La Biblia okambia chupekuéra
¿MBAʼÉREPA peteĩ kuñakarai orekóva mas de 60 áño okambiaite la opensáva umi sánto ha taʼangáre? ¿Mbaʼérepa peteĩ saserdóte sintoísta oheja upéva ha oiko chugui peteĩ minístro kristiáno? ¿Mbaʼéichapa peteĩ kuñakarai ovyʼa jey ojeheja reíramo jepe chupe imitãkuñaʼíme? Jahejamína haʼekueraite voi torresponde ñandéve koʼã porandu.
“Ndaikovéima aadora sánto ha taʼanga” (ABA DANSOU)
ONASE: 1938-PE
PAÍS: BENÍN
ÓTRA INFORMASIÓN: OADORA VAʼEKUE UMI TAʼANGA
CHE REMBIASAKUE: Akakuaa vaʼekue peteĩ lugár héravape So-Tchahoué. Péva pe sónape ningo oĩ vaʼekue peteĩ lágo ha hetaiterei estéro. Upépe la hénte okria umi vaka, kavara, ovecha, kure ha ryguasu umía. Péva pe lugárpe ningo ndaipóri rrúta ni kálle, ha upéicha rupi la hénte oñemaneha várko ha kanóape. La majoría ojogapo hag̃ua ojapo umi óga távla ha otecha kapiʼípe, péro oĩ mimi avei la ojapóva óga de materiál. La hénte upépe imboriahueterei, péro ndaiporiguasúi la maleánte ha mbaʼe.
Chemitãkuñaʼíme, che túa oremondo chéve ha che ermánape peteĩ konvéntope, ojeadorahápe umi sánto ha taʼanga. Upépe roñepyrũ vaʼekue ore avei rojapo upéva. Chetuichave rire añepyrũ vaʼekue aadora peteĩ dios héravape Dudua, térã Oduduwa, haʼéva hína pe dios oadorávape pe puévlo yoruba. Aprepara voi chupe g̃uarã peteĩ nícho ndetuichapa jepéva, ha upépe aofrese chupe aséite de pálma, jety, jatyta, ryguasu, palóma ha hetave animál. Hepyetereípe osẽmi vaʼerã chéve koʼã sakrifísio, ha pyʼỹinte asoite voi umíva rapykuéri.
LA BIBLIA CHEPYTYVÕ AKAMBIA HAG̃UA: Astudia rire la Biblia aaprende Jehová añoite haʼeha pe Dios verdadéro. Aaprende avei haʼe ndoipotaiha jaipuru umi sánto ha taʼanga jaadora hag̃ua chupe (Éxodo 20:4, 5; 1 Corintios 10:14). Apilla porãiterei mbaʼépa la ajapo vaʼerã kuri. Upévare ajagarra amombopaite umi sánto arekóva guive ógape. Ndahavéima avei umi espiritísta rendápe, ha ndapartisipavéima umi rrituál ojejapóvape che aikohápe ni umi kostúmbre ojesegívape oĩ jave omanóva.
Sinséramente ijetuʼueterei kuri chéve ajapo hag̃ua koʼã mbaʼe, pórke che ningo arekóma mas de 60 áño. Hiʼarive umi che amígo, che hénte ha che vesinokuéra, oñemoĩmba cherehe ha oñembohory cherehe hikuái. Péro che ajerure Jehovápe tachemombarete ajapo hag̃ua la haʼe oipotáva. Tuichaiterei chekonsola la heʼíva Proverbios 18:10: “Jehová réra ningo peteĩ tórre isegúro porãva, umi ihústova odipara upépe ojeprotehe hag̃ua”.
Ótra kósa tuichaiterei chepytyvõ vaʼekue haʼe aha umi rreunión ojapóvape umi testígo de Jehová. Añandu porãiterei umi che ermáno oĩva upépe cherayhuetereiha, ha ahecharamoiterei avei mbaʼeichaitépa enterovévante oñehaʼã oiko la Biblia heʼihaichaite. Koʼã mbaʼe chekonvense umi testígo de Jehová haʼeha pe rrelihión verdadéra.
