Umi konsého oĩva la Bíbliape siémpre ideprovécho

EÑEIMAHINAMÍNA rehoha rerrekorre peteĩ muséo oĩháme heta mbaʼe ymaiterei guaréva. La majoría umíva apytépe ojegasta, osoro ha oñembyaipáma ohóvo. Oĩ avei algúno ofaltapámava chupe heta párte. Péro peteĩva umíva apytégui oĩ porãiterei gueteri. Oguereko hetaiterei detálle ha umívare ojekuaa mbaʼeichaitépa ikomplikádone raʼe ojejapo hag̃ua. Upémarõ reporandu pe gíape: “¿Kóva piko ipyahuve mbaʼe umi ótrogui?”. Haʼe orresponde ndéve: “Nahániri, péva haʼe hína peteĩva umi itujavéva ha núnka ndojepokóiva hese oñemyatyrõ hag̃ua”. Upémarõ reporandu jey chupe: “¿Entónse piko kóva siémpre oñeñongatúva el mísmo lugárpe?”. Pe gía ombohovái jey ndéve: “Nahániri, péva ningo oaguantáma heta torménta, ama ha heta hénte aña ohundiséva chupe”. Rehendúvo upéva nde reñemoĩ repensa: “¿Mbaʼégui mbaʼe piko ojejapo?”.

La Biblia ojoguaiterei upe mbaʼe oĩva pe muséope. La Biblia ningo haʼe peteĩ lívro ymaiterei guare, itujave voi la majoría umi ótro lívrogui. Añetehápe oĩ avei heta kuatiañeʼẽ yma guare, péro oikoháicha umi mbaʼe oĩvare pe muséope, enterove léntoma oñembyaipa ohóvo. Avei umi lívro oñeʼẽva pe siénsiare opyta rei ohóvo, pórke koʼág̃arupi ojeprováma ndasiertoiha heta mbaʼe heʼíva pype. Ha oñeʼẽ jave medisínare katu, heta vése umi mbaʼe heʼíva haʼete ñandeperhudikavétava ñanepytyvõ rangue. Ha heta párte umi kuatiañeʼẽgui okañy térã oñembyaipáma.

La Biblia katu tuichaiterei idiferénte umívagui. Ojapómarõ jepe amo 3.500 áñorupi ojeskrivi hague, koʼag̃aite peve oñemantene pe mensáhe orihinál. Hiʼarive oĩ vaʼekue heta oñehaʼãva ohundi ko lívro. Por ehémplo oĩ vaʼekue ohapýva, oproivíva ojepuru ha avei heʼíva hese ndoserviriha. Upéicharõ jepe umi mbaʼe heʼíva la Bíbliape nokambiái. Ñambojojáramo umi mbaʼe ojekuaáva koʼág̃arupi ha umi mbaʼe la Biblia heʼíva, jahecha porãiterei ndahaʼeieteha peteĩ lívro ndovalevéimava itujaiterei rupi. (Ehecha pe rrekuádro hérava: “La Biblia heʼíma vaʼekue heta mbaʼe ojedeskuvri mboyve jepe umíva”).

MBAʼÉICHAPA ÑAÑEKOMPORTA VAʼERÃ

Ikatu oime reñeporandu: “¿Añetehápe piko ideprovécho gueteri umi konsého oĩva la Bíbliape?”. Embohovái hag̃ua ko porandu epensamína umi provléma tuichavéva oĩvare ko múndope. ¿Mbaʼépa oipyʼapyve umi héntepe? Ikatu ou ne akãme umi gérra, pe kontaminasión, pe violénsia térã pe korrupsión. Jahechamína koʼág̃a unos kuánto konsého oĩva la Bíbliape, ha jajapokuévo upéva eñeporandu: “¿Omehoránepa ko múndo enterovéva ojapóramo koʼã mbaʼe heʼíva la Biblia?”.

ÑAÑEHAʼÃ JAIKO PYʼAGUAPÝPE ENTÉRONDI

“Ovyʼa umi ipyʼaguapýva, chupekuéra oñehenóita Ñandejára raʼy” (Mateo 5:9). “Peñehaʼãmbaitékena peiko pyʼaguapýpe enterove pende rapichakuéra ndive” (Romanos 12:18).

JAPOROPORIAHUVEREKO HA ÑAPOROPERDONA

“Ovyʼa umi oiporiahuverekóva hapichápe, chupekuéra ojeporiahuverekóta avei” (Mateo 5:7). “Pesegíkena peñoaguanta ha peñoperdona pende pyʼaite guive, pejapo upéva oĩramo jepe penembopochýva. Jehováa peneperdona haguéicha ipyʼaite guive, upéicha avei peẽ pejapo vaʼerã” (Colosenses 3:13).

JAHECHA ENTÉROPE PETEĨCHA

Ñandejára “ojapo vaʼekue peteĩ kuimbaʼégui opaite tetãnguéra, oiko hag̃ua oparupiete ko yvy ape ári” (Hechos 17:26). “Antende Ñandejára otrataha enterovépe peteĩchante, haʼe oguerohory entéro umi hembiapo porãva ha okyhyjéva chugui, tahaʼe haʼéva tetãygua” (Hechos 10:34, 35).

