1. ¿Mbaʼéichapa jaipuru pe padrenuéstro japredika jave?

HETAITEREI persóna oikuaa porã pe orasión del padrenuéstro, oĩva Mateo 6:9-13-pe. Ñande testígo de Jehová katu jaipuru meme ko ñemboʼe japredika jave. Por ehémplo, jaipuru pe fráse “tou ne Rréino”, jahechauka hag̃ua pe Rréino haʼeha Ñandejára goviérno, koʼẽrõite ojapótava ko yvýgui peteĩ paraíso. Avei jaipuru pe fráse “toñemomarangatu nde réra”, jahechauka hag̃ua umi héntepe Ñandejára orekoha héra, ha jarrespeta vaʼerãha upe téra haʼe rupi peteĩ nómbre sánto (Mat. 6:9).

2. ¿Mbaʼérepa jaʼekuaa Jesús ndoipotái hague jarrepetínte de memória pe orasión del padrenuéstro?

² Heta persóna orrepeti de memória pe padrenuéstro oñemboʼe jave Ñandejárape. Péro, ¿oipotápa raʼe Jesús jajapo upéva? Nahániri. Haʼe heʼi vaʼekue: “Eñemboʼe jave ani ere jey jey peteĩ mbaʼénte” (Mat. 6:7). Ótra okasiónpe, Jesús omboʼérõ guare idisipulokuérape oñemboʼe hag̃ua, omensiona jey pe padrenuéstro, péro oipurúma diferénte palávra (Luc. 11:1-4). Upéva ohechauka Jesús omboʼe hague pe orasión ikatu hag̃uáicha jaikuaa mbaʼérehepa ñañemboʼe vaʼerã.

3. ¿Mbaʼe mbaʼépa ñañeporandu vaʼerã jastudiávo ko artíkulo ha pe ótro oúva?

³ Ko artíkulope ha pe ótro oúvape ñahesaʼỹijóta pe orasión del padrenuéstro. Ha jastudiávo koʼã mbaʼe, ñañeporandumi: “¿Mbaʼéichapa pe padrenuéstro chepytyvõ añemboʼe porãve hag̃ua? ¿Añehaʼãpa aiko heʼiháicha pe padrenuéstro?”.

“ORE RU REIMÉVA YVÁGAPE”

4. a) ¿Mbaʼérepa jaʼe “Ore Ru” ñañemboʼe jave? b) ¿Mbaʼéicha rupípa umi kristiáno oikótava ko yvy ape ári ikatu avei heʼi Jehovápe “Ore Ru”?

⁴ Jesús omoñepyrũ pe orasión del padrenuéstro heʼívo: “Ore Ru”. Upéva ñanemomanduʼa Jehová haʼeha ñande Túva ha avei ‘enterove ermáno’ oĩva ko yvy tuichakuére Túva (1 Ped. 2:17). Umi kristiáno unhído heʼi Jehovápe “che Ru”, pórke haʼe oadoptáma chupekuéra itaʼýra teerã (Rom. 8:15-17). Péro umi kristiáno oikótava ko yvy ape ári opa árare, ikatúnte avei heʼi Jehovápe “Ore Ru”. ¿Mbaʼéicha rupípa? Pórke Jehová omeʼẽ chupekuéra vída ha opa mbaʼe oikotevẽva. Ha ág̃a ohupyty vove hikuái perfeksión ha ohasa pe última pruéva, oikóta avei chuguikuéra Ñandejára raʼy tee (Rom. 8:21; Apoc. 20:7, 8).

5, 6. a) ¿Mbaʼépa hína pe rregálo iporãvéva tuvakuéra ikatúva omeʼẽ ifamíliape? b) ¿Mbaʼépa ojapo vaʼerã káda mitã upe rregálogui? (Ehecha pe taʼanga oĩva iñepyrũme.)

⁵ Umi túva oservíva Jehovápe ikatu omeʼẽ ifamíliape peteĩ rregálo ijojahaʼỹva. ¿Mbaʼépa hína upéva? Omboʼe chupekuéra Jehová haʼeha avei Itúva, ha ohechauka chupekuéra mbaʼéichapa oñemboʼe vaʼerã. Peteĩ superintendénte de sirkuíto Sudafricagua omombeʼu: “Onase guive che rajykuéra ajepokuaa añemboʼe hendivekuéra káda pyhare, aiméma guive ógape. Haʼekuéra heʼi naimanduʼaiha umi palávra aipuru vaʼekue roñemboʼe jave. Péro imanduʼa hikuái mbaʼéichapa isagrádo oréve pe orasión ha enterove roimeha trankílo upe moméntope. Haʼekuéra heʼi oñeñandu porãha ha oñesentiha segúra rojapo jave umi orasión káda pyhare. Upe rire, haʼekuéra oñepyrũrõ guare ojapo iñorasión, amokyreʼỹ káda únape ojapo hag̃ua en vos álta. Péicha ikatu ahendu mbaʼéichapa omombeʼu hikuái Jehovápe opensáva ha oñandúva. Upéva omeʼẽ chéve oportunida aikuaa hag̃ua mbaʼépa oĩ che rajykuéra pyʼapýpe. Upéi aipytyvõ avei chupekuéra ojerure hag̃ua umi mbaʼe iñimportánteva oĩva pe padrenuéstrope, ha omehora hag̃ua iñemboʼe”.

