Ikatu oime nde releese vaʼekue avei la Biblia, péro ejedehánte reñeñandu rupi koʼã persónaicha. Hetápe ijetuʼúnte voi olee hag̃ua la Biblia. Péro, ¿resegínepa repensa upéicha reikuaáramo umi konsého oĩva upépe ikatuha nepytyvõ revyʼave hag̃ua? ¿Reñanimánepa relee reikuaáramo mbaʼépa rejapo vaʼerã igustove hag̃ua ndéve relee jave?

Heta persóna ningo oñepyrũ olee la Biblia ha ohechakuaa mbaʼeichaitépa ideprovécho chupekuéra. Jahechamína mbaʼépa heʼi hikuái.

Ezekiel, orekóva 20 áño arimi, heʼi: “Yma ningo che aikomínte vaʼekue, haʼete umi omaneháva ohóvo ikóche péro ni ndoikuaáiva moõitépa ohose. Péro alee rire la Biblia aikuaáma mbaʼépa la ahupytyséva che rekovépe. Upépe atopa umi konsého káda día ideprovéchova chéve”.

Frieda, orekóva avei 20 áño arimi, heʼi: “Che ningo chepochypa rei vaʼekue, péro koʼág̃a alee rire la Biblia ajejokokuaavéma. Upéva chepytyvõ ajogueraha porãve hag̃ua che rapichakuérandi, ha koʼág̃a hetavéma che amígo”.

Peteĩ kuñakarai hérava Eunice ha orekómava mas de 50 áño, heʼi: “La Biblia tuichaiterei chepytyvõ hína akambia hag̃ua che rekove, koʼág̃a añehaʼã meme ajapo umi mbaʼe iporãva”.

Nde ikatu avei revyʼave releéramo la Biblia, ojapoháicha koʼã ha hetaiteve persóna (Isaías 48:17, 18). La Biblia ikatu nepytyvõ redesidi porã hag̃ua, reguereko hag̃ua amígo tee, reñeñandu porãve hag̃ua ha reñemoag̃ui hag̃ua Ñandejárare, upéva peteĩ mbaʼe ndaijojaháiva. La Biblia ou Ñandejáragui voi, ha haʼe siémpre omeʼẽ umi konsého ideprovéchotava ñandéve. Upévare jasegíramo koʼãva katuete ñasẽ porãta.

Péro ñañepyrũ hag̃uánte la ijetuʼu. ¿Mbaʼépa nepytyvõta releese hag̃ua la Biblia ha igústo hag̃ua ndéve? Umi ótro artíkulo oñeʼẽta upévare.

¿Mbaʼéichapa ikatu vyʼápe relee la Biblia? ¿Mbaʼépa ikatu rejapo ideprovechove hag̃ua ndéve? Jahechamína 5 konsého oipytyvõmava hetápe ha ikatúva avei nepytyvõ ndéve.

Elehi peteĩ lugár itrankílova. Eiporavo vaʼerã peteĩ lugár ipiroʼýva, hesakã porãva, ha mbaʼeve ni avave nemolestaʼỹ hag̃uáme. Péicha rejapóramo, ifasilvéta ndéve reñekonsentra hag̃ua.

Elee eaprende hag̃uáicha. La Biblia ningo peteĩ rregálo omeʼẽva ñandéve ñande Ru yvagapegua. Ha ojapoháicha peteĩ mitã oaprendeséva itúagui, upéicha avei reñehaʼã vaʼerã neumílde relee jave la Biblia. Ha oiméramo oñeñeʼẽ vai raʼe ndéve la Bíbliare térã ndéve voi ndahaʼéi la ndegustapáva, eñehaʼã emboyke koʼã pensamiénto ha eheja Ñandejára tanemboʼe (Salmo 25:4).

Eñemboʼe elee mboyve. La Bíbliape jatopa umi mbaʼe Ñandejára opensáva, upévare jaʼekuaa haʼe añoite ikatuha ñanepytyvõ ñantende porã hag̃ua umíva. Haʼe opromete omeʼẽtaha ijespíritu sánto “umi ojerurévape chupe” (Lucas 11:13). Ñandejára espíritu katuete nepytyvõta rentende hag̃ua mbaʼéichapa haʼe opensa. Ha péicha saʼi saʼípe rentendéta rehóvo “umi mbaʼe ipypukuvéva oúva Ñandejáragui” (1 Corintios 2:10).

