Christopher, Hannah, Gina ha hetaitereive hénte, oguerovia Ñandejára haʼeha iñamígo. Péro oĩ avei oñeporandúva: “¿Ikatúne piko peteĩ yvypóra reínte oiko Ñandejára amígoramo?”. Ndépa mbaʼe ere, ¿ikatúpa jaiko Ñandejára amígoramo? ¿Reikosépa nde iñamígoramo, térãpa repensa tekotevẽha reñemoag̃uive hese?

IKATU REIKO ÑANDEJÁRA AMÍGORAMO

La Bíbliape oñemombeʼu Ñandejára ohenói hague Abrahánpe “che amígo”, ha upéva ohechauka yvyporakuéra ikatuha oiko avei Ñandejára amígoramo (Isaías 41:8). La Bíbliape voi ningo jatopa ko invitasión Santiago 4:8-pe: “Peñemoag̃uíkena Ñandejárare, ha haʼe oñemoag̃uíta penderehe”. Péro, ¿mbaʼéicha piko ikatúta ñañemoag̃ui Ñandejárare ha jaiko iñamígoramo, ndaikatúiramo jahecha chupe?

Jaikuaa hag̃ua upéva, ñapensamína mbaʼéichapa oñepyrũ jepi peteĩ amista. Primeroite voi peteĩ persóna omombeʼu pe ótrope mbaʼéichapa héra. Upe rire oñemongeta jepi hikuái, ha péicha oikuaa mbaʼépa opensa ha oñandu káda uno. Upéi mbeguekatúpe ojokuaave ohóvo ha okakuaave pe amista. Ha oñehaʼãvo ojapo heta mbaʼe porã ojuehe, oñemombareteve pe amista. Upeichaiténte avei jaiko hag̃ua Ñandejára amígoramo. Jahechamína mbaʼéichapa ikatu jajapo upéva.

¿Nde piko ereko peteĩ ne amigoite péro ndereikuaáiva mbaʼéichapa héra? Nahanirichéne, katuete ningo reikuaáta héra. Upéicha vaʼerã avei jaiko hag̃ua Ñandejára amígoramo. Peteĩ kuñakarai, oikóva Bulgáriape ha hérava Irina, heʼi: “Ndaikatúi ñañemoag̃ui Ñandejárare ndajaikuaáiramo héra”. Jahecha haguéicha pe ótro artíkulope, Ñandejára oipota nde reñemoag̃ui hese ha reiko iñamígoramo. Haʼe voi oikuaauka ndéve héra, heʼívo: “Che hína Jehová. Péva haʼe che réra” (Isaías 42:8, NM).

Evréope, Ñandejára réra ojeskrivi ypy vaʼekue cuatro létrapente ha ndojepurúi ni peteĩ vokál. Upévape oñehenói Tetragrámaton ha oaparese 7.000 véserupi umi eskritúra evréa orihinálpe, térã pe Antiguo Testaméntope. Ñandejára réra ningo haʼe pe hetave vése oapareséva la Bíbliape. Upéva ohechauka porãiterei Ñandejára oipotaha nde reikuaa ha reipuru héra.a

Ñandejára ningo pe Ipoderosovéva ha Imarangatueterei, upévare oĩ opensáva haʼeha peteĩ fálta de rrespéto jaipuru héra. ¿Ndépa reipuru vaíne ne amigoite réra? Nahanirichéne, koʼytevéntema upéicharõ ndovaléi reipuru vai térã remongyʼa Ñandejára réra. Haʼe ningo oipota umi ohayhúva chupe, omombaʼe ha oikuaauka héra (Salmo 69:30, 31; 96:2, 8). Jesús voi omboʼe vaʼekue idisipulokuérape oñemboʼe hag̃ua kóicha: “Ore Ru reiméva yvágape, toñemomarangatu nde réra”. ¿Mbaʼéichapa ikatu jajapo upéva? Jaipuru ha jaikuaaukávo ótrope Ñandejára réra, péicha ñanemoag̃uivéta hese (Mateo 6:9).

