LA MAJORÍA umi hénte siémpre oñemboʼe, tahaʼe haʼéva ikultúra térã irrelihión. Haʼekuéra oñemboʼe oĩ jave haʼeño térã en grúpo. Oñemboʼe hikuái tupaópe, kapíllape, oratóriope, témplope ha sinagógape. Ha oipuru jepi hikuái heta mbaʼe oñemboʼe hag̃ua, por ehémplo, rrosário, sánto, lívro de orasión ha umícha.

Ñande umáno ningo heta mbaʼépe jajogua umi animálpe, por ehémplo, jakaru, jarrespira ha ñaikotevẽ y jaikove hag̃ua. Ha haʼekuéraicha avei ñanase, jaikove ha upéi ñamano (Eclesiastés 3:19). Péro umi animál noñemboʼéi Ñandejárape, ñande añoiténte jajapo upéva. ¿Mbaʼérepa?

La rrespuésta isensilloiterei: pórke ñaikotevẽ upéva. La majoría umi hénte oñemboʼe pórke oñekomunikase pe dios haʼekuéra oadorávandi. La Biblia ohechauka porã Ñandejára voi ñandeapo hague jareko hag̃ua upe nesesida (Eclesiastés 3:11). Peteĩ vuéltape Jesús heʼi voi: “Ovyʼa umi ohechakuaáva oikotevẽha Ñandejárare” (Mateo 5:3).

Enterove ningo jareko pe nesesida ñañemoag̃uívo Ñandejárare, upéicha rupi oĩ hetaite rrelihión ha heta lugár umi hénte oñembyatyhápe oadora ha oñemboʼe hag̃ua Ñandejárape. Péro oĩ avei opensáva noikotevẽiha Ñandejárare, ¿siértopa upéva? Epensamína ko mbaʼére, ñande umáno ningo jareko heta limitasión, mbyky la ñande rekove ha nañantendéi heta mbaʼe. Upévare ñaikotevẽmante álgien iñaranduvéva, ipoderosovéva ha oikovévare hetave tiémpore ñanepytyvõ hag̃ua. ¿Ha mbaʼe mbaʼépepa ñaikotevẽ haʼe ñanepytyvõ?

Por ehémplo, ¿rejechámapa peteĩ situasión ijetuʼúvape tekotevẽhápe álgien neakonseha, ndegia térã nepytyvõ redesidi porã hag̃ua? ¿Algúna véspa reikotevẽ raʼe konsuélo omanórõ guare peteĩ rehayhúva? ¿Térã nemolestápa raʼe ne konsiénsia rejapo haguére álgo ivaíva ha reikotevẽ álgien neperdona?

La Biblia ohechauka porã ñandéve ikatuha ñañemboʼe Ñandejárape entéro umi mbaʼére. Ikatu ñanepytyvõ jaikuaa hag̃ua mbaʼéichapa ñañemboʼe vaʼerã ha mbaʼe mbaʼe rehepa. Pype ojeskrivi voi heta orasión ojapo vaʼekue Ñandejára siervokuéra yma guare. Haʼekuéra ojerure vaʼekue konsuélo, perdón, gía ha oporandu chupe umi mbaʼe oikuaaséva (Salmo 23:3; 71:21; Daniel 9:4, 5, 19; Habacuc 1:3).

Entéro umi ñemboʼe ojapo vaʼekue Ñandejára siervokuéra yma guare ojojogua peteĩ mbaʼépe: haʼekuéra oikuaa porã mávapepa oñemboʼe vaʼerã. Upéva ningo iñimportanteterei, ha ñambyasýramo jepe heta hénte ndorahái enkuénta upéva.

¿OHENDÚPA Ñandejára entéro umi ñemboʼe? Heta hénte oguerovia upeichaha. Oĩ voi opensáva entéro rrelihión iporãha, upévare heʼi ikatuha ñañemboʼe oimeraẽ dióspente. Péro, ¿siértopa upéva?

La Biblia heʼi heta hénte noñemboʼeiha pe Dios verdadérope. Upéva oiko vaʼekue ojeskrivírõ guare la Biblia, umi hénte ojepokuaami vaʼekue oñemboʼe umi taʼangakuérape. Péicha ojapo vaʼekue hikuái jepe Ñandejára heta vése oavisa porã chupekuéra ndovaleiha ojapo upéva. Por ehémplo Salmo 115:4-6-pe heʼi: “Umi taʼanga [...] ijapysa, péro nohendúi”. Upéicharõ naisentidomoʼãi ñañemboʼe peteĩ dios ndaikatúivape ñanerendu.

