¿Mbaʼérepa ijetuʼuete kuri pe áño 2023-pe? ¿Mbaʼépa heʼi la Biblia?

Umi mbaʼe oiko vaʼekue áño 2023-pe ohechauka jaikoha pe tiémpo la Biblia ohenóivape “umi ára paha” (2 Timoteo 3:1). Jahechamína mbaʼéichapa umi mbaʼe oikóva ñane tiémpope oĩma vaʼekue voi la Bíbliape.

Umi profesía oĩva la Bíbliape ha umi mbaʼe oikóva ko múndope

“Pehendúta oikoha gérra heta hendárupi” (Mateo 24:6).

• “Heta hetave lugárpe ko múndope umi hénte oiko vaipa ha iviolentoiterei”.a

“Oĩta yvyryrýi ápe ha pépe” (Marcos 13:8).

• “Oñepyrũ guive áño 2023 koʼág̃a peve, ko múndo tuichakuére oikóma 13 yvyryrýi de magnitu 7 térã tuichavéva. Nameméi ojerrehistra peichagua terremóto tuicháva”.b

“Umi hénte ohecháta heta mbaʼe oporomongyhyjéva” (Lucas 21:11).

• “Umi ára haku opátama ñane planétape, koʼág̃a jachyryrýtantema” (António Guterres, secretario general de las Naciones Unidas).c

“Oĩta ñembyahýi” (Mateo 24:7).

• “Áño 2023-pe umi hénte ojepyʼapy pórke ijetuʼueterei kuri omantene hag̃ua ifamiliakuérape”.d

“Pe situasión ijetuʼúta ha ipeligrósota” (2 Timoteo 3:1).

• “Ko múndo tuichakuére 1 de káda 8 persóna oreko provléma emosionál”.e

¿Mbaʼépa oikóta áño 2024-pe?

Añetehápe avave ndaikatúi oaseguraite mbaʼépa oikóta áño 2024-pe. Péro umi mbaʼe oikóva ko múndope ohechauka koʼẽrõitéma Ñandejára Rréino, haʼéva Ñandejára goviérno oĩva yvágape, oipeʼataha umi goviérno koʼag̃agua ha osolusionáta entéro provléma ñanembosufríva ha ñanekevrantáva (Daniel 2:44; Apocalipsis 21:4).

Ñahaʼarõ aja oiko upéva, jajepyʼapyeterei jave ikatu jajerure Ñandejárape ñanepytyvõ hag̃ua. La Biblia heʼi:

“Sapyʼánte akyhyje, upéicha jave asegínte ajerovia nderehe” (Salmo 56:3).

¿Mbaʼéichapa ikatu jahechauka jajeroviaha Ñandejárare? La Biblia opromete koʼẽrõite opatamaha la kevránto. Roipotaite ningo esegi eaprende koʼã mbaʼe omboʼéva la Biblia. Upearã ikatu ejerure peteĩ kúrso bíblico grátis péicha eaprendéta mbaʼéichapa nde ha ne família ikatu pedisfruta umi promésa porãite omeʼẽvagui la Biblia.