¿Haʼépa kristiáno tee umi testígo de Jehová?

Ore testígo de Jehová roguerovia haʼeha kristiáno tee. ¿Mbaʼérepa? ¿Moõguipa roguenohẽ umi mbaʼe rogueroviáva? ¿Mbaʼérepa roñehenói testígo de Jehová? ¿Ha mbaʼéichapa rohechauka rojoayhuha? Jahechamína.

1. ¿Moõguipa ore testígo de Jehová roguenohẽ umi mbaʼe rogueroviáva?

Jesús heʼi vaʼekue: “[Ñandejára] ñeʼẽ hína la verda” (Juan 17:17). Jesús ojapo haguéicha, ore testígo de Jehová rojasegura umi mbaʼe rogueroviáva oĩha Ñandejára Ñeʼẽme. Por ehémplo, jahechamína mbaʼépa ojapo vaʼekue umi testígo de Jehová áño 1870 rupi. Upérõ oñehenói vaʼekue chupekuéra Estudiánte de la Biblia. Haʼekuéra oñepyrũ vaʼekue ostudia porã Ñandejára Ñeʼẽ ojasegura hag̃ua umi mbaʼe ogueroviáva oĩha upépe. Ojapo upéva hikuái, jepe idiferentete umi mbaʼe ogueroviáva umi iglésia omboʼévagui. Ha upéi oñepyrũ okomparti ótrondi umi mbaʼe oaprendéva la Bíbliagui.a

2. ¿Mbaʼérepa roñehenói testígo de Jehová?

Jehová heʼi umi oadoráva chupe haʼeha itestígo, pórke odefende chupe ha oñeʼẽ meme hese (Hebreos 11:4–12:1). Por ehémplo Ñandejára heʼi vaʼekue ipuévlope: “Peẽ hína che testígo” (elee Isaías 43:10). Ha Jesúspe voi oñehenói “pe Testígo Fiél” (Apocalipsis 1:5). Upévare, áño 1931 guive umi Estudiánte de la Biblia odesidi oñehenoitaha testígo de Jehová. ¡Ha añetehápe rovyʼaiterei roñehenói haguére upéicha!

3. ¿Mbaʼéichapa rohechauka rojoayhuha Jesús ojapo haguéicha?

Jesús ohayhueterei vaʼekue idisipulokuérape ihénte teetéicha (elee Marcos 3:35). Ore testígo de Jehová avei rojoayhu haʼeramoguáicha peteĩ família oĩva ko múndo tuichakuére. Upéicha rupi roʼe ojupe ermáno térã ermána (Filemón 1, 2). Ha avei rokumpli ko mandáto oĩva la Bíbliape: “Pehayhúkena enterove ermanokuéra oĩvape ko múndope” (1 Pedro 2:17). Ore testígo de Jehová rohechauka rojoayhuha hetaiterei hendáicha. Por ehémplo roipytyvõ ore ermanokuéra oĩvape ko múndo tuichakuére oikotevẽ jave hikuái.

EJEPYʼAMONGETAMÍNA

4. Rojasegura umi mbaʼe rogueroviáva oĩha la Bíbliape

Jehová heʼíma vaʼekue voi pe añetegua oĩva la Bíbliape mbeguekatúpe oñentendetaha ohóvo. Elee Daniel 12:4, ha upéi erresponde ko porandu:

• ¿Mbaʼépa la ‘heta hetavétava’ Ñandejára puévlo apytépe amáske ostudia la Biblia?

Ehecha mbaʼéichapa peteĩ grúpo ostudia porã la Biblia, umíva apytépe peteĩ karai hérava Charles Russell. Ehecha pe VIDÉO, ha upéi erresponde ko porandu:

VIDÉO: Ojetopa pe añetegua oĩva la Bíbliape (7:45)

• Según pe vidéo, ¿mbaʼéichapa Charles Russell ha unos kuánto Estudiánte de la Biblia oñembyaty oanalisa hag̃ua Ñandejára Ñeʼẽ?

¿Reikuaápa raʼe?

