¿Mbaʼérepa David opensáne raʼe Ñandejára oñangareko térã ojepyʼapyha hese? ¿Ndépa ere Ñandejára ojepyʼapyha nderehe? Heta persóna ndogueroviapái Ñandejára Ipuʼakapáva oñeinteresaneha hesekuéra, ¿mbaʼérepa?

Haʼekuéra heʼi Ñandejára iñimportantetereiha ha ni nomañaiha voi yvyporakuérare. Ñandejárape g̃uarã ningo ‘umi tetã haʼete ku y otykýva peteĩ mbaʼyru guasúgui, ha yvytimbóicha opytáva valánsa rehe’ (Isaías 40:15). Peteĩ eskritór atéo heʼi voi: “Reñemombaʼeguasuetereítama ningo repensáramo oĩha peteĩ diós oñeinteresáva umi mbaʼe rejapóvare”.

Oĩ avei opensáva nomereseiha Ñandejára oipytyvõ chupekuéra umi mbaʼe vai ojapo vaʼekuére. Por ehémplo, peteĩ kuimbaʼe hérava Jim omombeʼu: “Chéngo siémpre ajerure Ñandejárape tachepytyvõ anivéma hag̃ua chearheleterei, péro sapyʼaitérõ g̃uarã arrenega rendy jeýma oimeraẽ mbaʼére ha ndajejokokuaaiete voi. Amo ipahápe apensáma cheñañaitereiha ha ni Ñandejára ndaikatumoʼãiha chepytyvõ”.

¿Ohecháne jepe piko Ñandejára umi mbaʼe jajapóva? ¿Mbaʼépa haʼe oñandu yvyporakuéra imperféktore? Ñandejára voi ikatu ñanepytyvõ ñambohovái hag̃ua koʼã porandu. Iñeʼẽ la Bíbliape haʼe heʼi ojepyʼapyha ñanderehe ha ‘noĩriha mombyry ñandehegui’ (Hechos 17:27). Umi cuatro artíkulo oúvape koʼág̃a, jahecháta mbaʼérepa jaʼekuaa Ñandejára añetehápe ojepyʼapyha ñanderehe ha mbaʼéichapa ohechauka oñeinteresaha nderehe.

MBAʼÉREPA OĨ ODUDÁVA: Peteĩ investigasión ojejapo ramóvape, ojepilla ñande galáxiapente oĩha amo cien mil millones de planéta. Ha upéva peteĩ párte michĩmívante hiʼarive ko univérsogui. Upévare heta oĩ oñeporandúva: “¿Mbaʼére guaʼu piko Ñandejára ni omañáta umi mbaʼe jajapóvare ñande yvypóra imperfékto, ko jaikóva peteĩ planéta michĩetereívape?”.

MBAʼÉPA HEʼI LA BIBLIA: Ñandejára ningo ndahaʼéi omeʼẽva ñandéve Iñeʼẽ la Biblia ha upéi hesaráiva ñandehegui. Jehováa oasegura ñandéve: “Che ahechaukáta ndéve che rembipota ha ajesarekóta nderehe” (Salmo 32:8, ÑÑB).

Ñapensamína por ehémplo Agar rehe, peteĩ ehípsia oiko vaʼekue síglo 20-pe Jesús ou mboyve. Haʼe ningo Sarai rembiguái vaʼekue, péro peteĩ vuéltape ndorrespetái haguére ipatrónape, oñemondo chupe oiko pe desiértore. ¿Hesaráipa Ñandejára chugui ojavy haguére? Nahániri, la Biblia heʼi Jehová ánhel otopa hague hese desiértore ha omokyreʼỹ chupe heʼívo: “Jehová ohendu rejepyʼapyha”. Ha Agar heʼi: “Nde ningo Ñandejára añetehápe cherecha” (Génesis 16:4-13, NM).

Ñandejára nderecha avei ndéve. ¿Mbaʼérepa jaʼe upéva? Ñantende porã hag̃ua ñamoĩkuaa peteĩ ehémplo. Peteĩ sy ningo oñangareko ha omokunuʼũ entéro imembykuérape, péro oñatendeve umi michĩvévare, pórke haʼekuéra ikangy, noñedefendekuaái haʼeño ha oikotevẽve oñeñangareko hesekuéra. Upéicha avei Jehová oñatendeve ñanderehe ñanekangýrõ hína térã ndaikatúirõ ñañedefende ñaneaño. Haʼe voi heʼi: ‘Che agoverna ijyvatehágui ha aiko ikaneʼõva ha ojepyʼapýva ndive, amokyreʼỹ jey hag̃ua umi ikaneʼõva ha iñumíldevape’ (Isaías 57:15).

