¿Mbaʼérepa naiporãi ñandeplatarayhu?
Mbaʼépa heʼi la Biblia
Heta hénte heʼi pe pláta ikatuha ñandeperhudika, péro la Biblia nomboʼéi upéva. Ndeʼíri pe pláta ivaiha ni ñandeperhudikataha, síno ke heʼi jahayhúramo pe pláta, upéva la ivaiha. Peteĩ pártepe heʼi voi: “Pe platarayhu ogueru opaichagua mbaʼe vai” (1 Timoteo 6:10).
¿Mbaʼépa heʼi la Biblia pe plátare?
La Biblia heʼi pe pláta ideprovechoha jaipuru porãramo ha heʼi voi ikatuha ñandeprotehe (Eclesiastés 7:12). Avei upépe oñeñeʼẽ porã umi ipojerávare (Proverbios 11:25).
Péro la Biblia heʼi avei ani hag̃ua pe plátantema ñamotenonde ha upéva iñimportanteve ñandéve g̃uarã oimeraẽ mbaʼégui. Heʼi voi: “Aníkena peiko pendeplatarayhu, upéva rangue pevyʼáma vaʼerã umi mbaʼe perekóvare” (Hebreos 13:5). ¿Mbaʼépa ikatu ñaaprende ko téxtogui? Jaipuru porã vaʼerãha pe pláta ha ndajaikói vaʼerãha pe pláta rapykuéri ñanderríko hag̃uáicha. Upéva rangue, ñañekontentáma vaʼerã umi mbaʼe jarekomívare, por ehémplo, tembiʼu, ao ha peteĩ lugár jaiko hag̃ua (1 Timoteo 6:8).
¿Mbaʼérepa la Biblia heʼi ivaiha ñandeplatarayhu?
Umi hénte oipota potavéva ha noñekontentáiva, ndoikovemoʼãi pára siémpre (Efesios 5:5). ¿Mbaʼérepa jaʼe upéva? Primero voi pórke umichagua persóna haʼete omombaʼeguasúmava pe pláta, ojapoháicha umi omombaʼeguasúva umi taʼanga (Colosenses 3:5). Ha segundo, umichagua persóna ojapo jepi umi mbaʼe noĩporãiva ohupytységuinte umi mbaʼe haʼekuéra oipotáva. Proverbios 28:20 heʼi voi: “Pe sapyʼaitépe irrikoséva, ojapóta katuete ivaíva”. Ikatu voi ojapo hikuái umi mbaʼe ivaietereíva ohupyty hag̃ua la haʼekuéra oipotáva, por ehémplo, ombotavy ótrope, okoimea, osekuestra térã ojuka voi hapichápe.
Oiméramo jepe ndajajapói koʼã mbaʼe vai, lomímonte pe platarayhu ikatu ñandeperhudika. La Biblia heʼi voi: “Umi ojedesidímava ipláta hetataha, hoʼa ñuhãme, peteĩ lásope ha oiko heta vyrorei ha deséo oporoperhudikáva rapykuéri” (1 Timoteo 6:9).
¿Mbaʼéichapa ñanepytyvõta jasegíramo umi konsého oĩva la Bíbliape?
Jaipuru porãramo ñande pláta ha ndajajapóiramo ivaíva ñandeplataséguinte, jahechaukáta jajerrespetaha ñandejupe voi ha Ñandejára ovyʼáta ñandereheve. Ha ñañehaʼãmbaitéramo jajapo entéro mbaʼe Ñandejára oipotáva, haʼe opromete ñandéve: “Núnka ndorohejamoʼãi ha núnka nderepytamoʼãi neaño” (Hebreos 13:5, 6). Ha opromete avei ‘pe persóna iñeʼẽrendúva orresivitaha heta vendisión’ (Proverbios 28:20).