¿Mbaʼéichapa umi testígo de Jehová otrata umi anteve haʼe vaʼekuépe irrelihiongua?
Ore siémpre roñehaʼãmbaite rotrata porã, orembaʼeporã ha rorrespeta enterovépe. Upévare, oiméramo peteĩ testígo de Jehová oñepyrũ ikangy ha oñemomombyry Ñandejáragui, ore voi roñemboja hendápe, romomanduʼa chupe rohayhuetereiha chupe, ha roñehaʼã roipytyvõ chupe oñemoag̃uise jey hag̃ua Ñandejárare (Lucas 15:4-7).
Sapyʼánte peteĩ persóna ojapo peteĩ mbaʼe noĩporãiva ha upéva káusare oñenohẽmante vaʼerã chupe kongregasióngui (1 Corintios 5:13). Péro ore ningo rohayhueterei upe ermánope ha upévare roñehaʼãmbaite rojapo ikatúva guive ani hag̃ua oiko upéva. Ha oiméramo jepe oñeguenohẽ chupe, rosegi rohechauka rohayhu ha rorrespetaha chupe, la Biblia voi heʼiháicha (Marcos 12:31; 1 Pedro 2:17).
¿Mbaʼéicha rupípa peteĩ persónape oñeguenohẽ kongregasióngui?
La Biblia heʼi porã peteĩ kristiáno opeka vaietereíramo ha nokambiaséi, upéicharõ oñeguenohẽmante vaʼerã chupe kongregasióngui (1 Corintios 5:11-13).a La Biblia ohechauka avei mbaʼeichaguápa umi pekádo ivaietéva ha ikatúva upéva káusare oñeguenohẽ peteĩ persónape kongregasióngui. Por ehémplo, umi persóna hekovaíva, ikaʼúva, oporojukáva, ivioléntova hogayguándi ha imondáva (1 Corintios 6:9, 10; Gálatas 5:19-21; 1 Timoteo 1:9, 10).
Péro ndahaʼéi ensegídama voi oñeguenohẽva kongregasióngui peteĩ persóna ojapóvape koʼã mbaʼe vai. Umi ansiánob oipytyvõ raẽ chupe okambia ha oheja hag̃ua umi mbaʼe vai ojapóva (Romanos 2:4). Haʼekuéra oipotaiterei pe persóna okambia, upévare iñamávle, otrata porã chupe ha imbaʼeporã hendive (Gálatas 6:1). Péicha ojetrata rupi chupe, ikatu hína pe persóna ohechakuaa ivaietereiha la ojapóva ha oñarrepenti (2 Timoteo 2:24-26). Péro umi ansiáno oñehaʼãramo jepe oipytyvõ chupe, ha haʼe lomímonte osegíramo ojapo umi mbaʼe vai ha noñarrepentíri, upéicharõ oñeguenohẽ vaʼerã chupe kongregasióngui. Upéicha jave umi ansiáno oanunsia pe kongregasiónpe pe persóna ndahaʼeveimaha testígo de Jehová.
Umi ansiáno ningo oipotaiterei pe persóna opeka vaʼekue okambia, upévare iñamávle, otrata porã chupe ha imbaʼeporã hendive
¿Mbaʼépa ojehupyty oñeguenohẽramo kongregasióngui peteĩ persóna osegívape ojapo umi mbaʼe vai? Primero, pe kongregasión osegíta ipotĩ Ñandejára voi ojerureháicha ha ojeprotehéta umi oĩvape upépe ani hag̃ua ojegueraha vai chupekuéra (1 Corintios 5:6; 15:33; 1 Pedro 1:16). Avei, upéva ikatu omomýi pe persóna opekávape okambia hag̃ua ha anivéma hag̃ua ojapo la ivaíva (Hebreos 12:11).
¿Mbaʼéichapa umi testígo de Jehová otrata umi oñeguenohẽ vaʼekuépe kongregasióngui?
La Biblia heʼi porã umi kristiánope mbaʼéichapa otrata vaʼerã peteĩ oñeguenohẽvape kongregasióngui: “Anive pejeheʼa hese ha ani voi ni pekaru umichaguándi” (1 Corintios 5:11). Upéicharõ ore ndoroikói rojeheʼaiterei peteĩ oñeguenohẽ vaʼekuére kongregasióngui. Péro upéva ndeʼiséi avei romboyketemaha chupe. Ore rosegi rorrespeta chupe. Pe persóna oho jeýramo ore rreunionhápe, ore rorresivi porãta chupe, ha umi oĩva upépe ikatu osaluda chupe.c Haʼe ikatu avei ojerure umi ansiánope toipytyvõ chupe oñemoag̃ui jey hag̃ua Jehováre.
