Oipotaparakaʼe Ñandejára oiko koʼã mbaʼe?
ÑAMAÑA vove oimeraẽ diáriore, jahecha televisión térã ñahendu rrádio, mbaʼeichagua notísiapa jatopa? Jatopa hetaitereiha pe terrorísmo, gérra ha jejuka. Ha koʼág̃a ñapensami avei umi mbaʼe ñandepyʼapývare. Ikatu jajepyʼapyeterei jaguerekógui peteĩ ñanderogaygua térã ñane amígo hasýva térã omano ramoitéva, ha koʼã mbaʼére ñañeñandu Job oñeñanduhaguéicha. Job, peteĩ kuimbaʼe ipyʼaporãva, heʼivaʼekue: “ndaipóri avyʼa hag̃ua, chererekógui yvýre, jepyʼapýpe” (Job 10:15, Sociedad Bíblica Paraguaya).
Ñañeporandumi:
Oipotaparakaʼe Ñandejára koʼã mbaʼe chéve ha opa yvyporakuérape g̃uarã?
Mbaʼépa ikatu chepytyvõ ambohovái hag̃ua umi provléma aguerekóva?
Oĩpa esperánsa jaguerekotaha pyʼaguapy ko Yvy ape ári?
La Biblia ombohovái ñandéve koʼã porandu.
LA BIBLIA OMOMBEʼU ÑANDEJÁRA OJAPOTAHA KOʼÃ MBAʼE KO YVÝPE G̃UARÃ.
“Ha omokãta hesaykuéra, ha ndaiporimoʼãvéi ñemano, térã jaheʼo, térã pyahẽ, térã tasy.” (Revelación 21:4)
“Ikarẽva guasúicha opóta.” (Isaías 35:6)
“Umi ohechaʼỹva ohecháta.” (Isaías 35:5)
“Oúgui hína pe ára opavave oĩva yvyguýpe ohendutaha iñeʼẽ ha osẽta.” (Juan 5:28, 29)
“Ha avave ndeʼimoʼãi: ‘Cherasyʼaína’.” (Isaías 33:24)
“Oĩta hetaiterei kóga hiʼáva [térã hiʼupy] yvy ape ári” (Salmo 72:16)
MBAʼE VENEFÍSIOPA ÑAGUENOHẼ LA BIBLIA OMBOʼÉVAGUI?
Ani remboyke koʼã mbaʼe jahechavaʼekue reimoʼãgui ndoikomoʼãiha. Ñandejára opromete ojapotaha koʼã mbaʼe ha la Biblia ohechauka mbaʼéichapa ojapóta upeva.
Péro la Bíbliape jatopa hetave mbaʼe. Ohechauka mbaʼéichapa ikatu koʼág̃ama voi jaiko vyʼápe. Ñapensami umi mbaʼe ñandepyʼapývare ha umi provléma jaguerekóvare. Ikatu ñandesogue, jaguereko provléma ñande rogapýpe, ñanderasy, térã omano peteĩ jahayhúva. La Biblia ikatu ñanepytyvõ ñambohovái hag̃ua umi provléma, ha omeʼẽ ñandéve pyʼaguapy okontestávo koʼã porandu:
Mbaʼérepa jahasa asy?
Mbaʼéichapa ikatu ñambohovái umi mbaʼe ñandepyʼapýva?
Mbaʼépa ikatu jajapo javyʼave hag̃ua ñande rogaygua ndive?
Mbaʼépa oiko umi omanovaʼekuégui?
Jahecha jeýtapa umi jahayhúva omanovaʼekuépe?
Mbaʼérepa ikatu jaguerovia Ñandejára okumplitaha umi promésa ojapovaʼekue?
Releévo ko lívro rehechaukareína reikuaaseha mbaʼépa omboʼe la Biblia. Ko lívro nepytyvõta reikuaa hag̃ua upéva. Rehechaháicha, umi páhina guýpe oñemoĩ porandu káda párrafope g̃uarã. Millones oĩ ovyʼáva ostudiávo péicha la Biblia testigos de Jehová ndive. Ha hiʼã avei oréve nde reime ijapytepekuéra. Tanevendesi Ñandejára rejapóvo ko mbaʼe neporãva reaprendévo mbaʼépa añetehápe omboʼe la Biblia!