KAPÍTULO 24

Rojoayhuvénepa rojapóramo?

Dos mése ramo Sandra ha Pablo oñepyrũ hague ojegusta. Sándrape g̃uarã katu haʼete voi yma guivéma ojokuaa hague. Tódo el día oñomensahea ha órare oñeʼẽ selulárpe. Omaña haguénte ojuehe oikuaáma mbaʼépa opensa pe ótro. Péro oĩ aja hikuái ko ñasaindýpe, Pablo ndahaʼéi ku oñeʼẽsénteva, haʼe ojaposéma ambue mbaʼe.

Oñepyrũ guive osẽ oñondive haʼekuéra oiko ojopóre ha oñohetũʼi mimi avei. Sándrape g̃uarã upéva ovaletereíma. Péro ndoipotái Pablo oheja chupe. Haʼe ningo otrata porãiterei chupe ha hendive Sandra oñeñandu yvágare voi. Upévare heʼi: “Mbaʼe piko la tánto, haʼéngo cherayhu ha che upéichante avei”.

NDAHASYIETE japilla mbaʼépa oipota Pablo. Péro Sandra oñenóramo hendive heta mbaʼe ikatu okambia, ha ndahaʼéi katuete ojogueraha porãvétava hikuái. Ha sapyʼánte naentéroi ohechakuaa upéva. Epensamíntena ko mbaʼére:

Ñamoĩ chupe nerepenaiha pe léi de gravedad rehe ha rejepoi yvatégui, mbaʼépa oikóta? Reʼáta, ha ikatu voi repẽ térã remano. Ñandejára avei omoĩ peteĩ léi heʼíva kuña ha kuimbaʼe ndoikoivaʼerãha oñondive omendaʼỹre. Ha nerepenáiramo ko léi rehe, resẽ vaíta katuete (1 Tesalonicenses 4:3). La Biblia heʼi: ‘Umi oñemeʼẽva tekovaípe, ijehe voi ojapo ivaíva’ (1 Corintios 6:18). Añete piko upéva? Emoĩmi mbohapy mbaʼe vai ikatúva oiko reñenóramo nde chíko térã nde chíkandi.

1 ․․․․․

2 ․․․․․

3 ․․․․․

Ehechami jey pe rehaivaʼekue. Remoĩpa ikatuha nderyeguasu, ova nderehe mbaʼasy vai, ha repyta vaitaha Jehová renondépe? Koʼã mbaʼe ikatu oiko umi naiñeʼẽrendúivare Ñandejárape ha hekokyʼáva.

Upéicharõ jepe, oimevaʼerã retanteaséma. Ikatu ere: “Ndojehumoʼãingo chéve mbaʼeve. Ha upéi ave, enterove ningo ojapo”. Oiméne ne kompañerokuéra kolehiopegua ijuru renyhẽ omombeʼu oñenóma hague peteĩ mitãrusu térã peteĩ mitãkuñándi, ha rehecha lája ndoikói hesekuéra mbaʼeve. Ikatu voi repensa upéicha pejoayhuvetaha nde chíko térã nde chíkandi. Hiʼarive, katuete nandegustái oĩramo oñembohorýva nderehe vírhen haguére.

Ñepyrũrã reikuaavaʼerã ko mbaʼe: naentéroi ojapo. Pór ehémplo peteĩ investigasión ojejapóva Estados Unídospe heʼi: “Omboty mboyve 18 áño, mbohapy mitãrusúgui, mokõi oñenóma ichíko térã ichíka ndive”. Ko investigasión rupive jahecha mbohapy mitãrusúgui, peteĩva ndojapói hague, ha upéva tuicha mbaʼéma. Péro mbaʼéichapa oñeñandu umi ojapóva? Ovyʼápa hikuái? Umi estúdio ohechauka ombohovaiha heta mbaʼe ijetuʼúva. Jahechami mbohapy:

PETEĨHA OMBYASY. Oĩ heta omombeʼúva opytaha ombyasyeterei oreko haguére rrelasión sexual omenda mboyve.

MOKÕIHA NDOJEROVIAVÉI OJUEHE. Oñeno rire ichíko térã ichíka ndive, oñepyrũ opensa: “Mávandipa oiméne oñenómaraʼe avei?”.

