Jasegíkena ‘jahechakuaa ñaikotevẽha Ñandejárare’

1. ¿Mbaʼe mbaʼépa hína umi mbaʼe ñaikotevẽva? (Mateo 5:3).

JEHOVÁ ñandeapo rupi oikuaa porã mbaʼépa oikotevẽ entéro persóna. Por ehémplo ñande ñaikotevẽ tembiʼu, ao ha peteĩ lugár isegúrova jaiko hag̃ua. Ha sapyʼamínte jepe ofaltáramo ñandéve koʼã mbaʼe, jaiko asyetereíta. Péro Jehová haʼe rupi ñande Apohare oikuaa ndahaʼeiha koʼã mbaʼénte la ñaikotevẽva. Ñande ñaikotevẽ avei hese. Upévare tekotevẽ jaikuaa chupe ha jaheja siémpre haʼe ñandegia (elee Mateo 5:3). Javyʼa añete hag̃ua jahechakuaa vaʼerã ñaikotevẽha Ñandejárare ha jasegi ñañemoag̃ui hese.

2. ¿Mbaʼépa heʼise ‘jahechakuaaha ñaikotevẽha Ñandejárare’? Emombeʼu peteĩ ehémplo.

² ¿Mbaʼépa heʼise peteĩ persóna ‘ohechakuaaha oikotevẽha Ñandejárare’? Ñantende hag̃ua upéva jahechamína mbaʼépa heʼise upe fráse griégope. Upe idiómape ojepuru upe fráse oñeñeʼẽ hag̃ua peteĩ persóna imboriahuetereívare ha ojerure asýva ajúda. Ñañeimahinamína peichagua persóna situasión. Ijao ningo ivaipáma ha ndorekói mbaʼeve guasu hoʼu vaʼerã. Oiko pe kállere ha ohasa asyeterei anga ára hakúpe térã hoʼysãiterei jave, ha ipínta vai rupi umi hénte omboyke chupe. Upévare pe persóna ikaneʼõma ha ndovyʼái, haʼe oikuaa porã oikotevẽha ajúda osegi hag̃ua oikove ha imbarete jey hag̃ua. Upéicha avei, umi ohechakuaáva oikotevẽha Ñandejárare oikuaa la isituasión ivaiha ha orrekonose oikotevẽha Ñandejára ajúda. Upévare koʼãichagua persóna oaprovechase umi mbaʼe porãita Ñandejára omeʼẽva umi ohayhúvape chupe.

3. ¿Mbaʼépa jahecháta ko artíkulope?

³ Ko artíkulope primeroite jahecháta pe kuñakarai Feniciagua ehémplo. Haʼe ningo ojerure asýrõ guare ajúda Jesúspe ohechauka vaʼekue orekoha 3 kósa iporãitereíva: Iñumílde, noñentregái ha ojeroviaiterei. Upévare jahecháta mbaʼéichapa ikatu jasegi iñehémplo jaipotáramo Jehová siémpre ñandegia. Upéi ñaanalisáta pe ehémplo porã oheja vaʼekue mbohapy kuimbaʼe ohechakuaa vaʼekue oikotevẽha Ñandejárare. Umíva hína apóstol Pedro, Pablo ha rréi David.

¿MBAʼÉPA ÑAAPRENDE PE KUÑAKARAI FENICIAGUÁGUI?

4. ¿Mbaʼépa ojerure vaʼekue Jesúspe peteĩ kuñakarai Feniciagua?

⁴ Peteĩ kuñakarai Feniciagua oreko vaʼekue imembykuña ‘osufrietereíva anga pórke oñendemonia’. Upévare pe kuñakarai oho Jesús rendápe, oñesũ ha ojerure asy Jesúspe oipytyvõmi hag̃ua chupe (Mat. 15:​21-28). Pe kuñakarai ohechauka vaʼekue pe oiko lájare mbohapy mbaʼe iporãitereíva, ha koʼág̃a jahecháta mbaʼéichapa ikatu jasegi iñehémplo.

