‘Pejehekýi Satanás ñuhãgui.’ (2 TIM. 2:26, ÑÑB)

¿MBAʼÉPA REMBOHOVÁITA?

¿Mbaʼérepa tekotevẽ jahecha mbaʼéichapa oĩ ñande pyʼapy oiméramo ñañeʼẽ vaise ñande rapicháre?

¿Mbaʼéichapa Pilato ha Pedro ohasavaʼekue ñanepytyvõ ani hag̃ua jakyhyje ha jaguevi oĩramo ñandejopýva?

¿Mbaʼépa jajapovaʼerã ani hag̃ua oguapy ñanderehe umi mbaʼe vai yma jajapovaʼekue?

1, 2. ¿Mbaʼeichagua ñuhãpa Satanás oiporu?

SATANÁS omangea Jehová siervokuérare ha ojagarrase chupekuéra. Péro ndahaʼéi katuete ojuka hag̃ua, ojapoháicha peteĩ kasadór, síno ojagarrase ikatu hag̃uáicha ojapo chuguikuéra haʼe oipotáva (elee 2 Timoteo 2:24-26).

² Peteĩ kasadór ikatu oiporu diferénte ñuhã ojagarra hag̃ua umi mymba. Pór ehémplo, oguenohẽ chupekuéra oĩhágui ikatu hag̃uáicha ojura, térã omokañy peteĩ ñuhã ha pe mymba ojávo hese hoʼa pype. Upéicha avei, Satanás omoĩ opaichagua ñuhã ñandereity hag̃ua. Upévare jajesareko porã vaʼerã jahechakuaa hag̃ua umi ñuhã oĩva ñande jerére ani hag̃ua jaʼa pype. Ko artíkulope jahecháta mbohapy ñuhã Satanás oiporúva: 1) oipota ñaneñeʼẽ rei, 2) oipota jakyhyje ha oiporu ótrope ñandejopy hag̃ua, ha 3) oipota jajekulpa umi mbaʼe vai yma jajapovaʼekuére. Avei ñaaprendéta mbaʼépa jajapovaʼerã jajehekýi hag̃ua umívagui. Pe ótro artíkulope katu jahechavéta mokõi ñuhã.

JAJOKOKUAAVAʼERÃ ÑANDE JURU

3, 4. ¿Mbaʼépa ikatu oiko ndajajokóiramo ñande juru? Emoĩ peteĩ ehémplo.

³ Peteĩ mymba oĩramo ikuárape umi kasadór ohapy pe ñanandy oĩva ijerére, péicha pe mymba osẽ odipara ha ojejagarra. Satanás ojapo jepi avei upéicha. Haʼete omyendýva tata kongregasiónpe ikatu hag̃uáicha ñasẽ upégui ha ñandejagarra. ¿Ikatúpa jaʼa ko ñuhãme? Ñaimoʼãʼỹre oikokuaa upéva ñanderehe.

⁴ Santiago heʼi ‘ñande juru haʼeteha peteĩ tata’ (elee Santiago 3:6-8). Ndajajokóiramo ñande juru ikatu jajapo sarambi kongregasiónpe, ku ñamyendyrõguáicha tata. ¿Mbaʼéichapa ikatu oiko upéva? Ñapensamína ko situasión rehe. Peteĩ rreuniónpe oñeanunsia peteĩ ermána ojagarraha iprekursorádo rregulár. Opa rire pe rreunión, mokõi ermána oñemongeta pe anúnsiore. Peteĩva ovyʼaiterei pe prekursóra pyahu ndive ha oipotaiterei voi opa mbaʼe osẽ porã chupe. Pe ótra ermána katu heʼi ojagarraha iprekursorádo ojechauka hag̃uánte. ¿Mávarepa jajeheʼasevéta? ¿Mávapa ndojokói ijuru ha omyendy tata kongregasiónpe?

5. ¿Mbaʼépa tekotevẽ jajapo jaikuaa hag̃ua mbaʼéichapa oĩ ñande pyʼapy?

⁵ ¿Mbaʼéichapa ikatu jajoko ñande juru ani hag̃ua ñamyendy tata kongregasiónpe? Jesús heʼi: “Umi mbaʼe jaʼéva ningo osẽ ñane korasõgui” (Mat. 12:34, NM). Ñepyrũrã, jahechavaʼerã mbaʼéichapa oĩ ñande pyʼapy. Japytáramo ñandepyʼaro ikatu hína ñañeʼẽ vai ñane ermanokuérare. Pór ehémplo, jaikuaáramo peteĩ ermáno oñehaʼãha orekove hag̃ua rresponsavilida kongregasiónpe, ¿ñapensápa ojapoha upéva ombovyʼaségui Jehovápe, térãpa ojapoha ojechauka hag̃uánte? Oiméramo ñapensa vai ñane ermanokuérare, ñanemanduʼavaʼerã Satanás opensa vai hague avei Job rehe heʼírõ guare oserviha Jehovápe okonveni rupínte chupe (Job 1:9-11). Upéicharõ, jaikóramo ñadeskonfia ñande rapicháre, ñañeporanduvaʼerã mbaʼérepa ñañeʼẽ vai hese. ¿Ojapópa añete heta mbaʼe noĩporãiva? ¿Térãpa oime ñapensáma avei umi hénte aña opensaháicha koʼã ára pahápe? (2 Tim. 3:1-4.)

