Pe kanál JW satelitál ohupyty umi lugár ndaiporihápe Internet

Káda mes ningo ñande jahechasetereíma jepi umi prográma ha vidéo ñanemokyreʼỹetéva osẽva JW Broadcástingpe. Péro heta ermanokuéra Africapegua ndaikatúi ohecha koʼã mbaʼe Internet rupive. ¿Mbaʼérepa?

Hetaiterei pártepe Áfricape ndaiporiguasúi la Internet. Ha umi lugár oĩháme katu imbegueterei térã hepyeterei. Por ehémplo, peteĩ vuélta Madagascárpe peteĩ superintendénte de sirkuíto oho peteĩ kafeteríape, ha omboguejy pe prográma de Broadcasting osẽva káda mes. Ha upévare ojekovra voi chupe 16 dólar (mas de 100.000 guarani), ha oĩ hénte ombaʼapo vaʼerã una semána ogana hag̃ua upéva.

Upéicharõ jepe, Áfricape koʼág̃a hetaiterei hénte ikatu ohecha JW Broadcasting oipuruʼỹre Internet. ¿Mbaʼéichapa ojapo hikuái upéva?

Áño 2017 guive, heta país oĩvape Áfricape ikatúma ojehecha JW Broadcasting peteĩ kanál de televisión satelitál rupive. Ko kanál otransmiti gratiete 24 óra al día umi 7 día de la semána, ha 16 idiómape voi.

Upearã testígo de Jehová okontrata peteĩ kanál de televisión otransmiti hag̃ua umi prográma vía satélite. Pe satélite ojepurúva ojagarra 35 paísrupi oĩva Áfricape. Ha ojepaga chupekuéra mas de 12.000 dólar káda mes (78 millón de guaranírupi). Ha sapyʼánte ojepagave avei ikatu hag̃uáicha oñetransmiti umi prográma en vívo ótro kanál rupive. Upéicha rupi hetaiterei persóna ikatu ohecha umi asambléa, térã umi prográma espesiál ojejapóva pe rrepresentánte de la sentrál mundiál ovisita jave pe sukursál.

Heta hénte, umíva apytépe umi ndahaʼéiva Testígo, ohecha hogaitépe voi pe kanál JW satelitál. Péro hetaiterei ñane ermáno ningo ndaikatúi ojogua umi ekípo oñekotevẽva ikatu hag̃uáicha ohecha ko kanál. Oñepytyvõ hag̃ua chupekuéra, mas de 3.670 Salón del Reino ojeekipa ikatu hag̃uáicha ñane ermáno ha ermanakuéra ohecha upépe JW Broadcasting. Koʼã ekípo ha pe envío oñemog̃uahẽ hag̃ua chupekuéra ohupyty amo 70 dólar rupi (haimete 500.000 guarani), oimérõ pe Salón orekóma voi peteĩ téle térã projektór. Péro ndorekóiramo umi ekípo oñekotevẽva ikatu voi ohupyty mas de 530 dólar (3 millón imédio de guaranírupi).

Ñane ermáno ha ermanakuéra ningo omombaʼeterei ko kanál. Peteĩ ansiáno Camerunpegua heʼi: “Ore famíliape g̃uarã ko kanál haʼete voi maná ko desiérto mbytépe”. Peteĩ ermáno Nigeriagua hérava Odebode, heʼi avei: “Ore rohecha ko kanál che famíliandi 3 vése a la semána. Che raʼykuéra oipotaitereíma jepi og̃uahẽ umi día. Ha rohecha jave ótro kanál, haʼekuéra ojerure voi rokambia hag̃ua pe kanál JW-pe”. Rose, peteĩ ermána oikóva avei Nigériape, heʼi: “Avyʼaiterei ningo, pórke aiko rangue ahecha tóda la óra umi notisiéro, koʼág̃a ahecha pe kanál JW satelitál. Ahechárõ guare umi notisiéro chembopochypa rei vaʼekue umi mbaʼe ahecháva ha ojupipa la che presión. Péro JW Broadcasting katu ñanemokyreʼỹ ha ñanembopyʼaguapy. ¡Chegustaiterei ko kanál! Kóva ningo peteĩ vendisión tuichaitereíva oúva Jehovágui”.

Peteĩ superintendénte de sirkuíto Mozambiquepegua omombeʼu isirkuítope oñemoĩ hague umi Salónpe umi ekípo ojehecha hag̃ua pe kanál satelitál. Umi ermáno koʼã kongregasionpegua og̃uahẽ una órarupi oñepyrũ mboyve pe rreunión térã voive voi, ohecha hag̃ua JW Broadcasting vía satélite.

Áño 2019-pe, ojejapórõ guare pe asambléa internasionál Johannesburgo, Sudáfricape, pe kanál ojepuru oñetransmiti hag̃ua 9 lugárpe umi diskúrso iñimportantevéva, umíva apytépe umi ojapo vaʼekue umi oĩva pe Kuérpo Governántepe. Sphumelele, peteĩ ermáno ombaʼapóva pe Departamento Local de Broadcasting sukursál de Sudáfricape, heʼi: “Ymave rotransmiti vaʼekue umi diskúrso Internet rupive. Péro upearã oiko porã vaʼerã pe Internet ha hepy ojepaga vaʼerã hese. Pe kanál satelitál JW katu varatove ha iseguroiteve”.

Roagradeseterei ningo umi kontrivusión pemeʼẽ vaʼekuére pe óvra mundiálpe g̃uarã. Upéva rupive, hetaiterei ñane ermáno ha ermána Africapegua ikatu ohecha JW Broadcasting vía satélite. Roagradeseterei ningo peẽme pendepojera haguére pemeʼẽvo pene kontrivusión, peipurúvo umi diferénte fórma oĩva oñedona hag̃ua donate.jw.org.