Heta oĩ heʼíva Ñandejára haʼeha peteĩ mistério, ndojepyʼapyiha ñanderehe ha ipyʼahatãha, upévare ijetuʼu chupekuéra ohayhu hag̃ua chupe. Jahechamína mbaʼépa heʼi mbohapy tapicha:

• “Añemboʼéramo jepe Ñandejárape chepytyvõmi hag̃ua, haʼetévaicha chéve mombyryeterei oĩva chehegui. Apensa ndaikatuiha jaikuaa chupe ha haʼe nañanderayhuiha voi.” (Marco, Italiagua.)

• “Chemanduʼa aservise hague Ñandejárape, péro ijetuʼu vaʼekue chéve aimoʼãgui haʼe ñandekastigasenteha voi. Ha naimoʼãi haʼe ñanderayhúne hag̃ua, síno ipyʼahatãha.” (Rosa, Guatemalagua.)

• “Chemitãkuñaʼíme apensa vaʼekue Ñandejára ojesarekoha ñanderehe ñandekastiga hag̃uánte jajavy jave, ha peteĩ governánteicha ndojepyʼapyiha avavére.” (Raimunda, Canadagua.)

¿Ha ndépa mbaʼe repensa? ¿Ikatúnepa jahayhu Ñandejárape? Heta áñore oĩ kristiáno oñeporandu vaʼekue upéva. Áño 500 guive 1500 peve, hetaiterei hénte noñemboʼéi vaʼekue Ñandejárape okyhyjégui chugui. Peteĩ istoriadór hérava Will Durant heʼi: “¿Mbaʼéicha piko peteĩ pekadór omog̃uahẽta iñemboʼe pe orekóvape itróno yvatete ha oporomongyhyjévape?”.

¿Mbaʼére piko umi hénte opensa péicha Ñandejárare? ¿Mbaʼépa añetehápe la Biblia heʼi hese? ¿Ikatúnepa jahayhu Ñandejárape jaikuaa porãramo chupe?

OJEʼÉVA JEPI:

“Norog̃uahẽi gueteri peteĩ ñeʼẽme roʼe hag̃ua Ñandejára orekoha héra tee. Ha oimérõ oreko katu ni ndoroikuaái mbaʼéichapa la héra.” (Profesór David Cunningham, ohai ilívro héravape Theological Studies.)

MBAʼÉPA HEʼI LA BIBLIA:

Ñandejára voi heʼi: “Che hína Jehová, péicha che réra” (Isaías 42:8, NM). Evréo ñeʼẽme pe téra Jehová heʼise: “Chugui oikóta oñekotevẽva guive” (Génesis 2:4, nóta).

Ñandejára Jehová oipota jaiporu héra. La Biblia heʼi: “Peguerohory héra porãite, pemombeʼu hembiapo porã ambue tetãnguérape, pegueromanduʼa héra mbaʼe guasuha” (Isaías 12:4, ÑÑB).

Jesús oiporu vaʼekue Ñandejára réra ha omombeʼu hemimboʼekuérape. Peteĩ jey haʼe oñemboʼe Itúvape ha heʼi: “Che aikuaauka chupekuéra nde réra”. ¿Maʼerãpa ojapo upéicha? Haʼe heʼive: “Ikatu hag̃uáicha haʼekuéra oporohayhu nde cherayhu haguéicha ha che aime hag̃ua hendivekuéra” (Juan 17:26, NM).

IPORÃ REIKUAA PE AÑETEGUA:

Pe teólogo Walter Lowrie heʼi: “Umi ndoikuaáiva Ñandejára réra, ndoikuaái mbaʼeichagua persónapa haʼe, [...] ha ndaikatúi ohayhu chupe”.