6, 7. a) ¿Mbaʼéicha rupípa ikatu jaju ñaneñeʼẽ rei? b) ¿Mbaʼépa jajapovaʼerã oĩramo oñeʼẽ vaíva ñanderehe?

⁶ ¿Mbaʼéicha rupípa ikatu avei jaju ñaneñeʼẽ rei? Jaipotágui ótro omombaʼe jajapóva, térã jaikose rupi ñandevaleverõguáicha, tajaʼapoʼi jepe raʼe ñande rapichápe upearã. Ikatu avei oime nañañehaʼãguasúi ha upévare ñañeʼẽ vai ótrore. Tuicha ningo jajeperhudikáta oimérõ jataky ótrore ñañemombaʼeguasu rupi, ñaneenvidióso térã ndajajeroviáigui ñandejehe.

⁷ Sapyʼánte peteĩ ermáno ikatu opoi rei rei ijurúgui, ha upévare ñaimoʼã oĩ porãha jakopi hese. Péro ñanemanduʼavaʼerã ñañevengáramo hese nañasolusionamoʼãiha mbaʼeve, síno ñambyaive reíta pe káva raity. Hiʼarive upéicha ndajajapomoʼãi Jehová rembipota, síno ñambovyʼáta Satanáspe (2 Tim. 2:26). Ikuentave jasegi Jesús ehémplo: “Ojejahéiramo hese, haʼe nombohovairivaʼekue jejahéipe. [...]. Oñemboʼentevaʼekue [Ñandejárape] oporombojovakéva tekojojápe” (1 Ped. 2:21-23). Haʼe oikuaa porã Jehová osolusionataha upe situasión oikuaahaichaite ha itiempoitépe. Ñande avei upeichaite jajeroviavaʼerã Jehováre. Umi mbaʼe jaʼéva ningo ikatu oporopytyvõ ojeiko hag̃ua “pyʼaguapýpe” kongregasiónpe (elee Efesios 4:1-3).

OIMÉRAMO JAKYHYJE HA OĨRAMO ÑANDEJOPÝVA

8, 9. ¿Mbaʼérepa Pilato ojukauka Jesúspe?

⁸ Peteĩ mymba ojejagarra jepéva lásope ndaikatuvéi oho moõve. Upéicha avei peteĩ tapicha okyhyjéva ha oguevíva ojejopy jave, ndaikatúi ojapo porã heta mbaʼe (elee Proverbios 29:25). Jahechamína mbaʼépa oikovaʼekue mokõi kuimbaʼére okyhyje ha oguevi rupi ojejopýrõ guare chupekuéra, ha avei jahecha mbaʼépa ñaaprende umi ehémplogui.

⁹ Pe mburuvicha Poncio Pilato oikuaa porã Jesús nahembiapovairiha, ha amalisia ndojaposéi hese mbaʼeve ivaíva. Heʼi voi: “Haʼe ndojapói mbaʼeve ojejuka hag̃uáicha chupe”. Upéicharõ jepe, ojukauka Jesúspe. ¿Mbaʼérepa ojapo upéva? Okyhyje rupi umi henteitágui (Luc. 23:15, 21-25, NM). Pe aty osapukái: “Repoíramo pévagui, nde ndahaʼéi César amígo” (Juan 19:12, NM). Oiméne Pilato okyhyje ojepeʼárõ g̃uarã chugui ipuésto térã ojejuka odefendéramo Jesúspe. Upévare oguevi oĩrõ guare ojopýva chupe ha amo ipahápe ojapo Satanás oipotáva.

10. ¿Mbaʼérepa Pedro heʼi ndoikuaaiha Jesúspe?

¹⁰ Apóstol Pedro ningo Jesús amigoitevaʼekue. Haʼe ni michĩmi ndokyhyjéi heʼi hag̃ua umi héntepe Jesús haʼeha pe Mesías (Mat. 16:16). Peteĩ vuéltape, heta disípulo ontende vai Jesús heʼivaʼekue, upémarõ osẽ oheja rei chupe hikuái, péro Pedro opyta Jesús ykére (Juan 6:66-69). Avei espáda ipópe odefendevaʼekue Imboʼehárape iñenemigokuéra ojagarrárõ guare chupe (Juan 18:10, 11). Péro upe rire Pedro ou okyhyjeterei umi héntegui ha heʼi voi ni ndoikuaaiha Jesúspe. Upéicha rupi upérõ haʼe ndaipyʼaguasúi ha hoʼa pe ñuhãme (Mat. 26:74, 75).

11. ¿Mbaʼéichapa sapyʼánte ñande rapichakuéra ikatu ñandejopy?

¹¹ Opavave jaservíva Jehovápe ñañehaʼã meme vaʼerã ani hag̃ua jajapo umi mbaʼe ivaíva. Pór ehémplo, ñande travahohápe ikatu ñane patrón térã ñane kompañéro ñandejopy ñandejapu, ỹrõ ñamonda hag̃ua, térã ñanetantea jahecha nañanderekovaíripa hendive. Ikatu avei peteĩ kompañéro de eskuéla térã de koléhio heʼi ñandéve jakopia hag̃ua eysámenpe, jahecha pornografía, japita, jajedroga, jaʼu vevída térã ñanderekovai hag̃ua. ¿Mbaʼéichapa ikatu jajehekýi koʼã ñuhãgui haʼetéva peteĩ láso?

12. ¿Mbaʼépa ikatu ñaaprende Pilato ha Pedro ohasavaʼekuégui?

