Jesús oñeʼẽ umi mbaʼerepýre

Jesús opytámarõ okaru pe fariséo rógape, heta hénte oñembyaty pe okápe ha ohaʼarõjoa chupe. Péicha oikóma vaʼekue avei oĩrõ guare Galiléape (Marcos 1:33; 2:2; 3:9). Koʼág̃a Judéape, heta persóna ohechase chupe ha ohenduse oporomboʼe jave. ¡Ajépa idiferentete hikuái umi fariséogui okaru vaʼekue hendive!

Ñepyrũrã Jesús heʼi peteĩ mbaʼe iñimportantetereíva idisipulokuérape g̃uarã. Haʼe heʼi: “Peñeñangarekóke umi fariséo levadúragui, upéva hína tovamokõi”. Jesús heʼíma vaʼekue voi umi disípulope upéva. Péro okarúvo pe fariséo rógape, koʼytevéntema ohechakuaa tekotevẽha umi disípulo ojekuida chuguikuéra (Lucas 12:1; Marcos 8:15). Umi fariséo ningo iñañaiterei, péro imbaʼeporã guaʼu hikuái omoʼã hag̃ua upéva. Jesús oipota umi hénte ohechakuaa upe pelígro, upévare heʼi: “Ndaipóri hína mbaʼeve oñeñomi porãva ikatuʼỹ vaʼerã upe rire ojehecha, térã oñemokañýva ikatuʼỹ vaʼerã upe rire ojekuaa” (Lucas 12:2).

Oime vaʼerã umi hénte oúva Jesús rendápe haʼe hína Judeagua. Koʼãva ningo nohendúi kuri chupe omboʼérõ guare Galiléape. Upévare Jesús orrepeti jey umi mbaʼe iñimportantevéva omboʼéma vaʼekue. Haʼe heʼi umi ohendúvape chupe: “Ani pekyhyje umi ikatúvagui pendejuka, ha upéi ndaikatuvéima ojapo mbaʼeve” (Lucas 12:4). Heʼíma haguéicha ymave, entéro osegiséva chupe ojerovia vaʼerã Ñandejára oñangarekotaha hesekuéra. Avei tekotevẽ oikuaa hikuái pe Yvypóra Raʼýpe, ha ontende vaʼerã Ñandejára ikatuha oipytyvõ chupekuéra (Mateo 10:19, 20, 26-33; 12:31, 32).

Upéi pe hénte apytégui, peteĩ kuimbaʼe osẽ heʼi chupe: “Mboʼehára, eremína che ermánope tombojaʼo chéve umi mbaʼe oheja vaʼekue oréve ore ru” (Lucas 12:13). Pe Léipe heʼi porã pe taʼýra ypykuépe oñemeʼẽ vaʼerãha el dóvle pe erénsia otokávagui káda uno iñermanokuérape. Upévare ndahasyiete oñesolusiona hag̃ua upe provléma (Deuteronomio 21:17). Péro amalisia ko kuimbaʼe oipotave hína upe otokávagui chupe. Jesús noñentremetéi upe pléitope, ha heʼi pe kuimbaʼépe: “¿Máva piko chemoĩ huésramo pende apytépe? ¿Mbaʼére piko che ambojaʼóta peẽme?” (Lucas 12:14).

Upéi omeʼẽ ko konsého enterovépe: “Peñatende porãke ha ani pendetaryrýi mbaʼevére. Peguerekóramo jepe heta mbaʼe, pende rekove nodependéi hína umi mbaʼe peguerekóva rehe” (Lucas 12:15). Peteĩ persóna ikatu ipláta heta, péro oúramo omano, imbaʼerepy opytapa reíta. Upéi Jesús omombeʼu peteĩ ehémplo ohechauka porãva ndovaleiha ñandetaryrýi, síno iñimportantetereiveha ñaime porã Ñandejárandi.

Haʼe heʼi: “Peteĩ karai ipláta hetávape osẽ porãiterei ikosécha. Upémarõ oñepyrũ heʼi ipyʼapýpe: ‘¿Mbaʼéiko la ajapomítava? Ndarekói moõpa ambyatypáta che kóga’. Upéi heʼi: ‘Aikuaáma mbaʼépa ajapóta, aitypáta koʼã che galponkuéra ha amopuʼãta tuichavéva, ha upépe ambyatypáta che trígo ha opa mbaʼe porã arekóva. Upe rire haʼéta chejupe: “Koʼág̃a aguerekóma heta mbaʼe porã iñongatupy, aiporu hag̃ua heta áñore. Ikatúma pyʼaguapýpe akaru, amboyʼu ha avyʼa”’. Ñandejára katu heʼi chupe: ‘Aje piko ndevyroite, ko pyharépe ojepeʼáta ndehegui nde rekove. ¿Mávapepa opytapáta upéicharõ umi mbaʼeta rembyaty vaʼekue?’. Péicha oiko umi ombyatývare mbaʼerepy ijupe g̃uarã, péro imboriahúva Ñandejára renondépe” (Lucas 12:16-21).

Ojapo un áño imédio Jesús oñeʼẽ hague pe platarayhúre pe Sermón del Móntepe. ¿Mbaʼérepa upéicharõ orrepeti jey koʼág̃a? Pórke umi ohendúva chupe, tahaʼe idisipulokuéra térã umi ótra hénte, ikatu hína omotenonde umi mbaʼerepy. Ikatu avei oĩ ojepyʼapyetereíva hemikotevẽre ha upéicha rupi ombotapykue Jehovápe.

Haʼe heʼi: “Anive pejepyʼapyeterei pendejehe, peikuaaségui mbaʼépa pekarúta, térã mbaʼépa pemondéta. [...] Pemañamíntena umi yryvu rehe, haʼekuéra noñemitỹi ha nomonoʼõi. Ndoguerekói galpón ni sílo, péro Ñandejára omongaru chupekuéra. ¡Peẽngo koʼýte pevaleve hína umi guyrágui! [...] Pemañamíntena umi líriore, mbaʼéichapa okakuaa, haʼekuéra nombaʼapói ni ndojapói ijaorã. Péro che haʼe peẽme: ni Salomón haʼéramo guare pe mburuvicha iplatavéva, noñemondéi vaʼekue haʼekuéraicha. [...] Anive pendepyʼatarova ha peheka mbaʼépa peʼúta, térã pemboyʼúta, ha anive pejepyʼapyeterei. [...] Pende Ru oikuaa voi peẽ peikotevẽha koʼã mbaʼe. Pemotenonde meme katu Irréino, ha koʼã mbaʼe oñemeʼẽta avei peẽme” (Lucas 12:22-31; Mateo 6:25-33).

¿Mávapa umi omotenondéva Ñandejára Rréino? Jesús heʼi kuri oĩha saʼieterei ojapóva upéva. Heʼi voi hesekuéra “che ovechakuéra mbovymi”. Tiémpo rire, oñemyesakã oĩtaha 144.000 persónante. ¿Mbaʼépa ohupytýta hikuái? Jesús oasegura chupekuéra: “Pende Ru odesidíma omeʼẽtaha peẽme pe Rréino”. Koʼã persóna ndoikói ombyaty pláta ni mbaʼerepy ko yvy ape ári, ikatuhápe oñemonda chuguikuéra. Upéva rangue, iñimportanteve chupekuéra g̃uarã ombyaty “mbaʼerepy yvágape”, pe lugár ohotahápe ogoverna hag̃ua Crístondi. Ha umi mbaʼerepy oĩva yvágape ‘ndopamoʼãi arakaʼeve’ (Lucas 12:32-34).