MBOHAPYHA NOÑEPENAVÉI HESE. Mitãkuñanguéra oipota umi mitãkariaʼy oñangareko ha ohayhu chupe, ha ndahaʼéi ojaprovecha hese. Péro heta mitãrusu opyta ndohayhuvéi ha ndorrespetavéi ichíkape oñeno rire hendive.

Hiʼarive oĩ mitãrusu heʼíva ni mbaʼevéicharõ nomendamoʼãiha peteĩ mitãkuñáre oñeno rire hendive. Mbaʼérepa? Haʼekuéra oipotave hembirekorã peteĩ mitãkuña vírhen.

Upéva ikatu omondýi térã ombopochy voi heta mitãkuñáme. Péro añete ningo! Ha koʼã mbaʼe oñemokañy jepi umi novéla ha pelíkulape. Umívape ojehechauka ku iporãitereíramo mitãrusu ha mitãkuña oĩ oñondive omendaʼỹre, ohechauka hag̃ua ojupe ojoayhuha. Péro ani ndevýra! Pe mitãrusu ndejopýva reñeno hag̃ua hendive ijehénte opensa (1 Corintios 13:4, 5). Oimérõ haʼe nderayhu, reimoʼã piko ojeruretaha ndéve peteĩ mbaʼe ndereja vaítava ha rembyasýtava upe rire? (Proverbios 5:3, 4.) Añetehápe ojepyʼapýrõ nderehe, ni mbaʼevéicharõ ndojapoukamoʼãi ndéve mbaʼeve ikatúva ombopochy Ñandejárape (Hebreos 13:4).

Ha oimérõ nde peteĩ mitãkariaʼy ha ndechíkama, rejepyʼamongetavaʼerã avei koʼã konséhore ha eñeporandu: “Mbaʼéichapa ahechaukáta ahayhuha chupe?”. Rehechaukáta upéva rejejokokuaárõ neñeʼẽrendu hag̃ua Ñandejárape, nearandúrõ remboyke hag̃ua oimeraẽ mbaʼe ikatúva penemomýi pejapo hag̃ua peteĩ mbaʼe vai, ha rehayhu añetérõ rehechakuaáta mbaʼépa iporãve chupe g̃uarã. Rejapóramo koʼã mbaʼe, pe mitãkuña nde rehayhúva katuete oñeñandúta pe sulamíta oñeñandu haguéicha, ha heʼíta: ‘Che mborayhu jára hakateʼỹ cherehe. Haʼe cherayhu ha che avei chupe’ (El Cantar de los Cantares 2:16, NM).

Umi mitãrusu orekóva rrelasión sexual omendaʼỹre, katuete opyta vai upe rire (Romanos 1:24). Oĩ otĩetereíva ha oñandúva omeʼẽ rei hague peteĩ mbaʼe ijojahaʼỹva. Anína reheja oiko nderehe upéva! Oĩramo ndejopýva nderekokyʼa hag̃ua ha heʼi guaʼúva ndéve: “Ehechaukána chéve cherayhuha”, kyhyjeʼỹme rembohovaivaʼerã: “Nde cherayhúrõ nderejeruremoʼãi chéve upéva”.

Reñangarekovaʼerã ndejehe, ha ani reheja avave oñembohory nderehe. Eñehaʼãkena ejejokokuaa ha neñeʼẽrendu Ñandejára léipe heʼíva kuña ha kuimbaʼe ndoikoivaʼerãha oñondive omendaʼỹre. Upéicha, remenda vove, reĩta ne ména térã ne rembirekóndi rejepyʼapyʼỹre, pejeroviavéta ojuehe ha ndereikomoʼãi reñembyasy mbaʼevére (Proverbios 7:22, 23; 1 Corintios 7:3).

RETOPAVÉTA INFORMASIÓN VOLÚMEN 2, KAPÍTULO 4 HA 5-PE

TÉYSTO OĨVA LA BÍBLIAPE

‘Peñemomombyrýke tekovaígui. Umi oñemeʼẽva tekovaípe ijehe voi ojapo ivaíva.’ (1 Corintios 6:18)

PETEĨ KONSÉHO

Resẽ jave peteĩ mitãrusu térã peteĩ mitãkuñándi, eñehaʼã ejeporta porã ha ani rejapo mbaʼeve nderejapomoʼãiva nde tuvakuéra oĩrire penendive.

REIKUAÁPARAʼE?

