1-3. a) ¿Mbaʼérepa jaʼekuaa Josué haʼe hague peteĩ ehémplo iporãva? b) ¿Mbaʼe rehépa ñanemanduʼavaʼerã jadesidíta jave?

JADESIDÍTA jave peteĩ mbaʼe, entéro ikatu jajapo iporãva térã ivaíva, upévare iñimportánte hína jaiporavo porã. Epensamína nde reguataha rehóvo peteĩ tapére, ha peichahágui rehecha oĩha mokõi tape. ¿Mbaʼépa redesidíta? Reiporavo porã hag̃ua, repensavaʼerã moõpa rehosehína, ha nemanduʼavaʼerã peteĩ tape ndeguerahataha rehosehápe péro pe ótro nemomombyryvéta upégui.

² Ñandejára Ñeʼẽme jatopa heta ehémplo ohechaukáva mbaʼérepa iñimportánte jadesidi porã mbaʼépa jajapovaʼerã térã mbaʼe tapérupipa jaháta. Umíva apytépe oĩ Caín, haʼe odesidivaʼerã kuri ojejokótapa, térã osegítapa ipochy rendy (Gén. 4:6, 7). Josué katu oiporavovaʼerã oservítapa Ñandejára teépe térã umi ñandejára guaʼúpe. Haʼe akóinte oñemoag̃uise Jehováre, ha upévare oiporavo peteĩ tape oipytyvõtava chupe upearã (Jos. 24:15). Caín katu ndojaposeivaʼekue upéva ha oiporavo peteĩ tape omomombyrýva chupe Ñandejáragui.

³ Heta vése ñande jadesidivaʼerã avei mbaʼe tapérupipa jaháta. Upéicha jave iporã ñanemanduʼa moõpa “ñag̃uahẽse” térã mbaʼépa jajapose: ñande ñambotuichase Jehovápe opa mbaʼe jajapóvape, ha ndajahejaséi mbaʼeve ñanemomombyry chugui (elee Hebreos 3:12). Ko artíkulo ha pe oúvape ñahesaʼỹijóta siete mbaʼe tekotevẽva jadesidi porã ani hag̃ua jaheja mbaʼeve ñanemomombyry Jehovágui.

ÑANDE TRAVÁHO

4. ¿Mbaʼérepa iñimportánte ñambaʼapo?

⁴ Enterove kristianokuéra tekotevẽ ñambaʼapo ñamantene hag̃ua ñane famíliape ha ñandejupe voi. La Biblia heʼi umi ndojaposéiva upéva oĩ vaiveha peteĩ ojeroviaʼỹvagui ha haʼete voi omboykéva Jehovápe (2 Tes. 3:10; 1 Tim. 5:8). Añetehápe iñimportánte ñambaʼapo, péro nañañatendéiramo, ñande traváho ikatu ñanemomombyry Jehovágui. ¿Mbaʼérepa jaʼe upéva?

5. ¿Mbaʼe mbaʼépa rehechavaʼerã reiporavo mboyve nde travahorã?

⁵ Epensami nde rehekahahína nde travahorã, ha reikohárupi ijetuʼueterei retopa hag̃ua. Ikatu repensa iporãveha reaprovecha pe retopa raẽvévantema, tahaʼe haʼéva. Péro ¿mbaʼépa rejapóta upe traváho noĩporãiramo la Biblia heʼíva ndive? ¿Ha mbaʼépa oikóta hoʼupátaramo ndehegui ne tiémpo? ¿Mbaʼépa rejapóta tekotevẽtaramo reviaha mombyry, ha upévare reñemomombyry ne famíliagui, ha ndaikatuvéi voi ni rreunionhápe reho? ¿Repensátapa ikuentaveha rejagarra upe traváho reiko rei rangue? Aníke nderesarái redesidi vaíramo ikatuha reñemomombyry Jehovágui (Heb. 2:1). Upéicharõ, rehekáramo hína nde travahorã térã rekambiaséramo nde traváho, ¿mbaʼépa nepytyvõta reiporavo porã hag̃ua?

6, 7. a) ¿Mbaʼe mbaʼépa ikatu jahupyty ñambaʼapóramo? b) ¿Mbaʼépa nemoag̃uivéta Jehováre, ha mbaʼérepa?

⁶ Jaʼéma haguéicha ñanemaduʼa meme vaʼerã moõpa ñag̃uahẽse térã mbaʼépa jahupytyse. Upéicharõ reñeporanduvaʼerã: “¿Mbaʼépa ahupytyse che traváho rupive?”. Oiméramo nde rembaʼapose remantene hag̃ua ne famíliape térã ndejupe voi, ikatu hag̃uáicha peservi Jehovápe, haʼe katuete nevendesíta (Mat. 6:33). Ñande Ru yvagapegua ni mbaʼevéicharõ nañanderejareimoʼãi oiméramo japyta travahoʼỹre térã jajejopy vaíramo (Is. 59:1). La Biblia heʼi porã: “Jehová oikuaa mbaʼéichapa oguenohẽta jejopy vaígui umi hénte omombaʼeguasúvape chupe” (2 Ped. 2:9, NM).

