¿Nemanduʼápa koʼã mbaʼére?
¿Releépa raʼe umi rrevísta Ñemañaha osẽ vaʼekue ko áñope? Ehechamína ikatúpa nemanduʼa koʼã mbaʼére:
¿Mbaʼépa ñanemomýi ñamombaʼeguasu hag̃ua Jehovápe?
Ñamombaʼeguasu Jehovápe jarrespeta ha jahayhu rupi chupe ñande pyʼaite guive. Avei ñamombaʼeguasu Jehovápe jaipotaitereígui umi hénte oikuaa porã chupe (w25.01, páh. 3).
Oĩramo ojapóva álgo ñanemoñeñandu vaíva, ¿mbaʼépa ñanepytyvõta ñaperdonakuaa hag̃ua?
Jareko vaʼerã enkuénta umi mbaʼe ñañandúva. Ñañehaʼã vaʼerã pono jasegi ñandepochy ha ñandepyʼaro, péicha ndajaikomoʼãi ñañamarga la oiko vaʼekuére (w25.02, páh. 15, 16).
¿Mbaʼérepa jaʼekuaa pe disípulo Marcos oheja hague ehémplo porã umi mitãrusúpe?
Marcos vyʼápe oasepta vaʼekue peteĩ asignasión. Oñepresentárõ guare peteĩ situasión ijetuʼúva, oiméne haʼe oñedesanima ha oñeñandu vai péro noñentregái. Marcos ojeheʼa vaʼekue Páblore ha ótro kristiáno ijerovia mbaretévare (w25.04, páh. 27).
Jesús heʼi vaʼekue iñemboʼépe Itúape: “Che aikuaauka chupekuéra nde réra”, ¿mbaʼépa heʼise vaʼekue upérõ? (Juan 17:26).
Jesús disipulokuéra oikuaa vaʼekue Ñandejára réra. Péro Jesús oipytyvõ chupekuéra oikuaa porãve hag̃ua Jehovápe, por ehémplo oikuaa hag̃ua ivolunta, umi mbaʼe ojapóva ha umi kualida orekóva (w25.05, páh. 20, 21).
¿Mbaʼépa ñarrekonoséta ñaneumílderamo?
Ñarrekonoséta oĩha unas kuánta kósa ndajaikuaáiva. Por ehémplo ndajaikuaái arakaʼépa oñehundíta ko múndo aña ha mbaʼépa Jehová ikatu ojapo upe tiémpope. Ndajaikuaái avei mbaʼépa oikóta koʼẽrõ ha mbaʼeichaite pevépa Jehová ñandekuaa (w25.06, páh. 15-18).
¿Mbaʼéichapa ikatu ideprovécho ñandéve peteĩ artíkulo térã peteĩ diskúrso púvliko?
Ikatu ñañeporandu: “¿Mbaʼe pruévapa oñemensiona ikatúva okonvense la héntepe siertoha upe enseñánsa bíblica? ¿Oñemombeʼúpa peteĩ ehémplo ikatúva aipuru amboʼe jave ótrope? ¿Mávapepa ikatu ointeresa ko téma?” (w25.07, páh. 19).
Ohechaukaháicha David káso, ¿mbaʼépa Jehová ojapo ñañarrepentíramo?
David opeka vai vaʼekue, péro upéi oñarrepenti ipyʼaite guive ha Jehová operdona chupe (1 Rey. 9:4, 5). Ñandejára ñaneperdona rire ndoikovéima ohekýi ñandéve la jajapo vaʼekue ni ndoipurumoʼãi upéva ñane kóntrape amo gotyove (w25.08, páh. 17).
¿Mbaʼépa ikatu jajapo oimérõ ijetuʼu ñane estudiántepe ontende hag̃ua peteĩ téma?
Ikatu jahechaukáma raʼe pe estudiántepe mbaʼépa heʼi la Biblia peteĩ témare, péro lomímonte ijetuʼu chupe ontende hag̃ua. Oimérõ upéicha ikuentavénte jasegírõ la estúdio ha upe rire ae ñañeʼẽ jey upe témare (w25.09, páh. 24).
La Biblia heʼi ‘pe pekádo ñanembotavyha’, ¿mbaʼépa heʼise upéva? (Heb. 3:13).
Ñanase rupi pekadór ñandestira umi mbaʼe vai. Péro avei pe pekádo oporombotavykuaa rupi ikatu jasegi jaduda Jehová ñanderayhuha (w25.10, páh. 16).
¿Mbaʼe mbaʼépa ikatu jajapo ñane ñemboʼe ñanemoag̃uive hag̃ua Jehováre?
1) Ñapensa meme Jehová kualida porãitére. 2) Ikatu ñapensa mbaʼeichagua provlémapa ñambohovái hína koʼág̃a ha ñamensiona upéva, por ehémplo tekotevẽrõ ñaperdona álgienpe. 3) Aníkena apúropente ñañemboʼe. Ñañemboʼe pukuvéramo ifasilvéta ñandéve ñamombeʼu hag̃ua Jehovápe la ñañandúva ha ñapensáva (w25.10, páh. 19, 20).
¿Mbaʼépa ikatu jajapo umi ijedáva rehehápe?
Ikatu javisita ha ñahenói umi ermáno ha ermána ijedávape. Avei ikatu ñamoirũ chupekuéra oho jave doktórpe ha japredika hendivekuéra diferénte hendáicha (w25.11, páh. 6, 7).
¿Mbaʼéichapa ikatu ojejapo hendápe porã peteĩ kasamiénto?
Umi omendátava tekotevẽ okumpli umi goviérno ojeruréva, ha ojasegura vaʼerã hikuái pe kasamiéntope tojehecha umi kualida porã oúva Ñandejára espíritu sántogui. Umi nóvio oñemonde lájare ojekuaa vaʼerã opororrespetaha ha oñatende vaʼerã ani ikasamiéntope ojesegi umi kostúmbre ohóva la Biblia kóntrape. Avei oñeorganisa aja pe kasamiénto oñemongeta porã vaʼerã hikuái (w25.12, páh. 21-24).