Oĩramo jepe heta provléma ani japerde la esperánsa

“Umi ára pahápe pe situasión ijetuʼúta ha ipeligrósota” (2 TIMOTEO 3:1).

¿NDÉPA rehendúva térã rehechámava oikoha peteĩva koʼã mbaʼe?

● Peteĩ mbaʼasy vai káusare omano hetaiterei hénte.

● Heta hénte ndorekóiva hoʼu vaʼerã omano ñembyahýigui.

● Peteĩ terremóto ojuka heta persónape, ha hetaitereípe oheja hogaʼỹre.

Umi ótro artíkulope retopáta hetave informasión oñeʼẽva koʼã mbaʼére, ha avei rehecháta la Bíbliape ojepredesíma hague umíva oiko vaʼerãha “umi ára pahápe”.

Péro koʼã artíkulo ndojepreparái oñemombeʼu hag̃uánte ndéve ko múndope oĩha heta provléma, pórke upéva katuete nde reikuaáma voi. Upéva rangue, koʼã artíkulo nepytyvõta ikatu hag̃uáicha ereko esperánsa. Jahecháta avei mbaʼéichapa ñane tiémpope oñekumpli heta profesía oĩva la Bíbliape, ha mbaʼéichapa upéva ohechauka koʼẽrõitéma opataha pe sufrimiénto oĩva ko múndope. Oĩ ndogueroviáiva jaikomaha “umi ára pahápe”, péro jahecháta umi pruéva ohechauka porãva upeichaha ha avei mbaʼérepa ikatu ñaime segúro koʼẽrõitéma omehorataha ñane situasión.

1. Umi terremóto

“Oĩta yvyryrýi tuicháva” (LUCAS 21:11).

● Haitípe oiko rire peteĩ terremóto, peteĩ ekípo ombaʼapóva umi notisiérope ohendu oĩha peteĩ mitã hasẽva umi eskómbro guýpe. Haʼekuéra osalva pe mitãkuñaʼi orekóvape un áño imédiorupi, péro ituakuéra katu omano upe terremótope.

¿MBAʼÉPA OHECHAUKA UMI INFÓRME? Enero de 2010-pe oiko vaʼekue Haitípe peteĩ terremóto tuichaitereíva omano haguépe mas de 300.000 persóna, ha un millón trecientos mil katu opyta vaʼekue hogaʼỹre. Upe terremóto ningo hetaitereípe operhudika kuri, péro ndahaʼéi upérõnte la oikóva. Pórke éntre abril de 2009 ha abril de 2010, ojerrehistra ko yvy tuichakuére oiko hague 18 terremóto tuicháva.

¿MBAʼÉPA OJEʼE JEPI? Ndahaʼéingo la hetavéva umi terremóto koʼág̃arupi, síno ke pe teknolohía rupive ojekuaavénte la oikóva.

¿SIÉRTOPA LA OJEʼÉVA JEPI? Epensamína ko mbaʼére: la Biblia ningo ndeʼíri mboy terremótopa oiko vaʼerã umi ára pahápe, síno heʼínte oikotaha “yvyryrýi tuicháva, ápe ha pépe”. Upéva ohechauka porã ñaimemaha hína umi ára pahápe (Marcos 13:8; Lucas 21:11).

¿MBAʼÉPA NDE ERE? ¿Oikópa hína umi yvyryrýi tuicháva ápe ha pépe la Biblia heʼi haguéicha?

Ndahaʼéi ningo umi terremóto añónte la ohechaukáva jaikomaha umi ára pahápe. Jahechamína ótra profesía oñekumplíva avei hína koʼág̃a.

[Komentário]

Umi terremóto káusare hetaitereíma ojesufri.

[Roagradese]

©William Daniels/Panos Pictures

2. Ñembyahýi

“Oĩta ñembyahýi” (MARCOS 13:8)

● Peteĩ karai og̃uahẽ ohóvo peteĩ puevloʼi opytávape Níger kapitál ypýpe, pórke opensa upépe okonsegitaha hoʼumi vaʼerã. Umi iprímo ha iñermanokuéra ohejáma avei hóga ha ou mombyrymbyrýgui pórke iñembyahyipáma hikuái. Ha oĩmbáramo jepe upépe ihentekuéra pe karai oñeno pe yvýpe haʼeño peteĩ, ¿mbaʼérepa? Sidi, pe héfe oĩva pe puevloʼípe, omombeʼu pe karai otĩha omaña hag̃ua ihentekuérare pórke ndaikatúi omongaru chupekuéra.