Jahechamína mbaʼépa ikatu ñaaprende peteĩ rreláto bíblicogui. Peteĩ vuéltape proféta Elías odesafia umi Baal profetakuérape. Heʼi haʼekuéra toñemboʼe idióspe ha haʼe oñemboʼetaha avei idióspe. Ha pe orrespondéva pe orasión ohechaukáta haʼeha pe Dios verdadéro. Umi profetakuéra oñemboʼe heta idióspe péro oñemboʼe hatãramo jepe chupe, Baal norrespondéi. La Biblia heʼi: “Avave noñeʼẽi ni nokontestái chupekuéra, avave nopenái hesekuéra” (1 Reyes 18:29). ¿Péro mbaʼépa oiko Elías oñemboʼérõ guare?

Haʼe oñemboʼérõ guare Idióspe upepete okontesta chupe, ombou tata yvágagui ha ohapypaite pe ofrénda Elías ojapo vaʼekue. ¿Mbaʼérepa Elíaspe oñekontesta iñemboʼe ha umi ótrope nahániri? Jatopáta la rrespuésta jaleévo 1 Reyes 18:36, 37. Upépe ojeskrivi pe orasión ojapo vaʼekue Elías ha mbykýramo jepe iñemboʼe haʼe ojapo álgo umi ótro proféta ndojapói vaʼekue: tres vése voi oipuru Ñandejára réra tee Jehová.

Umi cananeo oadora vaʼekue Baálpe ha haʼekuéra ombohéra diferénte ko dióspe asegún moõpa oiko hikuái. Péro Ñandejára réra teete haʼe hína Jehová ha haʼe pe úniko Dios verdadéro. Haʼe heʼi vaʼekue ipuévlope: “Che hína Jehová, péicha che réra. Che napermitimoʼãi oñemombaʼeguasu ótrope” (Isaías 42:8).

¿Mbaʼérepa oñekontesta vaʼekue Elíaspe iñemboʼe péro umi Baal profetakuérape katu nahániri? Umi cananeo ojapo vaʼekue heta mbaʼe vai oadora jave idióspe. Por ehémplo haʼekuéra hekokyʼa ha hekovai henondépe, inklusíve ojuka voi umi persónape osakrifika hag̃ua chupe g̃uarã. Péro umi oadoráva Jehovápe idiferentete vaʼekue, haʼe oipota vaʼekue ipuévlo ipotĩ ha ndoipotái ojapo koʼãichagua mbaʼe kyʼa oadorávo chupe. Epensamína ko ehémplore, ñamoĩ chupe nde reskriviha peteĩ kárta ne amígope, og̃uahẽ hag̃ua chupe reipurúmante vaʼerã héra pórke nderejapóiramo upéicha pe kárta ikatu oho ótro ladoite.

Añetehápe nde reñemboʼe jave Jehovápe reñeʼẽ hína ko univérso Apohare ndive ha ñande Ru yvagapegua ndive.a Proféta Isaías oñemboʼérõ guare Ñandejárape heʼi chupe: “Nde Jehová, ore Túa hína” (Isaías 63:16). Jesús oñeʼẽ vaʼekue Jehováre heʼírõ guare idisipulokuérape: “Ajupi hína che Ru ha che Jára rendápe, haʼéva avei pende Ru ha pende Jára” (Juan 20:17). Upéicharõ Jehová haʼéramo Jesús Túa, chupe Jesús oñemboʼe vaʼekue ha omboʼe idisipulokuérape ojapo hag̃ua avei upéicha (Mateo 6:9).

¿Heʼípa la Biblia ñañemboʼe vaʼerãha Jesúspe, Maríape, umi sántope térã umi anhelkuérape? No, sólamente Jehovápe ñañemboʼe vaʼerã. ¿Mbaʼérepa? Jahechamína mokõi rrasón. Primero, pórke ñande ñañemboʼe jave peteĩ dios térã peteĩ ovhétope añetehápe jaadora hína chupe. Ha la Biblia ohechaukaháicha Jehovápe añoite jaadora vaʼerã (Éxodo 20:5). Segundo, pórke la Bíbliape heʼi voi Jehová ‘ohenduha umi hénte ñemboʼe’ (Salmo 65:2). Heta rresponsavilida Jehová orekóva omeʼẽ ótrope ojapo hag̃ua, péro Ñandejára odesidi haʼete ohendutaha umi ñemboʼe.

