Mbaʼépa ou ndéve ne akãme rehendu jave ojeʼe: “Hiʼag̃uimbaitéma la fin del múndo”. ¿Reñeimahinápa Ñandejára okastigataha umi héntepe ha ohundietetaha ko yvy? ¿Térãpa repensa umi hénte voi opuʼãmbataha ojuehe ha ohunditaha ojuhúva guive haperãme? Heta oĩ ojepyʼapýva opensávo pe fin del múndore, péro ótrope katu nointeresái térã ndogueroviái oikotaha koʼã mbaʼe.

La Biblia oñeʼẽ avei peteĩ fínre heʼívo: “Og̃uahẽta pe ára pahaite” (Mateo 24:14). Oñehenói avei upévape ‘Ñandejára Ipuʼakapáva ára guasu’ ha “Armagedón” (Apocalipsis 16:14, 16). Umi rrelihión ningo omboʼe diferénte mbaʼe ko témare ha péicha okonfundipa la héntepe, algúno katu oporomongyhyje voi. Péro la Biblia omyesakã porã mbaʼépa pe fin ha mbaʼépa ndahaʼéi; ñanepytyvõ avei jahechakuaa hag̃ua hiʼag̃uimaha, ha iporãveha katu, ñanemboʼe mbaʼépa jajapo vaʼerã jajesalva hag̃ua. Jahechamína mbaʼépa heʼi jepi la hénte ko témare ha avei mbaʼépa heʼi la Biblia.

PE FIN NDEʼISÉI HÍNA...

1. OKAIPATAHA KO YVY.

   La Biblia omombeʼu Ñandejára ndojapói hague ko yvy ohundi hag̃uáicha upe rire. Peteĩ salmísta heʼi vaʼekue voi Ñandejárape: “Nde remopyenda vaʼekue ko yvy ani hag̃ua okuʼe [térã oñehundi] arakaʼeve” (Salmo 104:5). Oĩ avei hetave versíkulo ohechaukáva Ñandejára núnka nohundimoʼãiha ko yvy ha ndohejamoʼãiha avave ojapo upéva (Eclesiastés 1:4; Isaías 45:18).

2. PETEĨ DESTRUKSIÓN OG̃UAHẼTANTEVA OIMERAẼ DÍA.

   La Biblia ohechauka Ñandejára omoĩmaha peteĩ fécha pe fínpe g̃uarã. Heʼi péicha: “Upe día ha upe óra katu avave ndoikuaái, ni umi ánhel yvagapegua, ni pe Taʼýra. Pe Túva añoite oikuaa. Pejesareko meméke ha peñatende porãke, cháke ndapeikuaái pe ára Ñandejára oiporavo vaʼekue” (Marcos 13:32, 33). Jahechaháicha, Ñandejára oiporavóma peteĩ día ha óra omoñepyrũ hag̃ua pe fin.

3. YVYPORAKUÉRA OHUNDITAHA KO YVY NI HOʼATAHA PETEĨ METEORÍTO ÑANDEJUKAPÁTAVA.

   ¿Mbaʼéichapa oñepyrũta pe fin? La Biblia heʼi: “Ahecha pe yvága ojavriha ha ¡péina!, peteĩ kavaju morotĩ. Ha pe oguapýva hiʼári héra Jeroviaha ha Añeteguáva [...]. Ha ahecha pe mymba ñarõ, ha umi rréi yvy arigua ha ijehersitokuéra oñembyatyha oñorairõ hag̃ua pe kavaju arigua kóntrape, ha ijehérsito kóntrape” (Apocalipsis 19:11-21). Oĩ heta mbaʼe ko versíkulope ijetuʼúva ñantende hag̃ua, péro jaleévo jahechakuaa Ñandejára omboutaha hiʼanhelkuéra ohundi hag̃ua umi iñenemígope.

PE FIN HEʼISE HÍNA...

1. OÑEHUNDITAHA UMI GOVIÉRNO.

   La Biblia heʼi Ñandejára omoĩtaha peteĩ Rréino, térã goviérno, noñehundimoʼãiva arakaʼeve ha ndaiporimoʼãiha avave ipuʼaka vaʼerã hese. Heʼi avei ohundietetaha umi goviérno oĩva ko yvy ape ári ha irréino opytataha pára siémpre (Daniel 2:44). Jahecha haguéicha pe púnto 3-pe, “umi rréi yvy arigua ha ijehersitokuéra”, oñembyatýta hína “oñorairõ hag̃ua pe kavaju arigua kóntrape, ha ijehérsito kóntrape” (Apocalipsis 19:19). Péro Ñandejára Rréino ohundipáta chupekuéra.