5. ¿Mbaʼe iporãvapa ojekuaa pe kuñakarai Feniciaguáre, ha mbaʼépa ojapo Jesús hesehápe? (Ehecha pe taʼanga).

⁵ Pe kuñakarai Feniciagua ohechauka vaʼekue iñumildeha. ¿Mbaʼérepa jaʼe upéva? Pórke haʼe ndaipochýi vaʼekue Jesús okomparárõ guare chupe peteĩ jagua raʼýre. Posívlemente yma umi ndahaʼéiva judío ojepokuaáne raʼe oreko umi jagua raʼy hógape. ¿Mbaʼéichapa nde rerreaksionáne Jesús heʼírõ ndéve upéicha? ¿Ndepochýtapa raʼe ha rehoitéma voi upégui? Pe kuñakarai Feniciagua ndojapói vaʼekue upéva, síno haʼe iñumílde ha avei noñentregái. Upévare osegi vaʼekue ojerure asy Jesúspe oipytyvõ hag̃ua chupe. ¿Mbaʼérepa ojapo upéva? Pórke pe kuñakarai ojerovia Jesús rehe. Upéi Jesús ohechakuaárõ guare mbaʼeichaitépa ojerovia mbarete pe kuñakarai, odesidi oipytyvõtaha chupe. Jesús heʼíma kuri pe kuñakaraípe Ñandejára ombouha chupe ‘oipytyvõ hag̃ua umi Israelguápente’. Upéicharõ jepe haʼe oipytyvõ pe kuñakaraípe ha omonguera imembykuñáme.

6. ¿Mbaʼéichapa ikatu jasegi pe kuñakarai Feniciagua ehémplo?

⁶ ¿Mbaʼépa jajapo vaʼerã jahechakuaárõ ñaikotevẽha Ñandejárare ha jaipotárõ haʼe ñandegia? Jasegi vaʼerã pe kuña Feniciagua ehémplo. Upearã tekotevẽ ñaneumílde, ndovaléi ñañentrega ha jajerovia mbarete vaʼerã. Ñaneumílderamo añoite jasegíta jajerure Ñandejárape tañanepytyvõ ha nañañentregamoʼãi. Avei jajerovia mbarete vaʼerã Jesucrístore, ha ñakonfia vaʼerã umi kuimbaʼe haʼe ojevalévare ñandegia hag̃ua (Mat. 24:​45-47). Jehová ha Itaʼýra ovyʼaiterei ohecha jave ñaneumílde, nañañentregái ha jajerovia mbareteha. Upévare haʼekuéra vyʼápe ñanepytyvõ ha ñandegia (ekompara Santiago 1:​5-7 heʼívare). Jahechamína koʼág̃a mbaʼéichapa Jehová omeʼẽ ñandéve umi mbaʼe ñaikotevẽva javyʼa hag̃ua. Avei jahecháta Pedro, Pablo ha rréi David ehémplo. Upéva ñanepytyvõta jaikuaa hag̃ua mbaʼéichapa jaaprovecha porã vaʼerã umi mbaʼe Jehová omeʼẽva ñandéve.

JASEGÍKENA PEDRO EHÉMPLO HA JASTUDIA MEME ÑANDEJÁRA ÑEʼẼ

7. ¿Mbaʼépa Jesús omanda vaʼekue Pédrope, péro mbaʼépa Pedro voi ojapo vaʼerã kuri? (Hebreos 5:14–6:1).