¿MBAʼÉPA OHECHAUKA UMI INFÓRME? Ko múndo tuichakuére 1 de káda 7 persóna iñembyahýi pórke ndorekói la hoʼumi vaʼerã. Ha Áfricape katu ivaivéntema la situasión pórke upépe 1 de káda 3 voi. Ñantende porã hag̃ua upéva ñañeimahina peteĩ família oĩháme pe túa, sy ha peteĩ mitã. Ha pe tembiʼu orekóva hikuái ndohupytýi rupi mbohapyvévape g̃uarã peteĩva ojesakrifikámante vaʼerã, ¿mávapa la ojesakrifikátava ijapyteguikuéra? Hetaiterei família ningo ohasa hína peichagua situasiónre káda día.

¿MBAʼÉPA OJEʼE JEPI? Ko yvy ningo oprodusi porã ohupyty hag̃uáicha enterovépe, tekotevẽnte oñeadministra porã oñekonsegi hag̃ua upéva.

¿SIÉRTOPA LA OJEʼÉVA JEPI? Legálmente ko yvy oprodusi porãiterei ha ifásil la oñemog̃uahẽ hag̃ua upéva oñekotevẽhápe, upévare ñahaʼarõta voi umi goviérno ojapo tekotevẽva guive anivéma hag̃ua oĩ pe ñembyahýi. Péro amo ipahápe haʼekuéra oñehaʼãramo jepe nokonsegíri upéva.

¿MBAʼÉPA NDE ERE? ¿Oñekumplípa hína la heʼíva Marcos 13:8? Ojehupytýramo jepe heta mbaʼe pe avánse teknolóhiko rupive, ¿oipytyvõpa upéva anivéma hag̃ua oĩ pe ñembyahýi?

Umi terremóto ha pe ñembyahýi káusare oñepresenta jepi avei ótro provléma tuichaitereíva ojepredesíma vaʼekue la Bíbliape.

[Komentário]

“Hetaiterei mitã omanóva de neumonía, diarréa térã ótra enfermeda, ikatu vaʼerãmoʼã kuri ojesalva orekórire hoʼumi vaʼerã”. (ANN M. VENEMAN, EX DIREKTÓRA EHEKUTÍVA DE UNICEF).

[Roagradese]

© Paul Lowe/Panos Pictures

3. Mbaʼasy

“Oĩta [...] opaichagua mbaʼasy [térã: ‘péste’]” LUCAS 21:11, nóta).

● Peteĩ país africánope ojesufrieterei pe gérra sivíl káusare. Peteĩ karai hérava Bonzali oñehaʼã oipytyvõ umi minéro ojagarra vaʼekuépe peteĩ vírus igravetereíva. Bonzali ojerure ajúda pe goviérnope péro mbaʼeve ndojapói hikuái. Upéi 4 mése rire og̃uahẽ la ajúda péro ja tárdema, Bonzali omanóma pe mbaʼasy káusare, oñekontahia jepe pe vírus oreko vaʼekuégui umi minéro.

¿MBAʼÉPA OHECHAUKA UMI INFÓRME? Káda áño hetaiterei hénte omano umi mbaʼasy káusare. Por ehémplo ojagarrágui chupekuéra neumonía, diarréa, sída, mbaʼasy poʼi ha malária. Ojekalkula áño 2004-pe koʼã mbaʼasy káusare omano hague haimete 11 millón de persóna. Upéva heʼise omano hague peteĩ persóna káda 3 segúndo.

¿MBAʼÉPA OJEʼE JEPI? Pe kantida de avitánte oĩva ko múndope hetave ohóvo, upévare hetave avei la hasýva.

¿SIÉRTOPA LA OJEʼÉVA JEPI? Siérto ningo la koʼág̃a oĩ hetave hénte ko múndope, péro oĩve avei tratamiénto ha pohã umi hasývape g̃uarã. Upéicharõ ningo saʼive hénte hasy vaʼerã kuri, péro amo ipahápe hetave rei.

