Rojasegura umi Salón del Reino taisegúro pe pandémia aja

Marzo de 2022 oñepyrũmíre, jw.org-pe oñemoĩ kuri ko anúnsio: “Rovyʼaiterei romombeʼúvo peẽme Kuérpo Governánte odesidi hague entéro umi kongregasión ikatuha oñembyaty jey en persóna semána del 1 de abril guive, noiméiramo pe goviérno lokál oproivi gueteri upéva”. Entéro testígo de Jehová oĩva ko múndo tuichakuére ovyʼaiterei kuri oleérõ guare ko notísia. Péro upérõ pe pandémia osegi gueteri.a ¿Mbaʼe mbaʼépa tekotevẽ raʼe ojejogua ha oñekambia, ojeprotehe hag̃ua umi ohóvape rreunionhápe? ¿Oĩta piko preparádo umi Salón del Reino orresivi hag̃ua la héntepe 2 áño haguépe?

Umi ñane ermanokuéra ningo ojapóma heta mése oprepara hague umi Salón del Reino, ojejapo jey hag̃ua upépe umi rreunión.

Diferénte mbaʼe oñekotevẽva, diferénte solusión

Un mes haguépente, oñesuspende rire umi rreunión en persóna áño 2020-pe, pe Departaménto Mundiál de Diséño ha Konstruksión oĩva Wárwickpe (Nueva York), oñepyrũ okalkula mbaʼéichapa pe pandémia ikatu oafekta umi Salón del Réinope, ha mbaʼépa tekotevẽ ojejapo ñañembyaty jey hag̃ua jajapeligraʼỹre.

Káda lugárpe idiferénte umi mbaʼe oñekotevẽva, odepende la lugár rehe. Matthew De Sanctis, ombaʼapóva Departaménto Mundiál de Diséño ha Konstruksiónpe, omombeʼu: “Algúna pártepe ijetuʼueterei etopa hag̃ua moõpa ikatu ejepohéi. Peteĩ Salón del Réinope ndaipóriramo água korriénte, pe y ojejogua vaʼerã térã ojegueroja vaʼerã algún póso térã rríogui oĩva ag̃ui. Ótro lugárpe katu umi goviérno ojerure oñemoĩ hag̃ua áire akondisionádo, sistéma de rrenovasión de áire, ha letréro oipytyvõva umi héntepe hesãive ha ipotĩve hag̃ua”.

¿Mbaʼépa ojapo ñane ermanokuéra osolusiona hag̃ua koʼã provléma? Matthew omombeʼu heta Salónpe g̃uarã ojetopa hague peteĩ solusión “sensíllo, varáto ha oikoitéva”. Por ehémplo, ñane ermanokuéra Papúa Nueva Guineapegua oñeinhenia ha otopa peteĩ fórma isensíllova, péro oikoitéva, ojepohéi hag̃ua. Oipuru hikuái peteĩ vidón de plástiko orekóva 20 lítro ha omoĩ hese peteĩ kanílla. Péicha umi Salón del Reino oĩva kampañaháre oĩma ojepuru hag̃uáicha, ha ojegasta hese 40 dólarnte. Avei ojejogua peteĩ proveedór de Ásiagui mas de 6.000 lavamáno portátil oikoitéva, ha oñemondo umíva umi Salón del Reino Áfricape.

Ótro lugárpe katu oñeinstala térã ojearregla umi ventiladór ha pe sistéma ojepurúva oñembopyahu hag̃ua pe áire, ikatu hag̃uáicha ipiroʼymie pe Salón ryepy. Avei heta kongregasión ojogua umi káño pukuichagua oñemoĩ hag̃ua hese pe mikrófono, ani hag̃ua ojepoko pe mikrófonore oñekomentáta jave. Ha ani hag̃ua pyaʼeterei iñasarambi pe vírus, ojejapo opa ikatúva ojejoko hag̃ua upéva. Por ehémplo, pyʼỹinte oñedesinfekta umi okẽ ha umi kanílla ojepurúva ojepohéi hag̃ua. Algúno kongregasión oinstala pe váñope umi kanílla natekotevẽihápe ni epoko hese oñehẽ hag̃ua la y. Chílepe, oñemoĩ hag̃ua en fórma porã umi Salón, ojegasta 1.400 dólar rupi káda Salónre.

Iñimportanteterei ningo umi Salón del Reino koʼág̃a isegúro, péro lomímonte umi ermanokuéra heta ombaʼapo ojepuru porã hag̃uáicha umi kontrivusión. Por ehémplo, algúno paíspe umi ermáno oaprovecha umi ajúda omeʼẽva pe goviérno ojogua hag̃ua umi lavamáno portátil ha avei umi kañoichagua ojepurúva mikrófonore. Avei umi sukursál oñopytyvõ ojogua hag̃ua en kantida umi prodúkto oñekotevẽva ha péicha ojeaorrave. Umi sukursál ha pe Departaménto Mundiál de Kómpra heta vése oñemongeta diréktamente umi favrikántendi, upéicha varatovépe osẽ ha pyaʼeve og̃uahẽ la oñekotevẽva.

“Umi mbaʼe ojejapóva chemoñeñandu trankíla”

Umi mbaʼe ojejapóva umi Salón del Réinope isegurove hag̃ua, oprotehe ha otrankilisa umi ohóvape rreunionhápe. Peteĩ ermána Perupegua, hérava Dulcine heʼi “okyhyjeʼimi hague” oikuaárõ guare ñañembyaty jeytamaha umi Salón del Réinope. Haʼe heʼi: “Oñepyrũrõ guare la pandémia che areko kuri Covid, upévare apensa haguénte aha jeytaha Salónpe ha ikatuha hína añekontahia jey, chepyʼapyeterei kuri. Péro aikérõ guare pe Salón del Réinope, ahecha umi ansiáno ojapóma hague opa ikatúva roñeñandu hag̃ua segúro. Oĩ kuri heta desinfektánte ha ahechakuaa natekotevẽiha avei ropoko umi mikrófonore rokomentáta jave. Avei ojejapóma kuri arréglo oñedesinfekta hag̃ua pe Salón, oñepyrũ mboyve ha opa rire káda rreunión. Umi mbaʼe ojejapóva chemoñeñandu trankíla”.b

Umi mbaʼe ohasáva ñane ermána Sara oikóva Zámbiape katu idiferentete voi, haʼe omombeʼu: “Ojapo unos kuánto mése che ména omano hague oreko rupi Covid. Chepyʼapy mbaʼéichapa añeñandúta kuri aike jeývo primera ves Salónpe heseʼỹ”. ¿Mbaʼéichapa amo ipahápe oñeñandu raʼe oho jeývo Salónpe? Haʼe omombeʼu: “Umi rreunión ojejapóva presensiál ohechauka chéve Jehová oĩha ñande ykére koʼã ára pahápe. Upépe mas ke núnka añandu mbaʼéichapa umi ansiáno ha umi ermáno chemokyreʼỹ, cherayhu ha cheapoja”.

Ko múndo tuichakuére ñane ermáno ha ermanakuéra ovyʼaiterei ikatu haguére oho jey umi Salón de Réinope. Roagradeseterei peẽme pene kontrivusiónre, heta umíva apytépe umi pemeʼẽva donate.jw.org rupive. Upéicha rupi rojasegura entéro umi ermáno oñeñanduha segúro porã umi Salón del Réinope.