Jehová ndahesaráiri umi sórdogui

Ñandejára Jehová oipota entéro persóna, tahaʼe haʼéva la isituasión, oikuaave chupe ha Irréinogui (1 Timoteo 2:3, 4). Upévare ñande testígo de Jehová, jatradusi hetave idiómape la Biblia ha avei umi informasión ojestudia hag̃ua. Péicha ikatúta hetave persónape og̃uahẽ koʼã informasión, ha umíva apytépe umi sórdope avei. Ñane organisasión ojapo hetaiterei vidéo umi sórdope g̃uarã, ha oĩ mas de 100 kláse de lenguáhe de séñape.a ¿Mbaʼéichapa ojejapo ha oñemog̃uahẽ umi héntepe koʼã vidéo? ¿Ha mbaʼéichapa omehora ohóvo ojejapo lája koʼã vidéo?

¿Mbaʼéicha ojegrava umi vidéo lenguáhe de séñape?

Ko yvy tuichakuére oĩ heta ekípo otradusíva umi puvlikasión diferénte lenguáhe de séñape. Káda ekípo oanalisa porã umi puvlikasión otradusítava. Upéi odesidi mbaʼéichapa opyta porãvéta pe informasión lenguáhe de séñape. Upéi oñepyrũma ograva hikuái umi vidéo. Koʼág̃a oĩ 60 ekípo otradusi meméva umi puvlikasión ojepurúva ojestudia hag̃ua la Biblia, ha ótro 40 ombaʼapo sapyʼapyʼa.

Yma ningo hepyve vaʼekue ojejapo hag̃ua umi vidéo lenguáhe de séñape. Umi kámara ha ótro ekípo ojegrava hag̃ua hepyeterei. Avei oñekotevẽ vaʼekue peteĩ estúdio de gravasión. Sapyʼánte tekotevẽ ojejapo upéva de seroite ha ótra vése katu oñembopyahu vaʼerã peteĩ edifísio oĩmava voi. Ikatu hag̃uáicha peteĩ ekípo de traduksión orekopaite la oikotevẽva ombaʼapo porã hag̃ua, ojegastámi vaʼerã mas 30.000 dólar.b

Ikatu hag̃uáicha ojepuru porãve umi kontrivusionkuéra, ñane organisasión oñehaʼãmbaite ojapo porãve ha isensillove hag̃uáicha pe traduksión. Upévare ojepuru umi ekipamiénto imodernovéva, péro avei ivaratovéva. Ha oñearma rangue peteĩ estúdio de gravasión, káda ekípo ikatu ograva umi vidéo iñofisinaitépe voi oipurúvo peteĩ fóndo vérde. Oiméramo peteĩ gravasión oikotevẽta hetave persónare, ikatu hína káda ermáno térã ermána ograva la otokáva chupe iñofisínape o hogaitépe voi.

Ñane organisasión ojapo avei umi prográma ojepurúva komputadórape, oipytyvõva umi ekípo de traduksiónpe. Mediánte upéva ojejapo hetave vidéo, saʼive tiémpope. Upéva ogustaiterei ñane ermanokuérape. Peteĩ ermáno hérava Alexander heʼi: “Koʼág̃a osẽ hetaiteve vidéo lenguáhe de séñape, péva ningo chembovyʼaiterei. Ha káda día ahecha umi vidéo”.

Koʼã tiémpope, ndohupytýi ni 5.000 dólar oñemoĩmbaitéma hag̃ua peteĩ ekípo de traduksiónpe umi mbaʼe oikotevẽva ombaʼapo hag̃ua. Upéicha rupi ikatu ojejapo umi vidéo hetave lenguáhe de séñape.

¿Mbaʼéicha oñemog̃uahẽ umi sórdope umi vidéo lenguáhe de séñape?

Umi ekípo otermina rire peteĩ traduksión lenguáhe de séñape, oñemog̃uahẽ vaʼerã umi persóna oikotevẽvape. ¿Mbaʼéichapa ojejapo upéva? Yma ningo umi gravasión oñemondo raẽ peteĩ emprésape ha haʼekuéra ombohasa umíva videokasét ha DVD-pe. Ha upe rire ae umíva ojegueraha umi kongregasionkuérape. Ojejapo hag̃ua koʼã mbaʼe heta ojeiko vaʼerã, ha ojegasta vaʼerã heta pláta ha tiémpo. Por ehémplo, áño 2013-pente ojegasta mas de 2 millón de dólar ojejapo hag̃ua umi DVD lenguáhe de séñape.

