¿Mbaʼépa añetehápe oiko umi omano vaʼekuégui? ¿Osufrípa hikuái algún lugárpe? ¿Jahecha jeýnepa chupekuéra? ¿Ikatúnepa algúna ves ñantende porã koʼã mbaʼe? Jahechamína mbaʼépa heʼi la Biblia oikoha umi omano vaʼekuégui ha avei oĩpa esperánsa chupekuéra g̃uarã.

¿Mbaʼépa oiko umi héntegui omano vove?

MBAʼÉPA HEʼI LA BIBLIA: “Umi oikovéva oikuaa omanotaha, péro umi omano vaʼekue ndoikuaavéima mbaʼevete ha ndorresivivéima avei mbaʼevete, opytáma rupi tesaráipe. Opa mbaʼe ikatúva rejapo, rejapo vaʼerã nde pyʼaite guive, pórke reho vove pe sepultúrape ndaikatumoʼãvéima rejapo mbaʼeve, ndaikatumoʼãi repensa ni rekalkula rejapóvo mbaʼeve, upépe opáma arandu”a (Eclesiastés 9:5, 10, NM).

Pe sepultúra orrepresenta pe lugár ohohápe entéro umi omanóva, upépe haʼekuéra noñanduvéima mbaʼeve ha ndaikatuvéima avei ojapo mbaʼeve. Ñapensamína Job ehémplore, haʼe ningo peteĩ kuimbaʼe ojerovia mbarete vaʼekue Ñandejárare. Peteĩ díape ojere vaipaite chupe, operdepa la orekomíva ha omanomba ifamiliakuéra, hiʼarive osẽmba hese kuru ipeupáva. Upémarõ haʼe ojerure Ñandejárape: “Aipotaite chemokañy pe sepultúrape, chereja upépe” (Job 1:13-19; 2:7; 14:13, NM). Péicha ñantende porã Jóbpe g̃uarã pe sepultúra ndahaʼéi hague peteĩ lugár ohotahápe osufrive, síno peteĩ lugár ikatutahápe opytuʼu.

La Biblia oñeʼẽ avei ocho persóna omano vaʼekuére péro upéi oikove jeýva. Koʼã ehémplo tuicha avei ñanepytyvõta ñantende porãve hag̃ua mbaʼépa oiko umi omano vaʼekuégui. (Ehecha pe rrekuádro heʼíva: “Umi ocho rresurreksión oñemombeʼúva la Bíbliape”.)

Ni peteĩva koʼã ocho apytégui ndeʼíri oho hague yvágape térã ohoha osufri infiérnope. Ñapensamína, ohórire hikuái koʼãichagua lugárpe, katuete omombeʼu vaʼerãmoʼã hapichakuérape, ¿ajépa? Péro la Biblia ndeʼíri mbaʼeve upévagui, síno heʼi umi omano vaʼekue noñanduveimaha mbaʼevete, haʼete ku oketéva. La Biblia heta vése voi okompara umi omanóva umi persóna okévare. Por ehémplo, Lázaro omanórõ guare Jesús heʼi hese ‘okeha hína’ (Juan 11:11-14).

Péro, ¿ikatúnepa “opáy” jey umi omano vaʼekue? ¿Oĩpa esperánsa chupekuéra g̃uarã?

¿Ikatúpa oikove jey umi omano vaʼekue?

MBAʼÉPA HEʼI LA BIBLIA: ‘Og̃uahẽta pe óra opavave umi oĩva pe sepultúrape ohendutaha Jesús ñeʼẽ ha osẽta’ (Juan 5:28, 29).

Jesús heʼi vaʼekue haʼe ogoverna vove ko yvy, umi oĩva pe sepultúrape oikove jeytaha. Fernando, oñemensionáva pe ótro artíkulope, heʼi: “Chesorprendeterei aleérõ guare primera ves Juan 5:28, 29. Koʼã versíkulo ohechauka oĩha peteĩ esperánsa iporãitereíva, ha upéva tuicha chembopyʼaguapy”.

Job ojeroviaiterei vaʼekue Ñandejára ikatutaha omoingove jey chupe. Haʼe heʼi: “Peteĩ persóna omanóramo, ¿ikatu piko oikove jey? [...] Che ahaʼarõta pe sepultúrape pe tiémpo ojeʼéva chéve, ahaʼarõta og̃uahẽ meve pe tiémpo apuʼã jey hag̃ua. Nde cherenóita ha che apuʼã jeýta” (Job 14:14, 15, NM).