⁶ Ko ermáno rajykuéra okakuaávo ohóvo, oñemoag̃ui ag̃uive avei Jehováre. Koʼág̃a haʼekuéra omendapáma ha imenakuérandi oservi Jehovápe de tiémpo kompléto. Jahechaháicha, tuvakuéra omboʼe vaʼerã ifamíliape Jehová haʼeha peteĩ persóna rreál ha ikatuha oiko chuguikuéra iñamígo. Upéva hína pe rregálo iporãvéva ikatúva omeʼẽ chupekuéra. Péro tekotevẽ káda uno oñehaʼã oiko hag̃ua chugui Jehová amígo. Upéva heʼise umi mitã oaprende vaʼerãha ohayhu Ñandejára réra ha omombaʼe upe téra porãite (Sal. 5:11, 12; 91:14).

“TOÑEMOMARANGATU NDE RÉRA”

7. a) ¿Mbaʼe priviléhiopa jareko ñande testígo de Jehová? b) ¿Mbaʼéichapa jahechauka ñamombaʼeha upe priviléhio?

⁷ Ñande testígo de Jehová jareko peteĩ priviléhio ijojahaʼỹva: jaikuaa Ñandejára réra, ha oiko ñandehegui “peteĩ tetã ogueraha vaʼerã héra” (Hech. 15:14; Is. 43:10). Pe padrenuéstrope Jesús ñanemboʼe jajerure hag̃ua Jehovápe: “Toñemomarangatu nde réra”. Upéva heʼise jaipotaha oñemopotĩ Ñandejára réra. ¿Mbaʼéichapa jahechauka ñamombaʼeha upe priviléhio? Jajerure vaʼerã Jehovápe tañanepytyvõ ani hag̃ua jaʼe ni jajapo mbaʼeve omongyʼátava héra. Síglo primérope oĩ vaʼekue heta kristiáno nokumplíriva umi mbaʼe omboʼéva. Aníkena jajogua umívape. Apóstol Pablo heʼi vaʼekue hesekuéra: “Pende káusare umi tetã ambuépe ojetaky Ñandejára rérare” (Rom. 2:21-24).

8, 9. ¿Mbaʼéichapa Jehová oipytyvõ peteĩ ermána oñehaʼãvape ani hag̃ua ofalla chupe?

⁸ Enterove kristiáno ñañehaʼãmbaite ñambotuicha Jehová réra. Por ehémplo, peteĩ ermána Noruegagua orekóva peteĩ imemby de dos áño, ou opyta viúda . Haʼe heʼi: “Ijetuʼueterei ningo chéve upérõ. Manterei añemboʼe Ñandejárape ikatu hag̃uáicha chemombarete ha agueropuʼaka che mbaʼembyasy. Ndaipotaieterei ningo Satanás oñembohory Jehováre adesidi vai haguére, ha ndafallaséi Ñandejárandi. Che ambotuichase chupe ha aipota che memby ohecha jey itúvape pe múndo pyahúpe” (Prov. 27:11).

⁹ ¿Okontestápa Jehová ko ermána ñemboʼe? Si, okontesta. Haʼe siémpre ojeheʼa umi ermáno ha ermánare, ha haʼekuéra omokyreʼỹ meme chupe. Cinco áño haguépe omenda peteĩ ansiánore. Koʼág̃a imemby orekóma 20 áño ha oservi avei Jehovápe. Ko ermána heʼi: “Aagradeseterei che ména chepytyvõ haguére amongakuaa hag̃ua che membýpe”.

10. ¿Mbaʼéichapa Jehová osantifikáta héra?

¹⁰ Jehová osantifikáta térã omopotĩetéta héra ohundi vove umi odespresiávape chupe ha orrechasáva igoviérno (elee Ezequiel 38:22, 23). Upe rire yvyporakuéra ohupytýta perfeksión, ha entéro oikóva yvágape ha ko yvy ape ári omombaʼeguasúta Jehovápe ha ombotuicháta héra marangatu. “Upéicha Ñandejára añoite omoakãta opa mbaʼe.” (1 Cor. 15:28.) Upéva heʼise Jehová añoite ogovernataha opavave oikóvape ko univérso tuichakuére.

