Jehová ikatu nepytyvõ reñedesanima jave

1, 2. ¿Mbaʼéichapa sapyʼánte oñeñandu vaʼekue apóstol Pablo, ha mbaʼérepa jaʼekuaa jajoguaha avei chupe? (Romanos 7:​21-24).

¿MBAʼÉPA ou ndéve ne akãme repensáramo apóstol Pablo rehe? Provávlemente eréta haʼe opredika hague heta lugárpe, oskrivi hague heta lívro ha ivaleterei hague oporomboʼe hag̃ua. Ha legálmente entéro umi mbaʼe siertoite. Péro apóstol Pablo sapyʼánte oñeñandu vai, oñedesanima térã oñekevranta vaʼekue, ha ñande avei koʼág̃arupi ñañeñandu jepi haʼe oñeñandu haguéicha.

² (Elee Romanos 7:​21-24). Pablo oskrivírõ guare ikárta umi rrománope omombeʼu kuri mbaʼéichapa oñeñandu, ha ñande apytépe ikatu hína oĩ heta oñeñandúva haʼéicha. Pablo ifiél vaʼekue ha ipyʼaite guive iñeʼẽrenduse vaʼekue Jehovápe, péro iñimperfékto rupi ndahaʼéi vaʼekue la siémpre ifásilva chupe ojapo Ñandejára oipotáva. Apóstol Pablo oñeñandu vaʼekue kulpávle imanduʼávo umi mbaʼe ojapo vaʼekuére oiko mboyve chugui kristiáno. Avei haʼe oreko vaʼekue peteĩ provléma ndaikatúiva osolusiona, ha upéva oiméne omoñeñandu vai raʼe chupe.

3. ¿Mbaʼépa jahecháta ko artíkulope? (Ehecha pe nóta).

³ Apóstol Pablo sapyʼánte oñeñandu vaíramo jepe ndohejái vaʼekue umi mbaʼe opensáva odomina chupe.a Ko artíkulope ñambohováita koʼã porandu: ¿Mbaʼérepa Pablo heʼi vaʼekue ivaietereiha la isituasión? ¿Mbaʼépa oipytyvõ vaʼekue chupe ogueropuʼaka hag̃ua umi mbaʼe oñandúva? ¿Ha mbaʼépa ñande ikatu jajapo ñañedesanima jave?

¿MBAʼE MBAʼÉREPA PABLO OÑEÑANDU VAI VAʼEKUE?

4. ¿Mbaʼépa sapyʼánte odesanima vaʼekue Páblope?

⁴ Umi mbaʼe vai ojapo vaʼekue yma. Oiko mboyve chugui kristiáno apóstol Pablo ojapo vaʼekue heta mbaʼe ivaietereíva. Por ehémplo chupe g̃uarã oĩ porã vaʼekue la ojejuka Estébanpe, ha haʼe oĩ vaʼekue upépe Esteban omanórõ guare (Hech. 7:58; 8:1). Avei Saulo opersegi mbarete vaʼekue heta kristiánope ha otrata vaieterei kuri chupekuéra (Hech. 8:3; 26:​9-11).

5. ¿Mbaʼéichapa oñeñandu rakaʼe Pablo imanduʼávo umi mbaʼe vai ojapo vaʼekuére?

⁵ Jahecháma haguéicha, apóstol Pablo oñeñandu vai vaʼekue imanduʼávo umi mbaʼe ojapo vaʼekuére yma, ha ohasávo pe tiémpo koʼytevéntema oiméne oñeñandu vaive rakaʼe. ¿Mbaʼérepa jaʼekuaa upéva? Por ehémplo áño 55-pe oskrivírõ guare ikárta umi Corintoguápe heʼi kuri: “Namereséi voi ojeʼe cherehe haʼeha apóstol, pórke yma apersegi vaʼekue Ñandejára kongregasiónpe” (1 Cor. 15:9). Upéi ohasa rire 5 áñorupi oskrivi peteĩ kárta umi Efesoguápe, ha Pablo heʼi vaʼekue chupekuéra: “Che ningo ndaikatúi añembojoja ni umi michĩvévare jepe umi ojeporavo vaʼekue apytépe” (Efes. 3:8). Avei oskrivírõ guare Timotéope, Pablo heʼi vaʼekue ijehe: “Yma che añeʼẽ vai vaʼekue Ñandejárare, apersegi ipuévlope ha cheorgullóso vaʼekue” (1 Tim. 1:13). Epensamíntena ko mbaʼére, Pablo ohórõ guare ovisita umi kongregasiónpe ojotopáne raʼe umi haʼe opersegi vaʼekuéndi, térã umi ermáno hentekuérandi. ¿Ndépa reñeimahina mbaʼéichapa Pablo oñeñandu rakaʼe upérõ?