¿MBAʼÉPA NDE ERE? ¿Osufrípa umi hénte umi mbaʼasy káusare la Biblia opredesi haguéicha?

Hetaiterei héntema ningo osufri umi terremóto, ñembyahýi ha mbaʼasy káusare. Péro heta hénte katu osufri hapichakuéra káusare. Ha sapyʼánte umi okuida ha ohayhu vaʼerã chupekuéra la ombohasa asýva umi héntepe. Jahechamína mbaʼépa heʼíma vaʼekue la Biblia upévare.

[Komentário]

“Ivaieterei ningo jahecháramo álgienpe ojukaha peteĩ león térã ótro animál salváhe. Péro upeichaiténte avei ivai ñamanóramo peteĩ mbaʼasy káusare, ha koʼytevéntema ñanemoñeñandu vai jahecháramo heta ñande rapicha omanoha avei upévare” (MICHAEL OSTERHOLM, EPIDEMIÓLOGO).

[Roagradese]

© William Daniels/Panos Pictures

4. Oĩta ndohayhumoʼãiva ni ihéntepe

Umi ára pahápe oĩta ndohayhumoʼãiva ihéntepe (2 TIMOTEO 3:1-3).

● Peteĩ kuñakarai hérava Chris ombaʼapo peteĩ grúpo oipytyvõvape umi osufrívape violénsia doméstika Reino Unídope. Haʼe omombeʼu: “Chemanduʼa peteĩ vuéltape ou hague ore rendápe peteĩ kuñataĩ che aikuaáva, péro ndaikatúi ni arrekonose chupe pórke hetaiterei anga oipoʼo. Heta kuña katu oñemaltratágui chupekuéra oñandu ndovaleiha mbaʼeverã ha itindyhárente voi oiko”.

¿MBAʼÉPA OHECHAUKA UMI INFÓRME? Peteĩ país africánope ojekalkula 1 de káda 3 kuñágui ojeavusa hague imitãme. Upe mísmo paíspe ojejapo peteĩ enkuésta umi kuimbaʼépe, ha 1 de káda 3 heʼi ndaivairiha omaltrata hembirekópe. Péro ndahaʼéi umi kuña añónte la osufríva violénsia doméstika. Por ehémplo, Canadápe ojekalkula 3 de káda 10 kuimbaʼépe omaltrataha hembireko.

¿MBAʼÉPA OJEʼE JEPI? Siémprente voi oexistíva la violénsia doméstika, koʼág̃arupi ikonosidovénte pórke noñeguerokirirĩvéima la oikóva.

¿SIÉRTOPA LA OJEʼÉVA JEPI? Añetehápe ningo koʼág̃arupi ojepuvlikave la oikóva. Péro, ¿oipytyvõpa upéva saʼive hag̃ua umi otrata vaíva ihéntepe? ¡Nahaniriete voi! Koʼág̃arupi katu koʼytevéntema jahecha mbaʼéichapa oĩ umi ojotrata vaíva ha ndohayhúiva ni ihéntepe.

¿MBAʼÉPA NDE ERE? ¿Oñekumplípa hína la heʼíva 2 Timoteo 3:1-3? ¿Rehechakuaápa nde oĩha umi ndohayhuvéimava ni ihéntepe?

Pe quinta profesía jahechátava katu oñekumpli hína ñane planétare. Jahechamína mbaʼépa heʼi hese la Biblia.

[Komentário]

“Oĩ heta hénte okyhyjéva odenunsia hag̃ua oñemaltrata jave chupe hogapýpe. Umi estadístika ohechauka umi kuña ndohoiha ensegída odenunsia osufriha violénsia doméstika. Oĩ ojapóva upéva iména omaltrata riréma chupe 35 véserupi voi.” (RREPRESENTÁNTE DE GRÚPO OIPYTYVÕVA UMI OSUFRÍVAPE MALTRTÁTO DOMÉSTIKO GÁLESPE).

5. Oñehundi ohóvo ko yvy

Ñandejára ohundíta umi ohundívape ko yvy (APOCALIPSIS 11:18).

