Púnto mimi okambiáva heta hénte rekove

Pe rrevísta The Watch Tower 1 de junio de 1912 heʼi vaʼekue: “Oiméne heta oleéva ñane puvlikasionkuéra oikuaa peteĩ persóna isiégova”. Ko rrevísta heʼi avei oĩha puvlikasionkuéra grátis chupekuéra g̃uarã, ha upéi heʼive: “Koʼã puvlikasión umi isiégovape g̃uarã oñeimprimi ikatu hag̃uáicha haʼekuéra opokópente hese oleéma. Heta isiégova omombaʼeterei oikuaávo oĩtaha peteĩ múndo ndaiporimoʼãveimahápe persóna ndohecháiva”.

Upe tiémpope umi testígo de Jehová ojapóma voi kuri unas kuánta puvlikasión ikatu hag̃uáicha umi isiégova opokópente hese olee. Hiʼarive upérõ guare neʼĩraiti kuri ojedesidi mbaʼeichaitépa ojeskrivíta bráillepe ingléspe. Ha koʼag̃aite peve ojejapo puvlikasión umi isiégovape g̃uarã, péro koʼág̃a ojerekóma mas de 50 idiómape. ¿Mbaʼéichapa ojeprepara koʼã puvlikasión?

¿Mbaʼéichapa ojejapo umi puvlikasionkuéra isiégovape g̃uarã?

Pe primer páso haʼe hína ojekopia bráillepe umi puvlikasión ikatu hag̃uáicha umi isiégova olee. Michael Millen ombaʼapóva pe Servísio de Prosesamiénto de Téxto oĩva Páttersonpe, heʼi: “Ymavémi roipuru vaʼerã umi prográma ndahaʼéiva ñane organisasión mbaʼe, péro umíva ndoguerekói vaʼekue heta idióma, upévare ijetuʼu oréve rombohasa hag̃ua heta idiómape umi puvlikasión bráillepe. Péro koʼág̃a roipuru rupi pe prográma WTS ikatu rombohasa umi puvlikasión bráillepe hetaiterei idiómape. Ko prográma ningo ndaijojahái. ¡Ndaiporichéne ótro peichagua!”.

Umi puvlikasión oĩva bráillepe ndahaʼéi ojekopiánteva síno tekotevẽ avei ojedeskrivi umi taʼangakuéra. Por ehémplo, pe taʼanga oĩva pe lívro ¡Jaikóta vyʼápe pára siémpre! apére ojedeskrivi kóicha bráillepe: “Peteĩ kuimbaʼe oguata hína ohóvo peteĩ tape poʼíre oĩháme heta yvoty porã porã ha umi sérro ha montáña ijyvatéva”. Jamshed haʼéva peteĩ ermáno prekursór ha siérvo ministeriál isiégova heʼi: “Umi deskripsión oguerekóva umi taʼangakuéra ivaliosoiterei chéve g̃uarã”.

Ojeskrivipa rire umi puvlikasión bráillepe, oñemondo umi sukursálpe ikatu hag̃uáicha oñeimprimi, ha upearã oipuru hikuái umi kuatia noñembyaimoʼãiva péicha péichante ojepurúramo jepe heta vése. Upe rire oñemohenda porã umi páhina ha upéi oñenkuaderna ha oñemondo umi ótra puvlikasión ndive, térã oñemondo chupekuéra ojepurúvo umi servísio gratuíto orekóva umi korréo umi isiégovape g̃uarã. Ha oiméramo peteĩ ermáno oikotevẽtereíma peteĩ puvlikasión, pe sukursál ohecha pyaʼe porã omondo chupe pe puvlikasión oikotevẽtava.

Ojejapo hag̃ua entéro koʼã mbaʼe oñekotevẽ heta tiémpo ha oguereko avei heta gásto. Por ehémplo, ñane imprénta oĩva Wállkillpe ojapo hag̃ua 2 Biblia bráillepe otarda el mísmo tiémpo oñekotevẽva ojejapo hag̃ua 50.000 Biblia normál. Peteĩ Biblia braille grádo 2 oguereko voi 25 volúmen ingléspe, ha umi materiál oñekotevẽva ojejapo hag̃ua upe Biblia hepyve 123 vése mas peteĩ Biblia normálgui.a Por ehémplo pe ijapénte voi ovale 150 dólar rupi (1 millón de guaranírupi).