“TOU NE RRÉINO”

11, 12. ¿Mbaʼépa Jehová omyesakã isiervokuérape áño 1876-pe?

¹¹ Jesús oho jey mboyve yvágape, idisipulokuéra oporandu chupe: “Ore Ruvicha, ¿remoĩ jeýtapa ko tiémpope, pe Rréino Israélpe?”. Jesús heʼi chupekuéra nog̃uahẽitiha pe tiémpo haʼekuéra oikuaa hag̃ua arakaʼépa pe Rréino oñepyrũta ogoverna. Upéva rangue, tekotevẽha oñekonsentra hikuái pe tembiapo iñimportantevévape: pe predikasión (elee Hechos 1:6-8). Upéi heʼi avei chupekuéra ojerure vaʼerãha iñemboʼépe tou Ñandejára Rréino, ha tekotevẽha oñatende porã ikatu hag̃uáicha ohechakuaa hikuái haʼe oñepyrũ vove ogoverna. Upévare ñande avei jasegi jajerure Jehovápe tou Irréino.

¹² Oñemoag̃uívo ohóvo pe tiémpo Jesús oñepyrũ hag̃ua ogoverna yvágape, Jehová oipytyvõ isiervokuérape ohechakuaa hag̃ua arakaʼetépa oikóta upéva. Por ehémplo, áño 1876-pe ermáno Charles Taze Russell ohai peteĩ artíkulo hérava: “¿Arakaʼépa opáta pe tiémpo oñemeʼẽva umi tetãme?”. Upépe haʼe omyesakã kuri pe profesía oĩva lívro de Daniélpe oñeʼẽva umi ‘siete tiémpore’. Avei oexplika mbaʼépa heʼise pe profesía Jesús omeʼẽ vaʼekue oñeʼẽva ‘pe tiémpo oñemeʼẽvare umi tetãme’. Ermáno Russell heʼi koʼã mokõi profesía oñeʼẽha la mísma kósare (Dan. 4:16, NM; Luc. 21:24). Pe artíkulo ohechauka koʼã “tiémpo” opataha áño 1914-pe.a

13. a) ¿Mbaʼépa oiko raʼe áño 1914-pe? b) ¿Mbaʼépa ohechauka umi mbaʼe oikóva ko múndope 1914 guive?

¹³ Áño 1914-pe, Európape oñepyrũ peteĩ gérra upéi ojagarráva ko yvy tuichakue, ha upérõ hetaiterei persóna omano ñembyahýigui. Opakuévo pe gérra 1918-pe, ou peteĩ grípe ivaietereíva. Heta hénte ningo omano pe gérra káusare, péro pe grípe ojuka hetaitereive persónape. Koʼã mbaʼe okumpli pe señál Jesús oprofetisa vaʼekue, ha ohechauka haʼe oñepyrũmaha ogoverna yvágape 1914-pe (Mat. 24:3-8; Luc. 21:10, 11). Upe áñope Jesús “osẽ ipuʼaka hag̃ua iñenemigokuérare ha omohuʼã hag̃ua iñorairõ” (Apoc. 6:2). Jesús omosẽ Satanás ha idemoniokuérape yvágagui ha opoi chupekuéra yvy gotyo. Upe guive oñekumpli pe profesía heʼíva: “Aichejáranga pe yvy ha pe mar, oguejy rupi peẽme pe Aña, haʼe orrenegaiterei hína oikuaágui mbykypaitemaha itiémpo” (Apoc. 12:7-12).

14. a) ¿Mbaʼérepa jasegi jajerure Ñandejárape: “Tou ne Rréino”? b) ¿Mbaʼe tembiapópa jasegi vaʼerã jajapo?

¹⁴ Jesús oñepyrũ rire ogoverna, oiko heta mbaʼe vai ko yvy ape ári. Apocalipsis kapítulo 12 ñanepytyvõ ñantende hag̃ua mbaʼérepa oiko koʼã mbaʼe. Jesús ogovernámarõ jepe yvágape, Satanás oreko gueteri ipoguýpe ko yvy. Péro koʼẽrõite Jesús ‘omohuʼãta iñorairõ’ oipeʼávo opa mbaʼe vai oĩva ko múndope. Og̃uahẽ meve upe tiémpo, ñande jasegíta jajerure Ñandejárape tou Irréino, ha ñamombeʼúta umi héntepe pe notísia porã oñeʼẽva upe Rréinore. Ko tembiapo okumpli pe profesía Jesús heʼi vaʼekue: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mat. 24:14).

