MANDUʼARÃ

Upe guive ikyreʼỹvéntema hikuái opredika hag̃ua

SEPTIEMBRE 1922-pe, peteĩ viernes pyhareve ijaty 8.000 persónarupi peteĩ salón guasúpe. Upe díape ningo hakueterei kuri. Pe ermáno oĩva de presidénte pe asambléape heʼi umi persóna osẽséva upégui ikatuha osẽ, péro noñepermitimoʼãvéima chupekuéra oike jey.

Pe prográma oñepyrũ ojepurahéivo pe folléto héravagui “Servicio de alabanzas”. Upéi ermáno Joseph Rutherford ojupi pe platafórmape. La majoría oĩva pe atýpe oguapy ha ohaʼarõjoa ohendu hag̃ua la ojeʼétava. Oĩ mimi avei umi oguatáva áoty péoty hakueterei rupi. Upévare pe diskursánte ojerure chupekuéra oguapymi hag̃ua ikatu hag̃uáicha ohendu la ojeʼétava. Oñepyrũvo pe diskúrso ojekuaa pe platafórma ári osaingoha peteĩ rróllo de téla.

Ermáno Rutherford diskúrso héra vaʼekue: “Pe Rréino yvagapegua hiʼag̃uimbaitéma”. Idiskúrso ningo odura una óra imédia, ha pe iñeʼẽ pyrusu orretumba pe salónpe. Haʼe oexplika mbaʼéichapa umi proféta yma guare oikuaauka kyhyjeʼỹme pe Rréino outaha. Omohuʼãmbotaitévo idiskúrso oporandu: “¿Pegueroviápa pe Rréi tuichaitéva oñepyrũmaha ogoverna?”. Enterovéva oĩva upépe hatã ombohovái ogueroviaha.

Upe rire Ermáno Rutherford heʼi: “Upéicharõ, ¡pesẽ jey katu pepredika, peẽ haʼéva Ñandejára ijojahaʼỹva raʼy ha itajýra!”. Avei heʼi: “¡Péina, pe Rréi ogovernáma! Peẽ peñeʼẽ vaʼerã hérape. Upévare, tapeho peikuaauka, peikuaauka, peikuaauka mávapa pe Rréi ha irréino”.

Upe javete, oñepyrũ ojepyso mbeguekatu asy pe rróllo de téla osaingóva platafórma ári, ha ojehecha ojeskriviha hese: “Peikuaauka mávapa pe Rréi ha irréino”.

Peteĩ ermáno hérava Ray Bopp heʼi: “Orepirĩmba ningo ropytávo”. Ótra ermána hérava Anna Gardner omombeʼu: “Enterovévante hatãiterei rojepopete ha umi víga techoregua oryryipa”. Fred Twarosh heʼi: “Peichaháguinte roñemboʼypaite al mísmo tiémpo”. Evangelos Scouffas katu imanduʼa: “Haʼete voi oĩva algúna kósa mbaʼe oremopuʼãva ore síllagui, ha ropyta roñemboʼyhápe ore resay ore rováre”.

Heta persóna oĩva pe asambléape opredikáma voi oikóvo pe marandu porã oñeʼẽva Ñandejára Rréinore. Péro koʼág̃a ikyreʼỹvéntema hikuái osegi hag̃ua ojapo upéva. Ethel Bennecoff omombeʼu umi Estudiánte de la Biblia kyreʼỹme opredika hague upe guive. Pe asambléape ojejapo vaʼekue ko porandu oñeguenohẽva la Bíbliagui: “¿Mávapepa ikatu ñamondo?”. Odessa Tuck, orekóva upérõ 18 áño odesidi orrespondetaha pe porandu. Haʼe omombeʼu: “Ndaikuaái ningo moõpa, mbaʼéichapa, ni mbaʼépa ajapo vaʼerã, péro asegise Isaías ehémplo”. Ko proféta heʼi vaʼekue: “Ápe ningo aĩ che. Chemondóna chéve” (Is. 6:8, TNM). Ralph Leffler heʼi: “Upe día iñimportantetévape añetehápe oñepyrũ ojepredika pe marandu porã oñeʼẽva Ñandejára Rréinore, koʼág̃a og̃uahẽmava oparupiete”.