¿Mbaʼéichapa oñeñandu umi oipytyvõva ojejapo hag̃ua umi puvlikasión bráillepe? Nadia, oĩva pe sukursál de Sudáfricape heʼi: “Ñane ermanokuéra siégo térã ndohechaporãivape ningo ijetuʼu anga heta mbaʼe. Upévare chéve g̃uarã haʼe peteĩ priviléhio ajapo álgo hesehapekuéra. Che ahechakuaa mbaʼeichaitépa Jehová ohayhu chupekuéra”.

Oĩramo oaprendeséva olee hag̃ua bráillepe

Peteĩ persóna siéga ndoleekuaáiramo bráillepe, ¿mbaʼépa ikatu ojapo? Upearã ojejapo peteĩ folléto hérava Aprenda a leer braille. Ko folléto ojejapo ikatu hag̃uáicha peteĩ persóna ohecháva oipytyvõ peteĩ isiégovape olekuaa hag̃ua, oreko rupi peteĩ téxto normál ha peteĩ oĩva bráillepe. Ko folléto ogueru avei peteĩ rreglaʼi ha peteĩ punsón ojeskrivi hag̃ua bráillepe, ikatu hag̃uáicha pe persóna oaprende avei oskrivikuaa hag̃ua. Ha péicha ifasilvéta chupe omemorisa umi létra opokópente hese olee hag̃ua.

‘Ndaikatúi aiko heseʼỹ’

¿Mbaʼéichapa oipytyvõ umi puvlikasión oĩva bráillepe umi ñane ermanokuéra isiégo térã ndohechaporãivape? Jahechamína mbaʼépa heʼi ermáno Ernst, oikóva Haitípe. Haʼe ohómi rreunionhápe péro ndorekói ni peteĩ puvlikasión oĩva bráillepe. Upévare tekotevẽmante vaʼekue omemorisa umi mbaʼe heʼítava ipárte jave ha umi komentário ojapótava. Haʼe heʼi: “Koʼág̃a ideʼotroite pórke ikatúntema ahupi la che po chegusta vove akomenta hag̃ua. Avei añandu arresiviha el mísmo aliménto espirituál ha arekoha peteĩ lugár kongregasiónpe”.

Jan haʼe peteĩ ansiáno de kongregasión oikóva Áustriape. Haʼe ningo ndohechaporãiete voi ha upéicharõ jepe omoakã pe Ñemañaha Ñehesaʼỹijo ha pe Estúdio bíblico kongregasionpegua. Haʼe omombeʼu: “Umi ñane puvlikasionkuéra oĩva bráillepe ifasileterei ñantende porã hag̃ua. Por ehémplo ikatu apilla mbaʼe páhinapepa aime, avei ikatu pyaʼe atopa umi nóta, ha umi deskripsión oguerekóva umi taʼangakuéra katu chepytyvõ antende porãve hag̃ua la omboʼeséva”.

Seon-ok haʼe peteĩ prekursóra oikóva Corea del Súrpe, haʼe ningo ndohechái ha avei nohendúi. Anteve kuri haʼe rreunionhápe oikotevẽ peteĩ persóna ojapóva chupe séña opokóvo ipóre ikatu hag̃uáicha haʼe ontende pe rreunión, péro koʼág̃a haʼe ijeheguieténtema voi olee umi puvlikasión oĩva bráillepe. Haʼe omombeʼu: “Chéve g̃uarã ijetuʼueterei antende hag̃ua umi ótra puvlikasionkuéra, umívape ningo ofalta jepi umi puntoʼi térã pe kuatia ipererĩeterei ha ilínea karẽmba. Péro umi puvlikasión ojapóva umi testígo de Jehová ifasilve chéve alee hag̃ua pórke pe kuatia oipurúva hikuái iporãve ha umi puntíto oñentende porã. Ymavémi che astudia hag̃ua rreunionrã oĩmante vaʼerã chepytyvõva, péro koʼág̃a cheañóntema ikatu astudia. Chegustaiterei voi ajeprepara la rreunionrã ha avei akomenta. Che aleepaite umi puvlikasión oĩva guive bráillepe, ha ikatu voi haʼe ndaikatuiha aiko heseʼỹ”.

Umi puvlikasión oĩva bráillepe, umi ótro ñane puvlikasionkuéraicha avei oreko ko nóta: “Ko puvlikasión noñevendéi. Ojejapo donasión voluntária rupive ikatu hag̃uáicha umi hénte oparupigua oikuaa la Biblia omboʼéva”. Peẽ pemeʼẽ rupi pene kontrivusión pe aliménto espirituál ikatu og̃uahẽ enterovépe, inklúso umi persóna isiégova térã ndohechaporãivape g̃uarã. Upearã peipuru umi diferénte método jatopáva donate.jw.org. ¡Roagradeseterei ningo peẽme pendepojeraiterei haguére!