“TOJEJAPO NE REMBIPOTA YVY APE ÁRI”

15, 16. ¿Iporãpa jajerurénte tojejapo Ñandejára volunta ko yvy ape ári?

¹⁵ Jehová okreárõ guare Adán ha Évape, ko yvy ape ári ojejapo vaʼekue hembipota. Upévare haʼe heʼi kuri opa mbaʼe “iporãitereiha” (Gén. 1:31, NM). Péro upéi Satanás opuʼã ikóntrape, ha upe guive la majoría umi hénte ndojapói Ñandejára oipotáva. Upéicharõ jepe, koʼág̃a oĩma mas de ocho millón de persóna oservíva Jehovápe. Haʼekuéra ojerure tojejapo Ñandejára volunta ko yvy ape ári, péro ndahaʼéi ojerurénteva, síno oñehaʼã voi ojapo. Oñehaʼãmbaite hikuái oiko Ñandejára oipotaháicha ha oñeʼẽ hapichakuérape kyreʼỹme pe Rréinore.

¹⁶ Jahechamína peteĩ ermána ehémplo. Haʼe ningo ojevautisa áño 1948-pe. Koʼág̃a orekóma 80 áño ha oservi de misionéra Áfricape. Haʼe heʼi: “Pyʼỹinte ajerure Jehovápe toipytyvõ umi ipyʼaporãvape oñemoag̃ui hag̃ua hese oĩ reheve tiémpo. Ha asẽ jave apredika, ajerure Ñandejárape tachembokatupyry ikatu hag̃uáicha apoko che rapichakuéra korasõre. Avei ajerure chupe toipytyvõ entéro ermánope ikatu hag̃uáicha oñangareko porã umi oaseptávare pe mensáhe”. Ko ermána oipytyvõma hetaiterei persónape oikuaa hag̃ua Jehovápe. ¿Reikuaápa avei nde algún ermáno térã ermána ijedávape ojapóva kyreʼỹme Jehová rembipota? (Elee Filipenses 2:17.)

17. ¿Mbaʼéichapa reñeñandu reikuaávo Ñandejára okumplitaha hembipota ko yvy ape ári?

¹⁷ Ñande jaservíva Jehovápe jasegíta jajerure chupe tojejapo hembipota ko yvy ape ári, ha jasegíta jajerure upéva haʼe ohundi peve iñenemigokuérape. Upe rire oikóta ko yvýgui peteĩ paraíso ha hetaiterei persóna omano vaʼekue oikove jeýta. Jesús heʼi: “Ani pehecharamo ko mbaʼe, og̃uahẽtagui pe óra opavave umi oĩva pe sepultúrape ohendutaha iñeʼẽ ha osẽta” (Juan 5:28, 29). ¡Epensamíntena mbaʼeichaitépa javyʼáta jahecha jey vove umi jahayhúva omano vaʼekuépe! Og̃uahẽ vove upe tiémpo, Ñandejára “omokãmbaitéta” ñande resay (Apoc. 21:4). Opavave lénto umi oikove jeýva haʼéta hína umi “hekojojaʼỹva”. ¿Mbaʼérepa ojeʼe hesekuéra ndahekojojaiha? Pórke omano mboyve, haʼekuéra ndoikuaái kuri Jehová ha Jesúspe. ¡Ajépa igustoitéta ñamboʼe chupekuéra ojapo hag̃ua Ñandejára rembipota ikatu hag̃uáicha oiko opa árare! (Hech. 24:15; Juan 17:3.)

18. ¿Mbaʼépa Jehová okumplíta koʼẽrõite?

¹⁸ Koʼẽrõitéma Jehová okumplíta umi mbohapy mbaʼe jajeruréva chupe pe padrenuéstrope: oguerúta Irréino, omopotĩta héra, ha entéro umi oikóva igoviérno poguýpe omombaʼeguasúta chupe peteĩ ñeʼẽme. Péicha Jehová omeʼẽmbaitéta yvyporakuérape umi mbaʼe ojeruréva. Pe artíkulo oúvape ñahesaʼỹijóta ambue mbaʼe Jesús ñanemboʼe vaʼekue jajerure hag̃ua pe padrenuéstrope.

1-3. ¿Mbaʼérepa peteĩ ermána oĩ segúra Jehová okontesta hague kuri iñorasión?