Péro ikatu oime reñeporandu jey: “¿Mbaʼéichapa Ñandejára cherecha? ¿Haʼe piko ohecha che píntante, térã ikatu avei chentende ha ohecha arekóva che pyʼapýpe?”.

MBAʼÉREPA OĨ ODUDÁVA: Heta oĩ ogueroviáva Ñandejára ñanderechaha peteĩ yvypóra imperfektomíchante, ha upévare nañamereseiha oñeinteresa ñanderehe. Péicha oiko vaʼekue Kendra rehe, haʼe ningo oñedeprimi vaieterei vaʼekue ha oñeñandu vai ndaikatúi haguére okumplipaite umi mbaʼe Ñandejára ojeruréva. Haʼe imanduʼa: “Amo ipahápe ndaikatuvéi ni añemboʼe Ñandejárape upévare”.

MBAʼÉPA HEʼI LA BIBLIA: Jehová oikuaa mbaʼérepa heta vése jajavy ha ñanentende porãiterei. “Haʼe oikuaa voi mbaʼeichaguaitépa hína ñande, ha oikuaa porã voi ñande yvytimbonteha.” Haʼetépe Ñandejára nañandekastigái ñamereseháicha ñande pekadokuérare, síno ñandeporiahuvereko ha ñaneperdona, ñañarrepentíma guive (Salmo 103:10, 14, ÑÑB).

Ñapensamína rréi David rehe, ñañeʼẽma hague pe ótro artíkulope, haʼe heʼi Ñandejárape: ‘Aikove mboyve nde cherecháma vaʼekue, ha nde kuatiápe oĩmbáma mbaʼéichatapa che. [...] Eipyguara che pyʼapy ha eikuaa mbaʼépa oĩ che korasõme’ (Salmo 139:16, 23). David ningo heta ojavy vaʼekue ha sapyʼánte katu ivaieterei umi mbaʼe ojapóva, upéicharõ jepe Jehová ohecha oñarrepentiha ipyʼaite guive ha operdona chupe.

Nde ikatu reime segúro Jehová ndekuaa ha nentende porãitereiha. La Biblia heʼi: “Peẽ pemaʼẽ upe kuimbaʼe rováre, che katu amaʼẽ ipyʼapy rehe” (1 Samuel 16:7). Ñandejára oikuaa porã entéronte jajavyha. Ha sapyʼánte ndahaʼéi katuete jajaposégui, síno heta vése odepende mbaʼéicha ha moõpa jakakuaa térã ñande karákter rehe. Haʼe ohecha ha omombaʼe nde reñehaʼã haguére remehora, ha nderayhueterei rejavy mimíramo jepe.

Jahecha haguéicha Ñandejára ndekuaa porãiterei, ¿péro mbaʼéichapa Ñandejára oipuru upéva nepytyvõ hag̃ua?

MBAʼÉREPA OĨ ODUDÁVA: Oĩ heta persóna oñeñandu vaietereíva ha ndojuhúiva voi konsuélo moõve. Péro ndojerureséi Ñandejárape oipytyvõ hag̃ua chupekuéra oimoʼãgui upéicha ohechaukataha hikuái opensaha ijehénte. Peteĩ kuñakarai hérava Raquel omombeʼu: “Ko múndo tuichakuére ningo oĩ hetaiterei persóna iprovléma hetavéva chehegui ha ivaietereive umi mbaʼe ojehúva chupekuéra. Ha akomparátaramo umi provléma che mbaʼévare, vyroreiete la chéve ojehúva, upévare ndajeruréintema Ñandejárape chepytyvõ hag̃ua”.

MBAʼÉPA HEʼI LA BIBLIA: Ñandejára ningo hetaiterei mbaʼéma ojapo ñanderehehápe ñanepytyvõ ha ñanekonsola hag̃ua. Péro ndaikatúi ñakumplipaite Ñandejára ojeruréva guive ñandéve jagueronase rupi pe pekádo. Péro Ñandejára ñanderayhúgui “ombou Itaʼýra [Jesucrístope] oñemeʼẽ hag̃ua sakrifísioramo, ikatu hag̃uáicha ojeheja rei ñande pekádo” (1 Juan 4:10). Upe sakrifísio rupive ñande ikatu ñanekonsiénsia potĩ, oñeperdona ñandéve ñande pekádo ha ikatúta jaiko pyʼaguapýpe opa árare peteĩ múndo pyahúpe.a Upéicharõ jepe, oĩ jey opensáva Ñandejára ohayhuha entéro yvypórape, ndahaʼeiha peteĩteĩme. ¿Siértopa upéva?

