive Jehová servísiope che ermáno ha ermanakuéra ndive”.
JEHOVÁ OAGRADESETEREI UMI MBAʼE REJAPÓVA HESEHÁPE
La Bíbliape oĩ heta Jehová siérvo ehémplo iporãitereíva. Oĩ vaʼekue umi ndaikatuvéimava ojapo heta mbaʼe iposivilida nomeʼẽi rupi, péro Jehová lomímonte osegi ohayhueterei chupekuéra. Epensamíntena Simeón rehe, peteĩ israelita ijedámava oikove vaʼekue Jesús onasérõ guare. Simeón oho jave pe témplope, provávlemente ohechámi vaʼekue umi kuimbaʼe imitãvéva ojapoha umi traváho iñimportánteva. ¿Mbaʼépa oiméne opensa raʼe Simeón? Haʼe ikatu oime heʼi raʼe: “Chéngo ja chetujáma ha ndaikatuvéima ajapo la ojapóva umi imitãva, upévare saʼíma chedeprovécho Jehovápe”. Péro Jehová nopensái vaʼekue péicha, síno omombaʼeterei Simeónpe pórke ohecha haʼe ‘ihústo ha orrespetaha Ñandejárape’. Upévare opermiti Simeónpe ohecha Jesúspe onase ramóme, ha upéva peteĩ priviléhio tuichaitereíva Jehová omeʼẽva chupe. Hiʼarive ojevale vaʼekue Simeón rehe omeʼẽ hag̃ua peteĩ profesía oñeʼẽva pe Mesías rehe (Luc. 2:25-35). Péicha jahecha Jehová noñekonsentrái hague umi mbaʼe Simeón ndaikatuvéimavare ojapo. Upéva rangue, Jehová ohecha mbaʼeichaitépa Simeón ojerovia mbarete ha “Ñandejára espíritu sánto ogia chupe”.
Jehová omeʼẽ vaʼekue Simeónpe pe priviléhio ohechávo Jesúspe onase ramóme, ha avei oprofetisa hag̃ua haʼetaha pe Mesías
Nde avei ikatu reime segúro Jehová nemombaʼetereiha, ndaikatúiramo jepe rejapo entéro umi mbaʼe rejaposéva. ¿Mbaʼérepa? “Pórke haʼe ohaʼarõ peteĩ persóna omeʼẽ pe ikatúva, ndahaʼéi pe ikatuʼỹva” (2 Cor. 8:12).
Upévare, epensákena pe ikatúvare ejapo. Por ehémplo, ¿mbaʼéicha javépa ikatu sapyʼami jepe repredika? ¿Ikatúpa remokyreʼỹ ótrope rehenóivo chupe por teléfono, térã reskrivívo peteĩ kárta? Koʼã mbaʼe haʼete michĩetereíva, péro ikatu ojapo porãiterei ne ermanokuérare. Koʼýte ovaloráta hikuái la rejapóva hesehapekuéra, pórke nde reservíma Jehovápe hetaiterei tiémpore.
Ndaikatúiramo jepe ejapo heta mbaʼe ndeeda rupi, lomímonte ikatu emeʼẽ Jehovápe iporãnguete ha evyʼa epredika jave. Por ehémplo pe rrekuádro héravape “Ojesalva peteĩ persónape”, retopáta peteĩ ermána Africapegua experiénsia.
Nde heta tiémporema rejerovia ha ndefiél Jehovápe, ha upéva ikatu omokyreʼỹ ótrope. Nde ningo peteĩ ehémplo porã pórke resegi reaguanta. Aníkena nderesarái: “Ñandejára ningo ihústo hína ha ndahesaraimoʼãi umi mbaʼe rejapo vaʼekuégui ha mbaʼéichapa rehayhu héra. Peẽ pehechauka koʼã mbaʼe pesegívo peservi umi ermánope, yma guive koʼág̃a peve” (Heb. 6:10).
ESEGÍKENA EIPYTYVÕ ÓTROPE IKATUMIHÁICHA
Umi estúdio médiko ojejapóva ohechauka heta kuimbaʼe ha kuña ijedáva osegíramo oipytyvõ hapichápe hesãiveha, oiko porãveha la iñakã, ha oiko pukuveha.
Jaikuaa ningo ñaipytyvõ haguérente ótrope ndopamoʼãiha umi provléma jarekóva ñandeeda káusare. Ñandejára Reino añoite osolusionaitéta upéva, pórke oipeʼáta pe pekádo, ha añetehápe pe pekádo káusare la ñandeeda ha ñamano (Rom. 5:12).
Upéicharõ jepe, rejapóramo la Jehová heʼíva ha reipytyvõ ótrope oikuaa hag̃ua chupe, péva omombaretéta ne esperánsa ha ikatu voi neresãive. Nde ningo haʼe hína ore ermáno ha ore ermána rohayhuetéva. Nemanduʼákena, Jehovápe g̃uarã tuichaiterei mbaʼe la rejapóva iservísiope. Avei pe kongregasión omombaʼeterei pe ehémplo porãite remoĩva rejerovia mbarete rupi.