PETEĨ prekursóra rregulár hérava Lana, ovisita kuri Alemania áño 2012-pe. Haʼe heʼi ndahesaraimoʼãiha mbaʼéichapa upérõ Ñandejára okontesta chupe mokõi orasión. Ohokuévo pe aeropuértope ojerure Jehovápe otopakami hag̃ua chupe peteĩ persóna oñeinteresátava pe marandu porãre. Upéi og̃uahẽvo pe aeropuértope, oñentera al ótro día ae osẽtaha pe avión haʼe oviaháta haguépe. Ojerure jey Jehovápe toipytyvõmi chupe, pórke isoguéma ha ndorekói moõpa opytáta oke.

² Oñemboʼepamírente, ohendu peteĩ heʼíva chupe: “Lana, ¿mbaʼéiko rejapo koʼápe?”. Upe oñeʼẽva chupe haʼe peteĩ ikompañerokue kolehiopegua oviahátava hína Sudáfricape. Oĩ hendive isy ha ijavuéla, ohóva odespedi hag̃ua chupe. Upéi Lana omombeʼu chupekuéra mbaʼépa la iprovléma, ha umi kuñakarai oinvita chupe opyta hag̃ua hógape upe pyharépe. Hiʼarive oporandu hikuái Lánape heta mbaʼe irrelihióngui ha pe prekursorádogui.

³ Al ótro día, orambosapa rire hikuái, Lana osegi oñemongeta hendivekuéra la Bíbliare. Ha oviaha mboyve hetãme, oanota umi kuñakarai dáto, ikatu hag̃uáicha umi ermáno upe lugarpegua ovisita chupekuéra. Lana oservi de prekursóra koʼág̃a peve ha oĩ segúra Jehová okontesta hague iñemboʼe (Sal. 65:2).

4. ¿Mbaʼépa jahecháta ko artíkulope?

⁴ Jareko jave provléma, pyaʼe voi ñañemboʼe Jehovápe, ha haʼe katuete ñanerendu ha ñanepytyvõ (Sal. 34:15; Prov. 15:8). Péro pe padrenuéstrope Jesús omboʼe vaʼekue mbaʼe mbaʼépa iñimportanteve jajerure. Ko artíkulope jahechavéta cuatro mbaʼe oñemensionáva pe padrenuéstrope, ha ñaaprendéta mbaʼéichapa koʼãva ñanepytyvõ jasegi hag̃ua ñaneñeʼẽrendu Jehovápe (elee Mateo 6:11-13).

“EMEʼẼNA ORÉVE ORE REMBIʼURÃMI KO ÁRAPE G̃UARÔ

5, 6. Ndofaltáiramo jepe ñandéve jaʼumi vaʼerã, ¿mbaʼérepa jajerure vaʼerã: “Emeʼẽna oréve ore rembiʼurãmi”?

⁵ Jesús ndeʼíri pe padrenuéstrope: “Emeʼẽna chéve che rembiʼurãmi”. Upéva rangue haʼe heʼi: “Emeʼẽna oréve ore rembiʼurãmi”. Jahechamína mbaʼépa ojapo peteĩ superintendénte de sirkuíto hérava Victor, oservíva Áfricape. Haʼe heʼi: “Aagradese Jehovápe che ha che rembireko natekotevẽi haguére rojepyʼapy rokaru ni ropaga hag̃ua alkilér. Umi ermáno omoĩmba oréve koʼã mbaʼe. Péro ajerure Jehovápe toipytyvõmi umi ermáno ohasávape nesesida ombohovái hag̃ua iprovlemakuéra”.

⁶ Ikatu ningo ñandéve ndofaltái jaʼumi vaʼerã, péro oĩ heta ermáno imboriahúva térã ohasa asýva oiko rupi desástre naturál. Aníkena ñanderesarái ñañemboʼe vaʼerãha hesekuéra. Péro ikatu avei jajapo heta mbaʼe ñaipytyvõ hag̃ua umi ermánope. Por ehémplo, ikatu ñakomparti hendivekuéra umi mbaʼe jarekóva. Ikatu avei ñameʼẽ ñane kontrivusión pe obra mundiálpe g̃uarã. Jaikuaa ningo koʼã kontrivusión ojepuruha oñepytyvõ hag̃ua umi ermáno oikotevẽvape (1 Juan 3:17).

7. ¿Mbaʼéichapa Jesús ohechauka natekotevẽiha jajepyʼapyeterei “koʼẽrõ g̃uarãre”?

