¿Ndépa repensa avei Rogélioicha? Emañamína koʼã mbaʼe ogueroviáva jepi la hénte ha ehechami mavaitévapa nde repensa oĩ porãha:

• Satanás ndoexistíri, síno haʼe peteĩ mbaʼe jarekóva ñande pyʼapýpe ha ñanemomýiva jajapo hag̃ua ivaíva.

• Satanás oexisti, péro nopenaguasúi yvyporakuérare.

• Satanás peteĩ espíritu orekóva podér ha ipeligrosoitereíva.

Heta oĩ ogueroviáva koʼã mbaʼe. Péro, ¿iñimportántepa jaikuaa añetehápepa oexisti Satanás? Iñimportánte, pórke oiméramo haʼe ndoexistíri, upéva heʼise heta héntepe oñembotavyha hína. Ha oiméramo oexisti péro nopenaguasúi yvyporakuérare, ojekyhyje rei chugui. Péro oiméramo Satanás oexisti ha ipeligróso, ñañatende vaʼerã pórke ikatu ñandeperhudika.

Péro, ¿mávapa añetehápe Satanás? ¿Haʼépa peteĩ mbaʼe jarekóva ñande pyʼapýpente ha ñanemomýiva jajapo hag̃ua ivaíva? Ha oiméramo oexisti, ¿jakyhyje vaʼerãpa chugui? ¿Ipeligróso piko? ¿Mbaʼéichapa ikatu jajeprotehe chugui? Opa koʼã porandu okontesta la Biblia, jahechamína upéva umi artíkulo oúvape.

Heta hénte opensa pe aña haʼeha peteĩ mbaʼe vai jarekóva ñande pyʼapýpente. Péro, ¿omboʼe piko upéva la Biblia? Oiméramo upéicha, ¿mbaʼére piko upépe heʼi pe aña oñeʼẽ hague Jesús ha Ñandejárandi? Ñaanalisamína umi konversasión.

SATANÁS OÑEʼẼRÕ GUARE JESÚS NDIVE

Jesús ojevautisa riremi, Satanás tres vése oitysemoʼã chupe iñuhãme. Primero, omboliga chupe opensa hag̃ua ijehénte ha oipuru vai hag̃ua pe podér Ñandejára omeʼẽva chupe, ojapóvo itágui pan. Segundo, odesafia chupe heʼívo ojepoi hag̃ua peteĩ lugár ijyvatévagui, ikatu hag̃uáicha umi hénte omombaʼe chupe. Ha tercero, Satanás heʼi Jesúspe omeʼẽmbaitetaha chupe umi goviérno oĩva ko yvy ape ári, oñesũramo henondépe ha omombaʼeguasu chupe. Péro Jesús orrechasa umi mbohapy tentasión Satanás omoĩva henondépe oipurúvo Ñandejára Ñeʼẽ (Mateo 4:1-11; Lucas 4:1-13).

Oimérire Satanás ndoexistíri, ¿mávandipa upéicharõ oñeʼẽ Jesús? ¿Orekóne piko Jesús ipyʼapýpe peteĩ mbaʼe vai omomýiva chupe ojapo hag̃ua ivaíva? Ñandejára Ñeʼẽ ningo heʼi Jesús ndopekái hague, ohasáramo jepe opa mbaʼe vai ñande jahasáva (Hebreos 4:15). Heʼi avei: “Haʼe ndopekái vaʼekue ni nombotavýi avavépe heʼíva rupive” (1 Pedro 2:22). Jesús koʼag̃aite peve perfékto ha ndojapói mbaʼeve ivaíva. Haʼe núnka ndohejáiva umi mbaʼe vai odomina chupe. Upévare jaʼekuaa Jesús noñeʼẽi hague peteĩ mbaʼe vai orekóvandi ipyʼapýpe, síno peteĩ persóna oexistívandi.