Heta mitãrusu oheja rei ichíkape oñeno rire hendive, ha oheka jey ótro.

UMI MBAʼE AJAPÓTAVA!

Aĩme jave peteĩ mitãrusu térã peteĩ mitãkuñándi, ndahejaivaʼerã oiko koʼã mbaʼe: ․․․․․

Peteĩ mitãrusu térã peteĩ mitãkuña heʼíramo chéve ropyta hag̃ua oreaño, haʼéta chupe: ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Reĩséramo jepe peteĩ kuña térã peteĩ kuimbaʼéndi remenda mboyve, mbaʼérepa oĩ vai upéva?

● Mbaʼépa rejapóta oĩramo heʼíva ndéve orekoseha rrelasión sexual nendive?

[Komentário oĩva páhina 176-pe]

“Nde ningo reñehaʼã nderekoporã ha upéva entéronte ohecharamo. Emombaʼékena upéva ha ani reheja mbaʼeve nemongyʼa ha ndereja vai Ñandejára renondépe”. (Joshua)

[Taʼanga oĩva páhina 176 ha 177-pe]

Nderekokyʼáramo haʼete ku reiporúva peteĩ kuádro hepýva remopotĩ hag̃ua nde sapatu

KAPÍTULO 25

Mbaʼépa ikatu ajapo ponove ajejavyky?

“Arekópe ocho áño añepyrũ ajejavyky. Upéi aikuaa mbaʼéichapa Ñandejára ohecha upéva ha añehaʼã aheja, péro ajapo jey. Umícha jave añeñandu vaieterei ha haʼémi vaʼerã: ‘Ñandejára ningo ni mbaʼevéicharõ ndacheguerohorymoʼãi’.” (Luis)

OKAKUAA aja mitãrusukuéra okambia ohóvo, oñandu heta mbaʼe ipyahúva ha iñakãraku rei. Ha oĩ ndojejokokuaáiva ha oñepyrũva ojejavyky.a Oikópa nderehe upéva? Ikatu ojeʼe ndéve ani hag̃ua rejepyʼapy, ndojapomoʼãigui nderehe mbaʼeve ivaíva. Upéicharõ jepe, tekotevẽterei reheja. Apóstol Pablo heʼi voi: ‘Peñehaʼã pejejokokuaa; aníke avave oiko hembipota vai rapykuéri’ (Colosenses 3:5, BNP). Ha reikóramo rejejavyky, upéva nanepytyvõmoʼãi rejejokove hag̃ua, neakãrakuvereíta guei. Ha hetave mbaʼépe ikatu ou vai ndéve:

● Pe ojejavykýva ijupénte omeʼẽse gústo.

● Ohecha kuña térã kuimbaʼépe peteĩ trápoicha, oiporupáva ha upéi omombóva. Ha opensa natekotevẽiha kuña ha kuimbaʼe ojoayhu oĩ hag̃ua oñondive, síno ovyʼa hag̃uánte sapyʼaite ha péicha oñembopiroʼy.

● Opensa rupi ijehénte, omenda vove ndaikatumoʼãi ovyʼa oĩ jave iména térã hembirekóndi.

Upéicharõ, reiko rangue rejejavyky rembohasa hag̃ua ndehegui pe akãraku, iporãve reñehaʼã rejejokokuaa (1 Tesalonicenses 4:4, 5). La Biblia heʼi voi remboykevaʼerãha opa mbaʼe nemoakãrakútava (Proverbios 5:8, 9). Péro mbaʼépa ikatu rejapo oimérõ reiko repoko ndejehe? Oiméne heta vésema reñehaʼã reheja péro upéi rejapo jey. Ikatu voi ere: “Maʼerã piko añehaʼãvéta, ahechapaitéma voi ndaikatumoʼãiha aiko Ñandejára oipotaháicha”. Peteĩ mitãrusu hérava Pedro opensavaʼekue upéicha, haʼe heʼi: “Hetáma haʼe ndajapomoʼãveimaha, péro ajapo jey ha upéi apyta vaieterei. Ndaikatúi ni añemboʼe upe rire. Apensa voi Ñandejára nacheperdonamoʼãiha”.

Oimérõ nde avei repensa upéicha, ani reimoʼã nanepohãveimaha. Heta mitãrusu, mitãkuña ha kakuaa ohejavaʼekue ko mbaʼe, ha mbaʼére piko nde ndaikatumoʼãi avei reheja?