Peteĩ kuimbaʼe hérava Victor, káda semána oho vaʼekue iglésiape, péro ndoikuaái mbaʼeveguasu Ñandejáragui. Haʼe heʼi: “Aikuaárõ guare Ñandejára heraha Jehová, haʼete voi opresenta mbaʼéva chéve hikuái aikuaa hag̃ua chupe. Hetaitéma ningo ahendu oñeñeʼẽ hese ha koʼág̃a ae aikuaa porã mbaʼeichaguápa haʼe, ha upe guive areko chupe che amígoramo”.

Jehová voi oñemoag̃ui umi oiporúvare héra, ha opromete chupekuéra: “Pe túva oiporiahuverekoháicha itaʼýra ojapóvape haʼe heʼíva, upéicha aiporiahuverekóta chupekuéra” (Malaquías 3:16, 17). Ñandejára ovendesi avei umi ohenóivape chupe hérarupi. La Biblia heʼi: “Opavave ohenóiva Jehová réra ojesalváta” (Romanos 10:13, NM).

OJEʼÉVA JEPI:

Pe Diccionario Akal crítico de Teología heʼi: “Pe trinida ningo haʼe peteĩ mistério, heʼíva Túva, Taʼýra ha Espíritu Sánto peteĩ Ñandejaranteha”. Pe Diccionario abreviado del cristianismo katu heʼi: “Umi katóliko, ortodóxo, anglikáno ha protestánte oguerovia pe trinida”.

MBAʼÉPA HEʼI LA BIBLIA:

Jesús ningo Ñandejára Raʼy, ha haʼe arakaʼeve ndeʼíri ijehe haʼeha pe Túva. Upéva rangue heʼi: “Pevyʼa vaʼerã peikuaávo ahataha che Ru rendápe, haʼe ningo tuichave chehegui” (Juan 14:28). Peteĩ hemimboʼépe Jesús heʼi vaʼekue voi: “[Ajupi hína] che Ruete ha pende Ruete rendápe, che Jára ha pende Jára rendápe” (Juan 20:17, ÑÑB).

Pe espíritu sánto katu ndahaʼéi peteĩ persóna. Umi kristiáno ypykue ningo “henyhẽ [kuri] espíritu sántogui”. Ha Jehová heʼi: “Ahykuavóta che espíritu opa yvypóra ári” (Hechos 2:1-4, 17). Pe espíritu sánto hína Ñandejára fuérsa, upéva haʼe oiporu ojapo hag̃ua opa mbaʼe, ndahaʼéi heʼiháicha umi omboʼéva pe trinida.

IPORÃ REIKUAA PE AÑETEGUA:

Mokõi vivlísta katóliko, Karl Rahner ha Herbert Vorgrimler, heʼi: “Hasy oñentende hag̃ua pe trinida Ñandejára voi nomyesakãiramo ñandéve, ha omyesakãramo jepe, hasýta voínte ñantendepa hag̃ua”. Péro, ¿ikatúnepa jahayhu peteĩ jaikuaaʼỹvape ha nañantendéiva mbaʼeichaguápa? Nahániri, ijetuʼúta upéva. Upéicha rupi umi hénte ogueroviávape pe trinida ijetuʼu ohayhu hag̃ua Ñandejárape.

Marco, ñañeʼẽma hague pe ótro artíkulope, heʼi pe trinida káusare haʼe ndaikatúi hague oikuaa Ñandejárape ni oñemoag̃ui hese. Haʼe omombeʼu: “Che apensa vaʼekue Ñandejára ndoipotaiha jaikuaa chupe ni ñañemoag̃ui hese, ha haʼeha peteĩ mistério”. Péro la Biblia heʼi: “Haʼe noĩri mombyry ñandehegui” (Hechos 17:27, ÑÑB). Ñandejára ningo omombeʼu porã ñandéve mbaʼeichaguápa haʼe. Jesús heʼi: “Ore [...] roikuaa porã mávapepa romombaʼeguasu” (Juan 4:22).