Péro oĩ hína hetave detálle ko konversasióngui ohechaukáva Satanás oexistiha. Jahechamína umíva:

• Ñanemanduʼa vaʼerã Satanás oikuaveʼẽ hague Jesúspe umi goviérno oĩva guive ko yvy ape ári, una vemi jepe omombaʼeguasúrõ chupe (Mateo 4:8, 9). Ha upéva naisentidomoʼãi Satanás ndahaʼéiramo peteĩ persóna rreál. Avei jahechakuaa Jesús nonegái hague Satanás orekoha upe autorida.

• Jesús orrechasa rire umi mbohapy tentasión “pe Aña oho ou jey hag̃uáicha ija vove chupe” (Lucas 4:13). ¿Ikatúpa jaʼe upéicharõ Satanás haʼeha peteĩ mbaʼe vai Jesús orekóva ipyʼapýpe, térãpa haʼeha peteĩ enemígo hovaʼatãva ha oñehaʼãva oity chupe oimeháicha rei?

• Pe aña oho rire, “ou umi ánhel oñatende hag̃ua” Jesús rehe (Mateo 4:11). Koʼã ánhel ningo oexistímante vaʼerã omokyreʼỹ ha oapoja hag̃ua Jesúspe. ¿Mbaʼére piko upéicharõ ndajagueroviamoʼãi avei Satanás oexistiha?

SATANÁS OÑEʼẼRÕ GUARE ÑANDEJÁRA NDIVE

Satanás oñeʼẽ vaʼekue dos vése Ñandejárandi Job rehe. Job ningo peteĩ kuimbaʼe iñeʼẽrendu vaʼekue Ñandejárape, ha upévare haʼe oguerohoryeterei chupe. Péro Satanás heʼi Job oserviha Ñandejárape okonveníguinte chupe, ha ontendeka Ñandejára voi omeʼẽha chupe opa mbaʼe, oipotágui iñeʼẽrendu chupe. Upéicha Satanás ontendeka haʼe oikuaa porãveha Jóbpe Ñandejáragui. Upe rire Job ou hasyete, omano chugui ifamiliakuéra ha operde opa mbaʼe orekomíva. Ha Jehová voi opermiti Satanáspe ojapo hag̃ua upéva Job rehe.a Amo ipahápe ojehechakuaa Satanás ijapu hague ha Jehová oreko hague la rrasón. Ha Ñandejára ovendesi Jóbpe péicha iñeʼẽrendu haguére (Job 1:6-12; 2:1-7).

¿Ikatúpa jaʼe Jehová oñeʼẽ hague peteĩ mbaʼe vai orekóvandi ipyʼapýpe? La Biblia heʼi Ñandejára rape perfektoha, upéva heʼise haʼe ndojavyiha (2 Samuel 22:31). Ha heʼi avei: “Ñandejára Ipuʼakapáva Jehová ningo imarangatueterei” (Apocalipsis 4:8). Pe palávra marangatu heʼise, potĩ, joheipyre térã ndopekáiva. Jehová ningo perfékto ha hekopotĩ, upévare ndaikatúi oreko ipyʼapýpe defékto ni mbaʼeve ivaíva.

Péro oĩ heta opensáva Job ndoexistíri hague voi, upévare heʼi avei umi konversasión oreko vaʼekue Jehová ha Satanás ndoexistíri hague. ¿Siértopa upéva? Ótra párte de la Bíbliape ningo oñeñeʼẽ avei Job rehe. Por ehémplo, Santiago 5:7-11-pe ojepuru chupe kómo ehémplo oñemokyreʼỹ hag̃ua umi ermánope oaguanta hag̃ua umi pruéva ohasáva, ha oasegura chupekuéra Jehová omyengovia porãha umi oaguantávape. Oimérire Job ndoexistíri ha umi mbaʼe ohasa vaʼekue kuénto reínte, upéicharõ naisentídoi vaʼerãmoʼã koʼã téxto. Avei Ezequiel 14:14, 20-pe oñeñeʼẽ mbohapy kuimbaʼe hekojojávare. Umíva apytépe oĩ Daniel ha Noé, jaikuaa porãva oexisti hague. Ha pe tercero katu Job. Upévare jaʼekuaa haʼe añetehápe oexisti hague. Ha ja ke haʼe oexisti, jaʼekuaa avei oexistiha upe hetaite ombohasa asy vaʼekue chupe.