6. ¿Mbaʼe ótra kósapa avei ombohasa asy vaʼekue Páblope? (Ehecha pe nóta).

⁶ Peteĩ ñuatĩ oikutu rasýva chupe. Apóstol Pablo heʼi vaʼekue oĩ hague peteĩ mbaʼe oreko asyetereíva chupe, ha heʼi upéva ojoguaha peteĩ ñuatĩ oikutu rasývape chupe (2 Cor. 12:7). Ndajaikuaái ningo mbaʼépa pe oreko asyete vaʼekue Páblope pórke haʼe nomombeʼúi kuri. Ikatu oime haʼe raʼe peteĩ mbaʼasy, algún provléma emosionál térã oimeraẽ ótra kósa, péro la heʼi vaʼekuére japilla upe mbaʼe ombosufrieterei hague chupe.b

7. ¿Mbaʼérepa ijetuʼu vaʼekue Páblope ojapo hag̃ua siémpre la oĩ porãva? (Romanos 7:​18, 19).

⁷ Iñimperfeksión. Pablo heta oñehaʼã vaʼekue okambia hag̃ua ilája, péro sapyʼánte ojavy jave oñedesanimaite vaʼekue (elee Romanos 7:​18, 19). Haʼe heʼi vaʼekue ojaposetereiha umi mbaʼe iporãva, péro iñimperfékto rupi ijetuʼueterei chupe. Haʼe orrekonose vaʼekue tódo el tiémpo ogerrea vaʼerãha ojapo hag̃ua la iporãva ha ani hag̃ua ojapo umi mbaʼe vai oitiráva chupe (1 Cor. 9:27). Oiméne Pablo heta orrenega rakaʼe ijehe ohechárõ guare ojapo jeyha umi mbaʼe hetaitéma oñehaʼã vaʼekue okambia.

¿MBAʼÉPA OJAPO VAʼEKUE PABLO OÑEDESANIMÁRÕ GUARE?

8. ¿Mbaʼe mbaʼépa ojapo vaʼekue Pablo ikatu hag̃uáicha omehora?

⁸ Umi kárta Pablo oskrivi vaʼekuépe ojekuaa haʼe ojepyʼamongeta hague la Ñandejára espíritu ikatúvare ojapo. Pablo ohechakuaa vaʼekue mbaʼéichapa Ñandejára espíritu ikatu oipytyvõ umi kristiánope okambia hag̃ua, ha pono ipuʼaka hesekuéra umi deséo vai (Rom. 8:13; Gál. 5:​16, 17). Pyʼỹinte Pablo ohechauka vaʼekue mbaʼe mbaʼépa tekotevẽ umi kristiáno omboyke ikatu hag̃uáicha ombovyʼa Jehovápe (Gál. 5:​19-21, 26). Jahechaháicha Pablo opensa vaʼekue mbaʼépepa tekotevẽ vaʼekue haʼe omehora. Haʼe katuete ohekáne raʼe Ñandejára Ñeʼẽme umi konsého ohechaukáva chupe mbaʼépepa okambia vaʼerã, ha mbaʼéichapa ojapokuaa upéva. Ndajadudái haʼe voi ojapo hague umi mbaʼe heʼíva ótrope ojapo hag̃ua.

9, 10. ¿Mbaʼépa oipytyvõ vaʼekue Páblope oñeñandu vaírõ guare? (Efesios 1:7). (Ehecha pe taʼanga).

⁹ Apóstol Pablo oñeñandu vaíramo jepe sapyʼapyʼánte, lomímonte oĩ vaʼekue heta mbaʼe ombovyʼáva chupe. Por ehémplo haʼe ipyʼarory vaʼekue ohendu jave umi notísia porã oúva umi kongregasión oĩvagui mombyry (2 Cor. 7:​6, 7). Avei ovyʼa vaʼekue oreko haguére amígo ikalidáva (2 Tim. 1:4). Pablo ovyʼaiterei vaʼekue avei oikuaa haguére Jehová oguerohoryha chupe, ha ikatu haguére oservi Ñandejárape “konsiénsia potĩ reheve” (2 Tim. 1:3). Ha oĩrõ guare préso Rómape lomímonte heʼi vaʼekue umi ermáno ha ermánape: “Siémprekena pevyʼa ñande Ruvicha servísiope” (Filip. 4:4). Entéro koʼã mbaʼe ohechauka ñandéve Pablo ndohejái hague oity chupe umi provléma orekóva. Pablo oñepyrũ sapyʼárõ opensa umi mbaʼe ikatúvare odesanima chupe, haʼe ensegídama voi oñehaʼã vaʼekue ojepyʼamongeta umi mbaʼe iporãvare.