⁷ ¿Ha mbaʼépa oikóta nde rembaʼaposérõ ndepláta heta hag̃uánte? Ikatu rehupyty pe reipotáva, péro ani nderesarái Satanás mbaʼeve nomeʼẽreimoʼãiha ndéve, ha amo ipahápe tuicha reperdéta (elee 1 Timoteo 6:9, 10). Ñamotenondéramo ñande traváho ha jahekáramo plátante, upéva katuete ñanemomombyrýta Jehovágui.

8, 9. ¿Mbaʼérepa tekotevẽ tuvakuéra ojepyʼamongeta itraváhore?

⁸ Oiméramo nde peteĩ túva térã sy, ¿mbaʼe ehémplopa remoĩhína ne familiakuérape? ¿Mbaʼépa rehechauka chupekuéra iñimportanteveha ndéve g̃uarã? ¿Nde traváho térãpa nde servísio Jehovápe? Haʼekuéra ohecháramo remombaʼeveha pláta, reipotaha umi puésto yvate ha rejechaukaseha umi mbaʼe reguerekóvare, ikatu osegi pe ehémplo vai nde remoĩva. Amo ipahápe ikatu voi nanderrespetavéi hikuái. Peteĩ mitãkuña omombeʼu: “Chemichĩ guive che túva ombaʼapohárente voi oiko. Ñepyrũrã che aimoʼã ojapoha upéva omeʼẽ hag̃ua oréve roikotevẽva. Péro upéi okambiaite, koʼẽ guive pytũ meve ombaʼapo ha ndahaʼéi omeʼẽ hag̃uánte oréve roikotevẽva, síno umi lúho rehehápe. Upévare ore famíliape ojekuaa ipláta heta haguére, ha ndahaʼéi roipytyvõ rupi ótrope ojapove hag̃ua Ñandejára servísiope. Aipotaitevaʼerãmoʼã papa orepytyvõ roñemoag̃uive hag̃ua Jehováre oiko rangue pláta rapykuéri”.

⁹ Peẽ tuvakuéra, aníke peñemomombyry Jehovágui pende traváho hoʼupa rupi pene tiémpo, térã penekaneʼõiterei haguére. Peẽ pehechaukavaʼerã pene famíliape, añetehápe iñimportanteveha ñambaʼapove Jehovápe g̃uarã, jaiko rangue pláta rapykuéri (Mat. 5:3).

10. Mitãrusu, ¿mbaʼépa reikuaa porã vaʼerã redesidi mboyve mbaʼe profesiónpa resegíta?

¹⁰ Oiméramo nde peteĩ mitãrusu térã mitãkuña redesidítava mbaʼe profesiónpa resegíta, ¿mbaʼéichapa ikatu reiporavo porã? Jahecháma haguéicha tekotevẽ reikuaa mbaʼépa rehupytyse. Ikatu ndegusta voi hína peteĩ profesión, péro epensamína: ¿nepytyvõtapa upe traváho reservi porãve hag̃ua Jehovápe, térãpa nemomombyrýta chugui? (2 Tim. 4:10.) ¿Mávapepa rejoguase? ¿Umi hénte ovyʼávape ipláta javénte? ¿Térãpa rejeroviáta David ojerovia haguéicha? Haʼe heʼivaʼekue: “Chemitã vaʼekue, koʼág̃a katu chetujáma, ha ndahecháiva hekopotĩva oikotevẽramo, térã taʼyrakuéra ojeruréramo upérupi hoʼuvaʼerã” (Sal. 37:25). Nemanduʼavaʼerã peteĩ tape nemomombyrytaha Jehovágui, péro pe ótro nepytyvõta reiko hag̃ua vyʼápe opa ára g̃uarã (elee Proverbios 10:22 ha Malaquías 3:10). ¿Mbaʼépa nde reiporavóta?a

UMI VYʼARÃ

11. ¿Mbaʼépa heʼi la Biblia umi vyʼarãre, péro mbaʼépa ñañatendevaʼerã?

¹¹ Ñandejára Ñeʼẽ ndeʼíri ndovaleiha jajediverti, ni japerde reiha ñane tiémpo umi vyʼarãre. Apóstol Pablo heʼivaʼekue Timotéope ‘pe ehersísio ñanepytyvõha’ (1 Tim. 4:8, NM). La Biblia heʼi avei oĩha tiémpo japuka hag̃ua ha tiémpo jajeroky hag̃ua; heʼi avei iporãha japytuʼu (Ecl. 3:4; 4:6). Péro nañañatendéiramo, umi vyʼarã ikatu ñanemomombyry Jehovágui. Ani hag̃ua oiko upéva ñanderehe, ñañatendevaʼerã koʼã mokõi mbaʼére: mbaʼeichagua vyʼarãpa jaiporavo ha mboy tiémpopa hoʼu ñandehegui.

12. ¿Mbaʼépa ñañeporanduvaʼerã jaiporavóta jave ñande vyʼarã?