⁷ Jahechamína apóstol Pedro ehémplo. Haʼe ohechakuaa vaʼekue Jesús haʼeha pe Mesías. Haʼe oikuaa vaʼekue Jehová ojevaleha Jesús rehe oikuaauka hag̃ua ipuévlope umi ‘ñeʼẽ omeʼẽva jeikove opaveʼỹva’ (Juan 6:​66-68). Jesús oho mboyve yvágape heʼi vaʼekue Pédrope: “Emongaru umi che ovecha mimi” (Juan 21:17). Pedro iñeʼẽrendu vaʼekue chupe ha Jehová ojevale voi hese oskrivi hag̃ua mokõi kárta opytáva upéi Ñandejára Ñeʼẽme. Péro Pedro avei tekotevẽ vaʼekue ostudia Ñandejára Ñeʼẽ. Por ehémplo haʼe ohesaʼỹijo vaʼekue umi kárta Pablo oskrivi vaʼekue anteve, ha heʼi voi umívape oĩ hague umi mbaʼe “hasýva ñantende hag̃ua” (2 Ped. 3:​15, 16). Péro Pedro noñentregái ha osegi vaʼekue ostudia umi mbaʼe. Haʼe ojerovia vaʼekue Jehová katuete oipytyvõtaha chupe ontende ha ojapo hag̃ua umi mbaʼe oĩva Pablo kártape, umíva haʼe hína kuri “tembiʼu iñaliméntova” (elee Hebreos 5:​14–6:1).

8. ¿Mbaʼépa ojapo vaʼekue Pedro orresivírõ guare instruksión ipyahúva?

⁸ Pedro osegi vaʼekue umi instruksión Jehová omeʼẽva chupe ha péicha ohechauka ojeroviaha hese. Por ehémplo Pedro oĩrõ guare pe siuda héravape Jope ohecha vaʼekue peteĩ visión. Upérõ peteĩ ánhel heʼi chupe hoʼu hag̃ua umi animál ojeproivíva pe léi Moisés orresivi vaʼekuépe. Upéva omondýita kuri oimeraẽ judíope, upévare primerorã Pedro heʼi voi: “Ni mbaʼevéicharõ che Ruvicha, che arakaʼeve ndaʼúiva mbaʼeve ikyʼa ha ojeproivíva pe léipe”. Péro upéi ojeʼe Pédrope: “Anive ere ikyʼaha umi mbaʼe Ñandejára omopotĩma vaʼekue” (Hech. 10:​9-15). Upéi Pedro ontende la ojeʼéva chupe. ¿Mbaʼéichapa jaikuaa upéva? Haʼe ohecha riremi pe visión, og̃uahẽ hendápe mbohapy kuimbaʼe. Haʼekuéra heʼi Pédrope ipatrón hérava Cornelio ohenoikaha chupe hógape oñeʼẽ hag̃ua hendive. Anteve Pedro ni núnka ndohomoʼãi kuri Cornelio rógape, pórke haʼe ndahaʼéi vaʼekue judío ha umi judío opensa vaʼekue umi hénte ótro tetãygua ikyʼaha (Hech. 10:​28, 29). Pedro ohechakuaa vaʼekue Jehová omeʼẽha hína peteĩ instruksión ipyahúva, ha ensegída voi okambia opensa lája ha iñeʼẽrendu Jehovápe (Prov. 4:18). Pedro opredika vaʼekue Cornelio ha hogayguápe ha ovyʼa ohechávo mbaʼéichapa haʼekuéra ojerovia Jesúsre, orresivi espíritu sánto ha ojevautisa (Hech. 10:​44-48).

9. ¿Mbaʼéichapa ideprovéchota ñandéve jastudiáramo umi mbaʼe hypyʼũvéva?

