Primer milágro Jesús ojapo vaʼekue

Ojapo tres día Natanaélgui oiko hague Jesús disípulo. Koʼág̃a Jesús ha unos kuánto idisípulo osẽ oho nórte gotyo Galiléape, peteĩ puévlo héravape Caná, haʼéva hína Natanael válle. Upe puévlo opyta nórte gotyo Nazarétgui, pe lugár Jesús okakuaa haguépe. Jesús ha idisipulokuéra oñeinvita peteĩ kasamientorã Canápe.

Jesús sy oho avei pe kasamientohápe. Umi omendáva hentekuéra haʼe hína María amígo, ha upévare haʼe oñatende umi invitádore. María ensegidamínte opilla saʼimaha la víno, ha oho heʼi Jesúspe: “Opángo chuguikuéra la víno” (Juan 2:3).

María oipota Jesús oñenkarga pe provlémare, péro ñepyrũrã Jesús noñentremeteséi, upévare heʼi porãnte chupe: “¿Mbaʼére piko che ajepyʼapýta upévare?” (Juan 2:4). Jesús ningo pe Rréi Ñandejára omoĩ vaʼekue, upévare ni iñamígo ni ihentekuéra ndaikatúi heʼi chupe mbaʼéichapa okumpli vaʼerã hembiapo. Upémarõ María ohejánte imemby kárgope la provléma ha heʼi umi oporoservívape: “Pejapo opa mbaʼe heʼíva peẽme” (Juan 2:5).

Upépe oĩ seis kambuchi guasu ojejapo vaʼekue itágui ha káda únope ija 40 lítro rasa y. Jesús heʼi umi oporoservívape: “Pemyenyhẽ ýgui umi kambuchi”. Upéi heʼi: “Koʼág̃a peguenohẽ michĩmi ha pegueraha pe kasamiénto omoakãvape” (Juan 2:7, 8).

Pe oñenkargáva pe kasamiéntore ndoikuaái pe víno ojejapo hague peteĩ milágro rupive, péro ohechakuaa iporãha. Upévare ohenói pe nóviope ha heʼi chupe: “Oimeraẽ ótro kuimbaʼe ningo omoĩ raẽ pe víno iporãva ha umi hénte okaʼu rire, omoĩ pe ivaivéva. Upéva rangue katu nde reservi pe víno iporãva koʼág̃a” (Juan 2:10).

Kóva hína pe primer milágro Jesús ojapo vaʼekue, ha umi idisípulo pyahu ojeroviave hese ohecha rire koʼã mbaʼe. Upe rire, Jesús, idisipulokuéra, isy ha iñermanokuéra oviaha Capernáumpe, oĩva mar de Galilea kóstape noroéste gotyo.