¿Mbaʼépa hína pe rresurreksión?
Mbaʼépa heʼi la Biblia
La Bíbliape pe palávra griega anástasis haʼe hína la ojetradusíva jepi “rresurreksión”. Péva pe palávra en rrealida heʼise “opuʼã”, térã “oñemboʼy jey”. Peteĩ persóna orresusitáramo, upéva heʼise hína haʼe opuʼã jeyha térã oikove jeyha, ha opyta elmimoite jey pe omano mboyve guaréicha (1 Corintios 15:12, 13).
Péva pe palávra ningo ndaipóri umi Escrituras Hebréaspe, oñehenóiva jepi avei Viejo Testamento. Upéicharõ jepe, oĩ téxto umi Escrituras Hebréaspe ohechaukáva umi omano vaʼekue ikatuha oikove jey. Por ehémplo, pe proféta Isaías rupive, Ñandejára opromete kuri: “Umi che puévlo apytégui omano vaʼekue oikove jeýta” (Isaías 26:19; Job 14:13-15; Daniel 12:2, 13; Oseas 13:14).
¿Moõpa orresusitáta, térã oikove jeýta, umi omano vaʼekue? Algúno oikove jeýta yvágape ogoverna hag̃ua Jesús ndive (2 Corintios 5:1; Apocalipsis 5:9, 10). La Biblia heʼi haʼekuéra haʼetaha umi “primeroite oikove jeýva”. Ha heʼívo upéicha, ohechauka porã haʼekuéra oikove jey rire oĩtaha ótra rresurreksión (Apocalipsis 20:6; Filipenses 3:11). Upe rresurreksiónpe oikove jeýta hetaitereive hénte, ha opuʼã jeýta hikuái ikatu hag̃uáicha oiko ko yvy ape ári (Salmo 37:29).
¿Mbaʼéichapa oñemoingove jey peteĩ persónape? Ñandejára omeʼẽ Jesúspe pe podér orresusita hag̃ua umi omano vaʼekuépe (Juan 11:25). Jesús omoingove jeýta enterove umi oĩvape pe “sepultúrape”, ha káda uno oreko jeýta entéro umi rrekuérdo oreko vaʼekue omano mboyve, ha avei opensa ha oñekomportáta elmimoite jey (Juan 5:28, 29). Umi orresusitáva yvágape orekóta peteĩ kuérpo espirituál, ha umi oikove jeýtava ko yvy ape ári katu orekóta peteĩ kuérpo umáno hesãiva ha ndorekóiva defékto (Isaías 33:24; 35:5, 6; 1 Corintios 15:42-44, 50).
¿Máva mávapa la orresusitátava? La Biblia heʼi porã “oñemoingove jeytaha umi ihústova ha iñinhústovape” (Hechos 24:15). Umi ihústova apytépe oĩ umi Ñandejára siérvo yma guare ifiél vaʼekue, por ehémplo Noé, Sara ha Abrahán (Génesis 6:9; Hebreos 11:11; Santiago 2:21). Umi iñinhústova apytépe katu oĩ umi ndojapói vaʼekue Ñandejára heʼíva, péro ndorekóiguinte la oportunida oikuaa porã hag̃ua Ñandejárape ha iñeʼẽrendu hag̃ua chupe.
Upéicharõ jepe, umi iñañaitereíva ha núnka nokambiamoʼãiva, ndorresusitamoʼãi. Peichagua persóna omano vove, oñehundietéma ha ndorekói esperánsa oikove jeývo (Mateo 23:33; Hebreos 10:26, 27).
¿Arakaʼépa oikóta pe rresurreksión? La Bíbliape ojeprofetisa vaʼekue pe rresurreksión yvagapegua oikóta hague Jesús oñepyrũ rire ogoverna, ha upéva oiko kuri áño 1914-pe (1 Corintios 15:21-23). Pe rresurreksión ko yvy ape arigua katu oikóta Jesús goviérno de mil áño aja. Upe tiémpope, ko yvýgui oiko jeýta avei peteĩ paraíso (Lucas 23:43; Apocalipsis 20:6, 12, 13).
¿Mbaʼérepa ikatu ñaime segúro umi omanóva ikatuha oikove jey? La Biblia omombeʼupaite mbaʼépa oiko vaʼekue oikove jeýrõ guare 9 persóna, ha oĩ vaʼekue heta hénte ohecháva voi koʼã rresurreksión ha ikatu vaʼekue okonfirma oiko hague (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; Hechos 20:7-12; 1 Corintios 15:3-6). Umíva apytépe, la inotavlevéva haʼe Jesús omoingove jeýrõ guare Lázarope, pórke ojapóma kuri 4 día haʼe omano hague, ha Jesús ojapo ko milágro heta hénte renondépe (Juan 11:39, 42). Jesús kontrariokuéra jepe ndaikatúi vaʼekue onega la oikóva, ha upévare oñemoĩ voi oplanea hikuái mbaʼéichapa ikatu ojuka Jesúspe ha Lázarope avei (Juan 11:47, 53; 12:9-11).
La Biblia ohechauka Ñandejára orekoha la podér omoingove hag̃ua umi omanóvape. Haʼe ningo pe Todopoderóso ha impresionánte mbaʼeichaitépa ndahesaráiri mbaʼevégui, upévare ikatu imanduʼa umi detálle mimíre jepe oreko vaʼekue pe persóna, peichaite jey omopuʼã hag̃ua chupe (Job 37:23; Mateo 10:30; Lucas 20:37, 38). Péro haʼe ndahaʼéi la ikatúnteva ojapo upéva, síno ojaposetereíma voi. La Biblia heʼi voi Ñandejárare: “Nde katuete rehechaseterei jeýta upe ne rembiapokuemi” (Job 14:15).
Mbaʼépa oñentende vai jepi pe rresurreksiónre
Ojeʼéva jepi: Peteĩ persóna orresusita vove la hiʼálma oike jeýnte la ikuérpope.
La verda: La Biblia nomboʼéi pe álma haʼeha álgo osegíva oikove ñande ñamano rire, síno heʼi pe álma haʼeha pe persóna voi (Génesis 2:7, nóta; Ezequiel 18:4). Upévare peteĩ persóna orresusitávo, ndahaʼéi hiʼálma la oike jeýva ikuérpope, síno ojejapo jey de nuévo pe álmape voi, oséa pe persónape.
Ojeʼéva jepi: Oĩ algúno orresusitátava oñehundi jey hag̃uánte upe rire.
La verda: La Biblia heʼi umi “ojapo vaʼekue ivaíva” orresusitataha “ojehusga hag̃ua” (Juan 5:29). Péro chupekuéra ndojehusgamoʼãi umi mbaʼe ojapo vaʼekuére omano mboyve, síno ojehusgáta umi mbaʼe ojapóvare orresusita rire hikuái. Jesús heʼi vaʼekue “umi omanóva ohendutaha Ñandejára Raʼy oñeʼẽvo, ha umi ohendúva ha ojapóva haʼe heʼíva oikovéta” (Juan 5:25). Upéicharõ umi orresusitáva oñepyrũramo iñeʼẽrendu Jesúspe, herakuéra oñemoĩta ‘pe lívro de la vídape’ (Apocalipsis 20:12, 13).
Ojeʼéva jepi: Umi orresusitávape oñemeʼẽ jeýta el mísmo kuérpo oreko vaʼekue omano mboyve.
La verda: Ñamano rire, ñande retekue oñembyaipa ha oñehundi (Eclesiastés 3:19, 20).