⁷ Jesús omboʼe rire pe padrenuéstro, omoĩ peteĩ ehémplo ñanepytyvõva jahechakuaa hag̃ua natekotevẽiha jajepyʼapyeterei ñane remikotevẽre. Haʼe heʼi kuri Jehová okuidaha umi lírio oĩvare pe ñúre, ha upéi oporandu: “¿Mbaʼéicha piko pejeroviaʼiete ha ndapehechakuaái koʼytevéntema haʼe omeʼẽtaha peẽme pende aorã? Upévare, aníke arakaʼeve pejepyʼapyeterei ha peje: [...] ‘¿Mbaʼéiko romondéta?’”. Upéi heʼi avei: “Ani pejepyʼapyeterei koʼẽrõ g̃uarãre” (Mat. 6:30-34). Koʼã mbaʼe Jesús heʼi vaʼekue ñanemboʼe ndovaleiha jajepyʼapyeterei umi mbaʼe ñaikotevẽvare, síno javyʼáma vaʼerãha jahupytymívare káda día. Upéicharõ, ikatu hína jajerure Jehovápe peteĩ lugár jaiko hag̃ua, peteĩ traváho ñañemantene hag̃ua, ha tañanemoarandu ikatu hag̃uáicha jadesidi porã oiméramo ñanderasykatu. Péro oĩ peteĩ mbaʼe iñimportantevéva jajerure vaʼerã ñane ñemboʼépe. ¿Mbaʼépa hína upéva?

8. ¿Mbaʼépa ñanemomanduʼa vaʼerã pe fráse: “Emeʼẽna oréve ore rembiʼurãmi”? (Ehecha pe taʼanga oĩva iñepyrũme.)

⁸ Pe fráse: “Emeʼẽna oréve ore rembiʼurãmi”, ñanemomanduʼa vaʼerã ñaikotevẽha avei umi mbaʼe omombaretétava ñande jerovia. Peteĩ jey Jesús heʼi vaʼekue: “Yvypóra noikotevẽi pan rehe añónte oikove hag̃ua, oikotevẽ guei opaite mbaʼe Jehová heʼívare” (Mat. 4:4). Upéva heʼise jajerure vaʼerãha Jehovápe osegi hag̃ua omeʼẽ ñandéve opa mbaʼe ñanemoag̃uivétava hese.

“EPERDONA ORÉVE UPE RODEVÉVA”

9. ¿Mbaʼérepa jaʼekuaa pe pekádo haʼeteha peteĩ déuda?

⁹ Pe padrenuéstrope Jesús heʼi vaʼekue: “Eperdona oréve upe rodevéva”. Ha ótra okasiónpe katu heʼi avei: “Eperdonamína oréve ore pekádo” (Mat. 6:12; Luc. 11:4). Haʼe heʼi péicha pórke pe pekádo haʼete hína peteĩ déuda. Áño 1951-pe, rrevísta Ñemañaha (ingléspe), heʼi kuri japekáramo japytaha jadeve Ñandejárape. Ñande jahayhu ha ñaneñeʼẽrendu vaʼerã Jehovápe. Péro japeka jave ikóntrape, jafalla hína hendive, ha Jehová nomereséi upéva. Avei japyta vaíma henondépe ha haʼe ikatu hína ñanderrechasa. Pe rrevísta heʼi avei: “Japekáramo, jahechauka hína ndajahayhuiha Ñandejárape” (1 Juan 5:3).

10. a) ¿Mbaʼéicha rupípa Jehová ikatu ñaneperdona? b) ¿Mbaʼéichapa ñanemoñeñandu Jehová ojapo vaʼekue ñande rehehápe?

¹⁰ ¡Ajépa jaagradesete Jehovápe omeʼẽ haguére Itaʼýra ñanderehehápe ikatu hag̃uáicha ñaneperdona! Ñande ñaikotevẽ Jehová ñaneperdona káda día. Ojapóma ningo haimete 2.000 áño Jesús omano hague, péro koʼag̃aite peve ñanevenefisia isakrifísio. Akóinte jaagradese vaʼerã Jehovápe ko rregálo ijojahaʼỹvare. Jesús nomanóirire ñanderehehápe, ndaikatumoʼãi kuri jajei pekádo ha ñemano poguýgui (elee Salmo 49:7-9; 1 Pedro 1:18, 19). Pe padrenuéstrope heʼívo: “Eperdonamína oréve ore pekádo”, ohechauka ndahaʼeiha ñandénte ñaikotevẽva Jesús sakrifísiore, síno avei ñane ermanokuéra. Jehová oipota siémpre jakuida pe amista jarekóva hendive ha avei oipota ñañeinteresa ñane ermanokuérare. Upévare, ani hag̃ua ñane ermáno opyta vai Jehová renondépe, pyaʼe voi ñaperdona vaʼerã chupe ofalláramo ñanendive. Heta vése umi ofénsa vyroreieterei, péro ñaperdona jave ñane ermanokuérape, jahechauka hína jahayhuha chupekuéra ha jaagradeseha Jehovápe ñaneperdona haguére (Col. 3:13).