La Biblia ohechauka porã Satanás oexistiha, upévare iporã ñañeporandu: “¿Ikatúpa cheperhudika chéve ha che famíliape?”.

¿MBAʼÉPA OJAPO OIKÓVO SATANÁS?

Eñeimahinamína peteĩ grúpo de patotéro ouha oiko nde várriope. ¿Mbaʼéichapa ojeikóta upépe? Ndaiporimoʼãvéima segurida moõve ha umi hénte mbeguekatúpe ojaposétama avei mbaʼe vai. Koʼág̃a epensami, ¿mbaʼépa oikóta Satanás ha umi ánhel opuʼã vaʼekue Ñandejárare, térã umi demónio, oikórõ ko yvy ape ári ñanendive? Katuete oikóta sarambi ha heta mbaʼe vai ko múndo tuichakuére. Emañamína koʼã ehémplore, ha epensami oikópa hína añete upéicha:

• ¿Ajépa oparupiete oĩ pe violénsia ha avave ndaikatúi ojoko?

• ¿Reñemeʼẽpa enkuénta koʼág̃arupi umi pelíkula, divuhíto térã videohuégo henyhẽha espiritísmogui?

• ¿Rehechakuaápa amasdía oñembyaiveha ohóvo pe médio ambiénte, oĩramo jepe heta oñehaʼãva oprotehe?

• ¿Ndépa repensa oĩha álgien omomýiva umi héntepe ojapo hag̃ua ivaíva?

La Biblia ohechauka ñandéve mávapa upe oguerúva hetaite provléma yvyporakuérape, heʼívo: “Oñemombo yvy gotyo pe dragón guasúpe, haʼéva pe mbói ypykue oñehenóiva Diablo ha Satanás, ombotavýva hína ko múndo kompletoitépe. Chupe oñemombo yvy gotyo ha hiʼanhelkuérape oñemombo hendive. [...] Aichejáranga pe yvy ha pe mar, oguejy rupi peẽme pe Aña, haʼe orrenegaiterei hína oikuaágui mbykypaitemaha itiémpo” (Apocalipsis 12:9, 12). Heta hénte ohecha rire koʼã pruéva oĩva la Bíbliape, opensa Satanás ipeligrosoitereiha ha odominaha ko múndo.

Upéicharõ, ¿mbaʼépa ikatu jajapo jajeprotehe hag̃ua chugui? Pe ótro artíkulope jahecháta upéva.

Satanás ningo ojogua pe monóxido de karvónope: ndojekuaái, ipeligrosoiterei ha ijetuʼu japilla hag̃ua chupe. Upéicharõ jepe, ndajakyhyjéi vaʼerã chugui. ¿Mbaʼérepa? Ñandejára omeʼẽ rupi ñandéve heta mbaʼe ñanepytyvõtava jajeprotehe hag̃ua chugui. Jahechamína unos kuánto:

Ñande ikatu jadesidi. Santiago 4:7 heʼi: “Peñemoĩ mbaretéke pe Añáre ha haʼe odiparáta pendehegui”. Satanás ningo ipoderóso añete, péro ndaikatúi ñandeovliga jajapo hag̃ua peteĩ mbaʼe ndajajaposéiva. Jaʼe porãsérõ g̃uarã, ñande kárgope opyta upe desisión. Ñamombaretéramo ñande jerovia ha ñañemoĩramo Ñandejára ykére, pe aña ñanderejáta (1 Pedro 5:9). Jesús oñeplanta vaʼekue Satanáspe ha omboykete umi tentasión omoĩva chupe, “upémaramo pe Aña oheja chupe” (Mateo 4:11). Ñande avei ikatu jajapo upéicha.

