Oime vaʼerã nemitãme reʼa mimi vaʼekue. Ikatu voi peichahápe reikytĩ raʼe nde po térã ojepiro ndehegui nde rrodílla. ¿Mbaʼépa ojapómi nde sy péicha jave? Oime vaʼerã omopotĩ ndéve la nde erída ha upéi ojokua. Ha ohechávo nerasẽha, neañuã ha nemoñeʼẽmba nekonsola hag̃ua. Añetehápe ñanemitãme ndahasýi jatopa hag̃ua peteĩ ñanekonsola vaʼerã.

Péro jakakuaavévo jahávo umi provléma ijetuʼuvéma ha hasyvéma avei jatopa hag̃ua peteĩ ñanekonsola vaʼerã. Ha ñambyasýramo jepe, umi provléma noñesolusionavéima ñande sy ñaneañuã haguérente térã ojokua haguére ñandéve ñande erída. Jahechamína umi provléma ikatúva hína rembohovái.

• ¿Reñemosẽpa nde travahohágui ha reñeñandu vaieterei hína upévare? Upéva oiko vaʼekue Juliánre. Haʼe omombeʼu haʼeteha voi opáva chugui la múndo, ha opensa: “¿Mbaʼéicha piko amantenevéta che família? Heta áñoremango ambaʼapo ko emprésape, ¿mbaʼéreiko koʼág̃a ou opensa hikuái ndachedeprovechoveimaha chupekuéra?”.

• ¿Rejedivorsiápa raʼe ha repyta yvýre upéva káusare? Raquel omombeʼu: “Ojapo 18 mése che ména chereja rei hague. Upe guive aju ndavyʼaveiete, haʼete voi pe che korasõ oñembojaʼóva mbytetépe. Ha che rete jepe hasypa chéve. Aju akyhyjeterei pórke ndaikuaái kuri mbaʼépa oikóta chehegui”.

• ¿Nderasyetépa hína ha haʼetévaicha voi nderekueramoʼãiva? Ikatu oime reñeñandu jepi Job oñeñandu haguéicha. Haʼe heʼi vaʼekue: “Chekuerái che rekovégui, upéicha ndaikosevéima” (Job 7:16, Ñande Ruete Ñeʼẽ Bíblia [ÑÑB]). Térã ikatu avei reñeñandu Luis oñeñandu haguéicha. Haʼe orekóma 80 áño ha heʼi: “Sapyʼánte haʼete voi ahaʼarõntemava hína amano”.

• ¿Omanópa ndehegui peteĩ rehayhúva ha reikotevẽterei peteĩ nekonsola vaʼerã? Robert heʼi: “Ñepyrũrã ni ndaroviaséi kuri aikuaárõ guare pe avión oho haguépe che raʼy hoʼa hague ha haʼe omanoha. Upéi katu hasyeterei chéve, ha heʼiháicha la Biblia haʼete voi peteĩ espáda puku chekutu rasýva” (Lucas 2:35).

Umi mbaʼe ohasa vaʼekue Julián, Raquel, Luis ha Robert ningo ijetuʼueterei kuri, péro oĩ vaʼekue okonsoláva chupekuéra. ¿Mávapa? Ñandejára Todopoderóso. Ndaipóri ningo haʼéicha ñanekonsoláva. Péro, ¿mbaʼéichapa haʼe ojapo upéva? ¿Nekonsolánepa avei ndéve?

Apóstol Pablo heʼi vaʼekue Jehováa haʼeha “Ñandejára omeʼẽva opaichagua konsuélo. Haʼe ñanekonsola opa umi ñande jehasa asýpe” (2 Corintios 1:3, 4). Péicha la Biblia ohechauka Ñandejára ikatuha ñanepytyvõ ha ñanekonsola enterovépe ijetuʼúramo jepe ñane situasión.

Péro ñande jajapo vaʼerã avei ñande párte Ñandejára ñanekonsola hag̃ua. Por ehémplo, ñanderasýramo ha jaipota peteĩ doktór ñanepytyvõ, jahámante vaʼerã ñakonsulta hendive. Ha Ñandejárandi péicha avei, upévare la Biblia heʼi ñandéve: “Peñemoag̃uíkena Ñandejárare, ha haʼe oñemoag̃uíta penderehe” (Santiago 4:8).

¿Mbaʼérepa ikatu ñaime segúro Ñandejára oñemoag̃uitaha ñanderehe? Pórke haʼe voi heʼi jey jey ñanepytyvõseha (ehecha pe rrekuádro). Ha avei, Ñandejára okonsoláma heta hénte yma guarépe ha koʼag̃aguápe. Upéva oasegura ñandéve haʼe ikatuha oñemoag̃ui ñanderehe.