2. NDAIPORIMOʼÃVEIMAHA GÉRRA, VIOLÉNSIA HA INHUSTÍSIA.

   La Biblia heʼi Ñandejára ojokotaha “opaichagua ñorairõ guasu” oikóva ko yvy ape ári (Salmo 46:9, ÑÑB). Heʼi avei: “Hekojojávamante oikóne ko yvy ape ári, ijoheipyrévamante hendáne ipype. Iñañáva katu oñehundipáne, ojehapoʼóne ko yvýgui” (Proverbios 2:21, 22). Ha heʼi avei Ñandejára ‘ombopyahutaha opa mbaʼe’ (Apocalipsis 21:4, 5).

3. OPATAHA UMI RRELIHIÓN OFALLÁVA ÑANDEJÁRAPE HA OMBOTAVÝVA UMI HÉNTEPE.

   Jeremías 5:31 heʼi umi rrelihión japúre: “Iprofetakuéra ijapupa ha ipaʼikuéra omboguata hapichakuérape oipotaháichante. ¿Ha mbaʼéiko pejapóta og̃uahẽ vove pe [fin]?” (ÑÑB). Jesús heʼi vaʼekue mbaʼépa oikóta umichaguáre: “Upe díape oĩta heta heʼíva chéve: ‘Che Ruvicha, che Ruvicha, ore ningo roñeʼẽ nde rérape ha nde rérape romosẽ umi demóniope ha nde rérape rojapo heta milágro’. Upéicharamo jepe, upévo haʼéta chupekuéra: ¡Che ndapoikuaái! ¡Tapeho koʼágui peẽ mbaʼe vai apoha!” (Mateo 7:21-23).

4. OÑEHUNDITAHA UMI HÉNTE IÑAÑÁVA HA NDOIPOTÁIVA OKAMBIA KO MÚNDOPE OJEIKO LÁJA.

   Jesús heʼi vaʼekue: “Pe mbaʼerendy ou ko múndope, péro umi kuimbaʼe hembiapo vai rupi ohayhu pytũmby ohayhu rangue pe mbaʼerendy. Upévare ojehusga chupekuéra” (Juan 3:19). La Biblia omombeʼu yma Noé tiémpope oñehundíma hague umi hénte añáme, 2 Pedro 3:5-7 heʼi voi: “[Oñehundi] vaʼekue umi hénte upe tiempopeguápe. Péva oiko pe y ojagarrapárõ guare ko yvy tuichakue. Péro Ñandejára ñeʼẽ rupive umi yvága ha pe yvy oĩva koʼág̃a, oñeñongatu hína oñehundi hag̃ua tatápe. Upéva oikóta og̃uahẽvo pe ára ojehusga ha oñehundi hag̃ua umi hénte añáme”.

Jahechaháicha, pe “ára ojehusga ha oñehundi hag̃ua” oñekompara pe oiko vaʼekuére Noé tiémpope. Péro pe versíkulope heʼívo “pe yvy oĩva koʼág̃a” oñehunditaha, noñeʼẽi hína ñane planétare. ¿Mbaʼérepa jaʼe upéva? Noé tiémpope ko yvy noñehundíri, síno oñehundi umi hénte aña oñemoĩ vaʼekue Ñandejára kóntrape. Upéicha avei, og̃uahẽvo pe día Ñandejára oporohusgataha, umi oñemoĩva ikóntrape oñehundipaitéta. Péro umi ojapóva haʼe oipotáva ojesalváta, Noé ha ifamília ojesalva haguéicha (Mateo 24:37-42).

¡Epensamíntena mbaʼeichaitépa iporãta ko yvy Ñandejára ohundiete vove umi mbaʼe vai apohápe! Ñanembopyʼaguapy jaikuaávo la Biblia oñeʼẽvo pe fínre ndahaʼeiha omombeʼúva peteĩ notísia vai ñanemongyhyjéva, síno omombeʼu hína peteĩ notísia iporãitereíva. Péro ikatu oime nde reñeporandu: “¿Omombeʼúpa la Biblia arakaʼetépa og̃uahẽta pe fin? ¿Hiʼag̃uímapa? ¿Mbaʼépa ikatu ajapo ajesalva hag̃ua?”.