UMI MBAʼE PORÃ AHUPYTÝVA: Ajapo rupi la Biblia heʼíva, koʼág̃a ajogueraha porãve che membykuérandi. Anteve agastapámi vaʼerã la arekóva entéro umi sánto ha taʼanga rapykuéri, hiʼarive umíva ndorekói vída ha mbaʼevete asy nanohẽi chuguikuéra. Upévare ajedeha rire umívagui, añandu ku ojepeʼaramoguáicha chehegui peteĩ kárga ipohyietereíva. Koʼág̃a che aadora Jehovápe añoite, haʼe hína pe osolusionátava pára siémpre umi provléma jarekóva (Apocalipsis 21:3, 4). Avyʼaiterei pórke koʼág̃a ndaikovéima aadora umi sánto ha taʼanga, síno Jehovápe. Ha ajapo rupi upéva, añandu porãiterei haʼe okuidaha cherehe.
ʼChemitãʼi guive aheka vaʼekue Ñandejárapeʼ (SHINJI SATO)
ONASE: 1951-PE
PAÍS: JAPÓN
ÓTRA INFORMASIÓN: HAʼE VAʼEKUE PETEĨ SASERDÓTE SINTOÍSTA
CHE REMBIASAKUE: Akakuaa vaʼekue kampañaháre peteĩ lugár héravape Fukuoka. Che tuakuéra irrelihiosoiterei vaʼekue, upévare chemboʼe vaʼekue chemitã guive aadora hag̃ua umi dios sintoístape. Upe guivéma voi pyʼỹinte apensámi vaʼekue mbaʼéichapa ajesalváta, ha aipytyvõseterei vaʼekue umi iprovléma hetávape. Chemanduʼa peteĩ vuéltape peteĩ profesór oporandu entéro umi mitãme mbaʼépa rojapose ág̃a oretuicha vove, che kompañeritokuéra omombeʼu algúna profesión ogustáva chupekuéra térã heʼi ostudiaseha álgo, por ehémplo oiko hag̃ua chuguikuéra sientífiko ha mbaʼe. Péro che haʼérõ guare aservisetereiha Ñandejárape, enterovévante oñepyrũ opuka cherehe.
Atermina rire che koléhio, añepyrũ astudia oiko hag̃ua chehegui profesór de rrelihión. Upépe aikuaa peteĩ saserdóte sintoístape oleéva jepi peteĩ lívro hũ. Che ja ahecháma kuri pe lívro ape, upévare oporandúrõ guare chéve aikuaápa mbaʼe lívropa olee hína, che haʼe chupe: “La Biblia”. Upémarõ heʼi chéve: “Oipotáva guive oiko chugui saserdóte sintoísta, ou porãta chupe oleéramo ko lívro”.
Pyaʼe porã aha ajogua che Bibliarã, ha amoĩ voi peteĩ lugár ikatutahápe ahecha tódo el tiémpo. Péro hetaiterei mbaʼe areko kuri astudia hag̃ua ha upévare nachetiémpoi alee hag̃ua la Biblia. Upéi, hasýpe ajegradua ha oikóma chehegui saserdóte sintoísta peteĩ santuáriope. ¡Oñekumpli sapyʼa la che suéño!
Péro pyaʼeterei apilla ndahaʼéi hague kuri la che añeimahina haguéicha. La majoría umi saserdóte ndojepyʼapyiete voi la héntere, ha heta ni ndojeroviái voi Ñandejárare. Peteĩ umi che superiór heʼi chéve: “Eipotáramo oho porã ndéve eñeʼẽ vaʼerã sólamente filosofíare. Ani voíke ni oñantoha ndéve eñeʼẽ pe fe rehe”.
Entéro koʼã mbaʼe chedesepsionaite vaʼekue. Ndahejáiramo jepe pe santuário, añepyrũ ainvestiga umi ótra rrelihión. Péro amáske aheka koʼýte añedesanima. Haʼete voi ndaipóriva ni peteĩ rrelihión omboʼéva la verda.