11. ¿Mbaʼérepa tekotevẽterei ñaperdona ñande rapichápe?

¹¹ Ñande ningo ñaneimperfékto, ha upévare heta vése ijetuʼu ñaperdona hag̃ua umi ofallávape ñanendive (Lev. 19:18). Ha jaikóramo ñamombeʼu ótro ermánope ojejapo vaʼekue ñanderehe, ikatu hína pe ermáno oñemoĩ ñande favórpe ha pe ofalláva kóntrape. Oikóramo upéva ndaiporimoʼãvéima unida kongregasiónpe. Ha ndajajapóiramo mbaʼeve ñasolusiona hag̃ua pe provléma, jahechaukáta nañamombaʼeiha Jesús sakrifísio ha ndaikatumoʼãi ñañevenefisia chugui. Avei, nañaperdonáiramo ñande rapichápe, Jehová nañaneperdonamoʼãi (elee Mateo 6:14, 15). Añetehápe, jaipotáramo Jehová ñaneperdona, ñañehaʼãmbaite vaʼerã ani hag̃ua jaʼa umi pekádo igrávevape (1 Juan 3:4, 6).

“ANI REHEJA ROʼA MBAʼE VAÍPE”

12, 13. a) ¿Mbaʼépa oiko vaʼekue Jesúsre ojevautisa riremi? b) ¿Mbaʼérepa ndajakulpái vaʼerã ótrope jaʼáramo peteĩ ñuhãme? c) ¿Mbaʼépa ohechauka Jesús siémpre iñeʼẽrendu rupi?

¹² Pe padrenuéstrope heʼi avei: “Ani reheja roʼa mbaʼe vaípe”. Upéva ñanemomanduʼa Jesúsre oiko vaʼekue ojevautisa riremi. Upérõ Jehová oheja “pe Aña ou omoñuhã hag̃ua chupe” (Mat. 4:1; 6:13). ¿Mbaʼérepa Jehová oheja oiko upéva? Jaikuaaháicha, Jesús ou oprova hag̃ua siértopa la ojeʼe vaʼekue Adán ha Eva orrechasárõ guare Jehová goviérno. Péro upearã oñekotevẽ heta tiémpo. Por ehémplo, ojehecha vaʼerã oimépa Jehová ndojapoporãi rakaʼe yvypórape, ajeve opeka hikuái. Ojeprova vaʼerã añetehápepa yvypóra naiñeʼẽrendumoʼãi Jehovápe ojecha vaíramo. Avei ojehechauka vaʼerã siértopa yvyporakuéra oiko porãvéta Jehová reheʼỹ (Gén. 3:4, 5). Péro Jesús iñeʼẽrendu rupi oprova Satanás ijapuha. Ha umi mbaʼe Satanás okuestiona vaʼekue, koʼẽrõite oñemyesakãmbaitéta. Upe rire, entéro oikóva yvágape ha ko yvy ape ári okomprováta Jehová goviérno iporãveha opavavépe g̃uarã.

¹³ Jehová ningo peteĩ persóna sánta. Upéicha rupi, haʼe núnka ndoprovái avavépe ojapo hag̃ua ivaíva. Péro Satanás ndaupeichaiete. Haʼe siémpre ‘oñehaʼãmbaite ñandereity iñuhãme’ (Mat. 4:3). Satanás ñandeprova heta hendáicha, péro káda uno jadesidi vaʼerã jarrechasátapa umi tentasión térãpa nahániri (elee Santiago 1:13-15). Ñapensamína Jesús ojapo vaʼekuére Satanás omoñuhãsérõ guare chupe. Haʼe pyaʼe voi orrechasa pe tentasión ha upepete osita Ñandejára Ñeʼẽ heʼíva. Jesús odesidi iñeʼẽrendu Jehovápe. Upéicharõ jepe Satanás noñentregái, ohaʼarõ ótro moménto oprova jey hag̃ua chupe (Luc. 4:13). Péro Jesús siémpre iñeʼẽrendu Itúvape. Péicha haʼe ohechauka peteĩ persóna perfékta ikatuha iñeʼẽrendu oĩramo jepe peteĩ situasión ijetuʼuetereívape. Ñanemanduʼa vaʼerã Satanás ñandeprovaha avei oipotágui jadesovedese Jehovápe.

14. ¿Mbaʼépa jajapo vaʼerã ani hag̃ua jaʼa umi ñuhãme?

