Ojapóma 3.000 áñorupi Job oskrivi hague ko téxto, ha koʼag̃aite peve jahechakuaa siertoha upe heʼi vaʼekue. Ymaite guive yvyporakuéra oikose pára siémpre, ndaitujaséi ha nomanoséi. Péro ñambyasýramo jepe ndoikói upéva.

La Biblia heʼi voi Ñandejára ñandeapo hague jaikose hag̃ua pára siémpre, ha omoĩ upe deséo ñane korasõme. Ha jepeve koʼág̃a nañantendepái mbaʼépa añetehápe heʼise upéva, jareko pe deséo ñantendévo (Eclesiastés 3:11). Epensamína, ¿omoĩnepa Ñandejára upe deséo ñane korasõme oikuaa porãramo ndaikatumoʼãiha jahupyty? Ajépa naisentidomoʼãi upéva. Ñandejára ningo heʼi voi pe muérte haʼeha ñane enemígo ha opromete avei ohunditaha chupe (1 Corintios 15:26).

Jaikuaa porã pe muérte haʼeha ñane enemígo. Ndaipóri ni peteĩ ihuísio porãva omanoséva. Jahechávo oĩha peteĩ pelígro pyaʼe voi jajehekýi chugui, térã ñanderasýrõ pyaʼe voi jaha doktórpe. Jajapo opa ikatúva ani hag̃ua ñamano.

¿Péro ikatúne piko oñehundi ko enemígope? Kláro ke ikatu. Ñande Kreadór Jehová ningo nañandeapói jaiko hag̃ua unos kuánto áñonte ha upéi ñamano. Haʼe ymaite guive voi oipota jaiko pára siémpre ko yvy ape ári, ha koʼág̃a peve upéva la ipropósito. Ha Ñandejára heʼírõ ojapotaha álgo, katuete okumpli (Isaías 55:11).

¿Mbaʼéichapa oñehundíta ko enemígope? Ymaite guivéma yvyporakuéra ojapose upéva, péro ndaikatúi. Por ehémplo, umi sientífiko ojapóma heta pohã ha vakúna omongueráva umi mbaʼasy. Avei hetáma ostudia hikuái ontende hag̃ua mbaʼérepa ñamano, péro ndojuhúi la rrespuésta. Koʼág̃arupi ningo heta lugárpe añete oĩ hénte oiko aréva, péro lomímonte upéi omano. Heʼiháicha la Biblia, enterovégui oiko jey yvy (Eclesiastés 3:20).

Péro javyʼaiterei ningo jaikuaávo nodependeiha yvypórare oñesolusiona hag̃ua ko provléma. Jehová ja ojapóma oñekotevẽva ñandesalva hag̃ua pe muértegui, ha ojevale Itaʼýra Jesucrístore ojapo hag̃ua upéva.

Ñandejára nañandekreái ñamano hag̃uáicha

“Ñandejára Jehová omoĩ pe kuimbaʼe pe hardín de Edénpe ombaʼapo ha oñatende hag̃ua hese. Ha Ñandejára Jehová heʼi avei pe kuimbaʼépe: ‘Entéro yva oĩva ko hardínpe ikatu reʼu reʼuseháicha. Péro pe yva orekóva pe yvyramáta iporãva ha ivaíva rehegua ndereʼúi vaʼerã, pórke reʼuha ára katuete remanóta’.” (Génesis 2:15-17, NM.)

Ñandejára omoĩ vaʼekue Adánpe peteĩ lugár iporãitereívape, oĩháme hetaiterei animál ha plánta iporã porãva. Jehová heʼi Adánpe ikatuha hoʼu oimeraẽ yva oĩva pe hardínpe, péro omanda chupe ani hag̃ua hoʼu peteĩ yva añoite, ha heʼi porã chupe odesovedeséramo omanotaha.

Adán ontende la heʼise vaʼekue chupe Ñandejára, pórke upérõ guare omanóma voi umi animál ha haʼe ohecha kuri upéva. Avei oikuaa Ñandejára ndokreái hague yvypórape omano hag̃ua, osino naisentidomoʼãi kuri chupe g̃uarã pe mandáto oikuaárire omano vaʼerãha voínte. Haʼe ontende ke ojapóramo Ñandejára heʼíva añoite, ikatutaha oikove pára siémpre.