¹² Ñepyrũrã jahecháta mbaʼeichagua vyʼarãpa jaiporavovaʼerã. Katuete oĩ vyʼarã iporãva. Upéicharamo jepe, oĩ hetaiterei umi vyʼarã ñanemoakãrakúva jajapo hag̃ua ivaíva, pór ehémplo: umi ohechaukáva ñorairõ, máhia, ha tekokyʼa. Upévare jajepyʼamongetavaʼerã umi vyʼarã ñande jaiporavóvare. Ñañeporandumi: “¿Chemokyreʼỹpa añorairõse hag̃ua, térã chefanátiko hag̃ua che retãre?” (Prov. 3:31). “¿Tekotevẽpa agastaiterei pláta hese? ¿Ikatúnepa omoñepysanga ótrope?” (Rom. 14:21.) “¿Mbaʼeichagua héntere piko ajeheʼa?” (Prov. 13:20.) “¿Chemokyreʼỹpa ajapose hag̃ua ivaíva?” (Sant. 1:14, 15.)

13, 14. ¿Mbaʼérepa iporã jahecha mboy tiémpopa jaiporuhína umi vyʼarãme?

¹³ Koʼág̃a jahechami mboy tiémpopa jaiporuvaʼerã umi vyʼarãre. Ñañeporandumi: ¿Aiporupaitépa che tiémpo umi vyʼarã rapykuéri ha nahembyvéi chéve aha hag̃ua rreuniónpe, predikasiónpe ha umícha? Oimérõ upéicha, umi vyʼarã ñanembyetiaʼe rangue ñanemokaneʼõ reíta. Añetehápe umi ndoiporúiva heta tiémpo umi vyʼarãme ovyʼave. ¿Mbaʼérepa? Haʼekuéra oikuaa porã omotenondeha “umi mbaʼe iñimportantevéva”, ha upévare noñeñanduvaíri opytuʼu jave (elee Filipenses 1:10, 11).

¹⁴ Añetehápe ningo haʼete voi javyʼavétava jarekórõ heta tiémpo jajediverti hag̃ua, péro ikatu upéva peteĩ tape ñanemomombyrýva Jehovágui. Peteĩ ermána orekóva 20 áño hérava Kim oaprende upeichaha. Haʼe heʼi: “Che ningo núnka ndafaltáiva umi fiestítape. Káda fín de semána voi aha: viernes, sábado ha domingo. Péro koʼág̃a aikuaa oĩha hetave mbaʼe iñimportánteva tekotevẽva ajapo. Pór ehémplo, che prekursóra ha apuʼa pyharevete la seis apredika hag̃ua, upévare ndaikatúi aiko ajediverti la una térã la dos de la madrugáda peve. Ndahaʼéiko enterove fiésta ivaíva, péro nañañatendéiramo ikatu ikáusare nañakumpliporãvéi pe iñimportantevéva. Umi vyʼarã oĩvaʼerã hendápe porãnte”.

15. ¿Mbaʼéichapa tuvakuéra oipytyvõkuaa ifamíliape ojediverti hag̃ua hekópe?

¹⁵ Tuvakuéra oreko heta rresponsavilida: omantenevaʼerã ifamíliape, oipytyvõvaʼerã ijerovia mbarete hag̃ua ha ohechavaʼerã avei mbaʼépa oikotevẽ oñeñandu porã hag̃ua hikuái. Pévape oikehína umi vyʼarã. Peẽ tuvakuéra, tekotevẽramo jepe peñangareko ani hag̃ua oike pende rogapýpe umi vyʼarã ikatúva ombyai pene famíliape, peñatendéke ani oiko pendehegui ‘váile mbyaiha’; ani pepensa entéro vyʼarã ivaiha (1 Cor. 5:6). Pejeporekáramo, ikatu petopa heta mbaʼe porã ikatúva pejapo pevyʼa hag̃ua pene famíliandi.b Pejapóramo upéicha, peẽ ha pene família pehóta tape porãre ha peñemoag̃uivéta Jehováre.

PETEĨ NE FAMÍLIA OHEJÁRAMO JEHOVÁPE

16, 17. ¿Mbaʼe rehépa heta sy ha túva ohasa asy, ha mbaʼérepa jaʼekuaa Jehová ontende porãitereiha upe ohasáva hikuái?

¹⁶ Jehová oikuaa porã ndaiporiha ñanderayhúva ñande sy ha ñande túva ñanderayhuháicha, upévare heʼi peichaite avei haʼe ohayhuha ipuévlope (Is. 49:15). Jahayhueterei rupi ñane famíliape, ñañeñandu vaieterei peteĩva ohejáramo Jehovápe. Peteĩ ermána orekóva imembykuña oñemosẽvaʼekue kongregasióngui, heʼi: “Apyta ningo yvýre. Añeporandu mbaʼérepa la che memby oñemomombyry Jehovágui. Apensa voi che kúlpare oheja hague chupe”.

¹⁷ Oiméramo nde rehasa ko situasiónre, Jehová oikuaa mbaʼeichaitépa rehasa asy hína. Haʼe avei oñeñandu vaieterei vaʼekue, itaʼýra Adán opuʼãrõ guare hese, ha avei ohechávo mbaʼéichapa Noé tiémpope hetaiterei hénte oñemoĩ hese (Gén. 6:5, 6). Umi ndohasáiva ko situasiónre ikatu nontendéi mbaʼeichaitépa ijetuʼu ha hasy hína. Upéicharamo jepe, ndovaléi reñemomombyry Jehovágui, peteĩ nde rogaygua oho haguére tape vaíre. Péro, ¿mbaʼépa nepytyvõta regueropuʼaka hag̃ua?