Upéicharõ reipotáramo Ñandejára ohendu ne ñemboʼe nemanduʼa vaʼerã la Biblia heʼívare: “Entéro ojeroviáva Jehová rérare ojesalváta” (Hechos 2:21). ¿Péro ohendúpa Jehová entéro umi oñemboʼévape chupe? ¿Térãpa tekotevẽ jajapove álgo ñanerendu hag̃ua?

HETA hénte ohenói padrenuéstro pe orasión Jesús omboʼe vaʼekuépe idisipulokuérape. Péva haʼe pe orasión la majoría umi kristiáno oipuruvéva ha orrepetivéva. Upéicharõ jepe, hetaiterei hénte orrepetínte la heʼíva upe ñemboʼe ha ni nontendéi la heʼiséva. Péro Jesús ningo núnka voínte ndoipotái vaʼekue jarrepetínte de memória upe orasión. ¿Mbaʼérepa jaʼe upéva?

Pórke Jesús oñeʼẽ mboyvemi ko orasiónre heʼi: “Peñemboʼe jave ani perrepeti jey jey peteĩ mbaʼénte” (Mateo 6:7). Upéicharõ, ¿mbaʼérepa heʼi raʼe Jesús ñañemboʼe vaʼerãha péicha? Haʼe ningo ndoipotái ñamemorisa ha jarrepetínte upéva, síno ohechaukánte mbaʼe mbaʼe rehepa ñañemboʼe vaʼerã ha mbaʼépa umi mbaʼe iñimportantevéva tekotevẽva jajerure ñañemboʼe jave. Ñaanalisa porãmína pe orasión Jesús ñanemboʼe vaʼekue, jatopáva Mateo 6:9-13-pe.

“Ore Ru reiméva yvágape, toñembotuicha nde réra”.

Primeroite voi Jesús omomanduʼa idisipulokuérape oñemboʼe vaʼerãha Itúa Jehovápe añoite. Péro, ¿ndépa reikuaa mbaʼérepa iñimportantete oñembotuicha térã oñesantifika Ñandejára réra?

Iñepyrũ guive voi, pe hardín de Edénpe, oĩ vaʼekue ijapúva Ñandejára kóntrape ha omongyʼáva héra. Satanás ningo Ñandejára enemigoite, ha haʼe oipota jaguerovia Jehová opensaha ijehénte, ijapuha ha ndorekoiha derécho ñanegovernávo (Génesis 3:1-6). Heta hénte opensa avei Satanás opensaháicha ha heʼi Ñandejára noñeinteresaiha ñanderehe, ipyʼahatãha ha nañaneperdonaiha jajavy jave. Ivaiveha, oĩ voi heʼíva Ñandejára ndoexistiriha, ha ótro katu oipeʼa Ñandejára réra Jehová la Bíbliagui ha oproivi ojepuru hag̃ua.

La Biblia heʼi Ñandejára koʼẽrõitéma ohechaukataha japuha umi mbaʼe ojeʼéva hese (Ezequiel 39:7). Ojapo vove upéva, haʼe omeʼẽta ndéve la reikotevẽva ha oñesolusionáta ne provlemakuéra. ¿Arakaʼépa ojapóta upéva? Jaikuaa hag̃ua jasegíta ñaanalisa pe orasión Jesús ñanemboʼe vaʼekue.

“Tou ne Rréino”.

Entéro umi ohendúva pe orasión Jesús omboʼe vaʼekue oikuaa Ñandejára opromete hague omboutaha peteĩ Mesías, ha oikuaa avei hikuái ko Mesías ogovernáta peteĩ Rréino okambiaitétava ko múndo (Isaías 9:6, 7; Daniel 2:44). Ko Rréino omopotĩta Ñandejára réra, ohechaukáta Satanás ijapuha, ohundíta chupe ha entéro umi mbaʼe vai haʼe ojapo vaʼekue. Ñandejára Rréino oñepyrũ vove ogoverna opáta umi gérra, mbaʼasy, ñembyahýi ha pe ñemano jepe (Salmo 46:9; 72:12-16; Isaías 25:8; 33:24). Káda ke reñemboʼe ha rejerure ou hag̃ua Ñandejára Rréino, añetehápe rejerure hína oñekumpli hag̃ua entéro koʼã promésa.

“Tojejapo ne volunta ko yvy ape ári ojejapoháicha yvágape”.

