¿Mbaʼépa heʼi la Biblia pe avórtore?

Mbaʼépa heʼi la Biblia

La Biblia ningo ndoipurúi pe palávra “avórto” oñeñeʼẽta jave peteĩ kuña oitykávare imemby a propósito. Péro si oĩ heta versíkulo ohechaukáva mbaʼépa Ñandejára opensa ñande rekovére, umíva apytépe peteĩ mitã nonaséitiva rekovére.

Ñande rekove ningo peteĩ rregálo omeʼẽva ñandéve Ñandejára (Génesis 9:6; Salmo 36:9). Chupe g̃uarã enterovetéva rekove ivaliosoiterei, ha umíva apytépe oĩ avei umi mitã nonaséitiva. Upéicha rupi peteĩ persóna ojukáramo peteĩ veveʼi nonaséitivape, Ñandejárape g̃uarã upe persóna haʼe hína peteĩ asesíno.

Ñandejára omeʼẽ vaʼekue voi umi israelítape peteĩ léi heʼíva: “Oĩramo kuimbaʼe oñorairõva ha upeichahápe olastima hikuái peteĩ hyeguasúvape ha upévare pe kuñakarai imemby itiempopeʼỹ, péro nomanói pe mitã ni isy, upéicharõ pe oporolastima vaʼekue opaga vaʼerã pe kuñakarai ménape pe kantida odesidi vaʼekue umi hués. Péro omanóramo pe mitã térã isy, upéicharõ ojejuka vaʼerã avei pe oporojuka vaʼekuépe” (Éxodo 21:22, 23).a

• ¿Mbaʼe moménto guivépa oñepyrũ oikove peteĩ persóna?

• ¿Serápa Ñandejára operdonáne peteĩ persóna oavorta vaʼekuépe?

• ¿Ikatúpa peteĩ persóna oavorta oiméramo pe mitã térã isy oĩ en pelígro?

¿Mbaʼe moménto guivépa oñepyrũ oikove peteĩ persóna?

Ñandejárape g̃uarã peteĩ persóna oñepyrũ oikove oñeuni guive peteĩ óvulo ha peteĩ espermatosóide. La Bíbliape haʼe siémpre ontendekáva peteĩ mitã nonaséitiva haʼemaha peteĩ persóna. Jahechamína unos kuánto ehémplo ohechaukáva upéva.

• Ñandejára omomýi vaʼekue rréi Davídpe oskrivi hag̃ua: “Nde ningo cherecháma kuri che sy retepýpe” (Salmo 139:16). Ñandejárape g̃uarã David haʼéma vaʼekue peteĩ persóna, haʼe nonaséitiramo jepe.

• Ñandejára oelehi vaʼekue proféta Jeremíaspe ojapo hag̃ua álgo iñimportánteva, ha haʼe odesidi kuri upéva Jeremías onase mboyve jepe. Ha ikatu jaʼe upéicha hague pórke Ñandejára voi heʼi vaʼekue chupe: “Che roikuaáma vaʼekue rojapo mboyve nde sy retepýpe, ha renase mboyve roiporavóma kuri rejapo hag̃ua peteĩ traváho espesiál. Ajapo ndehegui proféta umi nasiónpe g̃uarã” (Jeremías 1:5).

• Lucas, peteĩva umi oskrivi vaʼekue la Biblia, haʼe vaʼekue avei doktór, ha haʼe oipuru vaʼekue la mísma palávra griega oñeʼẽ hag̃ua peteĩ veveʼi nonaséitivare ha peteĩ veveʼi onase ramóvare (Lucas 1:41; 2:12, 16).

¿Serápa Ñandejára operdonáne peteĩ persóna oavorta vaʼekuépe?

Si, Ñandejára ikatu operdona chupe. Oiméramo upe persóna okambiáma opensa lája ha koʼág̃a ohecháma avei la vída Ñandejára ohechaháicha, natekotevẽvéima oñeñandu vai ni ojekulpa la oiko vaʼekuére. La Biblia heʼi voi: “Jehová ñandeporiahuvereko ha ñanembyasy”.b Ha heʼi avei: “Pe kuarahyresẽ ningo mombyryeterei oĩ pe kuarahyreikégui, upéicha Ñandejára omomombyry ñandehegui umi ñane rembiapo vaikue” (Salmo 103:8-12). Ñandejára ningo operdona entéro persóna oñarrepentívape ipyʼaite guive, ha umíva apytépe oĩ avei umi persóna oavorta vaʼekue (Salmo 86:5).

¿Ikatúpa peteĩ persóna oavorta oiméramo pe mitã térã isy oĩ en pelígro?

Jahecháma haguéicha, la Biblia ohechauka Ñandejárape g̃uarã ivaliosoitereiha peteĩ mitã nonaséitiva rekove. Upévare, peteĩ persóna ndovaléi oavorta oñepensa rupi ikatuha osẽ vai pe mitã, térã ikatuha ojapo vai isýre pe mitã osegíramo hetepýpe.

Nameméiramo jepe, oĩ avei káso tekotevẽhápemante ojeelehi ojesalvátapa pe mitã térã isy, onaséta javete pe mitã. ¿Mbaʼépa ikatu ojejapo upe kásope? Upéicha jave, umi oĩva upe situasiónpemante ikatúta oelehi mavaitévapepa oñehaʼãta osalva hikuái.