Ohechaukaháicha la Biblia, ñande ñamombaʼéramo Ñandejára réra, haʼe katuete ñandeguerohorýta (Malaquías 3:16). Jehová voi opromete káda únope: ‘Che añangarekóta nderehe reikuaágui che réra. Nde rehenóiramo che réra, che ambohováita ndéve. Che aĩta nendive rehasa asy jave’ (Salmo 91:14, 15, NM). Upéicharõ, reñemoag̃uiséramo Jehováre ha reiko iñamígoramo, tekotevẽterei reikuaa ha reipuru héra.

Umi oñoamigoitéva ningo pyʼỹinte oñeʼẽ oñondive, ojapo jepi upéva en persóna, por teléfono, por korréo elektróniko, por kárta térã Internét rupive. Upéicha avei ñande ñañemoag̃uiséramo Ñandejárare, pyʼỹi ñañeʼẽ vaʼerã hendive. Péro, ¿mbaʼéichapa ikatu jajapo upéva?

Ñañemboʼévo Ñandejárape, ñande ñañemongetáma hína hendive. Péro ndaikatúi ningo jajapo upéva ñañeʼẽháicha jepi peteĩ persóna ñandeichaguándi. Ñanemanduʼa vaʼerã ñañeʼẽha hína ñande Kreadórndi, pe persóna iñimportantevéva ko univérsope. Upévare jaiporavo porã vaʼerã umi mbaʼe jaʼeséva ha jahechauka jarrespetaha chupe. Jaipotáramo Ñandejára ohendu ñane ñemboʼe, ñakumpli vaʼerã umi rrekisíto haʼe ojeruréva ñandehegui. Jahechamína mbohapy umi rrekisítogui:

Primero, ñañemboʼe jave jajedirihi vaʼerã Ñandejára Jehovápe, ndahaʼéi Jesúspe ni umi sántope (Éxodo 20:4, 5). La Biblia heʼi porã voi: “Opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe” (Filipenses 4:6). Segundo, ñañemboʼe vaʼerã Jesucristo rérape. Haʼe heʼi vaʼekue: “Che rupive añoite ikatu oñeg̃uahẽ pe Túva rendápe” (Juan 14:6). Ha tercero, jajerure vaʼerã umi mbaʼe Ñandejára oguerohorýva. La Biblia heʼi voi: “Oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta” (1 Juan 5:14).a

Peteĩ amista ndoduramoʼãi peteĩvante oñeʼẽramo, mokõivévante oñeʼẽ vaʼerã ha ohendukuaa vaʼerã. Péicha avei ñañemongeta jave Ñandejárandi, ñahendu vaʼerã avei mbaʼépa haʼe heʼi. Péro, ¿mbaʼéichapa Ñandejára oñeʼẽ ñandéve?

Upearã oipuru la Biblia (2 Timoteo 3:16, 17). ¿Mbaʼéichapa oiko upéva? Vuéno, ñamoĩ chupe jarresiviha peteĩ kárta ñane amigoitégui, jalee haguénte álgo chugui haʼete ku ñahendupáva chupe oñeʼẽrõ ñandéve. Péicha avei oiko jalee jave la Biblia, haʼete ku ñahendupáva Ñandejárape oñeʼẽrõ ñandéve. Gina, ñañeʼẽma hague primer artíkulope, heʼi: “Che aipotáramo Ñandejára cherecha iñamígaicha, tekotevẽ alee ‘ikárta’, térã la Biblia. Aleéramo káda día, añandu upéva chemoag̃uiveha hese”. ¿Ndépa relee avei la Biblia káda día? Rejapóramo upéicha, reheja hína Jehová oñeʼẽ ndéve ha reñemoag̃uive hese.

“Reipotáramo álgo, ani reduda, ejeruréntema vaʼerã chéve.” ¿Ndépa eréne péicha peteĩ extráñope térã peteĩ reikuaa ramóvape? Katuete ningo nderemoʼãi, péro peteĩ ne amigoitépe si eréta upéicha. Ñande nañaneprovlémai ñaipytyvõ hag̃ua ñane amígope, ha javyʼa voi ikatu haguére jajapo ojeruréva ñandéve.

La Biblia ohechauka Ñandejára siémpre ojapoha umi mbaʼe oikuaáva ou porãtaha iñamigokuérape. Por ehémplo, rréi David Ñandejára amigoite vaʼekue, upévare heʼi chupe: ‘Hetaite mbaʼe porã ningo rejapo. ¿Máva piko ndéicha, peichaite peve imbaʼeporãva orendive? [...] Umi mbaʼe rejapóva ndaikatúi romombeʼupa, hetaitereígui’ (Salmo 40:5, NM). Hiʼarive Jehová ndahaʼéi ojapóva umi mbaʼe ou porãtava iñamigokuérape añónte, síno omeʼẽ avei opaichagua héntepe hetaiterei tembiʼu ha hetave mbaʼe ombopyʼarorýva chupekuéra (Hechos 14:17).