¹² ¿Mbaʼépa ikatu ñaaprende Pilato ha Pedro ohasavaʼekuégui? Pilato oikuaa Jesús ndahaʼéi hague oimehaichagua kuimbaʼe ha avei ndojapói hague mbaʼeve ivaíva. Péro ko mburuvicha oñemombaʼeguasu ha ndohayhúi Ñandejárape, upévare ndahasyiete Satanáspe omoñuhã hag̃ua chupe. Pedro katu ohayhu Jehovápe ha oikuaa porã Jesúspe. Upéicharõ jepe, sapyʼánte ndahekomirĩri ha ipyʼaju, upévare oguevi ojejopýrõ guare chupe. Pór ehémplo, ojejagarra mboyve Jesúspe, Pedro ni ndojeréi heʼi hag̃ua: “Umi ótro ndereja reíramo jepe, che ndorohejaichéne” (Mar. 14:29, NM). Pedro ojeroviárire Ñandejárare ikatuvaʼerãmoʼã ombohovái porã upe situasión. Iporãvéta kuri ojerovia pe salmístaicha, heʼivaʼekue: “Ñandejára oĩ chendive, ndakyhyjéi mbaʼevégui. ¿Máva piko ojapóta cherehe mbaʼeve?” (Sal. 118:6). Pe pyhare omano mboyve, Jesús oike Pedro ha mokõi ijapóstol ndive hardín de Getsemanípe. Péro oñatende porã rangue, mbohapyvéva opyta oke. Jesús omombáy chupekuéra ha heʼi: “Peñatende porãke ha peñemboʼe meme ani hag̃ua peʼa mbaʼe vaípe” (Mar. 14:38, NM). Upéicharõ jepe, Pedro oke jey, ha upe rire okyhyje ha ndaikatúi ogueropuʼaka ojejopýrõ guare chupe.

13. ¿Mbaʼépa jajapovaʼerã jagueropuʼaka hag̃ua ñande rapichakuéra ñandejopy jave?

¹³ Péro ikatu avei ñaaprende ambue mbaʼe iñimportánteva Pilato ha Pédrogui. Jagueropuʼaka hag̃ua ñande rapichakuéra ñandejopy jave, tekotevẽ jaikuaa porã la Biblia omboʼéva, ñanderekomirĩ ha ñarrekonose ndaikatuiha jajapo opa mbaʼe. Tekotevẽ avei jahayhu Jehovápe ha jakyhyje chugui, ndahaʼéi yvyporakuéragui. Oiméramo jajerovia Ñandejárare jaikuaa porãgui la Biblia omboʼéva, ikatúta ñadefende pyʼaguasúpe umi mbaʼe jagueroviáva. Upéicharõ ndajakyhyjemoʼãi ha ndajaguevimoʼãi ñande rapichakuéra ñandejopy jave. Aníkena ñanderesarái ndovaleiha jajeroviaiterei ñandejehe. Upéva rangue, ñanerekomirĩ ha jahechakuaavaʼerã ñaikotevẽha Ñandejárare. Jajerurevaʼerã Jehovápe ijespíritu ha jahayhuve chupe ára koʼẽre, upéicha ikatúta ñadefende chupe ha ñakumpli ojeruréva ñandéve. Avei tekotevẽterei jajepreparáma jahasa mboyve peteĩ mbaʼe ijetuʼúva. Pór ehémplo, umi túva oñemboʼe ha oñensajavaʼerã ifamíliandi, ikatu hag̃uáicha oñedefende hikuái ikompañerokuéra omboliga jave chupekuéra ojapo hag̃ua ivaíva (2 Cor. 13:7).a

ANÍKENA JAHEJA ÑANDEJOPY UMI MBAʼE VAI JAJAPOVAʼEKUE YMA

14. ¿Mbaʼépa Satanás oipotaiterei ñapensa?

¹⁴ Sapyʼánte umi kasadór omosãingo peteĩ ita térã trónko guasu ohasahárupi pe mymba ojagarraséva. Upe rire ostira peteĩ pióla haperãme. Ohasáramo peteĩ mymba ha ojekupylia pe piólare, pe ita térã trónko hoʼa hiʼári ha ojuka chupe. Upéicha avei umi mbaʼe vai yma jajapovaʼekue ikatu oguapy ñanderehe ha “ñandejopyeterei” (elee Salmo 38:3-5, 8). Satanás oipotaiterei ñapensa ndaikatumoʼãiha ñakumpli Jehová léi ha arakaʼeve noperdonamoʼãiha ñane rembiapo vaikue.

15, 16. ¿Mbaʼépa ikatu rejapo ani hag̃ua umi mbaʼe vai yma rejapovaʼekue oguapy nderehe?

¹⁵ ¿Mbaʼépa ikatu jajapo ani hag̃ua oguapyeterei ñanderehe umi mbaʼe vai yma jajapovaʼekue? Oiméramo reʼa peteĩ pekádo ivaívape, pyaʼe porãkena ejapo tekotevẽva reiko porã jey hag̃ua Jehová ndive. Ejerure ansianokuérape tanepytyvõ (Sant. 5:14-16). Ejapo opa mbaʼe ikatúva oñesolusiona hag̃ua upe provléma (2 Cor. 7:11). Ha oiméramo oĩ ndekorrehíva, ani eju nekangy ha repyta nderevyʼavéi. Jehová ningo nderayhúguinte ndekorrehi (Heb. 12:6). Eñehaʼãmbaitékena ani reho tape vaíre ha reʼa jey. Reñearrepenti ha reguata jey rire tape porãre, rejeroviavaʼerã Jehová neperdonamaha Jesucristo sakrifísio rupive (1 Juan 4:9, 14).