18. ¿Mbaʼérepa tuvakuéra nopensaivaʼerã ikúlpare ifamília oheja hague Jehovápe?

¹⁸ Ani repensa nde kúlpare ne família oheja hague Jehovápe. Nemanduʼavaʼerã haʼe omeʼẽha enterovépe oportunida odesidi hag̃ua oservítapa chupe. Avei “káda uno ogueraháta ikárga”, upéva heʼise pe famíliape káda uno oĩha rresponsávle ojapóvare, koʼýte umi oñemeʼẽ ha ojevautisámava (Gál. 6:5, NM). Añetehápe Jehová ohusgáta pe opekávape, ndahaʼemoʼãi ituvakuérape (Ezeq. 18:20). Oĩ avei túva oñepyrũva okulpa ótrope ifamília oñemosẽ haguére kongregasióngui, aníkena nde rejapo upéva. Jehová odesidíma mbaʼéichapa ojekorrehivaʼerã isiervokuérape ha haʼe oipota rerrespeta upéva. Nemanduʼákena reñemoĩ mbarete vaʼerãha Satanás rehe, ndahaʼéi ansianokuérare. Haʼekuéra ningo oñangareko kongregasiónre (1 Ped. 5:8, 9).

19, 20. a) ¿Mbaʼépa oipytyvõta tuvakuérape oaguanta hag̃ua ifamília ohejáramo Jehovápe? b) ¿Mbaʼe esperánsapa ikatu oreko tuvakuéra?

¹⁹ Ndepochýramo Jehováre, rehohína tape vaíre ha upéva nemomombyrýta chugui. Tuvakuéra, pene família ohechavaʼerã Jehová iñimportanteveha peẽme g̃uarã opa mbaʼégui, ha upévare pekumpliha haʼe ohaʼarõva pendehegui, jepe pehayhu pene famíliape. Upévare, ikatu hag̃uáicha peaguanta oĩramo pene família ohejáva Jehovápe, pemombaretevaʼerã pende jerovia ha ani peñemomombyry ermanokuéragui ni kongregasióngui (Prov. 18:1). Pemombeʼu Jehovápe mbaʼéichapa peñeñandu (Sal. 62:7, 8). Aníke peheka voi oimeraẽ mbaʼe peñeʼẽ hag̃ua pene família oñemosẽvaʼekuéndi, pór ehémplo pemondóvo chupe mensáhe térã korréo elektróniko (1 Cor. 5:11). Upéva rangue, pembaʼapo jejopy vaʼerã Jehová servísiope (1 Cor. 15:58). Pe ermána ñanemanduʼa hague ajeʼi, heʼi: “Aikuaa porã tekotevẽha ambaʼapo meme Jehová servísiope ha amombarete che jerovia. Ajapóramo upéicha, ág̃a che memby ou jey vove Jehová organisasiónpe, chembaretéta aipytyvõ hag̃ua chupe”.

²⁰ La Biblia heʼi pe mborayhu ohaʼarõha opa mbaʼe (1 Cor. 13:4, 7). Upéicharõ ndaivaíri rerekóramo esperánsa ne família ikatuha ou jey Jehová rendápe. Añetehápe káda áño hetaiterei oĩ oñarrepentíva ha ou jeýva kongregasiónpe. Jehová ndaipyʼarói avavére; haʼe oĩ operdona hag̃uáicha umi hembiapo vaívape (Sal. 86:5).

EIPORAVO PORÃKENA

21, 22. ¿Mbaʼéichapa nde redesidíta?

²¹ Jehová oheja káda uno jadesidi jajapótava (elee Deuteronomio 30:19, 20). Péro upéva hína tuicha rresponsavilida. Enterove kristiáno ñañeporanduvaʼerã: “¿Mbaʼe tapérupipa che ahahína? ¿Ahejápa chemomombyry Jehovágui: che traváho, umi vyʼarã térã peteĩ che família ohejáva kongregasión?”.

²² Jehová ñanderayhueterei ha arakaʼeve nañanderejamoʼãi. Upéicharõ, oiméramo ñañemomombyry chugui, upéva oiko ñande jadesidi haguére jaha tape vaíre (Rom. 8:38, 39). Péro ni mbaʼevéicharõ ndajahejaivaʼerã upéva oiko ñanderehe. Animoʼãke jaheja mbaʼeve ñanemomombyry Jehovágui. Pe artíkulo oúvape jahecháta cuatro mbaʼe ikatúva jajapo akóinte ñañemoag̃ui hag̃ua Ñandejárare.

1, 2. a) ¿Mbaʼépa oipota Satanás ñande jajapo? b) ¿Mbaʼépa ñanepytyvõta ñañemoag̃ui hag̃ua Jehováre?

JEHOVÁ ndojapoivaʼekue yvyporakuérape oiko hag̃ua heseʼỹ. Péro Satanás oipota ñapensa nañaikotevẽiha Ñandejárare. Haʼe ombotavy guive Évape, hardín de Edénpe, oiko omosarambi ko japu (Gén. 3:4-6). Ha ymaite guivéma oĩ heta ogueroviáva chupe.