Heta oĩ okyhyjéva jajúrõ g̃uarã ñañehundipa yvyporakuéra káusare. Péro, ¿opermitítapa Ñandejára oiko upéva? Nahániri. Jahecháma haguéicha, Ñandejára okambiáta ko situasión. Haʼe oipeʼaitéta opaichagua inhustísia ha sufrimiénto oikóva yvyporakuéra ogoverna haguére. Ñande Kreadór oipota nde reikuaa mbaʼépa oikóta hiʼag̃ui vove pe tiémpo haʼe oguerutahápe pe kámbio. ¿Mbaʼéichapa haʼe oikuaauka upéva?

Epensamína ko ehémplore, ñamoĩ chupe nde rehoseha peteĩ lugárpe ha reporandu álgienpe moõrupipa reho vaʼerã reg̃uahẽ hag̃ua. Pe persóna oexplika ndéve, ha heʼi voi mbaʼe mbaʼépa rehecháta pe tapére, por ehémplo, heʼi ndéve reg̃uahẽ mboyve oĩha peteĩ supermerkádo, amo gotyove oĩha peteĩ ospitál, ha umícha. Koʼã mbaʼe nepytyvõta repilla hag̃ua hiʼag̃uímapa pe lugár rehoseha. Péicha avei, Ñandejára omeʼẽ ñandéve la Biblia, ohechaukáva mbaʼe mbaʼépa oiko vaʼerã ko múndo tuichakuére og̃uahẽ mboyve pe fin. Ha ñande jahechávo oñekumpliha umi mbaʼe, japilla hiʼag̃uimaha pe kámbio Ñandejára oprometéva.

La Biblia heʼi porã og̃uahẽ mboyve pe fin oikotaha hetaiterei mbaʼe oikoʼỹ haguéicha arakaʼeve. Koʼã mbaʼe oñekumplipáta peteĩ tiémpope ha oikóta oparupiete ko yvy ape ári. Jahechamína cuatro ehémplo.

1. OIKO SARAMBI OPÁRUPI Peteĩ profesía oĩva Matéope omombeʼu unos kuánto mbaʼe oikótava oparupiete og̃uahẽmbotávo pe fin. Oñekumplívo umi mbaʼe, japilla “ko múndo ára pahaite oñemoag̃uimaha”. ¿Mbaʼe mbaʼépa hína umíva? Por ehémplo, heʼi oikotaha hetave gérra, ñembyahýi ha yvyryrýi ápe ha pépe. Omombeʼu avei umi hénte iñañaiterei ha ndojoayhumoʼãveimaha, ha umi omoakãva rrelihionkuéra ombotavytaha heta héntepe (Mateo 24:3, 6-26). Añetehápe ningo koʼã mbaʼe ymaite guive oiko mimíva voínte. Péro og̃uahẽmbotaitévo pe fin, pyʼỹive oiko umi mbaʼe ha oñekumpli oparupiete. Jahechavemína mbohapy mbaʼe oiko vaʼerã hiʼag̃uívo pe fin.

2. UMI HÉNTE OHO VAIPA HESE La Biblia heʼíma vaʼekue “umi ára pahápe”, térã og̃uahẽmbotávo pe fin, ivaivetaha ohóvo la hénte oñekomporta lája. Heʼi péicha: “Umi hénte ijehénte ojepyʼapýta, iplatarayhúta, oñembotuicháta, ijejapóta, otakýta hapicháre, naiñeʼẽrendumoʼãi ituvakuérape, imalagradesídota, oporombotavýta, ndohayhumoʼãi ihéntepe, oñemohatãta heʼívape, okopíta ótrore, ndojejokokuaamoʼãi, oñemboharáita hapicháre, ndohayhumoʼãi mbaʼeve iporãva, itraisionérota, hovaʼatãta, oñemombaʼeguasúta, oikóta vyʼarã rapykuéri ohayhu rangue Ñandejárape” (2 Timoteo 3:1-4). Siérto, ymaite guive voínteko oĩ hénte ojapóva koʼã mbaʼe vai, péro koʼág̃arupi hetaitereive oĩ orekóva upe aktitu, upévare pe ‘situasión ijetuʼu ha hasy jagueropuʼaka hag̃ua’. Koʼã mbaʼe ohechauka porã jaikomaha “umi ára pahápe”. ¿Ndépa rehechakuaa avei mbaʼeichaitépa umi hénte amasdía oho vaive hese?