LA BIBLIA CHEPYTYVÕ AKAMBIA HAG̃UA: Áño 1988-pe aikuaa peteĩ vudístape, ha haʼe chemokyreʼỹ alee hag̃ua la Biblia. Upépe chemanduʼa ojapo hague unos kuánto áño pe saserdóte sintoísta chemokyreʼỹ hague avei ajapo hag̃ua upéva. Upémarõ adesidi asegi upe konsého ha alee la Biblia. ¡Chejurujái ningo apytávo! Sapyʼánte añemeʼeʼỹre enkuénta chekoʼẽmba jepi la aleehápe.
Aleepa rire, añemboʼese pe Dios oñeñeʼẽvare la Bíbliape, oñemombeʼuháicha Mateo 6:9-13-pe. Arrepeti ko ñemboʼe káda 2 óra, ajapo aja che traváho pe santuáriope jepe.
Amáske alee ahávo la Biblia añeporandu hetave mbaʼe. Upe tiémpope che ja amendáma kuri, ha aikuaa umi testígo de Jehová ostudiaha la Biblia umi héntendi, pórke ojapo kuri un tiémpo haʼekuéra ovisita hague che rembirekópe. Upémarõ añemongeta peteĩ Testígondi ha aataka vaipaite chupe pregúntape. La chesorprendeve vaʼekue mbaʼéichapa ko ermána orrespondepaite chéve la Biblia rupive. Upéi haʼe oñenkarga umi Testígo ou hag̃ua chembostudia la Biblia.
Tiémpo riremi añepyrũ aha umi rreuniónpe pe Salón del Réinope. Ñepyrũrã nañemeʼẽi enkuénta, péro upéi ahechakuaa umi Testígo apytépe oĩha unos kuánto che atrata vai vaʼekue anteve. Péro lomímonte haʼekuéra chesaluda porã ha chemoñeñandu porã.
Koʼã rreuniónpe aaprende Ñandejára oipotaha umi kuimbaʼe omombaʼe ha ohayhu ifamíliape. Ha legálmente che ndajapoiete kuri upéva pórke akumpli porãségui che traváho kómo saserdóte, amboykéma hína kuri che rembirekópe, che raʼy ha che rajýpe. Che ajapysaka porã vaʼekue umi héntere ou jave pe santuáriope, péro ahechakuaa ni una ves nahendúi hague che rembirekópe.
Amáske aaprende la Biblia, añeñandu ag̃uive Jehováre. Heta téxto opoko che korasõre, por ehémplo la heʼíva Romanos 10:13, upépe heʼi: “Entéro ojeroviáva Jehová rérare ojesalváta”. Chemitãʼi guive ningo che ahekámi vaʼekue Ñandejárape, ha koʼág̃a por fin atopa hese.
Upéi cheinkomodáma asegíti haguére ambaʼapo pe santuáriope. Ñepyrũrã chepyʼapy vaʼekue mbaʼépa oñepensáta cherehe ahejáramo pe sintoísmo, péro che siémpre haʼe vaʼekue ahejataha upéva atopáramo pe Dios verdadérope ótra pártepe. Upévare pe primavéra de 1989-pe asegi la che konsiénsia heʼíva chéve, asẽ pe santuáriogui ha upéi añemeʼẽ Jehovápe.
Upe desisión ningo ijetuʼueterei vaʼekue. Umi che superiór chejaʼo ha oñehaʼãmbaite chekonvense apyta jeýnte hag̃ua. Ha amo ipahápe la ijetuʼuve vaʼekue chéve ndahaʼéi voi upéva, síno amombeʼu che tuakuérape la adesidi vaʼekue. Ahakuévo hendapekuéra, tapére añandu chejopyha álgo che péchope ha cheretyma sosopaite. Heta vése apyta añemboʼe hag̃ua Jehovápe ha ajerure chupe tachepytyvõmi.
