¿Mbaʼépa heʼi la Biblia pe gérra nukleár rehe?
Umi poténsia mundiál amás día oreko hetave umi vómba ha árma nukleár, upévare la hénte okyhyje oikórõ g̃uarã peteĩ gérra nukleár. Oikuaávo hikuái oĩha hetave umichagua árma, opensa en kualkiér moménto oñepyrũtaha peteĩ gérra nukleár. Oĩ voi okyhyjéva peteĩ país oipurúrõ g̃uarã peteĩ árma nukleár michĩva ha upéva káusare ou oiko peteĩ gérra nukleár tuicháva, ohundítava ko múndo kompletoite. Peteĩ informasión heʼi jaikoha jakyhyjeháre, pórke “siémpre oĩ pe pelígro oikórõ g̃uarã peteĩ gérra nukleár” (Bulletin of the Atomic Scientists).
¿Oikónepa algúna ves peteĩ gérra nukleár? Oiméramo upéicha, ¿oaguantánepa ko ñane planéta? ¿Mbaʼépa ikatu jajapo jajepyʼapyetereíramo upévare? ¿Mbaʼépa heʼi la Biblia?
Ko artíkulope jahecháta:
¿Mbaʼépa ikatu rejapo ani hag̃ua rejepyʼapyeterei oikóramo g̃uarã peteĩ gérra nukleár?
¿Oĩpa algúna profesía heʼíva oikotaha peteĩ Armagedón nukleár?
¿Heʼípa la Biblia oĩtaha peteĩ gérra nukleár?
La Biblia ndeʼíri upéva. Péro si heʼíma kuri mbaʼépa la hénte ojapóta koʼã ára pahápe ha umi mbaʼe oikótava ko yvy tuichakuére. Ha umíva ohechauka porã mbaʼérepa la hénte okyhyje oikórõ g̃uarã peteĩ gérra nukleár.
Ekomparamína la heʼíva koʼã téxto bíblico umi mbaʼe oikóvare hína koʼág̃a ko múndo tuichakuére:
Téxto bíblico: Jesús disipulokuéra oporandu chupe: “¿Mbaʼe señálpa oĩta ropilla hag̃ua nde reimemaha orendive, ha pe fin ou potaitemaha?”. Jesús okontesta chupekuéra: “Peteĩ país opuʼãta ótro país rehe, ha umi goviérno opuʼãta ojuehe” (Mateo 24:3, 7).
Oikóva ko múndope: Heta país, umíva apytépe umi ikatúva ojapo umi árma nukleár, amás día oñorairõve oipurúvo opaichagua árma.
“Umi áño ohasa vaʼekuépe ko múndo iviolentove. Amás día heta hetave oiko umi ñorairõ” (Proyecto de Datos de Localización y Eventos de Conflictos Armados).
Téxto bíblico: “Umi ára pahápe pe rréi del sur ha pe rréi del nórte ojoatakáta” (Daniel 11:40).
Oikóva ko múndope: Umi país tuicha ha ipoderósova, ha unos kuánto país omoirũva chupekuéra, ojoataka térã okompeti ohechauka hag̃ua mávapa ipoderosove. Jepeve koʼag̃aite umi poténsia mundiál ndojoatakái, si omehorave ohóvo umi árma nukleár orekóva imbareteve hag̃ua.
“Umi 10 áño ohasa vaʼekuépe hetaiteve país oĩ opuʼãva ojuehe, ha umícha jave umi poténsia tuicháva oladea jepi peteĩvape” (Programa de Datos sobre Conflictos de la Universidad de Uppsala).
Téxto bíblico: “Eikuaáke umi ára pahápe pe situasión ijetuʼúta ha ipeligrósota. Pórke umi hénte [...] ndoikoporãsemoʼãi avavéndi, oñeʼẽ reíta ótrore, ndojejokokuaamoʼãi, isalváheta” (2 Timoteo 3:1-3).
Oikóva ko múndope: Koʼág̃arupi la hénte ndoikoporãséi voi avavéndi, ha umi governánte upeichaiténte avei. Oñehaʼã rangue osolusiona iprovléma pyʼaguapýpe porãnte, haʼekuéra mbaretépe osolusionase la iprovléma térã oñoamenasa. Ha amáske oĩ koʼãichagua amenása, koʼýte oĩ la pelígro oikóvo peteĩ gérra nukleár.
“Ñande voi nañañehaʼãiramo jaiko porã hag̃ua oñondive, amás día jaiko vaivéta ñañohundipa hag̃uáicha” (Samir Saran ha Jane Harman, Foro Económico Mundial).
¿Opermitínepa Ñandejára oiko peteĩ gérra nukleár?
La Biblia ndeʼíri upéva, péro si heʼi umi ára pahápe umi hénte ohechataha “heta mbaʼe oporomongyhyjéva” (Lucas 21:11). ¿Oñekumplímapa ohóvo la heʼíva ko téxto? Si. Por ehémplo, entéronte oñemondyipa kuri ojepurúrõ guare umi vómba atómika segunda gérra mundiál aja. La Biblia oexplika mbaʼérepa Ñandejára opermiti kuri oiko umi gérra. Reikuaasevéramo ko témagui, ehecha pe vidéo hérava ¿Mbaʼérepa Ñandejára oheja jasufri?
¿Oaguantánepa ko yvy?
Si. Ojepuru jeýramo jepe umi árma nukleár, Ñandejára ndohejamoʼãi ko yvy oñehundiete. La Biblia heʼi ko yvy arakaʼeve noñehundimoʼãiha ha umi hénte oikotaha pype pára siémpre.