Oĩ ningo opensáva pe yva orrepresenta hague umi rrelasión sexuál, péro jaʼekuaa ndahaʼeiha upéicha, pórke Jehová heʼi kuri Adán ha Évape: “Perekókena heta mitã ha peñemboheta hetave ha pemyenyhẽ ha peipuru ko yvy” (Génesis 1:28, NM). Upéicharõ, pe yva orrepresenta vaʼekue pe derécho oguerekóva Ñandejára odesidívo mbaʼépa iporã ha mbaʼépa ivai yvyporakuérape g̃uarã. Adán ndoʼúirire pe yva ohechaukáta kuri iñeʼẽrenduha, ha ndahaʼéi upévante, síno oagradeseha avei Ikreadórpe umi mbaʼe porãita omeʼẽ vaʼekuére chupe.

Adán omano ndojapói rupi Ñandejára heʼíva

Ñandejára heʼi Adánpe: ‘Reʼu rupi pe yva amanda vaʼekue ndéve “ani hag̃ua reʼu”, koʼág̃a [...] heta rembaʼapóta ha nderyʼáita rehupyty hag̃ua ne rembiʼurã. Ndéngo yvýguinte voi rejejapo vaʼekue ha yvy jey oikóta ndehegui’ (Génesis 3:​17, 19, NM)

Adán hoʼu pe yva oñemanda vaʼekue chupe ani hag̃ua hoʼu, péicha ohechauka opuʼãha Ñandejárare ha ndoagradeseiha chupe opa mbaʼe ojapo vaʼekue hesehápe. Haʼe orrechasa Ñandejárape ha odesidi ijeheguínte mbaʼépa ojapóta. Péro Ñandejára ndohejareíri chupe hembiapo vaikue, ha upéva ogueru Adánpe heta konsekuénsia vai.

Kon el tiémpo Adán omano, Jehová heʼi hagueichaite chupe. Ñandejára ojapo vaʼekue Adánpe yvýgui ha heʼi chupe oiko jeytaha chugui yvy. Adán omano rire ndohói oiko ótro lugárpe ni oñekonverti ótra kósape, síno oiko jey chugui yvy reínte (Génesis 2:7; Eclesiastés 9:5, 10).

Ñande ningo Adán familiare ha upévare ñamano

“Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi.” (Romanos 5:12.)

Adán naiñeʼẽrendúi, ha upéva ogueru chupe heta konsekuénsia vai. Primeroite voi, Adán operde pe oportunida oikovévo pára siémpre, ndahaʼéi operdénteva pe oportunida oikóvo 70 térã 80 áño. Avei operde pe perfeksión, ha upévare entéro ifamília ñanase imperfékto.

Ñande ningo Adán familiare upévare ñaneimperfékto, japeka ha ñamano. Pablo orrekonose vaʼekue upeichaha ñane situasión, upévare heʼi: “Che yvypórante, añevende vaʼekue pekádo poguýpe. ¡Aichejáranga che! ¿Máva piko chesalváta ko che retégui, chegueraháva hína ñemanóme? ¡Aagradese Ñandejárape, ñande Ruvicha Jesucristo rupive!” (Romanos 7:14, 24, 25).

Jesús omano ñanderehehápe, ikatu hag̃uáicha jaiko pára siémpre

“Pe Túva ombou [...] Itaʼýrape osalva hag̃ua ko múndope.” (1 Juan 4:14.)

Jehová ojapóma oñekotevẽva ñandepeʼa hag̃ua pe pekádo ha ñemano poguýgui. Upearã ombou Itaʼýra ohayhuetévape ko yvy ape ári, ikatu hag̃uáicha onase peteĩ kuimbaʼe perféktoicha. Péro Jesús idiferénte vaʼekue Adángui, pórke haʼe ndopekái (1 Pedro 2:22). Upévare haʼe noĩri kondenádo omano hag̃ua ha ikatu vaʼerãmoʼã kuri oikove pára siémpre ko yvy ape ári.

Jehová oheja kuri iñenemigokuéra ojuka Itaʼýrape, péro tres día haguépe omoingove jey chupe. Jesús orresusita vaʼekue peteĩ espírituicha ha upe riremínte oho jey yvágape. Upépe haʼe opresenta hekove perfékto, orrekupera hag̃ua pe vída perfékta Adán operde vaʼekue. Jehová oasepta pe sakrifísio ha upéicha omeʼẽ oportunida entéro ojeroviávape Jesúsre oiko hag̃ua para siémpre (Romanos 3:23, 24; 1 Juan 2:2).