¹⁶ Oĩ ningo ojekulpáva gueteri ojapo haguére peteĩ mbaʼe vai Jehová operdonáramo jepe chupe. Oimérõ nde reñeñandu upéicha, nemanduʼavaʼerã Jehová operdona hague Pedro ha umi ótro apóstolpe, jepe haʼekuéra oheja rei Itaʼýra ohayhuetévape haʼe oikotevẽve jave hesekuéra. Nemanduʼákena avei Jehová operdona hague pe kuimbaʼe Corintoyguápe. Haʼe ningo ojapo peteĩ mbaʼe ivaietereíva ha oñemosẽ kongregasióngui, péro upe rire oñearrepenti (1 Cor. 5:1-5; 2 Cor. 2:6-8). La Bíbliape oñeñeʼẽ heta tapicha opeka vai vaʼekuére, péro upe rire oñearrepenti ha Ñandejára operdona chupekuéra (2 Cró. 33:2, 10-13; 1 Cor. 6:9-11).

17. ¿Mbaʼépa jahupyty Jesús sakrifísio rupive?

¹⁷ Jehová ñaneperdonáta ha hesaráita ñane rembiapo vaikuégui oiméramo ñañearrepenti ñande pyʼaite guive ha jajerovia haʼe ñandeporiahuverekotaha. Aníkena ñaimoʼã Jesús sakrifísio ndohupytyiha oñeperdona hag̃ua ñandéve ñande pekádo. Oiméramo ñapensa upéicha, jaʼáma Satanás ñuhãme. Haʼe oipotaiterei ñaimoʼã Jehová nañaneperdonamoʼãiha. Péro Jesús sakrifísio rupive katuete oñeperdonáta opavave ojapóvape peteĩ mbaʼe vai ha oñearrepenti (Pro. 24:16). Jajeroviáramo Jesús sakrifísiore, ojeíta ñandehegui upe mbaʼe ipohyietéva ha ñanembaretéta jaservi hag̃ua Jehovápe ñande pyʼaite guive, ñane ánga rugua ha opa ñane arandukue reheve (Mat. 22:37).

“JAIKUAA PORÃITEREI NINGO UMI IÑUHÔ

18. ¿Mbaʼépa jajapovaʼerã ani hag̃ua jaʼa Satanás ñuhãme?

¹⁸ Satanás ñandereityseterei ha upearã oiporúta oimehaichagua ñuhã. Péro umíva nañanembotavymoʼãi. ¿Mbaʼérepa jaʼe upéva? “Jaikuaa porãiterei ningo umi iñuhã”, upévare ikatu jajehekýi chugui (2 Cor. 2:10, 11, BNP). Jajeruréramo Jehovápe tañanemoarandu ñambohovái porã hag̃ua umi provléma, Satanás ndaikatumoʼãi ñanemoñuhã. Santiago heʼi: “Oiméramo pende apytépe iñaranduʼỹva, tojerure [...] Ñandejárape. Haʼe omeʼẽ arandu opavavépe ojerureʼỹre mbaʼeve hekovia” (Sant. 1:5, JMP). Ikatu hag̃uáicha Jehová ñanepytyvõ, jajapovaʼerã umi mbaʼe jajeruréva chupe jastudiávo Iñeʼẽ ha jajapo rupi ñaaprendéva upépe. Pe tembiguái jeroviaha ha iñarandúva ohechauka ñandéve umi puvlikasión rupive mbaʼeichagua ñuhãpa Satanás oiporu ha avei ohechauka mbaʼépa jajapovaʼerã ani hag̃ua jaʼa pype.

19, 20. ¿Mbaʼérepa ñanembojeguaruvaʼerã umi mbaʼe ivaíva?

¹⁹ Ñañemboʼe ha jastudiáramo la Biblia, jahayhúta umi mbaʼe iporãva Ñandejára renondépe, ha ñanembojeguarúta umi mbaʼe ivaíva (Sal. 97:10). Jajei hag̃ua Satanás ñuhãgui, tekotevẽ avei jajepyʼamongeta umi mbaʼe ikatúvare oiko ñanderehe ñañemeʼẽramo ñane rembipota vaípe (Sant. 1:14, 15). Upéicha umi karnáda Satanás oiporúva nañandestiramoʼãi, síno ñanembojeguarúta.

²⁰ Javyʼaite ningo Jehová ñanepytyvõ haguére jajehekýi hag̃ua Satanás ñuhãgui. Haʼe ñandepeʼa “aña poguýgui” ijespíritu, Iñeʼẽ ha iñorganisasión rupive (Mat. 6:13, NM). Pe artíkulo oúvape jahechavéta mokõi ñuhã Satanás oiporúva oity hag̃ua umi Jehová rembiguáipe.

“Penembarete ani hag̃ua pe Aña penembotavy.” (EFE. 6:11, NM)

¿MBAʼÉPA REMBOHOVÁITA?

¿Mbaʼépa ojapovaʼerã Jehová rembiguaikuéra ani hag̃ua lásoicha ojuvy chupekuéra umi mbaʼerepy?

¿Mbaʼépa ojapovaʼerã pe kristiáno omendáva ani hag̃ua omoakãratĩ iména térã hembirekópe?

