¿Mbaʼérepa jaiporuvaʼerã Ñandejára réra?

Ko artíkulo nepytyvõta rembohovái hag̃ua la Biblia rupive umi mbaʼe reikuaaséva. Peteĩ testígo de Jehová ikatu ohesaʼỹijo nendive koʼã porandu.

1. ¿Mbaʼérepa Ñandejára oiporavo herarã?

Entéronte jaipota umi hénte ñanerenói ñande réra rupi. Heta oĩ oporohenóiva “karai”, “kuñakarai”, “mitãkuña”, “mitãkariaʼy” ha umícha. Péro umíva ndahaʼéi téra, ha oñehenói voínte upéicha oimeraẽvape. Ñande réra katu ñanediferensia ótrogui. Ñandejárape avei oñehenói heta hendáicha, pór ehémplo “Ñande Ruete”, pe “Ipuʼakapáva”, “Apohare Ijojahaʼỹva” ha umícha (Génesis 15:2; 17:1; Eclesiastés 12:1). Péro haʼe oiporavo herarã, ikatu hag̃uáicha jaikuaa porãve chupe ha jaiko iñamígoramo. Guaraníme, pór ehémplo ojeʼe Jehová. (Elee Isaías 42:8.)

Heta Bíbliagui ojepeʼa Ñandejára réra, ha hendaguépe oñemoĩ Tupã, Ñande Ruete, Ñandejára térã Señór. Péro Ñandejára réra tee oĩvaʼekue 7.000 vése rupi ojehai ypýrõ guare la Biblia. Upéva ohechauka Ñandejára voi oipotaha jaikuaa chupe héra rupi. (Elee Isaías 12:4.)

2. ¿Mbaʼérepa tekotevẽterei jaikuaa Ñandejára réra?

Ndahaʼéi jaikuaantevaʼerã Ñandejára réra ha oĩma, síno avei ñañemoag̃uivaʼerã hese ha jaiko iñamígoramo. Pe téra Jehová heʼise voi chugui oikotaha oimeraẽ mbaʼe oñekotevẽva ojapo hag̃ua hembipota. Upévare, jaikuaávo Ñandejára réra jaguerovia haʼe okumplipaitetaha ipromesakuéra (Salmo 9:10). Umi oikuaáva ha oiporúva héra tee ojerovia hese ha omotenonde chupe hekovépe. Ha Jehová oñangareko hesekuéra. (Elee Salmo 91:14.)

3. ¿Mbaʼérepa Ñandejára oipota jaikuaa héra?

Ñandejára oipota enterove jaikuaa héra ou porãtagui ñandéve. Jaikuaávo héra ikatu ñañemoag̃ui hese ha jaiko opa ára g̃uarã. Upévare Ñandejára oipota jaikuaauka opárupi héra tee. (Elee Juan 17:3 ha Romanos 10:13, 14.)

Jesús omboʼevaʼekue Ñandejára réra, iléi, ipromesakuéra ha mbaʼéichapa haʼe, upéicha rupi umi hénte oikuaave Ñandejárape. Koʼág̃a avei Jesús remimboʼekuéra ojapo upéva opárupi. Haʼekuéra oñondivepa “peteĩ tetã ogueraháva [Ñandejára] réra”. (Elee Hechos 15:14 ha Juan 17:26.)

4. ¿Mbaʼéichapa Ñandejára omopotĩta héra?

Heta hénte oñeʼẽ vai Jehováre, upévare haʼe omopotĩta héra. Pór ehémplo, oĩ heʼíva haʼe ndojapói hague ko univérso ha upévare natekotevẽiha ñaneñeʼẽrendu chupe. Ótro katu heʼi ndojepyʼapyiha ñanderehe ha ikáusare jahasa asyha. Péro koʼẽrõitéma Ñandejára okastigáta koʼã hénte oñeʼẽ vaívape hese ha omongyʼáva héra. (Elee Salmo 83:17, 18.)

Irréino rupive, Ñandejára ohundíta yvyporakuéra goviérno ha péicha omomarangatúta héra, ha jaikóta pyʼaguapýpe ha kyhyjeʼỹme ko yvy ape ári (Daniel 2:44). Koʼẽrõite enterovéva oikuaáta Jehová añoite haʼeha Ñandejára tee. (Elee Ezequiel 36:23 ha Mateo 6:9.)

Ha nde, ¿mbaʼépa rejapovaʼerã? Tekotevẽ restudia Ñandejára Ñeʼẽ reñemoag̃uive hag̃ua hese ha reñembyatyvaʼerã umi hénte ohayhúvandi chupe. Umi iñeʼẽrendúva Jehovápe oikuaa porã haʼe ndahesaraimoʼãiha chuguikuéra omomarangatu vove héra (Malaquías 3:16).

Reikuaasevéramo koʼã mbaʼe, ikatu rehecha ko lívro, Mbaʼépa añetehápe omboʼe la Biblia?, ojapóva testigos de Jehová, kapítulo 1.

[Nóta oĩva taʼanga ndive páhina 16]

Ñandejára réra peteĩ kuatiañeʼẽ evréope