² Haʼetépe ñande “jaikuaa porãiterei umi ñuhã haʼe oiporúva”, ha upévare Satanás ndaikatúi ñanembotavy péicha péichante (2 Cor. 2:11, NM). Haʼe oipota ñañemomombyry Jehovágui, ha upearã oñehaʼã ñandegueraha tape vaíre. Péro jahecháma haguéicha pe ótro artíkulope, ikatu jadesidi porã jaiporavóta jave ñande travahorã, umi vyʼarã, ha ñane família ohejáramo Jehovápe. Ko artíkulo katu ohechaukáta ñandéve mbaʼéichapa jahechavaʼerã hekópe porã pe teknolohía ha pláta, ha ndovaleiha jajepyʼapyeterei ñandejehe ni ñañemombaʼeguasu. Jahecháramo hendaitépe koʼã mbaʼe katuete ñañemoag̃uivéta Jehováre (Sant. 4:8).

TEKNOLOHÍA

3. Emombeʼu mbaʼéichapa pe teknolohía ikatu ideprovécho, péro ikatu avei ñanemoĩ vai Jehovándi.

³ Ko múndope oparupiete jajuhu umi aparáto elektróniko, ha añetehápe ojeporu porãrõ, umíva ideprovechoiterei. Upéicharõ jepe, nañañatendéiramo ikatu avei ñanemoĩ vai Jehová ndive. Pór ehémplo, ko rrevísta releéva ojehai ha oñeimprimi umi komputadóra rupive. Jaikuaaháicha umi komputadóra tuicha ñanepytyvõ jaheka hag̃ua informasión, ñamondo hag̃ua korréo elektróniko ha jajediverti hag̃ua jepe. Péro naiporãmoʼãi jaikóramo ñandetarovaite umi komputadóra ha aparáto elektrónikore. Umi ojapóva propagánda ogueroviauka umi héntepe ojoguavaʼerãha umi ipyahuvéva. Ñapensamíntena ko kásore: Peteĩ mitãrusu oipotaitereivaʼekue peteĩ távlet ha upévare ñemiháme ovende irriñón ojogua hag̃ua. ¡Ajépa ivyroite!

4. ¿Mbaʼépa ojapo peteĩ ermáno anivéma hag̃ua oiporueterei komputadóra?

⁴ Añetehápe ivaietereíta ñañemomombyrýramo Jehovágui ndajaiporuporãi rupi umi aparáto elektróniko. Peteĩ ermáno hérava Juana ha orekóva 30 áñorupi heʼi: “Aikuaa la Biblia heʼiha ñamboykevaʼerãha tiémpo Jehovápe g̃uarã, péro ajagarra jepéma guive che komputadóra ndaikatuvéima apoi chugui”. Pyʼỹinte haʼe oiporu Internet pyharepyte peve. Juan omombeʼu: “Amáske chekaneʼõ igustoverei chéve amondo email, ha ahecha kuánto videoʼi ajuhúva, jepe ndahaʼéi la iporãmbáva umíva”. Anivéma hag̃ua osegi péicha, Juan oprograma ikomputadóra ikatu hag̃uáicha ogue ijeheguiete og̃uahẽvo pe óra oke hag̃ua (elee Efesios 5:15, 16).

5, 6. a) ¿Mbaʼépa tekotevẽ ojapo tuvakuéra? b) ¿Mbaʼépa jajapovaʼerã ñane família ijúnta porã hag̃ua?

⁵ Peẽ tuvakuéra natekotevẽiramo jepe pekontrola opa mbaʼe ojapóva pene família, katuete peñatendevaʼerã hesekuéra oiporu jave komputadóra. Upépe haʼekuéra ikatu ohecha tekovai, videohuégo ivioléntova, espiritísmo ha ojeheʼa júnta vaíre. Upévare aníkena pehejánte pene famíliape ohecha ohechaséva, ndapeipotáigui penemolesta. Cháke haʼekuéra ikatu opensa: “Papa ha mama ndojepyʼapýi koʼã mbaʼe ahechávare, oiméne ndaivaíri hína”. Peẽ peñangarekovaʼerã hesekuéra ani hag̃ua mbaʼeve omomombyry chupekuéra Jehovágui. Ha ndahaʼéi michĩ ajánte pejapovaʼerã upéva. Jaikuaa umi mymba jepe oñangarekoha imembýre ani hag̃ua oiko hesekuéra ivaíva. Ñapensamínte, ¿mbaʼépa ojapóne peteĩ ósa oĩramo oapeligráva imembykuérape? Katuete ojapóta oimeraẽ mbaʼe odefende hag̃ua chupekuéra. (Embojoja Oseas 13:8 rehe.)

⁶ Avei peipytyvõvaʼerã pene famíliape ojeheʼa hag̃ua umi ermáno ijerovia mbaretévare, tahaʼe imitãva térã ijedavéva. Ha penemanduʼáke pene família oikotevẽha peẽ pehasa tiémpo hendivekuéra. Upévare tekotevẽ peguenohẽ tiémpo oimehágui ikatu hag̃uáicha pevyʼa, pehuga, ha pembaʼapo pene família ndive, ha oñondivepa peñemoag̃ui Jehováre.b

ANI JAJEPYʼAPYETEREI ÑANDEJEHE

7. ¿Mbaʼérepa ñaneresãise?