3. KO YVY OÑEHUNDI OHÓVO Koʼág̃arupi amasdía oĩve umi mbaʼe vai apoha, upévare ikatu jaʼe oñehundiha ohóvo ko yvy. Ñane tiémpo ningo ojogua lénto Noé tiémpope, upérõ “Ñandejára ohecha ivaipaitemaha ko múndo, ko yvýpe oĩma rupi hetaiterei hénte aña”. Upémarõ heʼi ohunditaha chupekuéra (Génesis 6:11-13, NM). Péro ndahaʼéi upéicha añónte la oñehundíva ko yvy. Koʼág̃arupi yvyporakuéra oreko voi pe kapasida ñanerundipávo ñandéve ha avei ko planéta. Ojapo hikuái umi armaménto ipoderosoitereíva ha avei ombyaipa pe médio ambiénte. Mbeguekatúpe oñekontaminamba ohóvo umi mbaʼe ñaikotevẽva jaikove hag̃ua, por ehémplo pe yvytu, umi plánta, umi oséano ha hetave mbaʼe. ¿Opermitítapa Ñandejára osegi upéicha? Nahániri, la Biblia heʼi Ñandejára ohunditaha “umi ohundívape ko yvy” (Apocalipsis 11:18).

Epensamíntena, 100 áño atrás, ¿ikatúpa raʼe yvyporakuéra ohundiete opavave oikóvape ko yvy ape ári? Nahániri, ¿ajépa? Péro jahecháma haguéicha, koʼág̃a si oreko pe kapasida umi armaménto káusare ha ombyaipa rupi ohóvo pe médio ambiénte. Koʼág̃arupi pyaʼeterei oavansa pe teknolohía, ha umi ojapóva koʼã mbaʼe nontendeporãi mbaʼéichapa umíva oafektáta hína pe ambiénte térã mbaʼe provlémapa ikatu ogueru. Péro haʼetépe ndahaʼéi yvyporakuéra la odesidítava mbaʼépa oikóta ko yvýgui. Umi hénte iñañáva ohundipa mboyve ko yvy, Ñandejára ohundíta chupekuéra. Ha ikatu jaguerovia oikotaha katuete upéva pórke haʼe voi opromete.

4. OJEPREDIKA OPARUPIETE Pe profesía oñeʼẽva pe fínre heʼi avei ojejapotaha peteĩ tembiapo tuichaitereíva ko tiémpope. ¿Mbaʼépa hína upéva? La Biblia heʼi: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mateo 24:14). Hetaiterei tiémporema oĩ rrelihión ojapóva opa mbaʼe rei ihénte hetave hag̃ua, péro ko traváho idiferenteterei umívagui. Pe fin og̃uahẽ mboyve oñemombeʼúta opárupi pe “marandu porã oñeʼẽva Ñandejára Rréinore”. ¿Reikuaápa nde peteĩ rrelihión opredikáva péva pe mensáhe? Ha oimérõ reikuaa, ¿opredikápa hikuái peteĩ lugárpente térãpa opredika hína “oparupiete ko yvy ape ári”?

Pe páhina oĩva Internétpe, www.jw.org, oikuaauka opárupi pe “marandu porã oñeʼẽva Ñandejára Rréinore”. Upépe retopáta mas de 700 idiómape umi lívro, rrevísta ha folléto oñeʼẽva upe mensáhere. ¿Reikuaápa nde ótra organisasión ojapóva peichagua projékto oikuaauka hag̃ua Ñandejára Rréino? Heta tiémpo oexisti mboyve jepe Internet, umi testígo de Jehová oñehaʼãma vaʼekue omog̃uahẽ opárupi umi notísia porã oñeʼẽva Ñandejára Rréino térã goviérnore. Áño 1939 guive, rrevísta Ñemañaha ingléspe orekóma vaʼekue itítulo guýpe ko fráse: “Oikuaauka Jehová Sãmbyhy”, térã “Oanunsia Jehová Goviérno”. Peteĩ lívro oñeʼẽva rrelihiónre heʼi umi testígo de Jehová opredikaha oparupiete ko yvy ape ári, ha ndaiporiguasuiha ótra organisasión ojapóva upeichagua tembiapo. Pe predikasión rupive oñemombeʼu Ñandejára Rréino rupive koʼẽrõitéma og̃uahẽtaha “pe ára pahaite” térã pe fin. ¡Ajépa iporãite upe notísia!