● Pirri ningo peteĩ karai oikóva Nigériape ha ojapóva víno palméragui, péro haʼe ndaikatuvéi ombaʼapo upévape pórke hetaiterei petróleo oñeñohẽ pe Rrío Nígerpe ha ohundipaite umi palméra. Haʼe heʼi: “Pe kontaminasión káusare ningo umi pira omanomba, ore pire oñembyaipa ha umi rrío oñehundipa. Ndarekovéima ningo ni añemantene hag̃ua”.

¿MBAʼÉPA OHECHAUKA UMI INFÓRME? Oĩ expérto heʼíva oñemomboha hetaiterei yty umi márpe, amo 6 millón imédio de toneláda voi káda áño. Haimete alamita umi ytýgui haʼe plástiko ha umíva otarda jepi mas de 100 áño oñembyaipa hag̃ua ha algúno katu hetaiteve áño voi. Hiʼarive ko yvy oprodusíramo jepe hetaiterei mbaʼe pyaʼeterei ojepurupa umíva. Por ehémplo, oĩ expérto heʼíva ko yvy oikotevẽha un áño imédiorupi oprodusi jey hag̃ua la ojepurúva un áñope. Peteĩ diário Australiagua heʼi: “Péichante ñanderetárõ jahávo ha jaipurupa umi mbaʼe ko yvy oprodusíva, áño 2035-pe g̃uarã ñaikotevẽtama mokõi planéta ipuʼaka hag̃ua ñanderehe” (Sydney Morning Herald).

¿MBAʼÉPA OJEʼE JEPI? Ñande umáno ningo ñandevaleterei, ha jareko pe kapasida jasalva hag̃ua ko planéta.

¿SIÉRTOPA LA OJEʼÉVA JEPI? Heta hénte ningo oñehaʼã ojoko pe kontaminasión, péro upéicharõ jepe amás día oñembyaipave ohóvo ñane planéta.

¿MBAʼÉPA NDE ERE? ¿Tekotevẽpa Ñandejára osalva ñane planéta opromete haguéicha ojapotaha?

Ñandejára opromete avei oikotaha álgo iporãva umi ára pahápe. Jahechamína pe profesía número 6.

[Komentário]

“Che propieda ningo haʼete vaʼekue peteĩ paraíso iporãitereíva, ha koʼág̃a katu oñekontaminamba rupi haʼete peteĩ vasuréro” (ERIN TAMBER, PETEĨ KUÑAKARAI OIKÓVA SUR DE ESTADOS UNÍDOSPE, OMOMBEʼU MBAʼÉPA OPENSA OÑEÑOHẼ RIRE PE PETRÓLEO ÁÑO 2010-PE PE GÓLFO DE MÉXICOPE).

[Rrekuádro]

¿Ñandejára káusarepa oiko koʼã mbaʼe vai?

La Biblia opredesíramo jepe koʼã mbaʼe vai oikotaha umi ára pahápe, upéva ndeʼiséi Ñandejára káusare oikoha koʼã mbaʼe, ¿mbaʼérepa jaʼe upéva? Ehechamína mbaʼéichapa oñerresponde upéva pe lívro ¿Mbaʼépa ñanemboʼe la Biblia?, kapítulo 11-pe, ojapóva umi testígo de Jehová.

[Roagradese]

U.S. Coast Guard photo

6. Ojepredika oparupiete

“Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári” (MATEO 24:14).

● Vaiatea oiko peteĩ ísla michĩetereívape oĩva Oséano Pacíficope. Upe íslape oĩ saʼieterei avitánte ha opyta mombyryeterei. Upéicharamo jepe Vaiatea ha ivesinokuérape oho ovisita umi testígo de Jehová. ¿Mbaʼérepa ojapo hikuái upéva? Pórke umi testígo de Jehová omombeʼuse umi notísia porã oñeʼẽva Ñandejára Rréinore tahaʼe haʼéva pe lugár ojeikoha.

¿MBAʼÉPA OHECHAUKA UMI INFÓRME? Umi testígo de Jehová opredika umi notísia porã oñeʼẽva Ñandejára Rréinore ko múndo tuichakuére. Áño 2010-pente voi opredika hikuái mas de 1.600 millón de óra ha ojapo upéva 236 país ha territóriope. Upéva heʼise káda testígo de Jehová opredika hague 30 minútorupi káda día. Ha ndahaʼéi voi upévante, umi 10 áño ohasa vaʼekuépe ojapo ha oimprimi hikuái mas de 20.000 millón de puvlikasión bíblica.