⁷ Ñambyasýramo jepe enterovéva ñanderasy jepi, umi ñande ru ypykue ohejágui Satanás omomombyry chupekuéra Jehovágui. Upévare oĩta katuete oporandúva ñandéve: “¿Mbaʼéichapa reime, neresãinte piko?”. Satanás ovyʼaiterei voi ñanderasýramo, oikuaágui umi mbaʼasy káusare ijetuʼuveha ñandéve jaservi Jehovápe. Ha ñamano rire katu mbaʼevetéma voi ndaikatúi jajapo chupe g̃uarã (Sal. 115:17). Upévare enterovéva jajepyʼapy ñandejehe ha ñane ermanokuérare, ha ñañehaʼã ñañangareko ñandejehe ani hag̃ua ñanderasy.c

8, 9. a) ¿Mbaʼépa ndovaléi jajapo Salónpe ha aty guasuhápe? b) ¿Mbaʼérepa iporã akóinte ñandepyʼarory?

⁸ Upéicharamo jepe, naiporãi jajepyʼapyeterei ñandejehe. Oĩ umi ermáno oikóva manterei omboliga ótrope ojapo hag̃ua diéta, osegi hag̃ua peteĩ tratamiénto térã hoʼu hag̃ua peteĩ pohã, ha ipahápe ojededikave upévape opredika rangue umi marandu porã. Koʼã ermáno oimoʼãne péicha oipytyvõha ótrope, péro añetehápe ñaime jave Salónpe térã asambleahápe ndovaléi jaiko ñamopropagánda pohã, kréma térã ambue tratamiénto ñanemoporãva. ¿Mbaʼérepa?

⁹ Rreunión ha aty guasuhápe jaha ñahendu hag̃ua Ñandejára Ñeʼẽ ha ikatu hag̃uáicha javyʼa espíritu sánto rupive (Gál. 5:22). Ndajahái upépe ñaikuaveʼẽ pohã, ni ñameʼẽ hag̃ua ótrope konsého hesãive hag̃ua. Oñeporandúramo jepe ñandéve, naiporãi ñañeʼẽ koʼã mbaʼére; umi rreunión ndojejapói upearã ha ikatu oĩ oñeñandu vaíva ñande káusare (Rom. 14:17). Káda uno odesidivaʼerã mbaʼépa ojapóta hesãi hag̃ua. Ñapensamíntena, umi doktór ivalevéva jepe ituja, hasy ha omano. Ndahaʼéi jajepyʼapyeterei haguére ñandejehe jaiko pukuvétava (Luc. 12:25). Upéva rangue ñanemanduʼavaʼerã la Biblia heʼiha: “Pyʼarory pohã guasu” hína (Prov. 17:22).

10. a) ¿Mbaʼépa jajapovaʼerã ñaneporã hag̃ua Jehová renondépe? b) ¿Arakaʼépa ñanemitã ha ñaneresãita opa ára g̃uarã?

¹⁰ Iporãramo jepe jajepyʼapy ñane píntare, ndovaléi jahasa la rrája. Oĩ umi ojapóva opa mbaʼe rei ani hag̃ua ojekuaa hese ijedamaha ohóvo. Péro, ¿mbaʼépa heʼi la Biblia? ‘Akãrague morotĩ ombojegua karaiete ha kuñakarai akã, oĩramo hustísia rapépe’ (Prov. 16:31, ÑÑB). Upéicharõ ndaivaíri ojekuaa ñane akãrague morotĩha ni ñanderovachaʼĩha. Koʼã mbaʼe ikatu ohechauka ñaneakãguapyha, jaikuaamaha heta mbaʼe ha jarekoha heta mbaʼe porã ñande pyʼapýpe. Jehová ñanderecha upéicha ha ñande ñapensavaʼerã avei haʼe opensaháicha (elee 1 Pedro 3:3, 4). ¿Iporãnepa upéicharõ jajeopera térã jajapouka tratamiénto ipeligrósova ñanepínta porãve hag̃uánte? Ñanemanduʼáke, tahaʼe haʼéva ñande eda, ñanderasy térã ñaneresãiramo, la añetehápe ñanemoporãva hína: pe vyʼa oúva Jehovágui (Neh. 8:10). Pe múndo pyahúpe añoite ñanemitã jeýta ha ñaneresãita opa árare (Job 33:25; Is. 33:24). Péro nog̃uahẽi aja upéva, jasegivaʼerã ñanearandu ha jajerovia ikatu hag̃uáicha akóinte ñaime Jehová ykére ha jajapo ikatúva guive iservísiope opa árape (1 Tim. 4:8).

PLÁTA

11. ¿Mbaʼéichapa ikatu ñanemoñuhã pe pláta?

¹¹ Pe pláta ningo ideprovécho, ha ndaivaíri ñambaʼapo ñagana hag̃ua (Ecl. 7:12; Luc. 19:12, 13). Péro pe “pláta rayhu” ñanemomombyry Jehovágui (1 Tim. 6:9, 10, NM). ‘Jajepyʼapyetereírõ ñane remikotevẽ ko mundopeguáre’, térã jahejáramo pe ‘pláta rayhu ñanembotavy’, ñande jerovia ikangýta. Oĩ opensáva umi mbaʼerepy añoite ikatuha ñanembovyʼa añetehápe, péro tuicha ojavy hikuái (Mat. 13:22, NM). Jesús heʼi porã vaʼekue avave ndaikatuiha oiko Ñandejára rembiguáirõ ha avei oiko pláta rapykuéri (Mat. 6:24).