Eñehaʼã entende. Ani elee pyaʼe pyaʼe, síno ejepyʼamongeta pe releévare. Ikatu voi reñeporandu: “¿Mbaʼépa ikatu aaprende ko persóna aleévagui hína? ¿Mbaʼéichapa ikatu ajapo la aaprendéva?”.

Reikuaa vaʼerã mbaʼérepa releese hína. Relee jave la Biblia, eñehaʼã etopa peteĩ mbaʼe jepe nepytyvõtava ha ikatúva ideprovécho ndéve, péicha katuete igustovéta ndéve relee. Por ehémplo, eñehaʼã eikuaave Ñandejárape, ekambia nde lája, etrata porãve ne ména térã ne rembirekópe, ha umícha. Upéi ikatu reheka peteĩ párte oĩva la Bíbliape nepytyvõtava rehupyty hag̃ua koʼã mbaʼe.a

Koʼã 5 konsého jahecha vaʼekue ikatúma nepytyvõ reñepyrũ hag̃ua relee la Biblia. Péro, ¿mbaʼépa ikatu rejapo ideprovechove hag̃ua ndéve umi mbaʼe releéva? Pe ótro artíkulo ohechaukáta upéva.

¿Mbaʼéguipa odependéta hína relee hag̃ua vyʼápe la Biblia ha ani hag̃ua ikaigue ndéve? Upéva en párte odependéta nderehe, péro jahechamína mbaʼe mbaʼépa ikatu nepytyvõ upearã.

Elehi peteĩ Biblia ojetradusíva hekópe ha ndahasýiva oñentende hag̃ua. Katuete ningo nemongaiguéta releéramo peteĩ Biblia orekóva umi palávra ndojepuruvéimava térã hasyetereíva oñentende hag̃ua. Upévare reheka vaʼerã peteĩ Biblia isensíllova ha ikatúva opoko ne korasõre, péro avei ojetradusíva hekópe ha ojeskrivi vaʼekue oĩ hagueichaite pe orihinálpe.a

Eipuru pe teknolohía. La majoría umi Biblia jaikuaáva ningo haʼe peteĩ lívro, péro koʼág̃arupi ikatu avei remboguejy upéva Internétgui térã releéntema upégui, tahaʼe ne komputadóra, távlet térã selulárpe. Sapyʼánte ikatu voi rekompara peteĩ versíkulo ótrore térã ehecha mbaʼépa heʼi ótra Biblia. Ereko avei la opsión rehecha hag̃ua mbaʼéichapa ojetradusi upe versíkulo ótro idiómape. ¿Ha oiméramo rehendusénte relee rangue? Oĩ avei Biblia ojegraváva heta idiómape. Ikatu rehendu umíva rehokuévo nde travahohápe, rejaojohéivo térã rejapo jave ótra kósa natekotevẽihápe reñekonsentraiterei. Etanteána peteĩva koʼã mbaʼégui rehecha hag̃ua mavaitévapa ou porãvéta ndéve.

Eheka informasión. Oĩ heta puvlikasión ojejapóva oñentende porãve hag̃ua la Biblia ha ikatúva ideprovécho ndéve. Por ehémplo, oĩ mápa ohechaukáva umi lugár oñemensionáva la Bíbliape ha ikatúva nepytyvõ reñeimahina hag̃ua umi mbaʼe oiko vaʼekue upépe. Ha ikatu hag̃uáicha rentende heta párte oĩva la Bíbliape, oĩ umi artíkulo osẽva jepi ko rrevístape oexplikáva umi mbaʼe, térã ikatu avei reike ore páhina de Internétpe: www.jw.org/gug.

Eñepyrũ ótra pártegui. Oiméramo nandestirapái relee la Biblia oñepyrũ guive opa peve, ikatu reñepyrũ ótra párte ndegustavévagui. Por ehémplo, ikatu relee umi personáhe bíblico istória reikuaa porãve hag̃ua chupekuéra. Upearã ikatu nepytyvõ pe rrekuádro “Eikuaa umi personáhe bíblicope rentende porãve hag̃ua la Biblia”. Ikatu avei relee por téma térã en órden asegún umi mbaʼe oiko vaʼekue. ¿Mbaʼépa ere etanteáramo peteĩva koʼã mbaʼégui?