Umi mbaʼe Jesús heʼi vaʼekue ohechauka Ñandejára ojapomaha ivolunta amo yvágape ha ojapotaha avei ivolunta ko yvy ape ári. ¿Mbaʼérepa jaʼe upéva? Pórke Ñandejára Raʼy omosẽ Satanás ha idemoniokuérape yvágagui ha omombo chupekuéra ko yvýpe, upévare ojejapóma Ñandejára volunta pe yvágape (Apocalipsis 12:9-12). Umi mbaʼe Jesús heʼíva jajerure hag̃ua pe orasiónpe ñanepytyvõ ñantende hag̃ua Ñandejára volunta iñimportanteveha umi mbaʼe ñandéve ñandegustávagui. Ha ñanemanduʼa vaʼerã umi mbaʼe Ñandejára oipotáva ñandéve g̃uarã siémpre iporãveha. Jesús jepe orrekonose vaʼekue upéva, upévare heʼi Itúape: “Ani oiko che volunta, síno toiko nde reipotáva” (Lucas 22:42).

“Emeʼẽna oréve ore rembiʼurã koestediarã”.

Jesús ohechauka avei ikatuha jajerure Ñandejárape umi mbaʼe ñaikotevẽva káda día. Upéva ñanemomanduʼa Jehová haʼeha hína “upe omeʼẽva enterovépe hekove, pe áire jarrespira hag̃ua ha entéro mbaʼe” (Hechos 17:25). La Biblia okompara Ñandejárape peteĩ túa ohayhúvare ifamíliape ha vyʼápe omeʼẽva chupekuéra oikotevẽva guive. Péro pe túaicha avei jajeruréramo chupe álgo noĩporãiva térã ikatúva ñandeperhudika, haʼe nomeʼẽmoʼãi ñandéve.

“Oreperdonamína ropeka haguére”.

¿Ñaikotevẽpa Ñandejára ñaneperdona? Koʼág̃arupi heta hénte ndoikuaái jepi mbaʼépa heʼise pe pekádo ni ivaietereiha upéva. Péro la Biblia ohechauka ñandéve pe pekádo káusare jarekoha umi provléma ivaivéva, por ehémplo upéicha rupi ñamano. Ñande ningo ñanaséma voi pekadór ha jajavy meme, upéicha rupi ñaikotevẽmante Ñandejára ñaneperdona ñande pekádo ikatu hag̃uáicha jaikove pára siémpre (Romanos 3:23; 5:12; 6:23). Ajépa ñanembovyʼaite la heʼíva Salmo 86:5: “Jehová, nde ningo nevuenoiterei ha reime oreperdona hag̃uáicha”.

“Oresalva Satanásgui”.

¿Ndépa rehechakuaa enterovéva ñaikotevẽha Ñandejára proteksión? Heta oĩ ndogueroviaséiva Satanás oexistiha, péro Jesús ñanemboʼe Satanás añetehápe oexistiha ha heʼi voi hese haʼeha ‘ko múndo ruvicha’ (Juan 12:31; 16:11). Ko múndo ningo oho vaipaitéma hese pórke oĩ Satanás poguýpe ha haʼe oipota nde avei reĩ ipoguýpe ani hag̃ua oiko ndehegui Jehová amígo (1 Pedro 5:8). Péro ñande Túa Jehová ningo ipoderosove Satanásgui ha haʼe oproteheseterei voi umi ohayhúvape chupe.

Heta mbaʼéma ningo ñaaprende pe orasión Jesús ñanemboʼe vaʼekuégui, péro oĩ hetave mbaʼe ikatúvare ñañemboʼe. Ñanemanduʼa vaʼerã 1 Juan 5:14 heʼiha: “Oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta”. Upéicharõ, aníkena epensa Ñandejárape nointeresaiha umi provléma erekóva, umívare ningo ikatúnte avei reñemboʼe (1 Pedro 5:7).

Péro, ¿iñimportántepa jareko enkuénta mbaʼe lugár ha mbaʼe moméntopepa ñañemboʼéta? ¿Oñeʼẽpa la Biblia upe témare?

HETA rrelihión heʼi jepi moõ ha arakaʼépa ñañemboʼe vaʼerã. Péro, ¿heʼípa la Biblia mbaʼe moménto ha mbaʼe lugárpepa espesífikamente ñañemboʼe vaʼerã?

La Biblia ohechauka oĩha moménto iporãhápe ñañemboʼe. Por ehémplo Jesús okaru mboyve idisipulokuérandi oñemboʼe oagradese hag̃ua Ñandejárape (Lucas 22:17). Ha avei idisipulokuéra oñembyatýrõ guare oadora hag̃ua Ñandejárape oñemboʼémi vaʼekue hikuái oñondivepa. Ha upéicha osegi hikuái peteĩ kostúmbre umi judío oreko vaʼekue káda ke oñembyaty pe témplo de Jerusalénpe térã umi sinagógape. Ñandejára heʼi vaʼekue voi pe témplore: “Che rógape oñehenóita lugár umi hénte ojapo hag̃ua orasión” (Marcos 11:17).