Lázaro omanórõ guare, Jesús heʼi iñermána Mártape: “Ne ermáno opuʼã jeýta”. Marta katu heʼi chupe: “Che aikuaa oñemoingove jeytaha chupe pe ára pahápe”. Upéva ohechauka porã Marta oikuaáma hague oĩha peteĩ esperánsa umi omano vaʼekuépe g̃uarã. Upévare Jesús heʼi chupe: “Che hína pe ñemoingove jey ha che rupive oikove jey umi hénte. Pe ojeroviáva cherehe omanóramo jepe oikove jeýta” (Juan 11:23-25). Upe riremínte Jesús omoingove jey Lázarope. Upéva ohechauka porã ñandéve mbaʼépa Jesús ojapóta koʼẽrõite. ¡Ajépa javyʼaitéta jahecha vove oñemoingove jeyha hetaiterei héntepe ko yvy tuichakuére!

¿Oĩtapa orresusitáva oho hag̃ua oiko yvágape?

MBAʼÉPA HEʼI LA BIBLIA: Ñandejára Ñeʼẽ ohechauka Jesús rresurreksión idiferenteterei hague umi ótro rresurreksióngui. ¿Mbaʼérepa? Umi ocho persóna oñemensiona vaʼekue ningo oikove jey vaʼekue ko yvy ape ári, péro la Biblia heʼi Jesús rehe: “Haʼe oho yvágape ha koʼág̃a oĩ Ñandejára deréchape” (1 Pedro 3:21, 22). Péro ndahaʼéi Jesús añónte la orresusitáta vaʼekue oiko hag̃ua yvágape. Por ehémplo, haʼe opromete vaʼekue idisipulokuérape: “Ág̃a aha vove aprepara peẽme pene rendag̃ua, aju jeýta ha porresivíta che rógape, ikatu hag̃uáicha peẽ peime che aĩháme avei” (Juan 14:3).

Jesús oho vaʼekue yvágape ha oprepara avei idisipulokuérape hendag̃ua upépe. La Biblia heʼi voi 144.000 persóna ohotaha yvágape (Apocalipsis 14:1, 3). Péro, ¿mbaʼépa ojapóta hikuái upépe?

Añetehápe heta hembiapóta hikuái. La Biblia heʼi: “Ovyʼa ha imarangatu umi tenondete oikove jeýva. Koʼãvare ndaipuʼakái pe ñemano mokõiha, síno oikóta chuguikuéra Ñandejára ha Cristo saserdóte, ha ogovernáta hendive mil áñore” (Apocalipsis 20:6). Upéicharõ, oikóta chuguikuéra rréi ha saserdóte, ha ogovernáta Jesúsndi ko yvy.

¿Oĩta piko orresusitáva ko yvy ape ári?

MBAʼÉPA HEʼI LA BIBLIA: Apóstol Pablo heʼi vaʼekue: “Areko esperánsa Ñandejárare, koʼã kuimbaʼe orekoháicha avei, oñemoingove jeytaha umi hekojojáva ha hekojojaʼỹva” (Hechos 24:15).

Mávapa hína umi “hekojojáva”? Umíva haʼe hína umi persóna hembiapo porãva. Jahechamína peteĩ ehémplo oĩva la Bíbliape. Proféta Daniel ningo hekojoja vaʼekue, ha omano mboyvemi Ñandejára heʼi chupe: “Tereho epytuʼu og̃uahẽ meve pe ára paha, upe ára upévape nde repuʼã jeýta” (Daniel 12:13, ÑÑB). ¿Moõpa orresusitáta Daniel? La Biblia omombeʼu: “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29, NM). Jesús heʼi vaʼekue avei: “Ovyʼa umi ndaipochyreíriva, Ñandejára omeʼẽta chupekuéra ko yvy” (Mateo 5:5). Proféta Daniel ha hetaiterei ótro ojapo vaʼekue Ñandejára volunta oikove jeýta ko yvy ape ári, ha upépe nomanomoʼãvéima.

¿Ha mávapa umi “hekojojaʼỹva” oikove jeýtava? Umíva hína umi persóna omano vaʼekue orekoʼỹre oportunida oikuaávo Ñandejárape. Orresusita vove hikuái, oaprendéta mávapa Jehováa ha Jesús, ha ikatúta oñemoag̃ui hesekuéra (Juan 17:3). Haʼekuéra odesidíramo oservi Ñandejárape oikovéta pára siémpre ko yvy ape ári.

¿Mbaʼéichapa ojeikóta ko yvy ape ári?

MBAʼÉPA HEʼI LA BIBLIA: “[Ñandejára] omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma” (Apocalipsis 21:4). “Haʼekuéra ojogapóta ha oikóta pype, oñotỹta parrál ha hoʼúta hiʼa.” (Isaías 65:21, NM.)

Epensamína mbaʼeichaitépa jaiko porãta ha javyʼáta umi jahayhúva orresusitávandi! Péro, ¿mbaʼéichapa ikatu ñaime segúro oikotaha koʼã mbaʼe?

