Umi mbaʼe heʼíva Samuel, Teresa ha Magdalene ohechauka la hénte oñemboʼeha heta mbaʼére. Oĩ oñemboʼéva ohasa hag̃ua peteĩ exámen, ogana hag̃ua iclúb, oiko porã hag̃ua hogapýpe ha umícha. Algúno oñemboʼe ipyʼaite guive, ha ótro katu orresitánte de memória umi orasión. Tahaʼe haʼeháicha, hetaiterei hénte ohechakuaa tekotevẽha oñemboʼe. Oĩ voi enkuésta ohechaukáva umi ndorekóiva rrelihión jepe oñemboʼeha avei.

Ha nde, ¿reñemboʼépa avei? ¿Mbaʼépa rejerure jepi Ñandejárape? Ha oiméramo jepe nde nereñemboʼeguasúi, ikatu oime reikuaase ideprovéchopa añete pe orasión térã oĩnepa álgien nerendúva. Peteĩ eskritór heʼi pe orasión ideprovechoha umi hénte ipyʼaguapyve hag̃uánte térã ojedesaoga hag̃ua. Oĩ doktór opensáva avei upéicha, ha heʼi oĩha hénte oñemboʼéva kómo tratamiénto oñeñandu porãve hag̃ua. ¿Ndépa mbaʼe ere? ¿Oñemboʼépa la hénte ojepokuaágui reínte ha oñeñandu porãve hag̃uánte?

La Biblia ndeʼíri ñañemboʼe vaʼerãha ñañeñandu porãve hag̃uánte. Síno heʼi oĩha álgien ohendúva ñañemboʼéramo chupe ogustaháicha. ¿Siértopa upéva? Jahechamína mbaʼérepa ikatu jaguerovia upeichaha.

Heta oĩ heʼíva japerde reiha ñane tiémpo ñañemboʼéramo, pórke avave nañanerendumoʼãi. Oĩ katu oñemboʼéva péro opensáva noñekontestaiha chupekuéra. Por ehémplo, peteĩ karai ndojeroviáiva Ñandejára oexistiha, peteĩ vuéltape oñeimahina mbaʼéichanepa Ñandejára ha oñemboʼe chupe: “Eremíntena chéve álgo jepe”. Ha upéi heʼive: “Péro Ñandejára ndeʼíri mbaʼevete”.

La Biblia katu oasegura ñandéve Ñandejára oexistiha ha ohenduha ñane ñemboʼe. Iñeʼẽme heʼi voi: “[Ñandejára] pendeporiahuvereko jeýta peẽ pehenói jey vove chupe” (Isaías 30:19, ÑÑB). Ha Proverbios 15:8 heʼi avei: “Umi hekojojáva ñemboʼe haʼe ohendu”.

La Bíbliape oĩ avei heta ehémplo ohechaukáva Ñandejára ohenduha umi orasión. Hebreos 5:7 heʼi voi Jesús “oñemboʼe [hague] ipyʼaite guive ha ojerure asy Ñandejárape, upe ikatu vaʼekue osalva chupe ñemanógui”, ha Ñandejára ombohovái chupe iñemboʼe, upévare orresusita chupe. Oĩ hetave ehémplo koʼã téxtope: Daniel 9:20, 21 ha 2 Crónicas 7:1.

¿Mbaʼépa tekotevẽ jajapo Ñandejára ñanerendu hag̃ua? Upearã ñañemboʼe vaʼerã Jehovápe añoite.a Ndajaikói vaʼerã ñañemboʼe umi sántope ni ótro dióspe. Ñanemanduʼa vaʼerã avei jajerure vaʼerãha umi mbaʼe ‘oĩ porãva hembipotándi’, ha upéicha katuete ñanerendúta (1 Juan 5:14). Upévare, jaipotáramo Ñandejára okontesta ñane ñemboʼe jaikuaa porã vaʼerã chupe ha jajapo haʼe oipotáva.