PETEĨ TIÉMPO IÑIMPORTANTETEREÍVA

¿Ndépa reñemeʼẽ enkuénta umi cuatro profesía jahecha vaʼekue oñekumpliha ñane tiémpope? Mas de 100 áñorema, ko rrevísta oipytyvõ umi héntepe ohechakuaa hag̃ua ijeheguiete hiʼag̃uimaha pe fin. Siérto, oĩ heʼíva ijetuʼuha jaikuaa hag̃ua ivaivépa añetehápe koʼág̃a la situasión. Ha heʼi koʼág̃a jaikuaaveha umi mbaʼe oikóva ko múndo tuichakuére, oĩ rupi téle, rrádio ha umícha, ha upévarente vaicha ivaive. Upéicharõ jepe, oĩ heta pruéva ohechaukáva ñane tiémpo idiferenteha oimeraẽ ótrogui, ha hiʼag̃uimaha pe fin.

Umi expérto opensa koʼẽrõitéma oikotaha peteĩ kámbio ko yvy ape ári. Por ehémplo, áño 2014-pe, peteĩ grúpo de sientífiko iñimportánteva oavisa pe Consejo de Seguridad de las Naciones Unídaspe oĩha heta mbaʼe ikatúva ñanerundipa. Haʼekuéra heʼi orrevisa porãha umi mbaʼe ikatúva ñanerundipa ha ohechakuaa umi mbaʼe ojapóva yvyporakuéra pe teknolohía rupive tuicha ñandeapeligraha. Heta hénte ohechávo umi pruéva oĩva, oñekonvense ñaimeha peteĩ tiémpo iñimportantetereívape. Umi ojapóva ko rrevísta ha heta umi oleéva jepi, oĩ konvensído ñaimemaha umi ára pahápe ha pe fin hiʼag̃uimaha. Péro, ¿rekyhyje vaʼerãpa umi mbaʼe oikótavagui? Nahániri, revyʼa vaʼerã katu umi kámbio oútavare, pórke nde ikatu hína rejesalva og̃uahẽ vove pe fin.

La Biblia heʼi heta hénte oñehunditaha og̃uahẽ vove pe fin: “Upérõ oúta jehasa asy guasu, arakaʼeve oikoʼỹ haguéicha ko múndo ñepyrũmby guive koʼág̃a peve. Añetehápe, umi ára noñemombykýiramo, ni peteĩ yvypóra ndojesalvamoʼãi” (Mateo 24:21, 22). Péro Ñandejára opromete avei ñandéve oĩtaha heta ojesalváva: “Ko múndo [...] ohasa ohóvo; péro pe ojapóva Ñandejára rembipota opyta opa ára g̃uarã” (1 Juan 2:17).

¿Mbaʼépa rejapo vaʼerã ikatu hag̃uáicha rejesalva? ¿Tekotevẽpa rembyatýma hína reikóvo umi hiʼupy ha umi mbaʼe repensáva reikotevẽtaha? Nahániri. La Biblia omeʼẽ ñandéve ko konsého: “Opa mbaʼe péicha hykupáta rupi, peñatendéke mbaʼeichagua persónapa peẽ: penderekomarangatu ha pemombaʼeguasu vaʼerã Ñandejárape pende pyʼaite guive. Akóinteke penemanduʼa ha pehaʼarõ Jehová ára” (2 Pedro 3:10-12). ¿Mbaʼépa oike hína “opa mbaʼe” oñehundítava apytépe? Upépe oike hína umi goviérno oĩva ko yvy ape ári ha entéro umi ojeroviáva hesekuéra, ojerovia rangue Ñandejára goviérnore. Upéicharõ, ndajajesalvamoʼãi jaiko haguérente ñambyaty umi hiʼupy térã umi mbaʼe ñapensáva ñaikotevẽtaha upe tiémpope g̃uarã.

¿Mbaʼépa upéicharõ jajapo vaʼerã jajesalva hag̃ua? Tekotevẽ jajapo Ñandejára Jehová heʼíva ha ñaaprende mbaʼeichagua persónapepa haʼe oguerohory (Sofonías 2:3). Hetaiterei hénte ko tiémpope nopenái umi pruéva ohechaukávare hiʼag̃uimaha pe fin, péro ñande jajesegi rangue haʼekuéra heʼívare, ‘akóinte ñanemanduʼa ha ñahaʼarõ vaʼerã Jehová ára’. Umi testígo de Jehová ikatu ohechauka ndéve la Bíbliape mbaʼépa rejapo vaʼerã rejesalva hag̃ua.