¿Mbaʼépa jahupyty ndajaikóiramo mbaʼerepy rapykuéri ha ñanderekopotĩramo?

1, 2. a) ¿Mbaʼérepa Satanás ni michĩmi ndoiporiahuverekói umi unhído ni ‘ambue ovechakuérape’? b) ¿Mbaʼeichagua ñuhãpa ñahesaʼỹijóta ko artíkulope?

SATANÁS ni michĩmi ndoiporiahuverekói yvyporakuérape, ha koʼýte ndaijaʼéi ñanderehe, jaservíva Jehovápe. Upévare oñemoĩ mbarete umi unhídore oĩva gueteri ko yvy ape ári (Rev. 12:17). Koʼã kristiáno iñeʼẽrenduetéva omoakã pe predikasión ñane tiémpope ha omombeʼu opárupi pe Aña oisãmbyhyha ko múndo. Satanás avei ndochaʼéi ‘ambue ovechakuérare’. Koʼã ovecha omoirũ umi unhídope ha oreko esperánsa oiko hag̃ua opa ára g̃uarã, peteĩ esperánsa Satanás ymaitereíma operdevaʼekue (Juan 10:16, NM). ¡Ajeve ningo pe Aña ipochyete oikóvo! Haʼe oñehaʼãmbaite ñandereity, tahaʼe ñande unhído térã ambue ovechakuéra (1 Ped. 5:8).

² Pe Aña omoĩ opaichagua ñuhã ñandereity hag̃ua. Oheja pytũmbýpe umi ndojeroviáivape Jehováre ha upéicha rupi haʼekuéra nohenduséi pe marandu porã ni ndohechakuaái umi ñuhã. Péro oity avei heta ojeroviávape Ñandejára Rréinore (2 Cor. 4:3, 4). Pe artíkulo jahasavaʼekuépe jahechákuri mbaʼéichapa ikatu jajehekýi koʼã mbohapy ñuhãgui: 1) ñaneñeʼẽ rei, 2) jakyhyje ha ñande rapicha ñandejopy, ha 3) jajekulpa umi mbaʼe vai yma jajapovaʼekuére. Koʼág̃a ñahesaʼỹijóta mbaʼéichapa ikatu jajehekýi mokõi ñuhãgui: jaiko mbaʼerepy rapykuéri ha ñamoakãratĩ ñane rembiayhúpe.

UMI MBAʼEREPY PETEĨ LÁSOICHA IKATU ÑANDEJUVY

3, 4. ¿Mbaʼéichapa jajepyʼapyetereírõ ñane remikotevẽre ikatu hína jaiko mbaʼerepy rapykuéri?

³ Peteĩ ehémplope Jesús oñeʼẽvaʼekue umi semílla oñeñotỹvare ñuatĩndýpe. Haʼe heʼi upéva ojoguaha peteĩ kuimbaʼe ohendúvape Ñandejára ñeʼẽ, “péro ojepyʼapyeterei hemikotevẽ ko mundopeguáre, ha pe platarayhu ombotavy chupe. Koʼã mbaʼe ojahoʼipa Ñandejára ñeʼẽ, ha upévare haʼe ndahiʼái” (Mat. 13:22, NM). Jahechaháicha, pe Aña oipota jaiko umi mbaʼerepy rapykuéri, ha upéva peteĩ ñuhã haʼe oiporúva.

⁴ Ko téystope jahecha oĩha mokõi mbaʼe ‘ojahoʼipáva Ñandejára ñeʼẽ’. Primero, pe kuimbaʼe “ojepyʼapyeterei hemikotevẽ ko mundopeguáre”. Koʼã tiémpo “ijetuʼueterei ha hasy jagueropuʼaka”, ha oĩ heta mbaʼe nañanemongevéiva (2 Tim. 3:1, NM). Opa mbaʼénte hepypa ha ndaiporiguasuvéi traváho, upévare ijetuʼueterei jepi ñag̃uahẽ hag̃ua fín de méspe. Ha ñapensáramo ñane renonderãre ikatu jaʼe: “¿Mbaʼéicha piko añemantenéta chetuja térã cheg̃uaig̃ui vove ha ndaikatuvéi ambaʼapo?”. Oĩ heta ojepyʼapýva koʼã mbaʼére ha oñehaʼã ombyaty pláta opa ikatuháicha, oimoʼãgui upéicha orekotaha oikotevẽva ijeda vove.

5. ¿Mbaʼérepa ojeʼe umi mbaʼerepy ikatuha ‘oporombotavy’?

⁵ Jesús heʼivaʼekue oĩha ambue mbaʼe ikatúva “ojahoʼipa Ñandejára ñeʼẽ”. Upéva hína ‘pe platarayhu oporombotavýva’. Añetehápe ningo la Biblia heʼi pe ‘pirapire oporopytyvõha’ (Ecl. 7:12). Péro tuichaiterei jajavýta jaikóramo pláta rapykuérinte. Heta tapicha ohechakuaa oñehaʼãmbaitévo ombyaty umi mbaʼeta, koʼýte oipota potave umi mbaʼerepy ha upéva omoñuhã chupekuéra. Ha oĩ voi katu oikóva umi mbaʼerepy rembiguáiramo (Mat. 6:24).

6, 7. a) ¿Mbaʼéichapa ñande travahohápe ikatu oĩ ñanemokyreʼỹva jaiko hag̃ua mbaʼerepy rapykuéri? b) ¿Mbaʼe mbaʼépa jahechavaʼerã jadesidi mboyve ñambaʼapovétapa?