⁹ Pedro ojapo haguéicha tekotevẽ jastudia meme umi enseñánsa primeroite ñaaprende vaʼekue, umíva ifasilve jepi ha oñekompara kambýre. Péro avei ñañehaʼã vaʼerã igústo hag̃ua ñandéve jastudia umi mbaʼe hypyʼũvéva. Umíva ikatu sapyʼánte ijetuʼuve, ha oñekompara tembiʼu iñaliméntovare. Jaikuaa ningo tekotevẽha ñañemotiémpo ha ñañehaʼãmbaite jastudia porãve hag̃ua Ñandejára Ñeʼẽ, péro ovale la péna. Tuichaiterei ideprovéchota ñandéve jajapóramo upéva. Ñapensamíntena koʼã mokõi mbaʼére. Primeroite voi ñaaprendéta hetave mbaʼe ñanemomýitava jahayhu ha jarrespetave hag̃ua Jehovápe. Ha segundo, ñaaprendévo álgo ipyahúva ñamombeʼusevétantema ótrope mbaʼeichaitépa Ñandejára yvagapegua ndaijojahái (Rom. 11:33; Apoc. 4:11). Pedro ehémplo ñanemboʼe avei ótra kósa. Jarresivi jave peteĩ entendimiénto ipyahúva, ensegída ñakambia vaʼerã la jajapóva ha ñapensa lája. Upéicharõ añoite Jehová osegíta ñandegia ha ojevaléta ñanderehe.

JASEGÍKENA PABLO EHÉMPLO HA ÑAMONDE AÓICHA PE KONDÚKTA PYAHU

10. Ohechaukaháicha Colosenses 3:​8-10, ¿mbaʼépa jajapo vaʼerã ñambovyʼa hag̃ua Jehovápe?

¹⁰ Ñambovyʼa hag̃ua Jehovápe, ñande lájare ojekuaa vaʼerã umi mbaʼe porã ogustáva chupe. Haʼe voi ohechauka ñandéve mbaʼéichapa ikatu jajapo upéva. Apóstol Pablo oskrivi vaʼekue tekotevẽha ‘jaipeʼaite ñandejehegui peteĩ aóicha ñane kondúkta yma guare’, ha ñamonde vaʼerãha ñandejehe peteĩ aóicha “pe kondúkta pyahu” (elee Colosenses 3:​8-10). Tekotevẽ ningo ñañehaʼãmbaite ñakambia hag̃ua ñande lája, ha péicha ñamonde aóicha pe kondúkta pyahu. Jahechamína Pablo ehémplo. Haʼe imitã guive ojapo vaʼekue ikatúva guive ombovyʼa hag̃ua Ñandejárape (Gál. 1:14; Filip. 3:​4, 5). Péro Pablo ndoikuaaporãi vaʼekue mbaʼéichapa Ñandejára oipota ojeadora chupe. Avei haʼe ndoikuaái vaʼekue umi mbaʼe Jesús omboʼéva ha hiʼarive ‘ijorgullóso vaʼekue’. Upéicha rupi Pablo ndorekói vaʼekue pe kondúkta ogustáva Ñandejárape (1 Tim. 1:13).

11. ¿Mbaʼépepa Pablo tekotevẽ vaʼekue okambia? Emyesakã.

¹¹ Apóstol Páblogui oiko mboyve kristiáno ikarákter mbarete ha ipochypa rei vaʼekue. La Biblia omombeʼu voi haʼe ipochyeterei hague Jesús disipulokuérandi ha “oamenasa ojukapataha voi chupekuéra” (Hech. 9:1). Péro oiko rire chugui kristiáno, katuete Pablo oñehaʼãmbaiténe rakaʼe okambia anivéma hag̃ua oiko orrenegaháre (Efes. 4:​22, 31). Upéicharõ jepe peteĩ vuéltape Pablo ojoavy vaʼekue Bernabé ndive, ha upérõ “tuicha oiko vai” hikuái (Hech. 15:​37-39). Upérõ Pablo noñekomportái kuri Ñandejárape ogustaháicha. Péro haʼe noñentregái ha osegi vaʼekue olucha okambia hag̃ua ilája, ikatu hag̃uáicha Jehová oguerohory chupe (1 Cor. 9:27).

12. ¿Mbaʼépa oipytyvõ vaʼekue Páblope osegi hag̃ua okambia?