Ñandejárape ogustaiterei ohecha isiervokuéra oñembyatyha ha oñemboʼe chupe. Ha haʼe ohendu chupekuéra oñemboʼéramo ipyʼaite guive ha la ojeruréva oĩ porãramo hembipotándi. Sapyʼánte Ñandejára ohendu rire isiervokuéra ñemboʼe odesidi ojapotaha álgo ndojapomoʼãi vaʼekue (Hebreos 13:18, 19). Umi testígo de Jehová siémpre oñemboʼe oñepyrũ mboyve ha opa rire umi rreunión ojapóva hikuái. Ndegusta vove ikatu reho koʼã rreuniónpe.

La Bíbliape oñemombeʼu ñandéve Ñandejára siervokuéra oñemboʼe hague diferénte lugárpe ha oimeha órante. Ha ndeʼíri ni peteĩ hendápe ñañemboʼe vaʼerãha peteĩ lugár ni peteĩ óra espesífikamente. Jesús heʼi vaʼekue: “Peẽ peñemboʼéta jave, peike vaʼerã pende kotýpe ha pemboty pene rokẽ, upéi peñemboʼe pende Ru oĩvape yvágape. Upéicha pende Ru ohecháva opa mbaʼe, penevendesíta” (Mateo 6:6).

Pe téxtope ojejapo ñandéve peteĩ invitasión iporãitereíva, ñañekomunika hag̃ua ko univérso Apohare ndive. Ha upéva ikatu jajapo oimeha óra ha oimeha lugárpe, ñaime jave ñaneaño jepe. Ha ikatu ñaime segúro haʼe katuete ñanerendutaha. Upéva oikuaa porã vaʼekue Jesús, upévare pyʼỹi ohekámi vaʼekue lugár oĩtahápe haʼeño ikatu hag̃uáicha oñemboʼe Ñandejárape. Peteĩ vuéltape oñemboʼe voi tódo el pyhare odesidi mboyve peteĩ mbaʼe iñimportánteva (Lucas 6:12, 13).

La Bíbliape oñemombeʼu avei Ñandejára siervokuéra oñemboʼe hague odesidi mboyve umi mbaʼe iñimportánteva, térã ohasa jave umi situasión ijetuʼuetereíva. Sapyʼánte oñemboʼe vaʼekue hikuái kirirĩháme ipyʼapýpente ha ótra vése katu en vos álta. Avei oĩ jave hikuái en grúpo térã haʼeñohápe. Chupekuéra g̃uarã iñimportanteterei vaʼekue upéva. Ha Ñandejára voi ojapo ñandéve ko invitasión: “Peñemboʼékena kontinuadoite” (1 Tesalonicenses 5:17). Upéicharõ ñañemboʼéramo jepe chupe heta vése Ñandejára siémpre ohendúta ñane ñemboʼe, upéva ohechauka mbaʼeichaitépa ñanderayhu ha oipotaha siémpre ñañemboʼe chupe.

Koʼág̃arupi heta héntepe g̃uarã naiñimportanteguasúi pe ñemboʼe. Upévare oiméne nde reikuaase, ¿añetehápepa ñanepytyvõ upéva?

¿AÑETEHÁPEPA ideprovécho ñandéve ñañemboʼe? La Biblia ohechauka si ideprovechoha, ha heta Ñandejára siérvo yma guarépe oipytyvõ vaʼekue voi (Lucas 22:40; Santiago 5:13). Upéicharõ tuichaiterei ikatu ñanepytyvõ pe ñemboʼe, por ehémplo ñañemoag̃uive hag̃ua Ñandejárare, javyʼave ha ñaneresãive hag̃ua jepe. Jahechamína mbaʼérepa jaʼe upéva.

Por ehémplo, jarresivíramo peteĩ rregálo katuete jaʼe: “¡Grásia!”. ¿Mbaʼérepa iñimportánte upéva? Pórke ñameʼẽramo pe agradesimiénto, ñanepytyvõ ñandeagradesidove hag̃ua. ¿Oikótapa avei upéva ñañemboʼévo Ñandejárape? ¡Kláro ke si! Jahechamína unos kuánto ehémplo.

Ñañemboʼe jaagradese hag̃ua. Jaagradeséramo Ñandejárape umi mbaʼe porã ojehúvare ñandéve, ñañekonsentra hína umi vendisión jarekóvare. Ha jajapóramo upéva javyʼave, ñandeagradesidove ha ñandepositivovéta (Filipenses 4:6).