Heta persóna oguerovia ipyʼaite guive Ñandejára ohenduha iñorasión, ha ndahaʼeiha oñemboʼéva oñeñandu porãve hag̃uánte térã ojedesaoga hag̃ua. Por ehémplo, Isaac oikóva Kéniape heʼi: “Che antendese vaʼekue la Biblia omboʼéva, upémarõ añemboʼe Ñandejárape. Tiémpo riremínte peteĩ persóna oñemboja che rendápe ha heʼi chéve haʼe ikatuha chepytyvõ”. Filipínaspe katu peteĩ kuñakarai hérava Hilda opoise vaʼekue pe sigarríllogui péro ndaikatúi. Upémarõ iména heʼi chupe: “¿Mbaʼére piko nderejeruréi Ñandejárape tanepytyvõ?”. Haʼe ojapo iména heʼíva chupe, ha upe rire omombeʼu: “Ni ndagueroviaséi ningo mbaʼeichaitépa chepytyvõ pe orasión. Mbeguekatúpe ndapitasevéi ha upéi ahejaitéma voi la sigarríllo”.

Ikatu oime nde reguereko álgo ndepyʼapýva ha ‘oĩ porãva Ñandejára rembipotándi’, péro, ¿oĩnepa haʼe dispuésto nerendúvo?

Ñandejára oipota jaiko iñamígoramo.

Umi oñoamigoitéva ningo oñemongeta meme oñondive, ha upéva omombareteve iñamista. Péicha avei Ñandejára oipota ñañeʼẽ hendive jaiko hag̃ua iñamigoitéramo. Haʼe heʼi voi ñandéve: ‘Peẽ cherenóiramo ha pejúramo che rendápe ha peñemboʼe, che pohendúta’ (Jeremías 29:12). Ñañeʼẽramo Ñandejárandi ñañemoag̃uivéta hese, ha ‘haʼe oñemoag̃uíta ñanderehe’ (Santiago 4:8). La Biblia opromete voi ñandéve: “[Ñandejára] oñemoag̃ui umi oñemboʼévare” (Salmo 145:18). Amáske ñañemboʼe chupe imbaretevéta ñane amista hendive.

Ñandejára ñanepytyvõse.

Jesús heʼi vaʼekue: “¿Máva piko oĩ pende apytépe itaʼýra ojeruréramo chupe pan, omeʼẽtava chupe ita? Térã ojeruréramo peteĩ pira, nomeʼẽmoʼãingo chupe peteĩ mbói, ¿ajépa? Peẽ [pemeʼẽramo] rregálo iporãva pende raʼykuérape, ¡koʼytevéntema upéicharõ pende Ru oĩva yvágape omeʼẽta mbaʼe porã umi ojerurévape chupe!” (Mateo 7:9-11). Upeichaite ningo, Ñandejára oipota ñañemboʼe chupe pórke ojepyʼapy ñanderehe ha ñanepytyvõseterei (1 Pedro 5:7). Heʼi voi ñandéve ñamombeʼu hag̃ua chupe ñane provlemakuéra. La Biblia heʼi: “Ani pejepyʼapyeterei mbaʼevére, síno opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe” (Filipenses 4:6).

Ñande ñaikotevẽ Ñandejárare.

Umi ostudiáva yvyporakuéra komportamiéntore ohechakuaa heta héntepe g̃uarã haʼeteha voi ofaltáva chupekuéra álgo noñemboʼéiramo. Umi ndojeroviáiva Ñandejárare térã umi ndogueroviáiva voi haʼe oexistiha jepe oñemboʼe avei.a Upéva ohechauka porã ñande Apohare ñandekrea hague ñadepende hag̃ua hese. Upévare voi Jesús heʼi vaʼekue: “Ovyʼa umi ohechakuaáva oikotevẽha Ñandejárare” (Mateo 5:3). Ha ñañemboʼe meméramo jahechauka hína añetehápe ñadependeha Ñandejárare.

¿Mbaʼéichapa ñanepytyvõta jaaseptáramo Ñandejára invitasión ha jaiko iñamígoramo?