¹² ¿Mbaʼéicha rupípa Pablo ikatu vaʼekue upéi okambia? Pórke haʼe ndojeroviái vaʼekue ijehénte (Filip. 4:13). Pedro ojapo haguéicha avei, Pablo okonfia vaʼekue Jehová oipytyvõtaha chupe ha omeʼẽtaha chupe “pe fuérsa” okambia hag̃ua (1 Ped. 4:11). Upéicharõ jepe sapyʼánte Pablo oñandu vaʼekue naipohãveimaha. Péro péicha jave haʼe imanduʼa vaʼekue entéro umi mbaʼe Jehová ojapo vaʼekuére hesehápe. Pablo ohechaukase vaʼekue Ñandejárape oagradeseha chupe umi mbaʼére, ha upévare osegi vaʼekue olucha okambia hag̃ua (Rom. 7:​21-25).

13. ¿Mbaʼéichapa ikatu jasegi Pablo ehémplo?

¹³ Oiméramo jepe aréma jaservi hague Jehovápe, lomímonte jasegi vaʼerã Pablo ehémplo. ¿Mbaʼéichapa ikatu jajapo upéva? Upearã jasegi vaʼerã ñakambia tekotevẽhápe ha péicha ñamonde peteĩ aóicha pe kondúkta pyahu. Ñanemanduʼákena jajavytanteha voi. Por ehémplo ikatu sapyʼánte jaju ñandepochyeterei térã jaʼe álgo noĩporãiva, péicha jave ani ñapensa nañanepohãveimaha ha Jehová núnka ndaikatumoʼãiha ñandeguerohory. Upéva rangue jasegíkena jalucha ñakambia hag̃ua umi mbaʼe ñapensáva ha jajapóva (Rom. 12:​1, 2; Efes. 4:24). Péro jarekókena enkuénta ko mbaʼe: Peteĩ ao opyta porã hag̃ua ñanderehe ikatu ñakambiaʼimi, por ehémplo ñamomichĩ térã ñambotuicha. Péro pe kondúkta pyahu tekotevẽva ñamonde peteĩ aóicha ndaikatumoʼãi ñakambia ñande gústope. Ñande hína la ñakambia vaʼerã ikatu hag̃uáicha jajapo umi mbaʼe Ñandejára ohaʼarõva ñandehegui.

JASEGÍKENA DAVID EHÉMPLO HA JAHEJA JEHOVÁ TOÑANGAREKO ÑANDEREHE

14, 15. ¿Mbaʼéichapa koʼág̃a Jehová oprotehe ipuévlope? (Salmo 27:5). (Ehecha pe taʼanga).

¹⁴ Javyʼa añete hag̃ua jaheja vaʼerã Jehová toñangareko ñanderehe. ¿Mbaʼéichapa Jehová ojapo upéva, ha mbaʼépa ikatu ñande jajapo jaheja hag̃ua haʼe ñandeprotehe? Jahechamína upéva.

¹⁵ Rréi David ndodudái vaʼekue Jehová oprotehetaha chupe ijetuʼu jave (elee Salmo 27:5). ¿Péro mbaʼéichapa koʼág̃arupi Jehová oñangareko ipuévlore? Jehová ndohejamoʼãi mbaʼeve ni avave ñanemomombyry chugui pára siémpre. Haʼe oprometéma voi kuri okuidataha pe amista jarekóvare hendive oĩramo jepe umi hénte ñandejokoséva ani hag̃ua jaservi chupe (Sal. 34:7; Is. 54:17). Jaikuaa Satanás, umi demónio ha umi ñandepersegíva ipoderosoitereiha ha ikatuha voi ñamano ikausarekuéra. Péro jaikuaa porã avei Jehová ipoderosoiteveha chuguikuéra, ha ñamanóramo jepe haʼe amo gotyove ikatutaha ñanemoingove jey (1 Cor. 15:​55-57; Apoc. 21:​3, 4). Sapyʼánte ningo ikatu avei ñañekevrantaiterei, péro péicha jave Jehová ñanepytyvõ avei jasegi hag̃ua jaservi chupe (Prov. 12:25; Mat. 6:​27-29). Avei ñande Ru yvagapegua omeʼẽ ñandéve umi ermáno ha ermána ñanemokyreʼỹ ha ñanekonsoláva ijetuʼu jave. Hiʼarive omeʼẽ ñandéve umi ansiáno ñanemboʼéva ha ñanepytyvõva jasegi hag̃ua jajerovia mbarete (Is. 32:​1, 2). Avei ñaimévo oñondivepa rreunionhápe ñaaprendeve mbaʼéichapa ikatu jaheja Jehovápe ñanepytyvõ ha ñandeprotehe (Heb. 10:​24, 25).