Ehémplo: Jesús oagradese vaʼekue Itúape ohendu ha okontesta haguére chupe iñemboʼe (Juan 11:41).

Ñañemboʼe jajerure hag̃ua perdón. Ñantende rire mbaʼépa oĩ vai ha mbaʼépa oĩ porã katuete ñambyasy umi mbaʼe vai jajapo vaʼekue, ha upépe jahechakuaa mbaʼeichaitépa iñimportánte ñaneñeʼẽrendu Ñandejárape. Peichagua ñemboʼe ñanepytyvõ avei ani hag̃ua ñamboguapyeterei ñandejehe umi mbaʼe vai jajapo vaʼekue.

Ehémplo: David omombeʼu vaʼekue Ñandejárape mbaʼéichapa oñeñandu vai opeka haguére (Salmo 51).

Ñañemboʼe jajerure hag̃ua arandu ha konsého. Jajeruréramo Jehovápe arandu ha tañandegia jadesidi porã hag̃ua, upéva ñanepytyvõ ñaneumildeve hag̃ua. Péicha jahechakuaa ñaikotevẽha Jehováre ha jajerovia vaʼerãha hese (Proverbios 3:5, 6).

Ehémplo: Salomón iñumílde ha ojerure Ñandejárape ogia ha omoarandu hag̃ua chupe ikatu hag̃uáicha ogoverna Israel (1 Reyes 3:5-12).

Ñañemboʼe jasufri térã ijetuʼueterei jave. Sapyʼánte ningo ijetuʼueterei ha ndajaikuaái ni mbaʼépa jajapóta. Upéicha jave ñamombeʼúramo Ñandejárape umi mbaʼe ñañandúva, ñanepytyvõta ñañetrankilisa hag̃ua. Ha péicha jajeroviavéta Jehováre jajerovia rangue ñandejehénte (Salmo 62:8).

Ehémplo: Rréi Asá ojerure vaʼekue Ñandejárape ajúda ombohovái hag̃ua peteĩ enemígo ipoderósova (2 Crónicas 14:11).

Ñañemboʼe ótro rehehápe. Upéva ñanepytyvõta ani hag̃ua ñapensa ñandejehénte, jaiporiahuvereko hag̃ua ñande rapichakuérape, ha ñañemoĩ hag̃ua ilugárpe.

Ehémplo: Jesús oñemboʼe vaʼekue Ñandejárape oipytyvõ hag̃ua idisipulokuérape (Juan 17:9-17).

Ñañemboʼe ñamombaʼeguasu hag̃ua Ñandejárape. Ñamombaʼeguasúvo Jehovápe ikreasión porãitére ha umi kualida orekóvare, jarrespeta ha jahayhuvéta chupe. Ha upeichagua orasión ñanepytyvõ avei ñañemoag̃uive hag̃ua ñande Túa yvagapeguáre.

Ehémplo: David heʼi vaʼekue Ñandejárape mbaʼeichaitépa oagradese chupe ikreasiónre (Salmo 8).

Pe ñemboʼe ñanepytyvõ avei ikatu hag̃uáicha jareko “Ñandejára pyʼaguapy tuichavéva entéro mbaʼe yvyporakuéra ikatúvagui ontende” (Filipenses 4:7). Ko múndope ningo ijetuʼueterei ñandepyʼaguapy hag̃ua. Péro ñaiméramo trankílo, upéva ñanepytyvõ ñaneresãive hag̃ua (Proverbios 14:30). ¿Ikatúpa ñakonsegi pe pyʼaguapy oúva Ñandejáragui ñandejehegui reínte? ¿Térãpa oĩ ótra kósa iñimportantevéva tekotevẽva jajapo?

HETA hénte oikuaase oimépa Ñandejára ohendu ha okontesta ñandéve ñane ñemboʼe. Ha la Biblia ohechauka Jehová añetehápe ojapoha upéva. Péro, ¿ohendútapa Ñandejára ne ñemboʼe? Péva tuichaiterei odepende nderehe.

Jesús ojaʼo vaʼekue umi líder rrelihiósope ha heʼi chupekuéra hovamokõiha, pórke haʼekuéra oñemboʼe ojechauka hag̃uánte. Ha heʼi chupekuéra upevantemaha “la prémio orresivítava hikuái”. Upéva heʼise umi hénte oguerohorytaha chupekuéra, péro Ñandejára nohendumoʼãiha iñemboʼekuéra (Mateo 6:5). Koʼág̃arupi avei oĩ heta persóna opensáva ijehénte, ha ndoraháiva enkuénta Ñandejára oipotáva. Upéicha rupi, oñemboʼe jave ojerure umi mbaʼe ogustávante chupekuéra. Péro ñanemanduʼa vaʼerã ndajajapóiramo la Biblia heʼíva, Ñandejára nohendumoʼãiha ñane ñemboʼe.