¿MBAʼÉPA OJEʼE JEPI? Ymaite guive voínte ningo ojepredika pe mensáhe oĩva la Bíbliape.

¿SIÉRTOPA LA OJEʼÉVA JEPI? Siérto ningo oĩha oñeʼẽva pe mensáhe oĩvare la Bíbliape, péro la majoría ojapo upéva sapyʼaiténte ha algúno lugárpente. Péro umi testígo de Jehová katu ndahaʼeiete upéicha, haʼekuéra oñeorganisa porã ikatu hag̃uáicha opredika oparupiete ko múndo tuichakuére. Ha ymaite guive osegi ojapo hikuái upéva oĩramo jepe heta goviérno ha organisasión oñemoĩ mbaretéva hesekuéra (Marcos 13:13). Hiʼarive umi testígo de Jehovápe ndojepagái opredika hag̃ua ha haʼekuéra ndokovrái avei mbaʼevete umi puvlikasionkuérare. Upéva rangue haʼekuéra opaga umi gásto orekóvare iñorganisasión umi kontrivusión voluntária rupive.

¿MBAʼÉPA NDE ERE? ¿Ojepredikápa hína umi notísia porã oñeʼẽva Ñandejára Rréinore ko múndo tuichakuére? ¿Ndépa ere oñekumplívo ko profesía ohechaukaha ikatuha avei ñahaʼarõ álgo iporãva amo gotyove?

[Komentário]

“Jehová opermiti aja entéro jasegíta japredika umi notísia porã oñeʼẽva Ñandejára Rréinore. Ha kyreʼỹme jajapóta ikatúva entéro japredika hag̃ua opaichagua persónape.” (ANUARIO DE LOS TESTIGOS DE JEHOVÁ 2010).

¡Koʼẽrõitéma omehoráta la situasión!

“Koʼẽrõitéma opáta umi hénte iñañáva [...]. Péro umi hénte ivuénova opytáta ko yvy ape ári, haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre” (SALMO 37:10, 11).

¿REHECHASÉPA oñekumpli vove pe profesía oĩva ko sálmope? ¡Katuete ningo hiʼãitereíma ndéve upéva! Ha añetehápe ikatu reime segúro upéva koʼẽrõitéma oikotaha.

Umi ótro artíkulope jahecha kuri unos kuánto profesía oĩva la Bíbliape ohechauka porãva jaikomaha “umi ára pahápe”, péro hetaitereive oĩ (2 Timoteo 3:1-5). Ñandejára oskrivika umi profesía la Bíbliape oipotágui jareko esperánsa (Romanos 15:4). Ha oñekumplipa vove koʼã profesía heʼise koʼẽrõitéma oñesolusionataha entéro provléma jaguerekóva.

¿Mbaʼépa oikóta amo gotyove? Umi ára paha opa rire, Ñandejára Rréino ogovernáta ko yvy kompletoite (Mateo 6:9, 10). Jahechamína mbaʼéichapa heʼi la Biblia jaikotaha upe tiémpope:

● Opátama pe ñembyahýi. “Ko yvy oprodusi porãitereíta, umi montáña ruʼãme entéro, hembypáta la ojekosecha vaʼerã” (Salmo 72:16).

● Opátama umi mbaʼasy. “Ni peteĩ oikóva ko yvy ape ári ndeʼimoʼãvéima: ‘Cherasy hína’ ” (Isaías 33:24).

● Ñane planéta ipyahuete jeýta. “Pe ñu ha pe yvy isékova ovyʼáta, pe desiérto ovyʼaitereíta, henyhẽta yvoty porã porãgui” (Isaías 35:1).

Oĩ ningo hetaitereive profesía oñekumplítava amo gotyove iporãitereíva. Ore testígo de Jehová ikatu rohechauka ndéve mbaʼérepa roime segúro koʼẽrõite omehorataha la situasión ha opataha entéro umi provléma jaguerekóva.