⁶ Ñaimoʼãʼỹre ikatu jaipota potave pe pláta. Pór ehémplo, epensamína ne patrón heʼiha ndéve: “¡Agueru peteĩ notísia neporãva! Ñane emprésa ojagarra peteĩ traváho tuichaitereíva. Koʼã més oúvape jajopypaitéta. Rembaʼapovéta, péro ani rejepyʼapy, ¡ropaga porãvéta ndéve!”. ¿Mbaʼépa eréne chupe? Jaikuaaháicha, iñimportánte remoĩ ne famíliape hemikotevẽ, péro oĩ avei ambue mbaʼe tekotevẽva rekumpli (1 Tim. 5:8). Rehechavaʼerã heta mbaʼe redesidi mboyve. Epensamína: ¿Mboy tiémpopa tekotevẽta rembaʼapove? ¿Nderefaltamoʼãipa rreunionhápe, ha ikatútapa akóinte restudia ne famíliandi? ¿Ikatútapa rejapo ambue mbaʼe tekotevẽva reservi porã hag̃ua Jehovápe?

⁷ ¿Mbaʼépa iñimportanteve ndéve g̃uarã? ¿Pe rehupytýtava rembaʼapove haguére, térãpa umi mbaʼe rejapóva reime porã hag̃ua Jehová ndive? ¿Rembotapykuétapa Ñandejára Rréino reganasevégui pláta? ¿Rehechakuaápa umi mbaʼe ikatúva oiko nde ha ne família napemombaretéiramo pende jerovia? Ha reiméramo koichagua situasiónpe, ¿mbaʼépa rejapovaʼerã ani hag̃ua umi mbaʼerepy “ndejuvy”? (Elee 1 Timoteo 6:9, 10.)

8. ¿Mbaʼe ehémplopa ñanepytyvõta jajepyʼamongeta hag̃ua umi mbaʼe jajapóvare?

⁸ Ani hag̃ua umi mbaʼerepy ñandejuvy, tekotevẽ jajepyʼamongeta jepi umi mbaʼe jajapóvare. Aníkena arakaʼeve jajogua Esaúpe. Haʼe ningo ohechaukavaʼekue hembiapo rupive omboykeha umi mbaʼe oúva Jehovágui (Gén. 25:34; Heb. 12:16). Ha ani ñahaʼanga pe mitãkariaʼy iplataitévape Jesús opredikavaʼekue. Ovende rangue umi mbaʼe orekóva ha oipytyvõ imboriahúvape, haʼe “ombyasy ha oho oñesenti, oguerekógui hetaiterei mbaʼe”. Upéicha rupi ndoikói chugui Cristo remimboʼe (Mat. 19:21, 22, NM). Umi mbaʼerepy oñapytĩete chupe ha ndaikatúi ohupyty pe priviléhio ijojahaʼỹva, ndoikói chugui pe kuimbaʼe iñimportantevéva remimboʼe. Ñande avei akóinte jaikoséramo Jesús remimboʼéramo, tekotevẽ ñañeñangareko ani hag̃ua jaiko umi mbaʼerepy rapykuéri.

9, 10. ¿Mbaʼépa heʼi la Biblia umi mbaʼerepýre?

⁹ Ani hag̃ua jaiko jajepyʼapy rasa umi mbaʼerepýre, jajapovaʼerã Jesús heʼivaʼekue: “Aníke arakaʼeve pejepyʼapyeterei ha peje: ‘¿Mbaʼe piko roʼumíta?’, térã ‘¿mbaʼépa romboyʼúta?’, térã ‘¿mbaʼéiko romondéta?’. Koʼã mbaʼe rapykuéri ningo oiko tarovaite umi hénte oĩva ko múndope. Pende Ru yvagapegua oikuaa voi peẽ peikotevẽha opa koʼã mbaʼe” (Mat. 6:31, 32, NM ; Luc. 21:34, 35).

¹⁰ Peteĩ kuimbaʼe ohaivaʼekue Ñandejára Ñeʼẽ, hérava Agur, oikuaa porã pe pláta ideprovechoha, upéicharõ jepe ndohejái ombotavy chupe pe platarayhu. Upévare ojerure Jehovápe: “Ani chemomboriahu ni chembopirapire heta, emeʼẽ chéve aikotevẽhaichamínte” (Pro. 30:8, ÑÑB). Ñañehaʼãmbaitékena ñapensa Agur opensa haguéicha. Jahechakuaavaʼerã ikatuha ñañemomombyry Jehovágui jaikóramo jajepyʼapyeterei ñane remikotevẽre ha jahejáramo ñanembotavy pe platarayhu. Ñapensaitereíramo umi mbaʼetáre ha jajepyʼapy jahupytységui, jaʼupáta ñane tiémpo, nañanekyreʼỹmoʼãi ha ñaneateʼỹtama ñambaʼapo hag̃ua Ñandejárape g̃uarã. Upévare, aníkena jaheja Satanás ñandereity iñuhãme jaiko rupi umi mbaʼerepy rapykuéri (elee Hebreos 13:5).

ÑEMOAKÃRATĨ: PETEĨ YVYKUA OĨVA KAÑYHÁME

11, 12. ¿Mbaʼéichapa peteĩ kristiáno ikatu omoakãratĩ hembiayhúpe itravahohápe?