Ojekuaa porã ningo mbaʼérepa iñimportantete entéro kristiánope g̃uarã pe asambléa oiko vaʼekue Cedar Póintpe, Ohio. George Gangas heʼi vaʼekue: “Pe asambléa chemokyreʼỹ ani hag̃ua arakaʼeve afalta koʼãichagua atýpe”. Ko ermáno naimanduʼái ofalta hague ni peteĩ asambleahápe. Ha Julia Wilcox heʼi: “Ndaikatúi amombeʼupa umi mbaʼe añandúva oñeñeʼẽ jave ñande puvlikasionkuérape pe oiko vaʼekuére Cedar Póintpe, áño 1922-pe. Péro apensa jave upe asambléare, chemomýi jey jey haʼe hag̃ua: ‘Aagradeseterei ningo ndéve Jehová repermiti haguére aĩ upépe’”.

Oime vaʼerã ñanemanduʼa porã avei algúna asambléa opokoiterei vaʼekuére ñanderehe, ñanemokyreʼỹva ha ñanemomýiva jahayhuve hag̃ua Ñandejárape ha pe Rréi haʼe omoĩ vaʼekuépe. Katuete ningo ñanemanduʼávo umi asambléare, jaagradeseterei avei Jehovápe opermiti haguére ñaĩ upépe.

Oñembohovái chupekuéra iñemboʼe ohaʼarõʼỹháicha

Arthur Claus ha hembireko hérava Nellie, voi og̃uahẽ vaʼekue pe asambleahápe ojagarra hag̃ua peteĩ lugár porã. Arthur heʼi: “Ajapysaka porã káda kósa ojeʼévare”. Péro peichaháguinte Arthur oñepyrũ hye rasy. Upévare osẽmante okápe oikuaáramo jepe ndaikatuveitamaha oike jey. Peteĩ akomodadór heʼi chupe: “¿Mbaʼéicha piko resẽta koʼág̃a?”. Upéicharõ jepe haʼe norremediái.

Ou jeývo, ohendu hatã ojejepopeteha. Upémarõ, oheka okápe peteĩ lugár ohendu porãtahápe la ojeʼéva, ha ohecha ikatutaha ojupi pe técho ári, ijyvatéva 5 métrorupi. Ojupikuévo, otopa peteĩ ventána ojeavríva.

Upe lugárpe ohecha unos kuánto ermánope omañáva pe diskursántere, ha ojekuaa hesekuéra ojepyʼapyetereiha algúna kósare. Chupekuéra ojeʼe kuri otrosa hag̃ua al mísmo tiémpo umi pióla ojokóva pe téla oñenrrolláva. Péro ojapo hag̃ua upéva oikotevẽ hikuái ótro kyse. ¿Orekónepa Arthur la oikotevẽva hikuái? Ni ndoroviaséi hikuái ohechávo Arthur orekoha peteĩ naváha. Arthur ha umi ótro ermáno koʼág̃a oĩma preparádo otrosa hag̃ua umi pióla oñemeʼẽ vove pe señál. Ermáno Rutherford heʼi rire dos vése “peikuaauka”, upépe haʼekuéra otrosáma vaʼerã.

Umi oĩ vaʼekue pe atýpe heʼi pe téla guasu oñepyrũ hague ojepyso mbeguekatu asy. Ojehecha pe téla orekoha tres kolór ha mbytépe oreko Jesús raʼanga.

Upe rire, umi ermáno omombeʼu Árthurpe ogueru hague peteĩ eskaléra ojupi hag̃ua pe técho ári, péro ndoikuaái mávapa oraha chuguikuéra la ijeskaléra. Ohechámarõ hikuái ndaikatuveimaha ojapo mbaʼeve, oñemboʼe Jehovápe ikatu hag̃uáicha ou hendapekuéra peteĩ ermáno kyse reheve. Koʼã ermáno ni michĩmi ndodudái Jehová ombohovái hague iñemboʼe haʼekuéra ohaʼarõʼỹháicha.