Jahechamína mbaʼépa heʼi vaʼekue apóstol Pablo. Haʼe ningo omombaʼeterei vaʼekue Jesús sakrifísio, upévare heʼi: “Ñandejára Raʼy [...] cherayhu ha oñemeʼẽ cherehehápe” (Gálatas 2:20). Jesús omanórõ guare, Pablo ndahaʼéi gueteri kristiáno, upéicharõ jepe haʼe ohecha upéva peteĩ rregáloicha Jehová omeʼẽva chupe.

Jesús sakrifísio ningo peteĩ rregálo avei ndéve g̃uarã, Ñandejára omeʼẽva ohechauka hag̃ua nderayhu ha nemombaʼetereiha. Ko rregálo ikatu ‘nekonsola opa ára g̃uarã ha omeʼẽ ndéve esperánsa’, ikatu hag̃uáicha siémpre ere ha ejapo iporãva (2 Tesalonicenses 2:16, 17).

Péro ojapóma ningo 2.000 áñorupi Jesús omano hague, ¿mbaʼérepa upéicharõ jaʼekuaa Ñandejára koʼág̃a peve oñeinteresaha ñanderehe?

MBAʼÉREPA OĨ ODUDÁVA: Heta hénte ningo ojerovia Ñandejárare, péro opensa haʼe oĩha mombyryeterei chuguikuéra. Péicha opensa vaʼekue avei Cristina, peteĩ kuñakarai Irlandagua ohóva káda semána iglésiape, haʼe omombeʼu: “Che aikuaa Ñandejára ojapo hague opa mbaʼe, péro haʼete ku ndaikuaáiva chupe. Núnka ndahecháiva chupe che amígoramo”.

MBAʼÉPA HEʼI LA BIBLIA: Ikatu oime sapyʼánte ñañandu ñaimeha mombyry Ñandejáragui, péro ñanemanduʼa vaʼerã haʼe arakaʼeve nañanderejareiriha. Jesús ohechauka hag̃ua Ñandejára siémpre oñangarekoha ñanderehe, oipuru vaʼekue ko ehémplo: “Peteĩ kuimbaʼe oguerekórõ cien ovecha, ha upéi okañy chugui peteĩ, ¿ndohejamoʼãipa umi noventa y nueve pe sérro ári ha oñepyrũ oheka upe okañy vaʼekue?”. ¿Mbaʼépa heʼise vaʼekue Jesús upérõ? Haʼe okontinua heʼi: “Upéicha avei, che Ru oĩva yvágape ndoipotái oñehundi ni peteĩ koʼã michĩvéva jepe” (Mateo 18:12-14).

Ñandejára ñanemombaʼe káda únope, umi “michĩvévape jepe”. Péro, ¿mbaʼéichapa haʼe “oheka upe okañy vaʼekuépe”? Pe téxto oĩva ko artíkulo oñepyrũvo heʼi porã haʼe voi ogueruha chupe.

Ñandejaraite voi oñenkarga ogueru hag̃ua umi persóna ipyʼaporãvape. Por ehémplo, síglo primérope Ñandejára omondo vaʼekue Felípepe oñemboja hag̃ua peteĩ kárrore ohohápe peteĩ kuimbaʼe omanda guasúva Etiopíape, ikatu hag̃uáicha oexplika chupe pe profesía haʼe oleéva hína ohóvo (Hechos 8:26-39). Apóstol Pédrope katu Ñandejára heʼi oho hag̃ua peteĩ ofisiál rrománo rendápe hérava Cornelio, ko kuimbaʼe ningo ojepokuaa vaʼekue oñemboʼe ha oñehaʼã oservi Ñandejárape (Hechos 10:1-48). Ñandejára ogia avei apóstol Páblope ha umi omoirũvape chupe oho hag̃ua peteĩ rríope, oĩva Filipos ypýpe. Upépe oikuaa hikuái peteĩ kuña héravape Lidia, haʼe “omombaʼeguasu Ñandejárape”, upévare “Jehová opoko ikorasõre oguerovia hag̃ua [Pablo] heʼíva” (Hechos 16:9-15).

Koʼã rrelátope jahecha porã Jehová voi oipotaha umi persóna ipyʼaporãva oñemoag̃ui hese. ¿Ha mávapa hína umi ohóva káda ógape térã oñembojáva umi hénte rendápe pe kállepe oñeʼẽ hag̃ua chupekuéra Ñandejárare? Umi testígo de Jehová. Eñeporandumína: “¿Noiméipa Ñandejára ojevale hína hesekuéra añemoag̃ui hag̃ua hese?”. Ejeruréna Ñandejárape tanepytyvõ reasepta hag̃ua iñinvitasión.a