Oĩ opensáva pe gérra nukleár rire unos kuántonte opytataha ko yvy ape ári ha ko yvy oñekontaminambataha pe rradiasión káusare. Péro ko yvy oñembyaíramo jepe pe gérra káusare, la Biblia ohechauka porã ikatuha ojerrekupera jey.
Ñandejára oipota jaiko vyʼápe peteĩ paraísope ko yvy ape ári.
Ñande Apohare okrea ko yvy ojerrekupera hag̃ua haʼeñoite oĩramo ombyaíva. Avei jaikuaa Ñandejára oipurutaha ipodér omyatyrõ hag̃ua ko yvy, ha umi ser umáno oikotaha ko planétape pára siémpre (Salmo 37:11, 29; Apocalipsis 21:5).
¿Mbaʼépa ikatu rejapo ani hag̃ua rejepyʼapyeterei oikóramo g̃uarã peteĩ gérra nukleár?
Oĩ ojepyʼapyetereíva oikóramo g̃uarã peteĩ gérra nukleár ha umi mbaʼe vai ikatúva oiko upéva káusare. ¿Mbaʼéichapa la Bíbliape ikatu oipytyvõ koʼãichagua persónape oiko hag̃ua pyʼaguapýpe?
La Biblia omeʼẽ peteĩ esperánsa iporãitereíva ñande yvýpe g̃uarã ha umi oikóvape g̃uarã pype. Upe “esperánsa ningo peteĩ ánkla ñande rekovépe g̃uarã” ha ñanepytyvõ ani hag̃ua jajepyʼapyeterei (Hebreos 6:19). Avei, ani hag̃ua jajepyʼapy rasa, ñapensa vaʼerã upe día g̃uarãrente, ha péicha ndajaikomoʼãi jajepyʼapyeterei rasa ñande futúrore. Jesús heʼi vaʼekue voi: “Ovaléma voi umi provléma káda día oñembohovái vaʼerã” (Mateo 6:34).
Legálmente iporãitereíta enterovénte ñañehaʼãramo jakuida ñandejehe ikatumiháicha, ani hag̃ua jareko provléma emosionál ni mentál. ¿Mbaʼéichapa ikatu jajapo upéva? Por ehémplo, ani jahecha ni ñahendu umi notísia ikatúva ñanemongyhyje, umíva apytépe umi konversasión, prediksión, térã notísia oñeʼẽva algúna gérra nukleár rehe. Péro upéva ndeʼiséi nañaneinteresaiha la oikóva ñande jerére, síno heʼise jajapoha ikatúva guive ani hag̃ua ñapensaiterei umi mbaʼe ndaikatumoʼãivare ñakontrola ha ikatúva voi ndoikói hína arakaʼeve.
Eaparta tiémpo ndejupe g̃uarã voi ha ani epensaiterei umi notísia vaíre, síno eñehaʼã eñekonsentra umi mbaʼe erekóvare nde rekovépe.
La Biblia omeʼẽ ñandéve peteĩ esperánsa iporãitereíva amo gotyove g̃uarã.
Amáske jaikuaa Ñandejára promesakuéragui jarekovéta esperánsa, javyʼáta ha ñandepyʼaguapýta.
¿Oĩpa algúna profesía heʼíva oikotaha peteĩ Armagedón nukleár?
Oĩ algúno opensáva Armagedón haʼetaha peteĩ gérra nukleár, oikótava ko múndo tuichakuére. Ha katuete oñeimahina sarambi oikotaha upe gérra rire.
Péro la Biblia oipurúvo pe palávra “Armagedón” heʼise hína “umi rréi ko yvy arigua”, térã umi goviérno umáno, oñorairõtaha Ñandejára kóntrapea (Apocalipsis 16:14, 16). Oiko vove Armagedón ndojejukapareimoʼãi umi persónape, ni noñehundimoʼãi ko yvy, ikatuháicha ojapo peteĩ vómba nukleár. Upéva rangue, Ñandejára ohundíta sólamente umi iñañávape ha ndoikomoʼãi ohundi oimeraẽ persónapentema. Upéva mediánte enterovéva jaikóta vyʼápe ha segúro porã (Salmo 37:9, 10; Isaías 32:17, 18; Mateo 6:10).
¿Mbaʼe solusiónpa la Biblia omeʼẽ umi gerrarã?
Jehováb ohechaukáta ipodér ohundietévo umi gérra ha umi árma ojepurúva gerrahápe. Upéva ojapóta Irréino rupive, peteĩ goviérno oĩva yvágape ogovernátava ko yvy ape ári (Daniel 2:44).
Ñandejára Rréino omboʼéta la héntepe oiko hag̃ua pyʼaguapýpe ha peteĩ ñeʼẽme. Oĩta rupi peteĩ goviérnontema ko yvy ape ári, ndaiporimoʼãvéima joavy umi país apytépe ha noñorairõmoʼãvéima. Ha umi hénte ni noaprendemoʼãvéima mbaʼéichapa oñeñorairõ umi gerrahápe (Miqueas 4:1-3). ¿Mbaʼéichapa upéicharõ ojeikóta upépe? “Umi hénte oguapýta iparrál máta guýpe ha hiʼígo máta guýpe, avave nomongyhyjemoʼãi chupekuéra” (Miqueas 4:4).
a Ehecha pe artíkulo “¿Qué es el Armagedón?”.
b Ñandejára héra Jehová (Salmo 83:18). Ehecha pe artíkulo hérava “¿Mávapa Jehová?”.