Heta hénte koʼág̃arupi ohasa heta mbaʼe ijetuʼuetereíva ha ojerure Ñandejárape oipytyvõmi hag̃ua chupekuéra. Rréi David ojapo vaʼekue avei upéicha, ha heʼi Ñandejárape: “Cherendumína ajerure jave ndéve chepytyvõ hag̃ua”. ¿Ohendúpa raʼe chupe Jehová? Si, upévare heʼi jey: “Haʼe siémpre chepytyvõ, upévare avyʼaiterei” (Salmo 28:2, 7, TNM).

ÑANDEJÁRA OJEVALE JESÚSRE ÑANEKONSOLA HAG̃UA

Ñandejára ojevale Itaʼýrare okonsola hag̃ua umi oikotevẽvape, upévare onkarga chupe ombopyʼaguapy hag̃ua umi oñekevrantávape ha avei okonsola hag̃ua umi oñembyasývape (Isaías 61:1, 2). Ha Jesús oĩrõ guare ko yvy ape ári ohechauka vaʼekue ojepyʼapyha umi ombaʼapo jejopýva ha ikárga pohýivare, péicha okumpli pe oñenkarga vaʼekue chupe (Mateo 11:28-30).

Jesús omeʼẽ vaʼekue konsého porã umi héntepe, otrata porã chupekuéra ha sapyʼánte omonguera voi umi hasývape, péicha haʼe okonsola vaʼekue umi oikotevẽvape. Peteĩ vuéltape, peteĩ lepróso ojerure asy chupe: “Nde reipotáramo ningo ikatu chemonguera”. Jesús ombyasyeterei chupe ha heʼi: “Si, romonguerase” (Marcos 1:40, 41). Ha pe lepróso okuera.

Añetehápe Jesús ndaiporivéima ko yvy ape ári ñanekonsola hag̃ua, péro Itúa Jehová osegi oipytyvõ umi oikotevẽvape, haʼe hína “Ñandejára omeʼẽva opaichagua konsuélo” (2 Corintios 1:3). Jahechamína mbaʼe mbaʼépa oipuru ñanekonsola hag̃ua.

• La Biblia. “Opa mbaʼe ojehai vaʼekue yma Ñandejára Ñeʼẽme, ojehai ñanerekomboʼe hag̃ua. Koʼãva omeʼẽ ñandéve esperánsa, ñanepytyvõgui ñaaguanta hag̃ua ha ñanekonsola avei” (Romanos 15:4).

• Pe espíritu sánto. La Biblia heʼi umi kristiáno yma guare oiko hague pyʼaguapýpe. ¿Mbaʼérepa? “Okyhyje rupi Jehovágui ha espíritu sánto omombarete rupi chupekuéra” (Hechos 9:31). Pe espíritu sánto haʼe hína pe fuérsa Ñandejára oipurúva okumpli hag̃ua ivolunta, ha ipoderosoiterei. Ñandejára ikatu ojevale ijespíriture ñanekonsola hag̃ua oimeraẽ situasiónpe.

• Pe orasión. La Biblia heʼi: “Ani pejepyʼapyeterei mbaʼevére, síno [...] pemombeʼu Ñandejárape peipotáva [...]. Ha Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare” (Filipenses 4:6, 7).

• Umi oservíva ñanendive Ñandejárape. Haʼekuéra ikatu avei ñanekonsola ñaikotevẽ jave, péicha ohechauka haʼeha ñane amígo tee. Apóstol Pablo heʼi vaʼekue isosiokuéra tuichaiterei okonsolaha chupe ohasa asy ha ojejopy vaíramo guare (Colosenses 4:11; 1 Tesalonicenses 3:7).

Ikatu oime reikuaase hína mbaʼéichapa koʼã mbaʼe nepytyvõta reikotevẽ jave peteĩ nekonsola vaʼerã. Upearã jahechami jey mbaʼépa ohasa raʼe umi 4 persóna ñañeʼẽ vaʼekuére pe primer artíkulope. Haʼekuéra ojapo haguéicha, nde avei rehechakuaáta Ñandejára okumpliha gueteri ko promésa ojapo vaʼekue: “Peteĩ sy [okonsolaháicha] imembýpe, che [pokonsoláta]” (Isaías 66:13).

EÑEMOSẼRAMO NDE TRAVAHOHÁGUI

Setha omombeʼu: “Che rembireko Priscila oñemosẽrõ guare itravahohágui, kavalete che aju avei añemosẽ. Dos áñore roñemantene changaʼi mimíme, ha avei ore hentekuéra orepytyvõ. Che rembireko ou oñedeprimi ha che añepyrũ apensa ndavaleiha mbaʼeverã.