Ag̃uahẽrõ guare che tuakuéra rógape nañanimái añeʼẽvo upe témare. Ohasa rire unas kuánta óra ha heta añemboʼe rire añanima haʼe che túape. Aexplika chupe atopa hague pe Dios verdadéro ótra rrelihiónpe ha ahejámante vaʼerã pe sintoísmo aservi hag̃ua chupe. Haʼe ndoikuaái kuri mbaʼépa heʼíta chéve ha itríste opytávo. Upéi unos kuánto che hentekuéra ou chekonvense hag̃uáicha akambia hag̃ua la adesidíva. Che namoñeñanduvaiséi avavépe, péro avei ajapose la oĩ porãva: aservise Jehovápe. Kon el tiémpo che família oñepyrũ cherrespeta adesidi haguére upéva.
Aikuaa ndahaʼéi ahejánte vaʼerãha pe santuário, síno akambia vaʼerã avei kuri la apensa lája. Ha ndaservivéiramo jepe kómo saserdóte, lomímonte osegi cheafekta pórke iñimportánte kuri chéve g̃uarã upéva. Ha añehaʼãramo jepe cheresarái, entéro mbaʼénte chemomanduʼa hese.
¿Mbaʼépa chepytyvõ asupera hag̃ua upéva? Mokõi mbaʼe. Primero, ambyaty ha ahapypaite entéro mbaʼe areko vaʼekue ojepurúva pe sintoísmope. Ahapy umi lívro, kuádro ha umi mbaʼe hepyvéva jepe. Segundo, tuichaiterei chepytyvõ ahasave tiémpo umi Testígondi. Haʼekuéra haʼe kuri che amígo ha cheapoja mbeguekatúpe cheresarái hag̃ua ahávo umi mbaʼe ajapo vaʼekuégui anteve.
UMI MBAʼE PORÃ AHUPYTÝVA: Yma napenaguasúi vaʼekue che rembireko ha che familiakuérare, upévare haʼekuéra oñeñandu vaʼekue haʼeñoite. Péro asegi rupi pe konsého oĩva la Bíbliape ha ahasave tiémpo hendivekuéra, koʼág̃a roĩve unído. Kon el tiémpo che rembireko odesidi oservi avei Jehovápe chendive. Ha koʼág̃a che, che rembireko, che raʼy, che rajy ha iména roadora oñondivepa pe Dios verdadérope.
Che ningo chemichĩete guive aservise vaʼekue Ñandejárape ha aipytyvosẽ la héntepe, ha koʼág̃a añemeʼẽ enkuénta oñekumplipaite hague la aipotáva guive. Ha sinséramente hetave mbaʼe voi katu ahupyty. Ndaikuaái ni mbaʼéichapa aagradesepáta Jehovápe umi mbaʼe ahupytývare.
“Aikuaa álgo ofaltaha chéve” (LYNETTE HOUGHTING)
ONASE: 1958-PE
PAÍS: SUDÁFRICA
ÓTRA INFORMASIÓN: OPENSA VAʼEKUE AVAVE NOÑEINTERESAIHA HESE
CHE REMBIASAKUE: Anase vaʼekue peteĩ siuda minéra michĩvape, hérava Germiston. Ko siuda ndahaʼéi vaʼekue la imboriahuetereíva ha ndaiporiguasúi vaʼekue la delinkuénsia. Che tuakuéra opensa vaʼekue ndaikatumoʼãiha okuida porã cherehe, upévare chemeʼẽ hikuái ótra família cheadopta hag̃uáicha. Ha 14 día anase haguépe cheadopta peteĩ matrimónio iñamorosoitereíva. Che apensa vaʼekue haʼekuéra haʼeha che sy ha che túa tee, péro añenterárõ guare ndahaʼeiha upéicha, añandu vaʼekue avave noñeinteresaiha cherehe. Haʼetévaicha chéve ndaipóriva mbaʼeve cheuníva hesekuéra ha upévare ndaikatuiha chentende hikuái.