¹⁰ ¿Mbaʼe ótra kósapa oipytyvõ vaʼekue Páblope osegi hag̃ua ovyʼa? Haʼe imanduʼa meme vaʼekue Jehová ombou hague Itaʼýrape omano hag̃ua ñanderehehápe, ha opensa upéva haʼe hague peteĩ rregálo chupe g̃uarã voi (Gál. 2:20; elee Efesios 1:7). Upévare Pablo ndodudái vaʼekue Jesús sakrifísio rupive Jehová operdonáma hague chupe ha osegitaha ojapo upéicha (Rom. 7:​24, 25). Entéro koʼã mbaʼe oipytyvõ vaʼekue Páblope vyʼápe osegi hag̃ua oservi Jehovápe (Heb. 9:​12-14).

11. ¿Mbaʼérepa ñanemokyreʼỹ Pablo ehémplo?

¹¹ Ñande avei koʼág̃arupi ikatu ñañeñandu Pablo oñeñandu haguéicha. Avése haʼete ñandéve ku tódo el tiémpo jalucha vaʼerã pono ñapensa, jajapo térã jaʼe álgo ndogustáiva Jehovápe. Sapyʼánte ikatu voi jaʼe avei ñandejehe: “Ivaietépa ko che situasión”. Peteĩ ermána hérava Elizac omombeʼu: “Chekyreʼỹeterei apensa jave Pablo ehémplore, tuicha chekonsola aikuaa haguére ndahaʼeiha chénte la añeñandu vaíva jepi. Péva ohechauka chéve Jehová oikuaa porãha mbaʼe mbaʼépa jahasa ñande isiervokuéra”. Upéicharõ sapyʼánte ikatúnte voi ñañeñandu vai, ¿péro mbaʼépa ikatu jajapo ñanekonsiénsia potĩ hag̃ua ha jasegi hag̃ua javyʼa Pábloicha?

¿MBAʼÉPA ÑANEPYTYVÕTA ÑAÑEÑANDU JAVE YVÝRE?

12. ¿Mbaʼépa jajapo meme vaʼerã javyʼave hag̃ua?

¹² Jajapo memékena umi mbaʼe ñanemoag̃uivétava Jehováre. Katuete ningo ñañeñandu porãve jaʼúramo umi tembiʼu iñaliméntova, jajapo meméramo ehersísio ha káda día japytuʼu porãramo. Upéicha avei ñanekyreʼỹve jaleéramo la Biblia káda día, japredikáramo, jaháramo rreunionhápe ha jajeprepara porãramo ñakomenta hag̃ua upépe. Jajapo meméramo entéro koʼã mbaʼe ndajaikomoʼãi ñapensaiterei umi provlémare, síno jajesarekóta umi mbaʼe iporãvare ha upéva ñanepytyvõta javyʼave hag̃ua (Rom. 12:​11, 12).

13, 14. ¿Mbaʼéichapa oñeñandu umi ermáno ojapo meméva umi mbaʼe omoag̃uíva chupekuéra Jehováre?

¹³ Ñapensamína la ermáno Juan ohasa vaʼekuére. Haʼe orekórõ guare 39 áño ojetopa kuri orekoha kánser. Ñepyrũrã haʼe oñeñandu yvýre ha oñekevrantaiterei, Juan ni ndoroviaséi anga la oikóva hese ha opensa: “Che ningo chemitãiterei gueteri peichaite cherasýma hag̃ua”. Hiʼarive upérõ guare itaʼyraʼi oreko kuri 3 áñonte. ¿Mbaʼépa oipytyvõ vaʼekue Juánpe upérõ guare? Haʼe heʼi: “Chekaneʼõháre aiko vaʼekue, péro lomímonte ndorofaltái vaʼekue rreunionhápe ha rosẽ meme ropredika. Avei káda semána rojapo ore estúdio de família. Ore rojapo koʼã mbaʼe sapyʼánte ijetuʼuetereíramo jepe”. Koʼág̃a Juan imanduʼávo la oiko vaʼekuére heʼi: “Peichagua situasión ijetuʼúva ningo ñepyrũrã ikatu desástre ojapo ñanderehe, péro upépe ensegída jahechakuaa avei Jehová ñanderayhuetereiha ha ñanemombaretetaha. Che aikuaa porã Jehová chepytyvõ haguéicha, peichaite avei oipytyvõtaha enterovépe”.