Jehová ningo vyʼápe ojapo umi mbaʼe ou porãtava ótrope. Upévare ñande jaikoséramo iñamígoramo, tekotevẽ avei jajapo umi mbaʼe ombovyʼátava chupe (Proverbios 27:11). Péro, ¿mbaʼéichapa ikatu jajapo upéva? La Biblia heʼi: “Ani penderesarái pejapo vaʼerãha iporãva ha pekomparti peguerekóva pende rapichakuérandi, Ñandejára oguerohoryetereígui koʼãichagua sakrifísio” (Hebreos 13:16). Péro, ¿upévantepa jajapo vaʼerã ñambovyʼa hag̃ua Ñandejárape?

La Biblia ohechauka tekotevẽha avei jajerovia. Hebreos 11:6 heʼi voi: “Ndajajeroviáirõ, Ñandejára ni mbaʼevéicharõ nañandeguerohorymoʼãi”. Upéva oikuaa porã vaʼekue Abrahán, Ñandejára siérvo yma guare. Haʼe “ojerovia Jehováre [...] ha upéicha rupi ojeʼe hese haʼeha Jehová amígo” (Santiago 2:23). Jesús avei heʼi vaʼekue tekotẽveha ‘jajerovia Ñandejárare’ jaipotáramo haʼe ñanevendesi (Juan 14:1). Péro, ¿mbaʼéichapa nde ikatu rejerovia Ñandejárare? Primeroite voi rejepokuaa vaʼerã relee ha restudia la Biblia, rejapóramo upéicha reikuaa porãta mbaʼépa haʼe oipota rejapo ha haʼe ndeguerohorýta opa mbaʼépe. Amáske reikuaa Ñandejárape ha rejapo umi mbaʼe ogustáva chupe, rejeroviavéta hese ha haʼe oñemoag̃uivéta nderehe (Colosenses 1:9, 10).

Upéicharõ, ¿mbaʼépa jajapo vaʼerã ñañemoag̃ui hag̃ua Ñandejárare ha jaiko hag̃ua iñamígoramo? Jahecha kuri mbohapy mbaʼe:

1. Jaikuaa ha jaipuru Ñandejára réra, Jehová.

2. Ñañekomunika meme hendive, ñañemboʼévo ha jaleévo Iñeʼẽ la Biblia.

3. Jajapo Ñandejára ojeruréva ñandehegui.

¿Ndépa ere rejapoha hína koʼã mbaʼe, térãpa repensa ikatuha rembaʼapomie algúna kósape? Jaikuaa ningo heta jaiko vaʼerãha ñañemoag̃ui hag̃ua Ñandejárare, péro nañambyasymoʼãi jajapóramo upéva.

Peteĩ kuñakarai oikóva Estados Unídospe, hérava Jennifer, heʼi: “Rejapo vaʼerã tekotevẽva guive reñemoag̃ui hag̃ua Ñandejárare, upéicha rehupytýta heta vendisión. Por ehémplo, rejeroviavéta hese, reikuaavéta mbaʼeichagua persónapa haʼe ha, iporãveha katu, rehayhuvéta chupe. Ni mbaʼevéicharõ nerembyasymoʼãi reñemoag̃ui haguére Ñandejárare”.

¿Ndépa reikose avei Ñandejára amígoramo? Umi testígo de Jehová ovyʼaitereíta ikatu haguére nepytyvõ. Haʼekuéra ikatu ohechauka ndéve mbaʼépa omboʼe la Biblia ha nandekovramoʼãi mbaʼevete. Avei ikatu reho umi rreunionhápe ojejapóva Salón del Réinope, upépe ningo retopáta heta persóna oguerekóva Ñandejárape iñamígoramo.a Rejapóramo upéicha, ikatúta ere avei pe salmísta heʼi haguéicha: ‘Chéve g̃uarã iporã añemoag̃ui Ñandejárare’ (Salmo 73:28).