Jesús orrekupera jey Adán operde vaʼekue. Haʼe omano ikatu hag̃uáicha ñande jaiko pára siémpre. La Biblia heʼi: “Ñandejára imbaʼeporãiterei rupi, [Jesús] omano opavave rehehápe” (Hebreos 2:9).

Ñandejára ningo oikuaa yvyporakuéra iñimperfékto rupi ndaikatumoʼãiha voínte opaga pe vída perfékta ojeperde vaʼekue. Upévare haʼe voi odesidi opagataha pe présio, ohejávo Itaʼýra omano ñanderehehápe. Péicha ohechauka mbaʼeichaitépa ihústo, ñanderayhu ha ñandeporiahuvereko (Romanos 5:6-8).

Jesúspe oñemoingove jey vaʼekue ha hetápe oñemoingove jeýta

“Crístope oñemopuʼã omanóva apytégui, chupe raẽve oñemoingove jey vaʼekue. Pe ñemano ningo ou peteĩ kuimbaʼe rupive, upévare umi omanóvape oñemoingove jey peteĩ kuimbaʼe rupive. Adán káusare enterove omano, upéicha avei Cristo rupive enterovépe oñemoingove jeýta.” (1 Corintios 15:​20-22.)

Jaikuaa porã ningo Jesús oexisti ha omano hague, péro ¿mbaʼéicha ikatu jaikuaa haʼe oikove jey hague? Haʼe ningo ojeaparese vaʼekue hetaiterei hénte renondépe, heta vése ha heta lugárpe. Peteĩ jey ojeaparese vaʼekue 500 persóna renondépe voi. Upéva ohechauka haʼe añetehápe oikove jey hague. Apóstol Pablo oñeʼẽ pe oiko vaʼekuére upérõ, oskrivírõ guare ikárta umi kristiáno Corintoguápe. Haʼe heʼi chupekuéra oĩha gueteri ijapytepekuéra heta ermáno ikatúva omombeʼu pe ohecha ha ohendu vaʼekue (1 Corintios 15:3-8).

Pablo heʼi vaʼekue ‘Cristo raẽve’ oñemoingove jey hague, upéva ohechauka oĩtaha hetave oñemoingove jeýtava. Jesús voi katu heʼi vaʼekue “opavave umi oĩva pe sepultúrape ohendutaha iñeʼẽ ha osẽta” (Juan 5:28, 29).

Jaikosérõ pára siémpre, jajerovia vaʼerã Jesúsre

“Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva.” (Juan 3:16.)

Génesis, pe primer lívro de la Biblia, omombeʼu mbaʼéicha rupípa ñamano ha mbaʼéichapa ojeperde vaʼekue pe hardín de Edén. Ha Apocalipsis, pe último lívro de la Biblia, omombeʼu koʼẽrõite Ñandejára ojapotaha ko yvýgui peteĩ hardín neporãva ha ndaiporimoʼãveimaha omanóva. Upe guive enterovéva javyʼajoáta ha jaikóta pára siémpre. Apocalipsis 21:4-pe heʼi ‘ndaiporimoʼãveimaha omanóva’. Ha ikatu hag̃uáicha jajerovia Ñandejára promésare, pe versíkulo 5-pe heʼi: “Koʼã ñeʼẽ ningo añetegua ha ikatu pejerovia hese”. Jehová oprometéva guive, katuete oñekumpli.

¿Ndépa reguerovia koʼã promésa oñekumplitaha? Oimérõ upéicha, eaprendeve vaʼerã Jesúsgui ha ejerovia hese, péicha Jehová katuete ndeguerohorýta. Koʼág̃ama voi rerresivíta heta vendisión, ha amo gotyove ikatúta reiko pára siémpre peteĩ hardín neporãvape. Og̃uahẽ vove pe día “ndaiporimoʼãvéima omanóva, oñembyasýva, hasẽva ni hasýva”.

Pe pyhare omano mboyve, Jesús omanda vaʼekue idisipulokuérape ani hag̃ua hesarái pe sakrifísio haʼe ojapopotaitévagui hína. Heʼi chupekuéra: “Pesegíkena pejapo kóva penemanduʼávo cherehe” (Lucas 22:19).

Ko áñope, pe rreunión ojejapóva ojegueromanduʼa hag̃ua Jesús omano hague ára, ojejapóta viernes 3 de abril kuarahy oike rire. Ore testígo de Jehová roinvita ndéve ha ne famíliape pehendu hag̃ua peteĩ diskúrso, oexplikátava mbaʼérepa Jesús ou omano ñanderehehápe ha mbaʼéichapa ñanevenefisia upéva.