¹⁴ Eliza, pe ermána anteve ñañeʼẽma vaʼekuére heʼi: “Aha jave rreuniónpe ha avei astudia jave la Biblia, ahechakuaa Jehová cherayhueterei ha cherenduseha. Upéva chepytyvõ avyʼa añete hag̃ua”. Nolan, peteĩ superintendénte de sirkuíto oikóva Áfricape omombeʼu mbaʼépa oipytyvõ chupe ha hembireko héravape Diane. Haʼe heʼi: “Sapyʼánte roñedesanimáramo jepe, lomímonte roñehaʼãmbaite roñemboʼe meme, rostudia la Biblia, roho rreunionhápe ha ropredika. Upéicha rohecha mbaʼéichapa Jehová orepytyvõ rovyʼa hag̃ua. Roñedesanima jave siémpre roñehaʼã oremanduʼa Jehová oĩtaha ore ykére ha orevendesitaha. Ndoroikuaái ningo añete mbaʼéichapa haʼe orepytyvõta, péro roĩ segúro katuete ojapotaha upéva”.

15. ¿Mbaʼe ótra kósapa ikatu rejapo resegíramo eñeñandu vai? Emombeʼu peteĩ ehémplo.

¹⁵ Ikatu oime rejapopáma raʼe umi mbaʼe oñemensiona vaʼekue ha lomímonte esegi eñeñandu vai, péro oĩve hína ótra kósa ikatúva rejapo. Epensamína ko ehémplore: Ñamoĩ chupe ne lómo rasyha hína reikóvo, péicha jave ikatu rejerure peteĩ ne héntepe ndepichymi hag̃ua. Péro lomímonte esegíramo ne lómo rasy, repensáta mbaʼe ótra kósapa ikatu rejapo. Primero reñehaʼãta rehecha mbaʼérepa reñeñandu hína upéicha, ha ikatu voi reho rekonsulta peteĩ doktórpe. Upeichaite avei ñañedesanima jave. Ikatu oime tekotevẽ hína jaheka informasión ñane puvlikasionkuérape ñantende hag̃ua mbaʼérepa ñañeñandu hína upéicha, ha jaikuaa hag̃ua mbaʼépa ikatu ñanepytyvõ ñañeñandu porãve hag̃ua. Avei ikatu reñeʼẽ peteĩ ermáno térã ermána iñakãguapývandi, haʼekuéra ikatu omeʼẽ ndéve peteĩ konsého nepytyvõtava ne situasiónpe. ¿Péro oĩvépa ótra kósa ikatúva rejapo? Si, jahechamína mbaʼépa hína umíva.

16. ¿Mbaʼépa ikatu nepytyvõ reikuaa hag̃ua mbaʼépa la reñandúva hína? (Salmo 139:​1-4, 23, 24).

¹⁶ Jajerure Jehovápe tañanepytyvõ jaikuaa hag̃ua mbaʼépa la ñaikotevẽva. Rréi David ojerure vaʼekue Jehovápe oipytyvõ hag̃ua chupe oikuaa hag̃ua mbaʼépa la okevrantáva hína chupe. David ojapo vaʼekue upéva pórke ndodudái Jehová oikuaa porãitereiha chupe (elee Salmo 139:​1-4, 23, 24). Nde avei ikatu rejerure Jehovápe tanepytyvõ rentende hag̃ua mbaʼérepa reñeñandu hína péicha, ha mbaʼéichapa ikatu regueropuʼaka umíva. Avei ikatu reñeporandu: “¿Mbaʼe rehepa legálmente la ajepyʼapy hína? ¿Oĩpa hína peteĩ mbaʼe siémpre chekevrantáva? ¿Aikópa hína avolea upe mbaʼe che akãme, añehaʼã rangue apensa umi mbaʼe iporãvare?”.

17. ¿Mbaʼeichagua informasiónpa ikatu jaheka jastudiáta jave la Biblia ñaneañoháme? (Ehecha pe taʼanga).

