Koʼág̃a raẽ avyʼa ha amombaʼe che rekove
Omombeʼu Gaspar Martínez
Che ningo peteĩ mitãkariaʼy chokokue avavaʼekue siudápe ha upéi cherríko. Ha releéramo rehecháta cherríko hague, péro ndahaʼéi chepláta hetágui.
CHE ningo akakuaa kampáñape, peteĩ lugár hérava La Rioja, Espáñape. Upépe ningo imboriahúvamante heta oĩ pe áño 1930 guive. Ha 10 áño arekórõ guare asẽma eskuélagui, péro alee ha askrivikuaáma. Che ningo ambaʼapo kokuépe koʼẽ guive pytũ meve umi siete che ermánondi ha roñangareko avei ovechakuérare.
Ore ningo oremboriahuetereivaʼekue ha hiʼãiterei oréve rosẽ upe situasión ijetuʼuetévagui. Orepyʼarasy voi rohechávo oĩha oiko porãvéva orehegui. Upéicharõ jepe, peteĩ obispo heʼi ore roikohárupi la hénte irrelihiosoveha. Haʼe ningo ni noimoʼãi og̃uahẽtaha peteĩ tiémpo hetaiterei oĩtaha ohejáva pe rrelihión katólika.
Aiko porãseve
Amenda peteĩ mitãkuña che tavaygua rehe. Haʼe ningo héra Mercedes, ha upe riremínte orefamíliama. Áño 1957-pe rova peteĩ távape, hérava Logroño. Upe rire che hentekuéra ova avei upépe. Sapyʼaitépe ahechakuaáma hasytaha agana porã hag̃ua, pórke chéngo ndarekói peteĩ profesión. Ha aikuaase voi moõpa ikatu atopa la solusión. Ñepyrũrãite aha peteĩ vivliotékape ha ni che ndaikuaái maʼerãpa.
Upe rire ahendu rrádiope oñekuaveʼẽha peteĩ kúrso de la Biblia por kárta. Upémarõ ajerure ha astudiapa rire oho cherendápe umi evanhéliko. Natekotevẽivaʼekue aha heta vése ahechakuaa hag̃ua noñontendeiha umi omoakãva upe rrelihión. Upévare adesidi ndahaveimaha ha haʼe voi enterove rrelihión ojojoguapaha.
Ñandejára Ñeʼẽ cheresapeʼa
Áño 1964-pe og̃uahẽ che rógape peteĩ mitãrusu hérava Eugenio, haʼe ningo testigo de Jehová. Che nahenduietéva mbaʼeve upe rrelihióngui. Péro añemongetase la Bíbliape heʼívare. Aimoʼãvaʼekue aikuaaha heta mbaʼe la Bíbliagui ha roñemongetárõ guare heta téystore voi chemanduʼa chupe. Ha ndagueroviapáiramo jepe umi evanhéliko omboʼéva, añehaʼã adefende.
Dos vése roñemongeta are porã rire, ahechakuaa Eugenio ijeskuelaʼivéramo jepe chehegui oikuaaveha la Biblia omboʼéva. Chéngo ahecharamoiterei mbaʼéichapa haʼe oheka ha omyesakã umi téysto. Eugenio omombeʼu chéve ñaimemaha ára pahápe ha koʼẽrõitéma Ñandejára Rréino poguýpe ko yvýgui oikotaha peteĩ hardín. Upéva ningo chembovyʼaiterei (Sal. 37:11, 29; Isa. 9:6, 7; Mat. 6:9, 10).
Añepyrũ astudia la Biblia ha umi mbaʼe aaprendéva ipyahupaite chéve ha amombaʼe che pyʼaite guive. Upérõ oñemeʼẽ chéve peteĩ oportunida avyʼa ha amombaʼe hag̃ua che rekove. Péinako ajuhu koʼág̃a raẽ upe hetaitéma ahekavaʼekue. Ha upe guive ndaikovéima aheka agana porãve hag̃ua. Ambotapykuéma upéva aikuaágui koʼẽrõitéma ndaiporimoʼãveimaha hasýva ni omanóva (Isa. 33:24; 35:5, 6; Rev. 21:4).
Upe riremínte amombeʼúma che hentekuérape umi mbaʼe aaprendéva la Bíbliagui. Kyreʼỹme amombeʼu chupekuéra koʼẽrõitéma Ñandejára ojapotaha ko yvýgui peteĩ hardín neporãmba jepéva ha oikotaha pype opa árare umi iñeʼẽrendúva chupe.
Che hentekuéra ostudia la Biblia
Upe riremínte, doce rupi che hentekuérandi roñembyaty roñemongeta hag̃ua Ñandejára Ñeʼẽre. Upéva rojapo káda domingo kaʼaru dos térã tres óra rupi peteĩ che tio rógape. Ha Eugenio ohechávo hetaiterei che hentekuérama oikuaaseveha la Bíbliagui, oñepyrũ omboʼe káda famíliape.
Umi che hénte apytépe ningo oĩ oikóva Durángope, peteĩ táva opytáva 120 kilómetro rupi Logróñogui, ha upépe ndaipóri ni peteĩ testigo de Jehová. Upéi tres mése haguépe añemotiémpo ha aha hendapekuéra amombeʼu hag̃ua chupekuéra umi mbaʼe aaprendéva la Bíbliagui. Aime aja upépe, diez rupi oñembyaty chendive kaʼarupytũngue ha roñemongeta pyharepyte peve. Ha omombaʼeterei hikuái umi mbaʼe amboʼéva chupekuéra la Bíbliagui. Ajukuetévoma aheja chupekuéra heta Biblia ha puvlikasión. Upe rire asegi añemongeta jepi hendivekuéra.