Umi konsého oĩva la Bíbliape ningo ou ñande Apoharégui voi, upévare jaʼekuaa haʼeha peteĩ lívro ndaijojaháiva (2 Timoteo 3:16). Umi mbaʼe oĩva pype ikatu okambiaite hína nde rekove. La Biblia voi heʼi: “Ñandejára Ñeʼẽ oikove ha ipoderosoiterei” (Hebreos 4:12). Jahechamína mbaʼéichapa la Biblia ikatu nepytyvõ, primero omeʼẽvo umi konsého ideprovéchotava ndéve káda día, ha segundo reikuaa porãve hag̃ua Ñandejárape ha ipromesakuéra (1 Timoteo 4:8; Santiago 4:8).

Ikatu ndegia koʼág̃ama voi. La Bíbliape oĩ konsého nepytyvõtava remehora hag̃ua, por ehémplo:

• Rejogueraha porãve hag̃ua ne hénte térã ótrondi (Efesios 4:31, 32; 5:22, 25, 28, 33).

• Neresãi ha reñeñandu porãve hag̃ua (Salmo 37:8; Proverbios 17:22).

• Nderekoporã hag̃ua (1 Corintios 6:9, 10).

• Reikuaa hag̃ua mbaʼéichapa ikatu rehupyty umi ne remikotevẽ (Proverbios 10:4; 28:19; Efesios 4:28).a

Vicent ha Annalou ningo peteĩ matrimónio imitãva oikóva Ásiape. Haʼekuéra ohechakuaa mbaʼeichaitépa ideprovécho umi konsého oĩva la Bíbliape. Umi omenda ramóvape ningo ijetuʼúnte voi ojepokuaa hag̃ua ojuehe ha oñemongeta meme hag̃ua, ha chupekuéra ijetuʼu avei kuri. Péro haʼekuéra oñepyrũ osegi umi konsého oĩva la Bíbliape. ¿Oipytyvõpa raʼe upéva chupekuéra? Vicent omombeʼu: “Umi mbaʼe alee vaʼekue la Bíbliape chepytyvõ ambohovaikuaa hag̃ua umi provléma roguerekóva ha rovyʼave hag̃ua”. Hembireko heʼi avei: “Umi ehémplo oĩva la Bíbliape tuichaiterei orepytyvõ. Koʼág̃a avyʼaiterei che ménandi, ha roguereko méta oñondive orembovyʼáva avei”.

Nepytyvõ reikuaa hag̃ua Ñandejárape. Péro la Biblia ndahaʼéi imatrimóniope añónte oipytyvõva Vícentpe. Haʼe heʼive: “Alee rupi la Biblia, koʼág̃a añandu aikuaa porãveha Jehovápe”. Vicent heʼi vaʼekue ohechauka porã la Biblia ikatuha avei nepytyvõ reñemoag̃ui hag̃ua Ñandejárare. Resegi rupi ikonsehokuéra ndahaʼéi revyʼátanteva, síno ikatúta voi reiko iñamígoramo. Rehechakuaáta avei Iñeʼẽme heʼiha enterove ikatuha jaiko vyʼápe pára siémpre (1 Timoteo 6:19). ¡Ajépa iporãite ko promésa! Ndaipóri ótro lívro ikatu vaʼerã omeʼẽ peichagua esperánsa.

Reñepyrũramo relee la Biblia, ha rejepokuaáramo rejapo upéva, rehechakuaáta mbaʼéichapa ikatu ndegia koʼág̃ama voi ha avei ikatúta reikuaa porãve Ñandejárape. Péro amáske relee rehóvo retopáta katuete heta párte ijetuʼu léntova rentende hag̃ua. ¿Mbaʼépa rejapokuaa umícha jave? Ojapo 2.000 áño rasa peteĩ etíope ohasa hague avei upe situasiónre. Haʼe oreko vaʼekue heta pregúnta la Bíbliagui, ha oñeporandúrõ guare chupe ontendépa umi mbaʼe oleéva, haʼe heʼi: “Añetehápe, ¿mbaʼéicha piko antendéta, ndaipóriramo omyesakãva chéve?”.b Upéi oheja peteĩ mboʼehára katupyry hérava Felipe oipytyvõ chupe ontende hag̃ua (Hechos 8:30, 31, 34). Nde avei rentende porãsevéramo la Biblia, ikatu remyenyhẽ pe formulário oĩva Internétpe www.jw.org/gug, térã ikatu reskrivi peteĩva umi direksiónpe oĩva páhina 2-pe. Ikatu avei reñemongeta umi testígo de Jehovándi, térã eho peteĩ Salón del Reino opyta porãvehápe ndéve. ¿Mbaʼére piko nereñehaʼãi koestediaitéma voi ekonsegi peteĩ Biblia ha reheja upéva tanepytyvõ ha tandegia?