Ñañepyrũ mboyve jajapo peteĩ mbaʼe katuete jaikuaase raẽ mbaʼépepa ideprovéchota ñandéve. Péro, ¿oĩ vai piko ñañeporandúramo avei mbaʼépepa ñanepytyvõta pe orasión? Ndahaʼéi ningo katuete la upéicha. Ndaivaíringo jaikuaase mbaʼépa jahupytýta ñañemboʼéramo. Ñandejára siérvo yma guare, hérava Job, oikuaase vaʼekue avei upéva. Haʼe heʼi: “Ajeruréramo Ñandejárape tachepytyvõ, ¿openáta piko cherehe?” (Job 9:16, NM).

Umi artíkulo jahasa vaʼekuépe jahecha kuri pe orasión ndahaʼeiha ñanepytyvõva ñañeñandu porãve hag̃uánte térã jajedesaoga hag̃ua. Síno jahecha kuri Ñandejára ohenduha ñane orasión. Ñañemboʼéramo Ñandejárape haʼe oipotaháicha ha jajerure umi mbaʼe oĩ porãva hembipotándi, haʼe katuete ñanerendúta. Ha ñaneinvita voi ñañemoag̃ui hag̃ua hese (Santiago 4:8). ¿Mbaʼépa upéicharõ ikatu jahupyty ñañemboʼe meméramo Ñandejárape? Jahechamína.

Ñanembopyʼaguapy.

Ñaneprovléma heta jave térã jahasa jave peteĩ situasión ijetuʼúva katuete jajepyʼapyeterei jepi. Péro la Biblia ohechauka mbaʼépa ikatu jajapo umícha jave. Upépe heʼi: “Peñemboʼe jey jeýkena”, ha heʼi avei: “Pemombeʼu Ñandejárape peipotáva” (1 Tesalonicenses 5:17; Filipenses 4:6). ¿Mbaʼépa jahupytýta jajapóramo upéicha? La Biblia heʼi jey: “Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare” (Filipenses 4:7). Ñamombeʼúramo Ñandejárape mbaʼéichapa ñañeñandu, katuete ñandepyʼaguapyvéta upe rire. Upévare la Biblia heʼi voi: “Emoĩ Jehová pópe umi mbaʼe ndepyʼapýva haʼetéva peteĩ kárga ndéve g̃uarã, ha haʼe katuete nepytyvõta” (Salmo 55:22, NM).

Hetaiterei persóna ohechakuaa ipyʼaguapyveha oñemboʼe rire Ñandejárape. Por ehémplo, peteĩ kuñakarai Corea del Surpegua hérava Hee Ran omombeʼu: “Che ningo heta cheprovléma, péro añemboʼe jave Ñandejárape tuicha chevevyive ha chembarete jey aaguanta hag̃ua”. Filipínaspe katu peteĩ kuñakarai hérava Cecilia heʼi: “Che ningo ajepyʼapyeterei che membykuñanguérare ha che sýre avei, pórke haʼe anga hasy ha ni ndachekuaavéima. Péro añemboʼe jave chepyʼaguapy ha upéicha rupi asegi aaguanta. Aikuaa porã Jehová chepytyvõtaha asegi hag̃ua akuida hesekuéra”.

Ñanekonsola ha ñanemokyreʼỹ.

Oiméramo nde rejestresaiterei térã rehasa hína peteĩ situasión ijetuʼúva, iporãta reñemboʼéramo ‘Ñandejára omeʼẽvape opaichagua konsuélo’, ha upéicha katuete reñeñandu porãvéta. La Biblia heʼi voi haʼe ‘ñanekonsolaha opa umi ñande jehasa asýpe’ (2 Corintios 1:3, 4). Por ehémplo, peteĩ vuéltape Jesús oñeñandu vaieterei, upémarõ “oñesũ oñemboʼe” Ñandejárape. ¿Mbaʼépa oiko upéi? “Ou hendápe peteĩ ánhel yvágagui ha omombarete chupe.” (Lucas 22:41, 43.) Proféta Nehemías avei heta osufri vaʼekue, pórke umi hénte iñañáva ojukase chupe ojapo haguére Ñandejára oipotáva. Upévare haʼe ojerure Ñandejárape omombarete hag̃ua chupe. La Biblia ohechauka Ñandejára oipytyvõ hague chupe ani hag̃ua okyhyje ha ojapo porã hag̃ua hembiapo (Nehemías 6:9-16). Reginald, oikóva Ghánape, heʼi: “Ahasa jave umi situasión ijetuʼuetereíva, añemboʼe Ñandejárape, aikuaágui péicha amombeʼuha che provléma álgien ikatútavape chepytyvõ ha chetrankilisa”. Jehechakuaa upéicharõ Ñandejára ikatuha ñanekonsola ñañemboʼéramo chupe.