JAKUIDA ÑANE PLANÉTARE

“Ñandejára omoĩ kuimbaʼépe Edénpe ombaʼapo ha oñangareko hag̃ua hese” (Génesis 2:15). Ñandejára ohundíta “umi ohundívape ko yvy” (Apocalipsis 11:18).

ÑANEMBOJEGUARU PE TEKOVAI HA NDAJAIKÓI ÑANDETARYRÝI

“Aníkena ni mbaʼevéicharõ peñeʼẽ tekovaíre, ni mbaʼeveichagua tekokyʼa, ni taryrýire, cháke Ñandejára siervokuéra ndojapói vaʼerã koʼã mbaʼe” (Efesios 5:3). “Ani pendetaryrýi mbaʼevére. Peguerekóramo jepe heta mbaʼe, pende rekove nodependéi hína umi mbaʼe peguerekóva rehe” (Lucas 12:15).

ÑANEONRRÁDO HA ÑAMBAʼAPO JEJOPY

“Hiʼãiterei oréve roiko hekópe opa mbaʼépe” (Hebreos 13:18). “Pe omondáva anive omonda, upéva rangue tombaʼapo pohýi” (Efesios 4:28).

ÑAIPYTYVÕ UMI OIKOTEVẼVAPE

“Pemokyreʼỹkena pene ñeʼẽ rupive umi oñeñandu vaietereívape, peipytyvõkena umi ikangývape ha penepasiénsiakena enterovére” (1 Tesalonicenses 5:14). Tekotevẽ “ñañangareko umi viúdare ha umi ityreʼỹvare ohasa asy jave” (Santiago 1:27).

La Biblia ningo ndahaʼéi heʼínteva ñandéve mbaʼépa jajapo vaʼerã, síno ñanemboʼe ñamombaʼe hag̃ua umi enseñánsa ha avei mbaʼéichapa jajapo vaʼerã. Mbaʼépa nde repensa, ¿omehoránepa la situasión ko múndope oĩrire hetave persóna osegíva koʼã konsého? Jaʼe porãsérõ g̃uarã, umi konsého oĩva la Bíbliape ideprovechovéntema koʼág̃arupi. Péro, ¿ikatúnepa la Biblia nepytyvõ ndéve?

¿MBAʼÉICHAPA IKATU NEPYTYVÕ LA BIBLIA?

Pe kuimbaʼe iñaranduvéva oiko vaʼekue ko yvy ape ári heʼi: “Jajapóvare ojekuaa ñanearandúpa” (Mateo 11:19). ¡Ajépa siertoite upéva! Jaikuaa hag̃ua iporã térã ivaípa peteĩ konsého jahechámante vaʼerã mbaʼépa oikóta jajapórõ la heʼíva. Upévare ikatu repensa: “Oiméramo añetehápe la Biblia ideprovécho, chepytyvõmante vaʼerã che rekovépe. Péro, ¿ikatúne piko chepytyvõ asolusiona hag̃ua umi provléma koʼág̃a ahasáva?”. Jahechamína peteĩ ehémplo.

Dianab ningo oreko vaʼekue itraváho, ovyʼa ha oiko porã. Péro peteĩ tesapirĩme okambiaite la isituasión. Omano chugui imembykuña, oheja chupe iména ha opyta isogueterei. Haʼe heʼi: “Ndaikuaavéi ningo ni mávapa che. Aperde che memby, che ména ha che róga. Añandu voi ndavaleveimaha mbaʼeverã, chekangypaite ha aperdete la esperánsa”.

Diana ohechakuaa siertoiteha la heʼíva Salmo 90:10: “Amo 70 áñorupi jaikove, imbaretevéva ohupyty 80, heta ñambaʼapo pohýi ha jahasa asy rei, umíva pyaʼe ohasa ha upéicha avei ñande rekove”.

Diana ohasárõ guare koʼã mbaʼe ijetuʼuetéva, oñepyrũ oheka konsého la Bíbliape ha oñesorprende ohechávo mbaʼéichapa oipytyvõ chupe. Jahechataháicha umi mbohapy artíkulo oúvape, heta persóna osegíva umi konsého bíblico ohupyty hína hetaiterei mbaʼe porã. Haʼekuéra ohechakuaa la Biblia ojoguaha pe mbaʼe itujaitéva péro iporãitiva oĩva pe muséope, ha ndahaʼeieteha umi ótro lívro yma guaréicha, kon el tiémpo ndoservivéimava. Péro, ¿mbaʼérepa idiferénte la Biblia umi ótro lívrogui? ¿Oime piko añetehápe ou Ñandejáragui ha ndahaʼéi kuimbaʼekuéra rembiapokuénte? (1 Tesalonicenses 2:13).

Ikatu nde avei repensa ñande rekove mbyky ha henyhẽha provlémagui. ¿Mávapepa rejerure jepi konsuélo, ajúda ha konsého neprovléma jave?

Jahechamína mbaʼéichapa la Biblia ikatu ñanepytyvõ koʼã mbohapy mbaʼépe:

1.  Jaevita umi provléma ikatúma guive.

2.  Ñasolusiona umi provléma oñepresentáva.

3.  Jagueropuʼaka umi situasión ijetuʼúva ha ndaikatúiva ñakambia.

Koʼã mbaʼe oñeanalisáta umi mbohapy artíkulo oúvape.