¿Ndépa mbaʼe ere? ¿Ohendu ha orrespondénepa Ñandejára ndéve ne ñemboʼe? Upéva nodependéi nde pire kolór rehe, mbaʼépa umi hénte opensa nderehe ni moõguápa nde. La Biblia oasegura voi ñandéve Ñandejára otrataha enterovépe peteĩchante. “Haʼe oguerohory entéro umi ojapóvape iporãva ha orrespetáva chupe ipyʼaite guive, tahaʼe haʼéva nasiónpe” (Hechos 10:34, 35). ¿Ndépa reñehaʼã rejapo koʼã mbaʼe? Rerrespetáramo Ñandejárape nde pyʼaite guive, katuete nderejaposemoʼãi mbaʼeve omoñeñandu vaíva chupe. Upéva rangue, reñehaʼãta rejapo umi mbaʼe Ñandejára heʼíva oĩ porãha, ha nderejegiamoʼãi umi mbaʼe nde repensávare térã umi hénte heʼívare oĩ porãha. ¿Ndépa reipota Ñandejára ohendu ne ñemboʼe? La Biblia ohechauka mbaʼéichapa reñemboʼe vaʼerã Ñandejára nerendu hag̃ua.a

Heta persóna ningo oipota Ñandejára orresponde chupekuéra iñemboʼe peteĩ milágro rupive. Péro ojeskriviha tiémpope la Biblia jepe, Ñandejára saʼietereípe orresponde upéicha. Sapyʼánte oiko rire peteĩ milágro ohasámi vaʼekue hetaiterei tiémpo oiko jey hag̃ua ótro. La Biblia heʼi voi omanomba rire umi apóstol Ñandejára nomeʼẽmoʼãvéima hague podér ojejapo hag̃ua milágro (1 Corintios 13:8-10). ¿Heʼisépa upéva Ñandejára koʼág̃arupi norrespondeveimaha umi ñemboʼe? ¡Nahaniriete voi! Jahechamína mbaʼéichapa haʼe orresponde umi ñemboʼe.

Ñandejára omeʼẽ arandu. Jehová ningo haʼe pe persóna iñaranduvéva oexistíva. Ha entéro iñaranduséva ojeruréramo chupe upéva, haʼe vyʼápe okontesta chupekuéra (Santiago 1:5).

Ñandejára omeʼẽ ijespíritu sánto ha umi mbaʼe porã oúva upe espíritugui. Pe espíritu sánto haʼe pe fuérsa oipurúva Ñandejára, ha ndaipóri mbaʼeve ipoderosovéva upévagui. Upéva ñanepytyvõ ñaaguanta hag̃ua umi provléma ha ñandepyʼaguapy hag̃ua ijetuʼu jave. Ha avei ñanepytyvõ jareko hag̃ua hetave kualida iporãva (Gálatas 5:22, 23). Jesús oasegura idisipulokuérape Ñandejára omeʼẽtaha ijespíritu sánto umi ojerurévape chupe (Lucas 11:13).

Ñandejára oipytyvõ umi oikuaasévape chupe. (Hechos 17:26, 27). Ko múndo tuichakuére oĩ heta oikuaa porãsevéva Ñandejárape. Oikuaase mbaʼéichapa héra, mbaʼépa ipropósito ko yvýpe g̃uarã ha ñandéve g̃uarã, ha mbaʼéichapa ikatu oñemoag̃ui hese (Santiago 4:8). Umi testígo de Jehová pyʼỹinte otopa umichagua persónare, ha ovyʼaiterei ikatu haguére okomparti hendivekuéra mbaʼépa heʼi la Biblia koʼã témare.

¿Ndépa reheka avei reikóvo Ñandejárape? ¿Upévare voípa relee hína ko rrevísta? Entónse oiméne haʼe péicha hína orresponde ndéve ne ñemboʼe.

HETA rrelihión omboʼe ñañemoĩ vaʼerãha peteĩ posisiónpe ñañemboʼe hag̃ua, ha ñañatendeterei vaʼerãha káda palávra jaʼétava. Péro la Biblia ñanepytyvõ ñantende hag̃ua mbaʼépa la añetehápe iñimportantevéva ñañemboʼe jave.