¹⁷ Jaheka umi informasión ñanepytyvõtava ñane situasiónpe. Sapyʼapyʼánte iporãta reanalisáramo peteĩva umi kualida Jehová orekóva, upéva ikatu hína nemokyreʼỹ. Por ehémplo apóstol Pablo opensa meme vaʼekue Jehová ñaneperdonasetereiha ha omeʼẽ hague Itaʼýrape ñanderehehápe, upéva tuicha oipytyvõ vaʼekue chupe. Nde avei ikatu rejapo la apóstol Pablo ojapo vaʼekue ha reheka umi informasión nepytyvõtava. Por ehémplo oĩ hína pe Gía oipurúva testígo de Jehová otopa hag̃ua informasión, térã ótra puvlikasión oĩva ne idiómape. Umíva ikatu nepytyvõ restudia hag̃ua umi téma ohechaukáva mbaʼeichaitépa Jehová oporoporiahuvereko, ñaneperdona ha ñanderayhueterei. Upéi retopa rire umi informasión ikatúva nepytyvõ, remoĩkuaa umíva peteĩ lístape. Upe lísta iporãta ehejáramo peteĩ lugár ikatutahápe rehecha, péicha eñepyrũ vove reñeñandu vai ikatúta relee umíva. Avei ehecha mbaʼéichapa umi informasión ikatu nepytyvõ ne situasiónpe, ha eñehaʼã ejapo umi mbaʼe reaprendéva (Filip. 4:8).

18. ¿Mbaʼeichagua informasiónpa oipytyvõ algúno ermáno ha ermánape?

¹⁸ Eliza, pe ermána ñamensionáma vaʼekue oheka informasión oñeʼẽva Job rehe. ¿Mbaʼérepa? Haʼe omombeʼu: “Che ningo ambohovái vaʼekue hetaiterei provléma al mísmo tiémpo. Upévare aheka umi informasión oñeʼẽva Job rehe. Hendive ijetuʼueterei vaʼekue, pórke ojoʼaripa ou chupe umi provléma. Hiʼarive haʼe ndoikuaái vaʼekue mbaʼérepa osufri, péro ni upeichavérõ ndohejái Jehovápe. Ha pe ijetuʼuvérõ guare hendive, haʼe lomímonte osegi ojerure ajúda Jehovápe” (Job 42:​1-6). Diane, pe ermána ñañeʼẽma vaʼekuére párrafo 14-pe heʼi avei: “Che ménandi ore rostudia vaʼekue umi informasión orepytyvõva roikuaa porãve hag̃ua Jehovápe. Upéi rohechakuaa mbaʼeichaitépa Jehová orepytyvõ rojoguave hag̃ua chupe ha roagradeseterei chupe upévare. Ore ningo sapyʼánte roñedesanima rojesarekógui ore deféktore. Péro péicha jave oremanduʼa Jehová orepytyvõ ha oremboʼeha hína rosegi hag̃ua romehora. Upéva omombarete pe amista rorekóva hendive” (Is. 64:8).

ANÍKENA JADUDA JEHOVÁ ÑANEPYTYVÕ HA ÑANEVENDESITAHA

19. ¿Mbaʼéichapa ikatu ñañeñandu sapyʼánte, péro mbaʼéguipa ikatu ñaĩ segúro?

¹⁹ Jajapóramo jepe entéro umi mbaʼe ñaanalisa vaʼekue ko artíkulope, lomímonte sapyʼánte ikatu hína ñañedesanima térã ñañeñandu vai. Oĩta voi día ikatuhápe hína ñañeñandu yvýre. Péro upéicha jave Jehová ñanepytyvõta ani hag̃ua ñapensaiterei umi mbaʼe ñanemoñeñandu vaívare ha ñaĩ hag̃ua trankílo. Epensamíntena avei ko mbaʼére: Oĩta ningo hetave día iporãva ke la ivaíva. Hetave díape javyʼáta jaikuaágui Jehová haʼeha ñane amigoite, ha jaikuaágui haʼe ovyʼaitereiha entéro umi mbaʼe jajapóvare hesehápe.

20. ¿Mbaʼépa ñañehaʼãmbaite vaʼerã jajapo?

²⁰ Aníkena jaheja umi mbaʼe ñañandúva ñanedomina. Sapyʼánte ikatu hína ñañeñandu vai la jajapo vaʼekuére yma, umi provléma jarekóvare koʼág̃a térã ñaneimperfékto haguére. Péro aníkena jaheja umíva ñanedesanima. Ñañepyrũ jave ñañekevranta peteĩ mbaʼére, Jehová ikatu hína ñanepytyvõ ñaĩ hag̃ua trankílo (Sal. 143:10). Avei jajesareko memékena pe múndo pyahúre, upépe ikatúta ág̃a ñapensa umi mbaʼe ñanembovyʼávare añoiténte. Upépe ndaiporimoʼãvéima mbaʼeve ñanekevrantáva, síno káda día japáyta ha ñapuʼãta vyʼápe ikatúgui jaservi Ñandejára Jehovápe.