¹¹ Heta kasadór ojoʼo peteĩ yvykua pypuku ha ojahoʼi yvyra rakã, yvy ha yvyra roguépe oity hag̃ua umi mymba. Péicha avei, Satanás oiporu peteĩ ñuhã oity hag̃ua umi héntepe: pe tekovai. Ha pyʼỹinte osẽ porã chupe (Pro. 22:14, ÑÑB; 23:27). Heta kristiáno hoʼáma ko ‘yvykuápe’ haʼekuéra voi ohekágui pe mbarakaja kupy. Pór ehémplo, oĩ omendáva oúva ojeheʼaiterei peteĩ ndahaʼéivare iména térã hembireko ha upéi omoakãratĩma katu hembiayhúpe.

¹² ¿Moõpa oikokuaa upéva? Ikatu oiko travahohápe. Peteĩ informasión omombeʼu umi oporomoakãratĩva apytépe, 50% ári umi kuña omosombreroha iménape ikompañéro de traváho ndive, ha haimete 75% umi kuimbaʼe omoakãratĩ hembirekópe ikompañéra de traváho ndive. Ñamoĩ chupe ñambaʼapohápe oĩha heta kuña ha kuimbaʼe. ¿Mbaʼéichapa jatrata chupekuéra? ¿Jahechaukápa jajeheʼaha hesekuéra ñambaʼapo hag̃uánte ha ndajahasaiha la rrája avavéndi? Ikatu ningo peteĩ ermána pyʼỹi oñemongeta peteĩ ikompañéro ndive ha pe kuimbaʼe oúma ojerovia hese ha omombeʼu chupe iprovlemaha hembirekóndi. Térã peteĩ kristiáno ou ojepokuaaiterei peteĩ ikompañéra rehe ha opensa: “Ko kuña omombaʼe apensáva ha cherendu. Ahecha cherrespetaha ipyʼaite guive. ¡Hiʼãite ningo che rembireko péicha avei!”. Jajecha jave ko situasiónpe, ndahasyiete jaʼa hag̃ua ko ñuhãme ha ñamoakãratĩ ñane rembiayhúpe.

13. ¿Mbaʼéichapa ikatu jaʼa Satanás ñuhãme kongregasiónpe jepe?

¹³ Avei tekotevẽ ñañangareko kongregasiónpe, ani nañañatendéi rupi jaʼa tekovaípe. Jahechamína mbaʼépa oiko Daniel ha hembireko Sara rehea. Mokõivéva ojapovaʼekue iprekursorádo rregulár ha Daniel katu ansiáno. Haʼe heʼi ndaikatuiha voi orrechasa mbaʼeveichagua priviléhio kongregasiónpe. Avei omombeʼu ombostudia hague la Biblia cinco mitãrusúpe. Umívagui tres ojevautisa ha oikotevẽterei oñepytyvõ chupekuéra. Péro Daniel hembiapoiterei kongregasiónpe, upémarõ hembireko pyʼỹinte oñatende hesekuéra. Koʼã mitãrusu oikotevẽ jave, Sáramante oipytyvõ chupekuéra. Ha Sara avei oikotevẽ oñatendéva hese, ha upéicha jave umi mitãrusumante oĩ hendive. Upépe Satanás omoĩma iñuhã. ¿Mbaʼépa oiko upe rire? Daniel heʼi: “Che rembireko oipytyvõ chupekuéra heta mésere ha upéva omokangy ijerovia ha noñeñanduporãvéi. Che katu nañangarekói hese ha upéicha rupi ou chemoakãratĩ peteĩva umi mitãrusu ndive. Che rembireko oñemomombyry Jehovágui, ha che katu ni ndahechakuaái la oikóva ajesarekógui che rembiapórente”. ¿Mbaʼépa jajapovaʼerã ani hag̃ua oiko koʼã mbaʼe ñanderehe?

14, 15. ¿Mbaʼépa oipytyvõta kristianokuérape ani hag̃ua omoakãratĩ hembiayhúpe?

¹⁴ Tekotevẽ ningo jajepyʼamongeta pe kompromíso jajapovaʼekuére ñamendárõ guare. Upéva ñanepytyvõta ani hag̃ua ñamoakãratĩ ñane ména térã ñane rembirekópe ha jaʼa pe yvykuápe. Jesús heʼivaʼekue: “Avave ndoipeʼaivaʼerã ojuehegui Ñandejára omoĩvaʼekue oñondive peteĩ júgo guýpe” (Mat. 19:6, NM). Aníkena repensa ne rembiapokuéra kongregasionpegua iñimportanteveha ne rembiayhúgui. Oiméramo reiporueterei ne tiempo reñatende hag̃ua umi mbaʼe naiñimportanteguasúiva, ikatu peñemomombyry ojuehegui ha ndapegueropuʼakái oĩramo pendepyʼaraʼãva ha upéicha peʼa tekovaípe.

¹⁵ Oiméramo nde peteĩ ansiáno, katuete rejepyʼapýne umi ermáno ne kongregasionguáre. Apóstol Pedro ohaivaʼekue: “Peñangareko [...] [Ñandejára] ovechakuéra rehe, anítei mbaretépe, peñangareko porãséguinte uvei [...]. Ani pehaʼarõ ojehepymeʼẽ upéva rehe peẽme, pejapónte uvei pejaposetégui” (1 Ped. 5:2, JMP). Upéicharõ, tekotevẽ reñatende porã umi ermáno oĩvare ne kongregasiónpe oñeenkargavaʼekue ndéve. Péro ndahaʼéi upe haguére rembotapykuevaʼerã ne rembirekópe. Noĩporãmoʼãi ningo reñatende Jehová ovechakuérarente ha reheja ikangy ne rembireko jerovia. Upéva ikatu penemoprovléma pende rogapýpe. Daniel, pe ermáno ñañeʼẽma hague, heʼi: “Ikatu hína ñambaʼapoiterei ñakumpli hag̃ua ñane rembiapo kongregasiónpe, ha jahechakuaʼỹre nañañangarekoporãi ñane famíliare”.