La Biblia omombeʼu Ñandejára siervokuéra oñemboʼémi hague diferénte lugárpe ha diferénte posisiónpe. Sapyʼánte oñemboʼe vaʼekue hikuái ipyʼapýpe ha sapyʼánte katu en vos álta. Algúna vése oñemboʼe hag̃ua omaña hikuái pe yvágare, ha avése katu oñakãityhápe. Péro haʼekuéra ndoipurúi vaʼekue umi taʼanga, rrosário, lívro de orasión ni ótra kósa oñemboʼe hag̃ua. Upéva rangue, haʼekuéra oñemongeta voi Ñandejárandi ha omombeʼupaite chupe la oñandúva. ¿Mbaʼérepa Ñandejára ohendu chupekuéra?

Jahecha haguéicha pe ótro artíkulope, haʼekuéra oñemboʼe vaʼekue Jehovápe añoite. Péro oĩ kuri ótra kósa oraháva avei hikuái enkuénta Ñandejára ohendu hag̃ua chupekuéra. Upéva ojehechauka ñandéve 1 Juan 5:14-pe: “Jajeroviakuaa ko mbaʼére: oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta”. Upéicharõ, umi mbaʼe jaʼéva ñañemboʼe jave oĩ porã vaʼerã Ñandejára rembipotándi. ¿Mbaʼépa heʼise upéva?

Ikatu hag̃uáicha umi mbaʼe jajeruréva Ñandejárape oĩ porã hembipotándi, jaikuaa raẽmante vaʼerã mbaʼépa la ivolunta. Upévare, jastudiámante vaʼerã la Biblia jaikuaa hag̃ua mbaʼépa haʼe oipota ñandéve g̃uarã, ha mbaʼépa ikatu jajerure. ¿Heʼisépa upéva jaikuaa vaʼerãha entéro detálle oĩva la Bíbliape Ñandejára ñanerendu hag̃ua? Nahániri. Ñandejára oipotánte jaikuaa jahávo ivolunta, ñañehaʼã ñantende, ha jajapo umi mbaʼe ñaaprendéva (Mateo 7:21-23). Ñañemboʼe jave jareko vaʼerã enkuénta umi mbaʼe ñaaprendéva la Bíbliagui.

Amáske ñaaprende Jehová ha hembipotágui, ñande jerovia imbaretevéta, ha upéva iñimportanteterei avei ñañemboʼe jave. Jesús heʼi vaʼekue: “Pejeroviáramo, entéro mbaʼe pejeruréva peñemboʼe jave, oñemeʼẽta peẽme” (Mateo 21:22). Jareko fe ndeʼiséi jagueroviatanteha peteĩ mbaʼe jaguerekoʼỹre pruéva. Upéva rangue, heʼise jakreeha álgo ndajahecháiramo jepe, pórke jareko pruéva ohechauka porãva upéva siertoha (Hebreos 11:1). Siérto ningo ndaikatuiha jahecha Jehovápe, péro la Bíbliape oĩ hetaiterei pruéva ohechaukáva haʼe añetehápe oexistiha, ikatuha jajerovia hese ha ohendusetereiha umi iñeʼẽrendúva ñemboʼe. Hiʼarive siémpre ikatu jajerure Jehovápe omombareteve hag̃ua ñande jerovia, ha haʼe vyʼápe ojapóta upéva (Lucas 17:5; Santiago 1:17).

Oĩ avei ótra kósa iñimportantetereíva jareko vaʼerã enkuénta ñañemboʼe jave. Jesús heʼi vaʼekue: “Che rupive añoite ikatu oñeg̃uahẽ pe Túa rendápe” (Juan 14:6). Upéicharõ, Jesús rupive añoite ikatu ñañemboʼe ñande Túa Jehovápe. Ndareíri Jesús heʼi idisipulokuérape oñemboʼe vaʼerãha hérape (Juan 14:13; 15:16). Ñañemboʼe Jesús rérape ndeʼiséi hína ñañemboʼe vaʼerãha chupe, síno heʼise ñarrekonoseha haʼe rupive ikatuha ñañemoag̃ui ñande Ru yvagapeguáre.

Peteĩ vuéltape, Jesús apostolkuéra ojerure vaʼekue chupe: “Ore Ruvicha, oremboʼemína mbaʼéichapa roñemboʼe vaʼerã” (Lucas 11:1). Añetehápe, Jesús apostolkuéra oikuaáma voi kuri heta mbaʼe ko témagui. Upéicharõ la haʼekuéra añetehápe oikuaase vaʼekue haʼe mbaʼe mbaʼe rehepa oñemboʼe vaʼerã.