16. ¿Mbaʼéichapa Jehová oprotehe vaʼekue Davídpe?

¹⁶ David iñeʼẽrendúrõ guare, Jehová voi oipytyvõ vaʼekue chupe iñarandu ha odesidi porã hag̃ua. Upévare David ikatu vaʼekue oiko vyʼápe, ha upe sentídope la Jehová oprotehe vaʼekue chupe (ekompara Proverbios 5:​1, 2 heʼívare). Péro David naiñeʼẽrendúirõ guare osufri odesidi vai haguére, ha Jehová oheja vaʼekue haʼe ohasa asy umíva káusare (2 Sam. 12:​9, 10). David sapyʼánte osufri vaʼekue avei oĩ rupi otrata vaíva chupe. Upéicha jave David omombeʼupaite Jehovápe la oñandúva ha Jehová okonsola vaʼekue chupe. ¿Mbaʼéichapa ojapo upéva? Jehová oasegura Davídpe ohayhuetereiha chupe ha oñangarekotaha hese (Sal. 23:​1-6).

17. ¿Mbaʼéichapa ikatu jasegi David ehémplo?

¹⁷ Ñande ikatu jasegi David ehémplo jadesidíta jave peteĩ mbaʼe, péicha jave ñañemboʼe vaʼerã Jehovápe ha jaheka ikonsého. Ñarrekonose vaʼerã sapyʼánte ikatuha jahasa asy ñande voi jadesidi vai haguére ha ndahaʼéi Jehová nañandeprotehéi rupi (Gál. 6:​7, 8). Péro sapyʼánte jasufrínte avei ñaneñeʼẽrendúramo jepe Jehovápe. Péicha ijetuʼu jave ñanendive, ñamombeʼúkena Jehovápe entéro mbaʼe ñandepyʼapýva ha jajerure chupe tañanepytyvõ. Haʼe katuete ñanekonsoláta ha ohechaukáta ñanderayhuha (Filip. 4:​6, 7).

JASEGÍKENA JAHEJA JEHOVÁ TAÑANDEGIA

18. ¿Mbaʼe mbaʼépa la hénte opensa koʼág̃arupi, péro mbaʼépa jajapo vaʼerã Jehová ñandegia meme hag̃ua? (Ehecha pe taʼanga).

¹⁸ Pe téxto ko áñope g̃uarã heʼi: “Ovyʼa umi ohechakuaáva oikotevẽha Ñandejárare”. Koʼág̃arupi iñimportantevéntema jajapo la heʼíva pe téxto. ¿Mbaʼérepa? Pórke oĩ hetaiterei hénte norrekonoséiva oikotevẽha Ñandejára ogia chupekuéra. Oĩ avei umi hénte ojeroviáva Ñandejárare, péro haʼekuérante odesidi mbaʼéichapa oadoráta chupe. Ótro katu ojerovia umi hénte ogia porãtaha chupekuéra, péro entéro koʼã persóna ndovyʼái. Upévare ñañatende vaʼerã ani hag̃ua ova ñanderehe la hénte opensa lája. ¿Mbaʼépa ikatu jajapo ani hag̃ua oiko ñanderehe upéva? Upearã jasegi vaʼerã jastudia Ñandejára Ñeʼẽ ha ñamonde peteĩ aóicha pe kondúkta pyahu ogustáva Ñandejárape. Avei tekotevẽ ñaneñeʼẽrendu Jehovápe ha jaheja haʼe ñandeprotehe.