Ñandejára ñanemoarandu.

Sapyʼánte jadesidi vaʼerã umi mbaʼe iñimportánteva ha ñandeafektátava ñandéve ha ñane famíliape avei. ¿Mbaʼépa ikatu jajapo jadesidi porã hag̃ua? La Biblia heʼi: “Oĩramo pende apytépe oikotevẽva arandu, ojerure meme vaʼerã Ñandejárape ha oñemeʼẽta chupe. Ñandejára ningo omeʼẽ pojerápe opavavépe ha ndaipochymoʼãi upe ojerurévandi” (Santiago 1:5). Ñandejára katuete ñanepytyvõta jadesidi porã hag̃ua jajeruréramo chupe ñanemoarandu hag̃ua. Jesús heʼi vaʼekue voi ‘ñande Ru yvagapegua omeʼẽtaha espíritu sánto umi ojerurévape chupe’ (Lucas 11:13).

Jesús jepe ojerure vaʼekue Ñandejárape oipytyvõ hag̃ua chupe odesidíta jave umi mbaʼe iñimportánteva. Por ehémplo, oiporavótarõ guare umi 12 apóstolpe “opyta oñemboʼe Ñandejárape peteĩ pyhare pukukue” (Lucas 6:12).

Heta persóna osegi Jesús ehémplo ha ohechakuaa Ñandejára oipytyvõha chupekuéra odesidi porã hag̃ua. Por ehémplo, Regina oikóva Filipínaspe omombeʼu heta provlémama ohasa hague; omano chugui iména, operde itraváho ha ijetuʼu avei chupe omongakuaa hag̃ua imembykuñanguérape. ¿Mbaʼépa oipytyvõ chupe odesidi porã hag̃ua? Haʼe heʼi: “Che añemboʼe Jehovápe ha péicha aheja ipópe opa mbaʼe chepyʼapýva”. Peteĩ karai oikóva Ghánape ha hérava Kwabena heʼi mbaʼe provlémapa haʼe ohasa vaʼekue: “Che ambaʼapo porã vaʼekue konstruksiónpe péro aju aperde che traváho”. Upéi omombeʼu mbaʼépa ojapo oheka aja itravahorã, haʼe heʼi: “Ajerure meme Jehovápe adesidi porã hag̃ua. Aime segúro haʼe chepytyvõ hague ajuhu hag̃ua peteĩ traváho opermitíva chéve añemantene ha omeʼẽva avei chéve tiémpo adedika hag̃ua Ñandejárape”. ¿Mbaʼépa ikatu jaʼe nde kásope? Reñemboʼéramo Ñandejárape haʼe katuete nepytyvõta avei redesidíta jave umi mbaʼe iñimportánteva.

Hetaiterei mbaʼépe ningo ikatu ñanepytyvõ la orasión, ha ko artíkulope ñamensionáma algúno. (Retopáta hetave ehémplo pe rrekuádro heʼívape “¿Mbaʼérepa iporã ñañemboʼe?”.) Péro, ¿mbaʼépa ikatu rejapo rehupyty hag̃ua koʼã mbaʼe porã? Reñehaʼã vaʼerã reikuaave Ñandejárape ha ivolunta. Ndegustáramo ikatu voi reñeʼẽ peteĩ testígo de Jehovándi, haʼekuéra naiprovlemamoʼãi ohechauka hag̃ua ndéve la Biblia omboʼéva.a Upéicha ikatúta reñemoag̃ui Ñandejárare, upe ohendúva ñane ñemboʼe (Salmo 65:2).