Marco omombeʼuve: “Aikuaa rire Ñandejára ndahaʼeiha peteĩ trinida, ikatu vaʼekue añemoag̃ui hese ha areko chupe che amígoramo”. Añetehápe, jaikuaáramo Ñandejára ndahaʼeiha peteĩ mistério, síno peteĩ persóna ikatúva jaikuaa, ifasilvéta jahayhu hag̃ua chupe. La Biblia heʼi: ‘Pe oporohayhuʼỹva ndoikuaái Ñandejárape, Ñandejára ningo mborayhu’ (1 Juan 4:8).

OJEʼÉVA JEPI:

“Umi hembiapo vaíva omanóvo, hiʼálma ohóma infiérnope osufri hag̃ua ‘tatarendýpe opa árare’.” (Catecismo de la Iglesia Católica.) Oĩ rrelihión omboʼéva umi ohóva infiérnope oĩha mombyry Ñandejáragui ha Haʼe hesaraimaha chugui.

MBAʼÉPA HEʼI LA BIBLIA:

‘Pe álma hembiapo vaíva omano vaʼerã.’ (Ezequiel 18:4, ÑÑB.) Ha umi omanóva “ndoikuaái mbaʼeve” (Eclesiastés 9:5). Péicha jahecha ñane álma ikatuha omano, ha ñamanóvo nañañanduveimaha mbaʼeve. ¿Mbaʼéicha piko upéicharõ ñamano rire jasufríta peteĩ “tatarendýpe opa árare” ha ñaiméta mombyry Ñandejáragui?

La Bíbliape, pe ñeʼẽ evréo ha griégo ojetradusíva “infiérno”, heʼise hína sepultúra oñemoĩha umi omano vaʼekue. Por ehémplo, la Bíbliape peteĩ profesía heʼi Jesús rehe: ‘Nderehejaichéne che álma umi omano vaʼekue oĩháme [térã “infierno”, Reina Valera, Versión Antigua]’ (Hechos 2:27, BNP). Upéicharõ jaʼekuaa pe infiérno ndahaʼeiha peteĩ lugár ojesufri ha oñeĩháme mombyry Ñandejáragui. Upéicharire ningo Jesús ndohói vaʼerãmoʼã upe lugárpe.

IPORÃ REIKUAA PE AÑETEGUA:

Ojeʼévo Ñandejára ipyʼahatãha, ndaipóri oñemoag̃uiséva hese. Rocío, oikóva Méxicope, heʼi: “Chemitãme ojeʼe vaʼekue chéve pe infiérno oexistiha. Upévare akyhyjetereími Ñandejáragui ha apensa voi ni michĩmi nañanderayhuiha, ijarhél ha ipyʼahatãha”.

Rocío okambia opensa lája Ñandejárare, oikuaa rire mbaʼépa la Biblia heʼi hese ha mbaʼépa oiko ñandehegui ñamano rire. Haʼe heʼi: “Koʼág̃a añeñandu porãiterei ha tuicha chepyʼaguapy. Ahechakuaa Ñandejára peteĩ túvaicha oñangareko porãha ñanderehe ha oipotaha iporãvante ñandéve g̃uarã. Haʼe ñanderayhu, ha ikatu avei che ahayhu chupe” (Isaías 41:13).

Heta oĩ ohóva tupaópe okyhyjégui omano rire ohórõ g̃uarã infiérnope osufri tatarendýpe, péro Ñandejára ndoipotái jaservi chupe jakyhyjégui chugui. Jesús heʼi vaʼekue voi: “Rehayhu vaʼerã Jehová nde Járape nde pyʼaite guive” (Marcos 12:29, 30, NM). Jahechakuaáramo Jehová hekojojaha, jajeroviáta haʼe oporohusgataha hekoitépe. La Biblia omombeʼu peteĩ kuimbaʼe hérava Elihú heʼi hague: “Ani peimoʼã, [Ñandejára] pe Ipuʼakapáva, ojapoha ivaíva térã hekopeguaʼỹ” (Job 34:10).