Oĩ heʼíva ñandevyroitereitaha jagueroviáramo umi omanóva ikatuha oikove jey. Péro apóstol Pablo nopensaiete vaʼekue upéicha, haʼe heʼi: “Jarekóramo esperánsa Crístore jaikove ajánte, upéicharõ ñane situasión ivaive enterove umi ótrogui. Péro añetehápe Crístope oñemopuʼã omanóva apytégui, chupe raẽve oñemoingove jey vaʼekue” (1 Corintios 15:19, 20). Haʼe ni michĩmi ndodudái vaʼekue umi omanóva ikatuha oikove jey. ¿Mbaʼérepa? Pórke oikuaa porã Jesús orresusita hague, ha upéva ogarantisa oikove jeytaha umi omano vaʼekue (Hechos 17:31).a Ha heʼívo Jesús “raẽve” oñemoingove jey hague, ohechauka oĩtaha hetave orresusitátava ha oikótava pára siémpre.

Ikatu avei jaguerovia oñemoingove jeytaha umi omano vaʼekuépe pórke Jehová voi opromete upéva, ha haʼe ni mbaʼevéicharõ ndaijapumoʼãi (Tito 1:2). Epensamíntena, Ñandejára heʼíma oĩtaha rresurreksión ha hiʼarive ohechaukáma vaʼekue orekoha podér okumpli hag̃ua upe promésa, ¿mbaʼére piko upéicharõ nokumplimoʼãi? ¡Katuete ningo okumplíta!

Jehová ningo ñanderayhueterei, upévare odesidi omoingove jeytaha umi omano vaʼekuépe. Job heʼi vaʼekue Ñandejárape: “Peteĩ persóna omanóramo, ¿ikatu piko oikove jey? [...] Nde cherenóita ha che apuʼã jeýta. Nde katuete rehechagaʼu ha rehechaseterei jeýta upe ne rembiapokuemi” (Job 14:14, 15, NM). Job ningo oĩ vaʼekue segúro Ñandejára ndahesaraimoʼãiha chugui, ha itiempoitépe omoingove jeytaha chupe. ¿Okambiápa Ñandejára opensa lája? Nahániri, haʼe voi heʼi: “Che hína Jehová ha arakaʼeve nakambiái” (Malaquías 3:6, NM). Epensamína, peteĩ túva imbaʼeporãvagui omanóramo itaʼýra katuete ohechaseterei jeýta chupe. Ha Ñandejára upeichaite avei, haʼe ohechaseterei jeýma isiervokuéra omano vaʼekuépe, ha oreko podér omoingove jey hag̃ua chupekuéra (Salmo 135:6).

Jehová omeʼẽta podér Itaʼýra Jesúspe omoingove jey hag̃ua umi omano vaʼekuépe, ha Jesús ojaposetereíma hína upéva. Haʼe ombyasy ohechávo oĩha hetaiterei ohasa asýva ohechagaʼu rupi ihénte omano vaʼekuépe. ¿Mbaʼéichapa jaikuaa upéva? Omoingove jeýtarõ guare iñamígo Lázarope, haʼe “hasẽ” vaʼekue voi ohechávo mbaʼeichaitépa osufri umi hénte oĩva upépe (Juan 11:35). Ótra vuéltape katu Jesús ohecha peteĩ viúda hasẽha hína imembykariaʼy omano haguére. Haʼe “oiporiahuverekoiterei chupe ha heʼi: ‘Anivéna nerasẽ’”. Ha upepete omoingove jey pe mitãrusúpe (Lucas 7:13). Péicha jahecha Jesús ombyasyetereiha ohechávo osufriha peteĩ persóna ihentemanóva. ¡Epensamíntena upéicharõ mbaʼeichaitépa haʼe ovyʼáta omoingove jey vove umi omano vaʼekuépe!

¿Omanómapa ndehegui peteĩ persóna rehayhúva? Ikatu oime repensa ndaiporiveimaha esperánsa chupe g̃uarã. Péro nemanduʼákena Ñandejára omoingove jeytaha umi omano vaʼekuépe Jesús rupive. Ha iporãveha katu, haʼe oipota nde reime upépe rerresivi hag̃ua umi persóna rehayhúva omano vaʼekuépe. Haʼe ovyʼaitereíta ohechávo mbaʼéichapa nde reañuã chupekuéra ág̃a oikove jey vove. Epensamíntena, ¡hetaiterei mbaʼe ningo ikatúta pejapo oñondive ha núnka ndereperdemoʼãvéima chupekuéra!

Lionel, oñemensionáva pe ótro artíkulope, heʼi: “Oñemombeʼúrõ guare chéve umi omanóva oikove jeytaha, ndagueroviaséi vaʼekue primerorã. Apensa voi ijapunteha pe persóna heʼíva chéve upéva. Péro upéi aheka la Bíbliape ha atopa siertoha la heʼíva. ¡Ahechaseterei jeýma che avuélope ág̃a orresusita vove!”.

¿Reaprendesevépa ko témagui? Umi testígo de Jehová naiprovlemamoʼãi ohechauka hag̃ua ndéve nde Bibliaitépe mbaʼérepa haʼekuéra oĩ segúro umi omano vaʼekue oikove jeytaha.b