¹⁴ Umi mbaʼe Satanás okuestiona vaʼekue noñesolusionambái gueteri. Upévare Jehová oheja gueteri Satanáspe ñandeprova. Péro siémpre ñanemanduʼa vaʼerã ndahaʼeiha Jehová la omoĩva ñandéve umi tentasión. Haʼe ojeroviaiterei ñaneñeʼẽrendutaha chupe ha ñanepytyvõse upearã. Péro Jehová nañandejopýi jajapo hag̃ua haʼe heʼíva, síno oheja káda uno jadesidi. ¿Mbaʼépa jajapo vaʼerã ani hag̃ua jaʼa Satanás ñuhãme? Jajapo vaʼerã mokõi mbaʼe: Primero, jakuida vaʼerã ñane amista Jehovándi, ha segundo, siémpre jajerure vaʼerã chupe tañanepytyvõ. Jahechamína mbaʼéichapa Jehová okontesta ñane ñemboʼe.

15, 16. a) ¿Mbaʼeichagua tentasiónpa oĩ koʼág̃arupi? b) ¿Mávapa oreko la kúlpa peteĩ ermáno hoʼáramo peteĩ tentasiónpe?

¹⁵ Jehová omeʼẽ ñandéve ijespíritu sánto ipoderosoitéva ikatu hag̃uáicha ñanepytyvõ jarrechasa hag̃ua umi tentasión. Avei omeʼẽ ñandéve Iñeʼẽ ha pe kongregasión ñandeavisa hag̃ua umi pelígrogui. Por ehémplo, heʼi ñandéve ani hag̃ua jaipurupa rei ñane tiémpo, ñande pláta ha ñane enerhía, ñakonsegi hag̃ua umi mbaʼe nañaikotevẽiva. Jahechamína mbaʼépa ojapo Espen ha Janne. Ko matrimónio oservi vaʼekue kómo prekursór rregulár heta tiémpore peteĩ lugár oĩvehápe nesesida. Péro upéi ou hikuái ifamília ha ohejámante iprekursorádo. Koʼág̃a haʼekuéra oiko Európape peteĩ país iporãvehápe la situasión, ha orekóma hikuái mokõi mitã. Pe ermáno omombeʼu: “Koʼág̃arupi ndaikatuvéima rojapo heta mbaʼe Jehová servísiope yma guaréicha. Upévare pyʼỹi rojerure Jehovápe ani hag̃ua roʼa umi tentasiónpe. Ha avei rojerure chupe taorepytyvõ ikatu hag̃uáicha siémpre rojerovia mbarete ha ropredika kyreʼỹ”.

¹⁶ Oĩ avei ótro ñuhã ipeligrosoitereíva: pe pornografía. Jahecháramo pornografía ndaikatúi jakulpa Satanáspe ni imúndope. ¿Mbaʼérepa? Pórke haʼe ha imúndo ndaikatúi ñandejopy jajapo hag̃ua peteĩ mbaʼe ndajajaposéiva. Umi ohecháva pornografía nomboykéi hína umi pensamiénto vai. Péro oĩ heta ermáno ha ermána orrechasáva ko tentasión, ha ñande avei ikatu jajapo upéva (1 Cor. 10:12, 13).

“OREPEʼA [...] PE IVAÍVAGUI”

17. a) ¿Mbaʼéichapa ikatu jahechauka jaipotaha Jehová ‘ñandepeʼa pe ivaívagui’? b) ¿Mbaʼépa ojapóta Jehová koʼẽrõite?

¹⁷ ¿Mbaʼéichapa jahechaukáta jaipotaha Jehová ‘ñandepeʼa pe ivaívagui’? Upearã ‘ndajajeheʼái vaʼerã ko múndore’, ni ndajahayhúi vaʼerã “umi mbaʼe oĩva ipype” (Juan 15:19; 1 Juan 2:15-17). ¡Ajépa javyʼaitéta Jehová ohundi vove Satanás ha imúndope! Péro upéva oiko mboyve, Satanás ojapóta ikatúva guive ani hag̃ua jaservi Jehovápe, pórke “orrenegaiterei hína oikuaágui mbykypaitemaha itiémpo”. Upévare jasegi vaʼerã jajerure Jehovápe ani hag̃ua Satanás ñanemoñuhã (Apoc. 12:12, 17).

18. ¿Mbaʼépa jajapo vaʼerã jaipotáramo Jehová ñandepeʼa opaichagua jehasa asýgui?

¹⁸ Jahechaséramo mbaʼéichapa Jehová ñandepeʼáta opaichagua jehasa asýgui, jasegi vaʼerã jajerure chupe tou Irréino, toñemopotĩ héra ha tojejapo hembipota ko yvy ape ári. Jajerovia vaʼerã Jehová nombofaltamoʼãiha ñandéve mbaʼeve ha ñanepytyvõtaha jasegi hag̃ua ñaneñeʼẽrendu chupe.