12. ¿Mbaʼe promésa japúpa ojejapo jepi pe plátare? ¿Mbaʼépa jajapokuaa ani hag̃ua ñanembotavy?

¹² Ñamombaʼetereíramo pe pláta, ikatu jaike heta akãrasýpe (Prov. 28:20). Oĩ pyaʼe oganaséva heta pláta, tekotevẽʼỹre oñehaʼãiterei, ha upévare ojogua lotería ha umícha. Térã ojapo negósio ogana hag̃uáicha heta pláta peteĩ tesapirĩme, ha omboliga ótro ermáno kongregasionpegua oike hag̃ua avei upe negósiope. Oĩ omoĩva pláta ojejapo hag̃ua negósio, oĩgui oprometéva chupekuéra pyaʼeterei oganataha hetave pe oguerekóvagui. Aníkena ndetaryrýigui reheja nembotavy hikuái. Epensa porãna la rejapótavare: oĩramo oprometéva ndéve peteĩ mbaʼe iporãitereíva, reganataha heta pláta pyaʼeterei, oiméne ijapuhína.

13. ¿Mbaʼéichapa opensa umi hénte ko mundopegua ha mbaʼérepa idiferénte Jehová opensávagui?

¹³ Ñamotenonde meméramo “Ñandejára Rréino ha ihustísia”, haʼe ñanevendesíta ha ikatúta jahupyty ñane remikotevẽ (Mat. 6:33, NM; Efes. 4:28). Jehová ndoipotái jaha rreunionhápe kaneʼõnguére ñambaʼapoiterei rupi, térã jaha jaguapy upépe ha jasegi ñapensa plátare. Ko múndope heta hénte opensa ipláta heta vaʼerãha ikatu hag̃uáicha amo gotyove oiko pyʼaguapýpe porã. Upévare ojopy hikuái ifamíliape oiko hag̃ua avei pláta rapykuéri. Péro Jesús heʼivaʼekue upéva naiporãiha (elee Lucas 12:15-21). Aníkena jajapo Guehazí ojapo haguéicha, haʼe oimoʼãvaʼekue ikatuha omombaʼeterei umi mbaʼerepy ha avei osegi oĩ porã Jehová ndive (2 Rey. 5:20-27).

14, 15. ¿Mbaʼérepa ndajajeroviaivaʼerã ko múndore? Emombeʼu peteĩ ehémplo.

¹⁴ Ñapensami ko ehémplore: Oĩ vése umi ágila ojagarra peteĩ pira tuichaitereíva ha ndopoiséigui chugui, ojahoga. ¿Ikatúnepa oiko upéva peteĩ kristiánore? Jahechami peteĩ káso. Peteĩ ansiáno hérava José omombeʼu: “Chéngo ni mbaʼevéicharõ ndaikóiva agasta péicha péichante la arekóva. Pe champu ryrúpe oĩramo gueteri michĩmi jepe, amboʼyve aiporupaite hag̃ua”. Upéi José oike peteĩ negósiope oimoʼãgui oganataha heta pláta. Haʼe opensákuri ikatutaha ogana porã, upe rire oheja itraváho ha ojapo iprekursorádo. Péro ou iñakãraku vai la negósiore, ha upévantema voi oĩ iñakãme. Oiporupa kuánto pláta orekomíva, péro ogana rangue operdepa. José heʼi: “Upéva oikóvo, adesidi arrekuperataha la che pláta oimeháicha. Apensa añehaʼãvéramo, pyaʼeve arrekuperataha la aperdevaʼekue”.

¹⁵ Heta mésere José upévante voi oreko iñakãme. Ndaikatuvéi ni oservi porã Jehovápe ha ndokeporãvéi. Péro la inegósio ni guaʼuhápe noñakãrapuʼãi. Amo ipahápe operdepaite la ipláta ha hóga jepe ovende. Haʼe heʼi: “Tuicha aperhudika che famíliape”. Péro oaprende peteĩ mbaʼe iñimportánteva: “Koʼág̃a aikuaa jajeroviáramo Satanás múndore tuichaiterei ñapoʼẽtaha” (Prov. 11:28). Añetehápe jajeroviáramo ñande plátare térã umi negósio jajapóvare, jajeroviahína Satanás rehe, haʼe ningo “ko múndo Jára” (2 Cor. 4:4, NM; 1 Tim. 6:17). Upe guive José oñehaʼã ovyʼa orekomívare ikatu hag̃uáicha ombaʼapove “umi marandu porã rehehápe”. Koʼág̃a haʼe ha ifamília ovyʼave ha oĩ porãve Jehová ndive (elee Marcos 10:29, 30).

ÑEMOMBAʼEGUASU

16. ¿Mbaʼéicha javépa iporã ñañemombaʼeguasu, ha mbaʼéicha javépa ivai?