Peteĩ árape, Jesús omboʼe Itúva rembipota umi hénte Jerusalenguápe, ha ohechauka porã chupekuéra mbaʼéichapa hovamokõi umi rrelihión omoakãva upe tiémpope (Juan 8:12-30). Haʼe heʼi: “Pejapo meméramo che haʼéva, peẽ añetehápe che disípulo, peikuaáta pe añetegua ha pe añetegua penemosãsóta” (Juan 8:31, 32, NM). Umi mbaʼe heʼi vaʼekue upérõ, ñanemboʼe avei mbaʼépa jajapo vaʼerã jaikuaa porã hag̃ua añetépa hína umi mbaʼe ojeʼéva Ñandejárare.

Jesús heʼívo: “Pejapo meméramo che haʼéva”, ohechauka mbaʼéichapa ikatu japilla añetépa hína umi rrelihión omboʼéva. Upévare, rehendúramo peteĩ mbaʼe ojeʼéva Ñandejárare, iporãta reñeporandu: “¿Oĩ porã piko ko mbaʼe Jesús omboʼe vaʼekue ndive? ¿Omboʼe piko upéva la Biblia?”. Jajapo vaʼerã umi Tesalonicagua ojapo haguéicha, “haʼekuéra orresivi torypápe umi marandu, ha káda día ohesaʼỹijo porã Ñandejára Ñeʼẽ ohecha hag̃ua añetépa upe ojeʼéva” (Hechos 17:11, NM).

Upéicha ojapo vaʼekue avei Marco, Rosa ha Raimunda, ñañeʼẽma hague umi ótro artíkulope. Haʼekuéra oñepyrũ ostudia umi testígo de Jehovándi oikuaa hag̃ua mbaʼépa añete omboʼe la Biblia. ¿Mbaʼépa oaprende hikuái?

Marco heʼi: “Pe Testígo oremboʼéva, chéve ha che rembirekópe, ombohovaipaite oréve la Biblia rupive opa mbaʼe roikuaaséva. Upe guive, káda día rohayhuve Jehovápe ha rojogueraha porãve ore rogapýpe”.

Rosa heʼi: “Che apensa vaʼekue la Biblia haʼeha peteĩ lívro yvypóra ohai vaʼekuénte oñeʼẽ hag̃ua Ñandejárare. Péro upéi ahechakuaa mbaʼéichapa la Biblia ombohovái chéve heta mbaʼe aikuaaséva. Koʼág̃a arekóma Jehovápe che amígoramo ha ajerovia hese che pyʼaite guive”.

Raimunda heʼi: “Añemboʼe kuri Ñandejárape tachepytyvõmi aikuaa porã hag̃ua chupe. Upe riremínte che ména ha che roñepyrũ rostudia la Biblia. Upépe ae roikuaa porã Jehovápe. ¡Rovyʼaiterei roikuaávo mbaʼeichagua persónapa Ñandejára!”.

La Biblia ohechauka porã ñandéve mbaʼeichagua persónapa Ñandejára ha japuha heta mbaʼe ojeʼéva hese. Péro ndahaʼéi upéva añónte, ñanepytyvõ avei “jaikuaa hag̃ua umi mbaʼe [Ñandejára] omeʼẽ vaʼekue ñandéve ipyʼaporã rupi” (1 Corintios 2:12). Iporãitereíta ningo reñehaʼãramo rehecha mbaʼéichapa la Biblia ombohovái heta mbaʼe jaikuaaséva Ñandejáragui, mbaʼépa haʼe oipota ñandéve g̃uarã ha mbaʼépa ñaneraʼarõ tenonderãme. Oiméramo restudiase la Biblia peteĩ testígo de Jehovándi, ikatu reike Internétpe ko páhinape: www.jw.org/gug térã rejerurekuaa peteĩ testígo de Jehová nde reikuaávape. Restudiáramo la Biblia, rehechakuaáta ikatuha rehayhu Ñandejárape.