Arekórõ guare 16 áño añepyrũ aha umi várpe che amigokuérandi ajeroky hag̃ua ha ahendu hag̃ua músika en vívo. Arekórõ guare 17 áño apitáma, ha ajoguaseterei vaʼekue umi modélo ipoʼi asývape osẽva umi propagánda de sigarríllope. Akumplírõ guare 19 áño, che traváho káusare ava Johannesbúrgope. Sapyʼaitérõ g̃uarã chejúnta vai jeýma, chejurutieʼỹ, apita ha amokõ kontinuadoite káda fin de semána.
Péro ajapo vaʼekue avei heta ehersísio, por ehémplo ajapo himnásia aeróvika, ha ahuga partído ha mbaʼe. Avei ajeity vaʼekue la che traváhope, upévare entéro heʼími vaʼerã cherehe chevaletereiha informátikape. Aiko porã vaʼekue ha chepláta heta, upévare oĩ vaʼekue opensáva oho porãitereiha chéve ha segúro avyʼaitereiha. Péro legálmente idiferentete vaʼekue la che añeñandu lája: naisentídoi chéve mbaʼeve ha añamarga. Ndavyʼaieterei vaʼekue ha aikuaa álgo ofaltaha chéve.
LA BIBLIA CHEPYTYVÕ AKAMBIA HAG̃UA: Añepyrũrõ guare astudia la Biblia aaprende Ñandejára Jehová ñanderayhuetereiha ha upévare orregala hague ñandéve la Biblia. Upéva ningo haʼete peteĩ kárta haʼe oheja vaʼekue ñandéve ñandegia hag̃ua (Isaías 48:17, 18). Ahechakuaa aaprovechaséramo upe gía, tuicha akambia vaʼerãha.
Primeroite voi tekotevẽ kuri aheja umi che júnta vai. Heʼiháicha Proverbios 13:20: “Pe oiko meméva umi iñarandúvandi iñarandúta avei, péro pe oiko meméva umi itavývandi osẽ vaíta”. Ajagarra enserioite voi ko konsého ha aheja umi che amigokuérape. Upéi añepyrũ aheka che amigorã umi testígo de Jehová apytépe.
Péro la ijetuʼuve vaʼekue chéve aheja la sigarríllo. Añehaʼãmbaite ningo aheja hag̃ua pe vísio, ha upeichahápe ajupimi 14 kílo. Upéva ningo chemoñeñandu vaieterei, ha atarda 10 áñorupi aguejypa jey hag̃ua la ajupi vaʼekue. Che aikuaa porã ahejámante vaʼerãha ko vísio, upévare kontinuadoite añemboʼe Jehovápe ha haʼe chemombarete akonsegi hag̃ua upéva.
UMI MBAʼE PORÃ AHUPYTÝVA: Primeroite voi cheresãive. Avei aaprende añekontenta hag̃ua la arekóvare. Yma ningo apensa vaʼekue ambaʼapo porãramo, aiko porãramo ha chepláta hetáramo, upéicharõ añoite ikatutaha avyʼa. Péro koʼág̃a apilla ndaupeichaieteha. Koʼág̃a che ména ha che rovyʼa romboʼévo la héntepe la Biblia, ha aipytyvõ jepe mbohapy che kompañerakue de traváhope oservi hag̃ua Jehovápe. Avei che tuakuéra adoptívo omano mboyve, ikatu kuri añeʼẽ chupekuéra Ñandejára promésare: ikatutaha jaiko ko yvy ape ári peteĩ paraísope ha upépe oikove jeytaha umi omano vaʼekue.
Koʼág̃a ningo Ñandejára haʼe che amigoite, upévare nañeñanduvéima cheaño ni napensavéima avave noñeinteresaiha cherehe. Koʼág̃a añandu umi testígo de Jehová haʼeha che família. Areko che sy, che túa, che ermáno ha che ermána ko múndo tuichakuére voi (Marcos 10:29, 30).
[Taʼanga]
Añandu porãiterei umi testígo de Jehová cherayhuetereiha
[Taʼanga]
Pe santuário sintoísta aĩ haguépe anteve