¿Mbaʼéichapa rogueropuʼaka pe situasión? Priscila imanduʼa meme Mateo 6:34-re, upépe Jesús heʼi ndovaleiha jajepyʼapyeterei koʼẽrõ g̃uarãre, pórke káda día ñambohovái vaʼerã voi heta mbaʼe vai. Che rembireko oñemboʼe meme avei ipyʼaite guive ha upéva omombarete chupe. Chéve katu chekonsola la heʼíva Salmo 55:22. Ojapo haguéicha pe salmísta, che avei amoĩ Jehová pópe umi mbaʼe chepyʼapýva ha ahechakuaa haʼe oĩha chendive. Koʼág̃a ambaʼapo jeýma, péro roñehaʼã roiko sensillomínte. Jesús heʼi vaʼekue jajapo hag̃ua upéva Mateo 6:20-22-pe. Koʼã mbaʼe orepytyvõ roñemoag̃uive hag̃ua ojuehe ha avei Ñandejárare”.

Jonathan heʼi: “Che família ou oso ha rombotýmante pe emprésa roguereko vaʼekue. Che ajepyʼapyeterei ha ndaikuaái voi mbaʼépa ajapóta. Orerupyty rupi la krísis roperdepa umi mbaʼe rogana vaʼekue 20 áñope. Che rembireko ha che roñepyrũ rojodiskuti plátare. Ni tarhéta de krédito ndaikatuvéi roipuru rokyhyjégui ndojeaseptáirõ g̃uarã oréve.

Péro Ñandejára Ñeʼẽ ha ijespíritu orepytyvõ rodesidi porã hag̃ua. Ahechakuaa aasepta vaʼerãha oimehaichagua traváho, ha roñehaʼã avei tekotevẽkueténte rogasta. Ore ningo testígo de Jehová, ha umi ermáno kongregasionpegua siémpre oĩ ore ykére. Ha ijetuʼuve jave orendive haʼekuéra oremokyreʼỹ ha orepytyvõ tekotevẽhápe”.

OIMÉRAMO REJEDIVORSIA RAʼE

Raquel omombeʼu: “Aimoʼãʼỹetére che ména ou vaʼekue chereja rei. Upérõ chepochyeterei, hasyeterei chéve la ojapóva cherehe ha aju voi ndavyʼaveiete. Péro añemoag̃ui Ñandejárare ha haʼe chekonsola. Káda día añemboʼe chupe, ha ahechakuaa haʼe chembopyʼaguapyha. Haʼetévaicha Ñandejára omongueráva che korasõ.

La Biblia chepytyvõ anivéma hag̃ua chepochy ha chepyʼaro. Apensa meme apóstol Pablo heʼi vaʼekuére Romanos 12:21-pe: ‘Ani reheja pe ivaíva ipuʼaka nderehe, síno akóinte ndepuʼaka vaʼerã ivaívare iporãvape’.

Peteĩ che amigoite chepytyvõ ahechakuaa hag̃ua tekotevẽha asegi adelánte. Ohechauka chéve Eclesiastés 3:6 ha heʼi porãnte chéve sapyʼánte tekotevẽha ñañembyesaráintema peteĩ mbaʼégui. Ijetuʼu kuri chéve ahendu hag̃ua chupe, péro añetehápe upéva la aikotevẽ vaʼekue. Koʼág̃a napensavéima la oiko vaʼekuére ha añehaʼã meme ajapo umi mbaʼe chembovyʼátava”.

Elizabeth katu heʼi: “Rejedivorsiáramo ningo reikotevẽterei peteĩ oĩ vaʼerã nde ykére. Ha upéva ojapo vaʼekue peteĩ che amigaite. Haʼe káda día oĩ che ykére, hasẽ chendive, chekonsola ha ohechauka chéve cherayhuha. Aikuaa porã Jehová ojevale hague hese añeñandu porã jey hag̃ua”.

NDERASÝRÕ TÉRÃ NDEEDÁRAMO REHÓVO

Pe primer artíkulope ñañeʼẽ kuri Luísre, haʼe hasy ikorasõme ha dos vésema haimetete omano. Haʼe oikotevẽ oxíheno 16 óra káda día. Luis heʼi: “Añemboʼe meme Jehovápe ha añandu ijespíritu chemombareteha. Añemboʼévo chembarete jey asegi hag̃ua adelánte, pórke ajerovia Ñandejárare ha aikuaa haʼe cherayhuha”.