Ore testígo de Jehová rokambia mimi jepi umi mbaʼe rogueroviáva. ¿Mbaʼérepa? Koʼẽmbávo ohóvo ningo jahecha porãve jahávo umi mbaʼe oĩva ñande jerére. Péicha avei, Ñandejára mbeguekatúpe ha hiʼoraitépe omyesakãve ohóvo umi mbaʼe oĩva Iñeʼẽme (elee Proverbios 4:18). Upéicharõ ndahaʼéi la Biblia la rokambiáva, síno rontende porãve jave peteĩ mbaʼe rokambiaʼimi umi mbaʼe rogueroviáva.

5. Ore rodefende Jehovápe ha roñeʼẽ meme hese

VIDÉO: ¿Mbaʼérepa roñehenói testígo de Jehová? (2:40)

• ¿Mbaʼérepa opyta porãiterei roñehenói testígo de Jehová?

¿Mbaʼérepa Jehová oiporavo peteĩ grúpope haʼe hag̃ua itestígo? Pórke haʼekuéra omombeʼúta la héntepe haʼe haʼeha Ñandejára tee, ha japuha heta mbaʼe ojeʼéva hese. Jahechamína mokõi ehémplo.

Oĩ rrelihión omboʼéva jaipuru vaʼerãha sánto térã taʼanga ñamombaʼeguasu hag̃ua Ñandejárape, ¿siértopa upéva? Elee Levítico 26:1, ha upéi erresponde koʼã porandu:

• ¿Mbaʼépa añetehápe omboʼe ko téxto? ¿Mbaʼéichapa oñeñandu Jehová ojepuru jave umi sánto térã taʼanga?

Oĩ rrelihión omboʼéva Jesús haʼeha Ñandejára, ¿siértopa upéva? Elee Juan 20:17, ha upéi erresponde koʼã porandu:

• ¿Mbaʼépa añetehápe omboʼe ko téxto? ¿Haʼépa la mísma persóna Jesús ha Ñandejára?

• ¿Mbaʼéichapa reñeñandu reikuaávo Jehová voi onkargaha itestigokuérape oho hag̃ua odefende chupe ha Itaʼýrape?

6. Ore rojoayhu

La Biblia okompara kristianokuérape umi párte oĩvare ñande retépe. Elee 1 Corintios 12:25, 26, ha upéi erresponde koʼã porandu:

• ¿Mbaʼépa ojapo vaʼerã umi kristiáno tee ohecha jave iñermanokuéra osufriha?

• ¿Mbaʼépa nde rehecharamove umi testígo de Jehová ojotrata lájagui?

Peteĩ testígo de Jehová osufríramo, enterovete ermáno oĩva ko múndo tuichakuére pyaʼe porã oñehaʼã oipytyvõ chupe. Emañamína peteĩ ehémplore. Ehecha pe VIDÉO, ha upéi erresponde ko porandu:

VIDÉO: Umi ermáno Haitipegua oaguanta pe urakán Matthew (5:29)

• ¿Mbaʼe mbaʼépa ojapo umi testígo de Jehová ohechauka porãva ojoayhuha?

RRESÚMEN

Ore testígo de Jehová haʼe kristiáno verdadéro. Ore rojoayhu peteĩ família teéicha, umi mbaʼe rogueroviáva oĩ la Bíbliape ha siémpre romombeʼu la verda Jehovágui ha rodefende chupe.

Rrepáso

• ¿Mbaʼérepa roñehenói testígo de Jehová?

• ¿Mbaʼéichapa rohechauka rojoayhuha?

• ¿Ndépa reguerovia umi testígo de Jehová haʼeha kristiáno tee?

EINVESTIGA HAG̃UA

Eikuaave ore istóriagui.

Testigos de Jehová: Ohechauka ojeroviaha. Párte 1: Osẽ hikuái pytũmbýgui (1:00:53)

Ehecha mbaʼéichapa umi testígo de Jehová ohechauka japuha heta enseñánsa rrelihiósa.

Ñandejára puévlo ombotuicha héra (7:08)

Elee koʼã artíkulo eikuaa porãve hag̃ua umi testígo de Jehovápe.

“Ojekuaaséva umi testígo de Jehovágui” (Seksión oĩva jw-pe)

Stephen iviolentoiterei vaʼekue, ¿péro mbaʼépa ohecha umi testígo de Jehová apytépe omomýiva chupe okambia hag̃ua?

“Amasdía aha vaive kuri hese” (Ñemañaha 1 de julio de 2015)