Umi oñenohẽ vaʼekue kongregasióngui ohóramo rreunionhápe, ore rorresivi porã chupekuéra
¿Ha mbaʼe oiko peteĩ persóna oñenohẽramo kongregasióngui péro hembireko ha ifamiliakuéra oikóva hendive haʼéiti testígo de Jehová? Siérto, haʼe ningo ndoservivéima Jehovápe hendivekuéra, péro lomímonte osegi vaʼerã ohayhu ha okuida ifamíliare. Haʼekuéra ningo oiko oñondive el mísmo ógape, upévare la tráto hogapýpe nokambiái, haʼe osegi vaʼerã ohayhu ha otrata porã hembireko ha ifamiliakuérape, ha haʼekuéra avei chupe.
Pe persóna oñenohẽva kongregasióngui ikatu ojerure umi ansiánope ovisitami hag̃ua chupe. Umícha jave umi ansiáno oipuru la Biblia oipytyvõ ha omokyreʼỹ hag̃ua chupe oñarrepenti ha ovolve jey hag̃ua (Zacarías 1:3). Ha la haʼe okambiáramo, térã ndojapovéiramo umi mbaʼe vai ojapo vaʼekue ha ohechauka de verda oikoseha Ñandejára oipotaháicha, haʼe ikatúta ovolve jey la kongregasiónpe. Upéva oikóramo, entéro ermáno vyʼápe orresivi jeýta chupe, ha avei operdonáta ha okonsoláta chupe, ojapo haguéicha yma pe kongregasión de Corinto oĩrõ guare peteĩ pekadór oñarrepenti vaʼekue (2 Corintios 2:6-8).
¿Mbaʼéichapa oñeñandu koʼág̃a umi ovolve jey vaʼekue kongregasiónpe?
Ehechamína mbaʼépa heʼi unos kuánto testígo de Jehová oñenohẽ vaʼekue kongregasióngui ha upéi odesidi vaʼekue ovolve jey.
“Adesidírõ guare avolve jeytaha kongregasiónpe, che aimoʼã kuri umi ansiáno oñepyrũtaha oporandu mbaʼépa ajapo kuri aikóvo umi áño aĩrõ guare okápe. Péro haʼekuéra ndojapói upéva, heʼínte chéve hikuái: ‘Nde eñekonsentránte la ikatúvare ejapo koʼág̃a ha esegi adelánte’. Upéva legálmente tuichaiterei chetrankilisa kuri” (María, Estados Unidos).
“Pe kongregasión ningo ovyʼaiterei vaʼekue che avolve jeýrõ guare. Añandu kuri umi ermáno cherayhuetereiha. La chetrata lájare hikuái apilla Jehová ha haʼekuéra voi cheperdonáma hague, ha upéva chepytyvõ anivéma hag̃ua apensaiterei la oiko vaʼekuére. Umi ansiáno avei siémpre oĩ kuri pendiénte cherehe ha chepytyvõ añemoag̃ui jey hag̃ua Jehováre. Haʼekuéra chekonsola ha chepytyvõ añandu hag̃ua Jehová osegitiha cherayhu ha chevalora” (Malcom, Sierra Leona).
“De tánto ke Jehová ñanderayhu, haʼe oñenkarga siémpre ipotĩ hag̃ua pe kongregasión, ha upéva chéve chembovyʼaiterei. Umi héntepe g̃uarã ikatu vaicha Jehová ipyʼahatãʼíma ojapo haguére upéicha, péro legálmente haʼe ojapo upéva tekotevẽguinte ha ñanderayhúgui. Ñande Túa Jehová hakateʼỹeterei ñanderehe ha ñaneperdonase la jajavýramo, ha che aagradeseterei chupe upe haguére” (Sandi, Estados Unidos).
a Anteve peteĩ persóna opekáramo ha noñarrepentíri ojeʼe vaʼekue hese oñemosẽ hague kongregasióngui térã haʼeha expulsádo. Péro koʼág̃a ojepurúntema pe palávra la Biblia voi oipurúva, ha upévare ojeʼéntema upe persóna oñenohẽ hague kongregasióngui.
b Umi ansiáno ningo haʼe umi kristiáno ijerovia mbaretéva ha ontende porãva umi mbaʼe omboʼéva la Biblia. Chupekuéra oñemeʼẽ la rresponsavilida okuida hag̃ua umi ermáno oĩvare kongregasiónpe, ha ojapo upéva okovraʼỹre mbaʼeve (1 Pedro 5:1-3).
c Ndoikóiramo jepe la pyʼỹieterei, oĩ avei káso peteĩ persóna oñenohẽva kongregasióngui operhudikaseha ótrope. Oñehaʼã voi ipy ha ipópe ombyai hag̃ua pe kongregasión térã oraha vai hag̃ua umi oĩvape upépe. Upéva oikóramo, ore rojapo la Biblia heʼíva ha ‘ni ndorosaludái’ upe persónape (2 Juan 9-11).