Petra, orekómava 80 áño ári, heʼi: “Oĩ heta mbaʼe ajaposéva jepi, péro ndaikatuvéima. Amasdía chekangyve ahávo, ha upéva ijetuʼu chéve. Chekaneʼõmba rei ha pohãrentema aiko. Heta vése apensa jepi Jesús ojerure vaʼekuére Itúape, heʼírõ guare ombohasamínte hag̃ua chugui pe situasión ijetuʼúva. Péro Jehová omombarete chupe oaguanta hag̃ua, ha upeichaite avei ojapo cherehe. Káda día añemboʼe ha upéva ojapo porãiterei cherehe. Tuicha añeñandu porãve añeʼẽ rire Ñandejárandi” (Mateo 26:39).

Julián oñeñandu avei upéicha. Ojapóma 30 áñorupi haʼe oreko hague peteĩ mbaʼasy hérava esclerosis múltiple. Haʼe heʼi: “Yma ambaʼapo porã vaʼekue peteĩ emprésape ha aguapy voi peteĩ sílla ikomodoitereívape, koʼág̃a katu sílla de rruédape akorre aikóvo. Péro ndahaʼéi upe haguére ndavalevéiva mbaʼeverã, síno aipurupaite che tiémpo aipytyvõ hag̃ua che rapichakuérape. Ha ñaipytyvõ jave ótrope javyʼaiterei. Jehová opromete ñanemombaretetaha ñaikotevẽ jave ha okumpli upéva. Che ikatu avei haʼe apóstol Pablo heʼi haguéicha: ‘Opa mbaʼerã chembarete Ñandejára omeʼẽgui chéve podér’” (Filipenses 4:13).

OMANÓRAMO PETEĨ REHAYHÚVA

Antonio heʼi: “Peteĩ áuto ochoka vaʼekue che túare ha upéva káusare omano. Che ni ndaroviaséi vaʼekue la oikóva. Nantendéi mbaʼérepa oiko hese upéva, haʼéngo oĩmínte hína kuri upépe. Péro ndaikatúi ajapo mbaʼeve asalva hag̃ua chupe. Haʼe opyta en kóma 5 día ha upéi omano. Aĩ aja che sýndi ajejokopaite ani hag̃ua cherasẽ, péro upéi apytávo cheaño cherasẽ soro. Manterei apensa: ‘¿Mbaʼére? ¿Mbaʼére?’.

Ijetuʼueterei vaʼekue upérõ guare, ha ajerure meme Jehovápe tachepytyvõ ani hag̃ua añeñandu vaieterei ha avei chepyʼaguapy hag̃ua. Mbeguekatúpe añeñandu porãve. Chemanduʼa la Biblia heʼiha oimeraẽvape ikatuha ohupyty peteĩ desgrásia ohaʼarõʼỹve jave. Aĩ segúro che túa orresusitataha, pórke Ñandejára siémpre okumpli umi mbaʼe oprometéva” (Eclesiastés 9:11; Juan 11:25; Tito 1:2).

Pe primer artíkulope ñañeʼẽ kuri Robert rehe. Chugui ningo omano kuri ifamília. Haʼe heʼi: “Che rembireko ha che roñemboʼe meme Jehovápe, ha haʼe orembopyʼaguapy heʼiháicha Filipenses 4:6, 7. Ore roikuaa umi omano vaʼekue oikove jeytaha, ha Jehová orembopyʼaguapy rupi ikatu kuri roñeʼẽ umi periodístandi upe esperánsare. Che raʼy omano hoʼárõ guare pe avión, péro ore oremanduʼa meme umi mbaʼe porã rohasa vaʼekuére hendive. Ha roñehaʼã ropensa meme upévare.

Ore amigokuéra haʼéva avei testígo de Jehová heʼi oréve orerecha hague télepe romombeʼúvo mbaʼépa roguerovia, ha heʼi orepyʼaguapyeterei hague. Ore roʼe chupekuéra rokonsegi hague upéva haʼekuéra oñemboʼe meme rupi orerehehápe. Hetaiterei oĩ omboúva oréve mensáhe ha nóta orekonsola hag̃ua, ha aikuaa porã Jehová ojevale hague umívare orepytyvõ hag̃ua”.

Umi ehémplo jahecha vaʼekue ohechauka porã Ñandejára ikatuha okonsola umi ohasa asývape, tahaʼe haʼéva pe situasión ohasáva. ¿Nekonsolátapa avei ndéve? Si, ani reduda upévagui. Haʼe nekonsoláta tahaʼe haʼéva pe provléma reguerekóva.b Upévare, eñemoag̃uíkena Jehováre, haʼe hína “Ñandejára omeʼẽva opaichagua konsuélo” (2 Corintios 1:3).