Umi sórdo ovyʼaiterei oreko haguére koʼãichagua vidéo. Péro ijetuʼu vaʼekue chupekuéra oipuru hag̃ua, pórke amáske osẽ hetave la informasión lenguáhe de séñape, hetave oĩ la videokasét ha DVD. Sapyʼánte peteĩ lívro de la Bíbliante ojegrava hetaiterei DVD-pe. Peteĩ ermáno Brasilpegua hérava Gilnei imanduʼa: “Káda ke roleese peteĩ téxto, primero roheka vaʼerã mbaʼe videokasétpepa oĩ ha upéi roñepyrũ vaʼerã roheka la versíkulo. Ijetuʼueterei vaʼekue upéva”. Peteĩ ermána hérava Rafayane, oipuru meme vaʼekue DVD lenguáhe de séñape, heʼi: “Chemanduʼa káda ke ajapóta che estúdio personál chemokaneʼõ, pórke ahekahápente voi umi téxto ha rreferénsia haʼupaitéma la che óra”. Predikasiónpe umi ermáno oguerahámi vaʼerã umi DVD ha videokasét, ha oĩramo peteĩ oñeinteresáva ohechauka chupe umi vidéo iteletépe voi. Algúno ermáno oraha voi irreproduktór de DVD. Péro tiémpo riremínte, osẽ umi rreproduktór de DVD portátil ha oguerekóva pantálla, umívango ifasilve vaʼekue ojepuru hag̃ua. Bobby, oikóva Estados Unídospe, heʼi: “Rohechaukapa rire peteĩ téxto, rohechaukase jeýramo ótro, heta vése rokambia vaʼerã la DVD. Upépe rotardáma, ha upévare ijetuʼu vaʼekue roipuru la Biblia roñemongeta hag̃ua peteĩ ogajárandi”.

Áño 2013-pe ñane organisasión okrea peteĩ aplikasión hérava JW Library Sign Language. Ko aplikasión rupive umi ermáno ikatu omboguejy ha ohecha umi vidéo iselulár térã itávletpe. Primerorã ko aplikasión osẽ lenguáhe de séña americánopente, upéi 2017-pe ojeaktualisa ikatu hag̃uáicha oreko entéro lenguáhe de séña. Umi ermáno ha ermána oĩva ko yvy tuichakuére ovyʼaiterei. Peteĩ ermáno sórdo oikóva Brasílpe, hérava Juscelino, heʼi: “¡Ni ndaroviaséi kuri! Che apensánte voi mbaʼeichaitépa umi ermáno oĩva pe Kuérpo Governántepe orerayhu, ha oipotaha avei ore roprogresa umi ótro ermánoicha. Osẽrõ guare ko aplikasión avyʼaiterei, ha koʼág̃a koʼýte astudiaseterei la Biblia”.

Koʼág̃a entéro umi vidéo oĩva lenguáhe de séñape osẽma Internétpe ha oĩma disponívle ñande aplikasión JW Library Sign Language-pe. Ojejapo rupi péicha ikatúma ojetradusi, ojegrava ha oĩ disponívle unos kuánto díapente, ha natekotevẽi oñehaʼarõ mése térã áñore. Sapyʼánte osẽ voi al mísmo tiémpo umi ótro idiómandi.

¿Mbaʼéichapa oñeñandu umi ermáno ha ermána haʼéva sórdo? Peteĩ ermána hérava Klízia heʼi: “Jehová ojepyʼapyeterei umi sórdore, upévare ofasilita oréve roreko hag̃ua avei umi informasión de la Biblia. Ndaipóri ótra organisasión ojapóva péicha. Ko múndo tuichakuére ndaipóri oñekompara vaʼerã Jehová organisasión ojapóvare”. Vladimir heʼi: “Umi vidéo ohechauka Jehová ohayhuha umi sórdope, ohayhuháicha umi ótra persónape”.

Umi vidéo osẽva jepi lenguáhe de séñape oreko peteĩ fráse: “Ko puvlikasión noñevendéi. Ojejapo donasión voluntária rupive ikatu hag̃uáicha umi hénte oparupigua oikuaa la Biblia omboʼéva”. Ore pyʼaite guive roagradese peẽme pemeʼẽ haguére pene kontrivusión, umíva apytépe umi pemeʼẽva donate.jw.org rupive. Umíva rupive ikatu ojejapo hetave Biblia ha vidéo lenguáhe de séñape, oipytyvõva umi sórdope oikuaa hag̃ua Jehovápe.