¹⁶ Oĩ vése ndaivairiha ñañemombaʼeguasu. Pór ehémplo, ñañemombaʼeguasuvaʼerã jaservi haguére Jehovápe (Jer. 9:24). Avei jajehayhuvaʼerã ñandejupe ikatu hag̃uáicha jadesidi porã ha ani ñamboyke Jehová oipotáva. Péro ñamombaʼeguasuetereíramo ñande ñapensáva térã ñaimoʼãramo iñimportantetereiha jareko priviléhio térã puésto yvate, ikatu ñañemomombyry Jehovágui (Sal. 138:6; Rom. 12:3).

17, 18. a) ¿Mávapa hekomirĩ ha mávapa oñemombaʼeguasuvaʼekue yma? b) ¿Mbaʼépa ojapo peteĩ ermáno ani hag̃ua oñemomombyry Jehovágui oñemombaʼeguasu rupi?

¹⁷ La Biblia omombeʼu oĩ hague tapicha hekomirĩva ha ótro katu oñemombaʼeguasúva. Pór ehémplo, Jehová ohovasavaʼekue rréi Davídpe oñemomirĩ haguére ha oipotágui oñehekomboʼe chupe (Sal. 131:1-3). Péro okastigavaʼekue avei umi oñemombaʼeguasúvape, umíva apytépe oĩ rréi Nabucodonosor ha rréi Belsasar (Dan. 4:30-37; 5:22-30). Ko tiémpope avei jahasa jepi heta situasión ohechaukáva añetehápepa ñanderekomirĩ. Jahechami peteĩ káso. Peteĩ siérvo ministeriál orekóva 32 áño ha hérava Raúl ovavaʼekue ikongregasióngui. Haʼe imanduʼa: “Che aimoʼã pyaʼe añenombrataha ansiáno, péro ohasa un áño ha mbaʼevete ndoikói”. ¿Oñamargátapa Raúl openságui umi ansiáno ndotrataporãi hague chupe? ¿Ndohovéitamapa rreunionhápe térã oñemomombyrýtapa Jehovágui ha ipuévlogui oñemombaʼeguasu rupi? ¿Mbaʼépa rejapóne nde péicha oikórõ nderehe?

¹⁸ Raúl omombeʼu: “Proverbios 13:12 ningo heʼi ‘peteĩ mbaʼe oñehaʼarõ aréva ogueruha ñembyasy’, upévare aheka umi informasión oñeʼẽva ko versíkulore ha aleepaite. Upépe ahechakuaa tekotevẽha chepasiensiave ha añemomirĩ. Ahejavaʼerã Jehovápe tojapo chehegui haʼe oipotáva”. Raúl oñehaʼã anive opensaiterei ijehe ha upéva rangue oservi hapichakuérape kongregasiónpe ha predikasiónpe. Sapyʼaitérõ g̃uarã orekóma heta estúdio oho porãva hese. Haʼe heʼi: “Upéi añenombra ansiáno, oiméne un áño y médio haguépe mbaʼe. Péro che nahaʼarõiete voi. Upérõ oho porã chéve predikasiónpe ha upéicha rupi ndajepyʼapyvéi la nombramiéntore” (elee Salmo 37:3, 4).

EPYTÁKENA JEHOVÁ YKÉRE

19, 20. a) ¿Mbaʼépa jajapovaʼerã ani hag̃ua ni umi mbaʼe iñimportánteva ñande rekovépe, ñanemomombyry Jehovágui? b) ¿Máva ehémplopa jasegivaʼerã japyta hag̃ua Jehová ykére?

¹⁹ Opa mbaʼe jahechavaʼekue ko artíkulope ha pe ótrope iñimportánte ñande rekovépe. Añetehápe ñañemombaʼeguasuvaʼerã jaservi rupi Jehovápe. Ñane família ovyʼáramo ha ñaneresãiramo ikatu jaʼe jarekoha mokõi rregálo ndaijojaháiva oúva Ñandejáragui. Jaikuaa avei tekotevẽha ñambaʼapo ha ñagana pláta japaga hag̃ua ñane remikotevẽre. Ha ñantende avei iporãha jajedivertiʼimi ha pe teknolohía ikatuha ideprovécho. Péro ñamotenondéramo koʼã mbaʼe, jahejáramo hoʼupa ñane tiémpo térã ñandestorva, ñanemomombyrýta Jehovágui.

²⁰ Satanás ningo itarovaite oipotágui ñande ha ñane família ñañemomombyry Jehovágui. Péro ñanderehe odepende ani hag̃ua oiko upéva (Prov. 22:3). Upearã ñañemoag̃uivaʼerã Jehováre ha akóinte japyta ijykére. La Biblia omombeʼu oĩ hague heta hénte yma guare ojapóva upéva. Pór ehémplo Enoc ha Noé ‘oguatavaʼekue Ñandejára ndive’ (Gén. 5:22; 6:9, ÑÑB). Moisés “osegivaʼekue ojerovia mbarete ohecharamoguáicha Upe ikatuʼỹvape jahecha” (Heb. 11:27, NM). Ha Jesús akóinte ojapo Itúva oipotáva ha upévare haʼe oguerohory chupe (Juan 8:29). Jasegíkena koʼã ehémplo ha jajapo ko téxto heʼíva: “Akóintekena pevyʼa. Peñemboʼe memékena. Peagradesékena Ñandejárape opa mbaʼére” (1 Tes. 5:16-18, NM). ¡Aníkena jaheja mbaʼeve ñanemomombyry Jehovágui!