Ñandejára amista. Santiago 4:8 heʼi: “Peñemoag̃uíkena Ñandejárare”. Péicha Jehová direktoite voi ñaneinvita jaiko hag̃ua iñamígoramo. ¿Mbaʼépa ñande ikatu jajapo ñakonsegi hag̃ua upéva? Upearã iñimportanteterei ñaaprende opa mbaʼe la Biblia omboʼéva chugui (Juan 17:3). Amáske jaikuaa Ñandejárape, jahayhuvéta chupe. Ha amáske jahayhu chupe, koʼýte jaserviséta chupe (1 Juan 5:3). ¿Ha mbaʼépa ojapóta ñande Ru yvagapegua ohechávo jaserviseha chupe? Santiago 4:8 osegi heʼi: “Haʼe oñemoag̃uíta penderehe”.

Ñandejára ogarantisa ñandéve iproteksión. Proverbios 18:10 heʼi: “Jehová réra ningo peteĩ tórre imbaretéva. Upépe oho pe hekojojáva ha haʼe oprotehe chupe” [NM]. ¿Heʼisépa ko téxto ikatuha jaipuru Ñandejára réra peteĩ amulétoicha? No, heʼise ke umi orrespetáva Ñandejárape, ikatuha ojerure chupe proteksión oikotevẽha óra, ha haʼe katuete oprotehetaha chupekuéra.

Ehémplo oĩva la Bíbliape. Hechos 19:19-pe oñemombeʼu peteĩ rreláto ikatúva ñanepytyvõ. Upépe ohechauka mbaʼépa ojapo vaʼekue umi oikóva Éfesope, oiko ramoitérõ guare chuguikuéra kristiáno. Pe rreláto heʼi: “Heta umi ojapóva máhia ogueru ilivrokuéra, ombyaty ha ohapy opavave renondépe. Ha okalkulávo hikuái mboýpa ovale, otopa ohupytyha cincuenta mil monéda de pláta”.a Umi kristiáno ohapypaite oĩva guive rrelasionádo pe máhiandi, tove tahepy térã varáto raʼe umi mbaʼe. Ha upéva peteĩ ehémplo iporãitereíva ñandéve g̃uarã. Ko múndope ningo henyhẽte pe espiritísmo térã máhia. Oĩ heta mbaʼe ojejapóva jajediverti hag̃uánte guaʼu, péro añetehápe oĩ diréktamente rrelasionádo pe espiritísmondi ha upéva haʼete ku oinvitáva umi demoniokuérape ou hag̃ua. Upévare tekotevẽterei jajehekyiete voi koʼã mbaʼégui, toiko la oikóva (Deuteronomio 18:10-12).

Rogelio, pe kuimbaʼe ñañeʼẽma hague pe primer artíkulope, oñekonvense Satanás oexistiha, orekórõ guare 50 áño ae. ¿Mbaʼére piko okambia la opensa lája? Haʼe omombeʼu: “Primera ves arekomi peteĩ Biblia. Ha aleérõ guare, añekonvensete voi Satanás oexistiha. Ha aikuaa rupi upéva, ikatu ajeprotehe chugui”.

¿Mbaʼépa nde ere, igústonepa jaiko peteĩ múndope ndaiporimoʼãveimahápe Satanás ni avave ñanemboligáva jajapo hag̃ua ivaíva? La Biblia ningo ogarantisa ñandéve koʼẽrõitéma oikotaha upéva. Ha anivéma hag̃ua pe Aña ombotavy umi héntepe, heʼi ojepoitaha chupe “pe lágo oĩháme tatarendy ha asúfre” (Apocalipsis 20:10). Upéva heʼise Satanás oñehunditaha opa árare. Omanoitéta voi. ¡Mbaʼeichaite piko ipiroʼýta opytávo Ñandejára siervokuéra oiko rire upéva!

Rehaʼarõ aja og̃uahẽ upe día, reaprendeve vaʼerã rehóvo Ñandejáragui ha umi mbaʼe haʼe opensáva.b Rejapóramo upéicha, nde ikatúta avei ere ág̃a Ñandejára siervokuéra iñeʼẽrendúvandi: “¡Satanás el Diablo ndoexistivéima!”.