16, 17. a) ¿Mbaʼépa ojapovaʼerã itravahohápe umi kristiáno omendáva ohechauka hag̃ua nointeresaiha chupe ótro ndahaʼéiva hembiayhu? b) Emombeʼu mbaʼe informasiónpa ikatu oipytyvõ kristianokuéra omendávape ani hag̃ua omoakãratĩ hembiayhúpe.

¹⁶ Umi rrevísta Ñemañaha ha ¡Despertad! ogueru heta konsého iporãva oipytyvõtava umi kristiáno omendávape ani hag̃ua omoakãratĩ iména térã hembirekópe. Pór ehémplo, La Atalaya 15 de septiembre de 2006-pe heʼivaʼekue kóicha: “Tahaʼe rembaʼapohápe, térã oimehápe, reñatendevaʼerã ani hag̃ua rejeheʼaiterei peteĩ ndahaʼéivare ne ména térã ne rembireko. Pór ehémplo, ikatu oñepresenta peteĩ tentasión repytáramo rembaʼapove hiʼorapeʼỹ peteĩ ne kompañéro térã ne kompañéra ndive. Nde ningo remendáva, ha rehechaukavaʼerã eréva ha reiko lájare ni michĩmi naneinteresaiha ótro ndahaʼéiva ne ména térã ne rembireko. Reservi rupi Jehovápe ni mbaʼevéicharõ ndereikoivaʼerã reñemonde vai térã rembojuruheʼẽ peteĩ ndahaʼéivape ne rembiayhu [...]. Iporãta remoĩramo nde travahohápe ne rembiayhu ha ne familiakuéra fóto peteĩ lugár ojekuaahápe. Upéicha nemanduʼáta haʼekuéra iñimportanteha ndéve g̃uarã ha ne kompañerokuéra ohechakuaáta upéva. Aníke arakaʼeve rejapo mbaʼeve ikatúva omopensa vai ótrope, upéva rangue rejerrespetakavaʼerã.”

¹⁷ Pe artíkulo “¿Qué implica realmente la fidelidad conyugal?”, osẽvaʼekue rrevísta ¡Despertad! abril de 2009-pe, ohechauka ndovaleiha jaiko ñapensa jarekoha rrelasión sexual peteĩ ndahaʼéiva ndive ñane ména térã ñane rembireko. Ha heʼi koʼãichagua tapicha sapyʼaitépe ikatuha ombotavy hembiayhúpe (Sant. 1:14, 15). Iporã ningo umi omendáva ohesaʼỹijo jepi ko informasión oñondive. Jehová omoñepyrũvaʼekue pe ñemenda, upévare ména ha tembireko omombaʼéva ko jopói porãite oúva Ñandejáragui, pyʼỹi oñemongetavaʼerã imatrimónio rehe (Gén. 2:21-24).

18, 19. a) ¿Mbaʼépa ojehu umi oporomoakãratĩvape? b) ¿Mbaʼépa jahupytýta nañambotavýiramo arakaʼeve ñane rembiayhúpe?

¹⁸ Sapyʼánte oñepresentáramo ndéve peteĩ tentasión rembotavy hag̃ua ne ména térã ne rembirekópe, repensavaʼerã umi mbaʼe vaieta oikótavare nderekovai térã reporomoakãratĩramo (Pro. 7:22, 23; Gál. 6:7). Umi hoʼáva tekovaípe ombopochy Jehovápe, otraisiona hembiayhúpe ha ojeperhudika ijupe (elee Malaquías 2:13, 14). Nemanduʼavaʼerã umi mbaʼe porãita rehupytývare nderekopotĩ haguére. Pór ehémplo, koʼág̃ama voi reiko vyʼápe ha ndepyʼapy potĩ, ha amo gotyove katu reikovéta opa ára g̃uarã (elee Proverbios 3:1, 2).

¹⁹ Peteĩ salmísta opurahéi kóicha Jehovápe: “Umi ne rembiapoukapy ohayhúva, pyʼaguapýpe oiko, ndaipóri mbaʼeve osẽ vaíva chupekuéra” (Sal. 119:165). Koʼã tiémpope koʼýte tekotevẽ jahayhu Ñandejára rape ha jajapo heʼíva ko konsého: “Pemaʼẽ porã mbaʼéichapa peikovaʼerã, ha ani peiko oikoháicha umi oikuaaʼỹva, peiko iñarandúvaichante uvei” (Efe. 5:15, 16, BNP). Ko múndo henyhẽte umi ñuhã Satanás omoĩvagui oity hag̃ua Ñandejára rembiguaikuérape. Péro Jehová oñangareko porã ñanderehe. Jarekopaite opa mbaʼe ñaikotevẽva ikatu hag̃uáicha “ñaime hatã” ha “ñamboguepa umi flécha rendyeta” pe Aña opoíva (Efe. 6:11, 16, NM).