Mbaʼeichaite piko oiméne ovyʼáraʼe umi testigos de Jehová oho ypýrõ guare Durángope ha ojuhu dieciocho tapicha ohaʼarõvahína chupekuéra ostudia hag̃ua la Biblia. Upémarõ umi ermáno oñepyrũ ostudia káda família ndive.
Upe tiémpope Mercedes okyhyjégui ndoikuaaseguasúi Ñandejára Ñeʼẽ omboʼéva. Upérõ ningo ojeproivi testigos de Jehová rembiapo Espáñape. Upévare Mercedes okyhyje oñemosẽrõ g̃uarã eskuélagui mokõi ore famíliape. Ha okyhyje avei orevesinokuéra omaña vaipárõ g̃uarã orerehe. Péro ohechávo umi ore hentekuéra ostudiajoa la Biblia, haʼe ostudia ñepyrũ avei.
Upe rire, dos áño haguépe cuarenta che hentekuérama ojevautisa ohechauka hag̃ua oñemeʼẽmaha Ñandejárape. Koʼág̃a che hentekuéra orekóma avei pe esperánsa che arekóva, ha upéva chemopensa ajapo hague peteĩ mbaʼe iñimportantetereíva. Hetaite mbaʼe porã ningo Ñandejára omeʼẽ oréve!
Koʼẽ koʼẽre cherrikove
Upéi veinte áño añehaʼãmbaite amongakuaa umi mokõi ore família ha ambaʼapo kongregasiónpe. Upépe ningo heta che rembiaporã oñemeʼẽ chéve. Chemanduʼa Mercedes ndive rovárõ guare Logróñope veinte testigo de Jehová rupínte oĩvaʼekue ha upe távape oiko 100.000 tapicha rupi.
Arekórõ guare 56 áño katu oñemboty la fávrika ambaʼapoha ha apyta travahoʼỹre. Ha che ningo ymaite guive ajaposévami la prekursorádo, upémaramo aaprovecha ko situasión ha añepyrũ che prekursorádo. Péicha rupi avei saʼi agana ha ijetuʼu chéve ahupytypa hag̃ua roikotevẽva. Péro Mercedes chepytyvõ hag̃ua ombaʼapo de limpiadóra. Roñehaʼãmbaite roiko pe roganamíva reheve ha péicha ndofaltáiva oréve mbaʼeve. Koʼág̃a peve ajapo che prekursorádo, che rembireko katu ojapo jepi precursorado auxiliar. Haʼe ningo opredikaseterei.
Ndaʼareguasuihína, Mercedes ogueraha jepi rrevísta peteĩ kuñakarai pyahu héravape Merche. Haʼe ningo michĩme ostudiamavaʼekue la Biblia. Ko kuñakarai ningo oleeseterei voi la rrevistakuéra, ha Mercedes ohechakuaa hese omombaʼeha gueteri Ñandejára Ñeʼẽ. Upéi Merche oñepyrũ ostudia la Biblia ha oho porã voi hese. Péro iména Vicente omokõiterei ha pyʼỹinte oñemosẽ itravahohágui. Upévare ndaikatúi ni omantene ifamília. Ha ikaʼu rupi ojopoipotaitémaraʼe hembirekóndi.
Mercedes heʼi Mérchepe omokyreʼỹ hag̃ua iménape oñeʼẽ hag̃ua chendive. Upéi Vicente oñemongeta chendive ha heta vése aha rire hendápe oñepyrũ ostudia la Biblia. Mbeguekatúpe okambia: ñepyrũrã nomokõvéima káda día, upéi una semána ha ipahápe opoietéma voi. Tuicha ipínta porãve avei ha ifamília oiko jey pyʼaguapýpe. Koʼág̃a oiko islas Canáriaspe, upépe hembireko ha itajýrandi oipytyvõ peteĩ kongregasión michĩvape.
Añetehápe avyʼa
Oĩramo jepe che hentekuéra Testígova omanomavaʼekue, heta hetave oĩ che hentekuéra oservíva Jehovápe (Pro. 10:22). Ojapóma ningo cuarenta áño rupi oñepyrũ hague ostudia la Biblia che hentekuéra. Ha avyʼaiterei ahechávo enterovelénto koʼág̃a peve oserviha Jehovápe ha hendivekuéra itaʼýra ha inietokuéramimi entero.
Hetaiterei ningo areko che hénte Testígova. Umíva apytépe oĩ ansiáno, siérvo ministeriál ha prekursór. Che raʼy ypykue ha hembireko oservi Jehovápe sukursál de Madrídpe. Chemanduʼa ajevautisárõ guare Espáñape oĩvaʼekue tres mil puvlikadór rupi, péro koʼág̃a ohasáma cien mil. Avyʼaiterei ningo la che prekursorádo reheve ha aagradese Jehovápe hetaite mbaʼe porã ahasa haguére aservívo chupe. Ha che eskuelaʼíramo jepe, sapyʼánte aservi de superintendente de circuito sustituto.
Ramónte aikuaa pe táva che akakuaa haguépe ndaiporiveilentomaha oikóva. Imboriahu rupi oheja hikuái la ijyvy ha hogakuéra ha oho ojeporeka oiko porãve hag̃uáme. Ha iporãveha heta umíva apytégui roaprende rovyʼa ha romombaʼe hag̃ua ore rekove.
[Nóta oĩva taʼanga ndive páhina 32]
Koʼápe oĩmbalénto che hentekuéra oservíva Jehovápe