¿Mbaʼéicha javépa iporã ñandepojera ha mbaʼéicha javépa nahániri?
Mbaʼépa heʼi la Biblia
La Biblia ñanemokyreʼỹ ñandepojera hag̃ua ha jajapo hag̃ua upéva ñande pyʼaite guive. Ñanembaʼeporãramo ótrondi, upéva ou porãta pe ótra persónape ha ñandéve avei (Proverbios 11:25; Lucas 6:38). Jesús heʼi vaʼekue voi: “Javyʼaiteve ñameʼẽvo, ñandéve oñemeʼẽ rangue” (Hechos 20:35).
¿Mbaʼéicha javépa iporã ñandepojera?
Ñandepojeráramo ñande rapichakuérandi ñanembaʼeporãgui voi, jahupytýta heta mbaʼe porã. La Biblia heʼi voi: “Káda uno tomeʼẽ odesidiháicha ikorasõme, ndovaléi omeʼẽ tovapukúpe ni ojeovligágui chupe, pórke Ñandejára ohayhu pe persóna vyʼápe omeʼẽvape” (2 Corintios 9:7).
Jaadoraséramo Ñandejárape haʼe oipotaháicha, ñandepojera vaʼerã ñande rapichándi ñaipytyvõségui chupe (Santiago 1:27). Ñaipytyvõramo umi persóna oikotevẽvape jajapo hína álgo Ñandejárape ogustaitereíva, ha chupe g̃uarã haʼete ku opytáva odeve ñandéve upe haguére (Proverbios 19:17). Ha la Biblia heʼi Ñandejára opagataha ñandéve upe jajapo vaʼekuére (Lucas 14:12-14).
¿Mbaʼéicha javépa naiporãi ñandepojera?
Jajapóramo upéva ñapenságui ñandejehénte. Por ehémplo:
Japyta porãségui ótrondi (Mateo 6:2).
Ñakonsegiségui álgo (Lucas 14:12-14).
Ñaimoʼãgui péicha jajesalvataha (Salmo 49:6, 7).
Ñameʼẽramo pláta jaapoja hag̃ua álgo Ñandejárape ndogustáiva. Por ehémplo, noĩporãmoʼãi ñameʼẽramo pláta peteĩ persónape ikatu hag̃uáicha oaposta, okaʼu térã ojedroga (1 Corintios 6:9, 10; 2 Corintios 7:1). Ha ndoikomoʼãi avei ñameʼẽ pláta peteĩ persóna iñateʼỹva ha nombaʼaposéivape (2 Tesalonicenses 3:10).
Ndaikatúiramo ñakumpli porã álgo Ñandejára onkarga vaʼekue ñandéve. La Biblia heʼi peteĩ omoakãva ifamília omeʼẽ vaʼerãha chupekuéra umi mbaʼe oikotevẽva (1 Timoteo 5:8). Ndahaʼéi vaʼerã imbaʼeporãségui ótrondi oñepyrũmava odeskuida la ifamília. Por ehémplo, Jesús tiémpope oĩ vaʼekue umi heʼíva ndaikatuiha oipytyvõ ituakuéra ijedávape, pórke supuéstamente umi mbaʼe orekóva oapartáma kuri Ñandejárape g̃uarã. Péro Jesúspe ndogustaieterei vaʼekue upéva (Marcos 7:9-13).