Ha reñeñandu vaietereíramo?

Umi ojejavykýva ningo opyta jepi ‘ombyasyeterei’ upe ojapovaʼekue (2 Corintios 7:11). Ndaivaíri reñeñandu upéicha, upéva ikatu nemomýi reheja hag̃ua upe mbaʼe, péro remboguapyetereíramo ndejehe ha reikóramo reñembyasyháre, ikatu repensa reiete reñehaʼãha reheja (Proverbios 24:10).

Péro nemanduʼavaʼerã avei ko mbaʼére: rejejavykýramo rejapo peteĩ mbaʼe ikyʼáva ha naiporãiva Ñandejára renondépe. Ha saʼi saʼípe reikóma umi mbaʼe vai rejaposéva rembiguáiramo (Tito 3:3). Upéicharõ jepe, rejejavykýramo ndeʼiséi rejapoha peteĩ pekádo ivaietereíva pe tekokyʼáicha (Judas 7). Upévare ndovaléi repensa Ñandejára naneperdonamoʼãiha. Reñehaʼã meme vaʼerã guei rejejoko ani hag̃ua oiko jey. Ha aníkena ni mbaʼevéicharõ nekaneʼõ.

Ha reʼa jeýramo ko mbaʼépe? Ani nekangy. Upéva ndeʼiséi ndaikatumoʼãveimaha rekambia. Nemanduʼavaʼerã Proverbios 24:16 (ÑÑB) heʼívare: ‘Pe hekopotĩva hoʼáramo jepe siete vése, katuete opuʼã jeýta. Umi iñañáva katu hoʼa mbaʼe vaípe ha nopuʼãvéima’. Ehechavaʼerã mbaʼérepa reʼa jey ha mbaʼépa rejapokuaa ponove oiko nderehe upéva.

Iporãta avei nemanduʼa meméramo Ñandejára nderayhu ha ndeporiahuverekoha. Pe rréi David heta vése opytavaʼekue yvýre ojapo rire peteĩ mbaʼe vai, péro ehechamína mbaʼépa haʼe ohai: ‘Peteĩ túva oiporiahuverekoháicha itaʼýrape, upéicha avei Jehová oiporiahuvereko umi iñeʼẽrendúvape. Haʼe oikuaa mbaʼéguipa ñandeapo, oikuaa porã ñande yvy reinteha’ (Salmo 103:13, 14). Ñandejára oikuaa manterei jajavyha, upévare oĩ ‘oheja rei hag̃uáicha ñandéve ñane rembiapo vaikue’ (Salmo 86:5). Péro oipota avei ñañehaʼãmbaite ñakambia. Mbaʼépa ikatu nepytyvõ?

Eiporavo porãkena nde vyʼarã. Rehechápa télepe térã Internétpe umi mbaʼe ikatúva nemoakãraku? Pe kuimbaʼe ohaivaʼekue Salmo 119:37 (NM) ojerurevaʼekue Ñandejárape: ‘Ani reheja che resa omaña umi mbaʼe ndovaléivare mbaʼeverã’.b

Eñehaʼã epensa ambue mbaʼére. Ou jave ne akãme umi mbaʼe tieʼỹ, pyaʼe eñehaʼã epensa ótra kósare. William heʼíva ikatu nepytyvõ: “Reñeno mboyve releevaʼerã peteĩ mbaʼe oñeʼẽva Ñandejárare. Reñehaʼãmbaitevaʼerã repensa umi mbaʼe ipotĩvare reke mboyve” (Filipenses 4:8).

Emombeʼu pe oikóva. Retĩramo jepe, ndahasyivéta ndéve reheja hag̃ua ko mbaʼe reñemongetáramo peteĩ ikatúvandi nepytyvõ. Péicha ojapovaʼekue peteĩ mitãrusu hérava David, haʼe heʼi: “Amombeʼúrõ guare papápe ajejavykyha, ndaipochýi chendive. Haʼe opilla atĩetereiha chugui ha heʼi chéve: ‘Avyʼaite che raʼy remombeʼu haguére chéve’. Upepete ajedesidi, ha haʼe: ‘Koʼág̃a ndahejamoʼãvéima mbaʼeve chejoko akambia hag̃ua’.

”Ñepyrũrã papa olee chéve la Bíbliape umi téysto chembopyʼaguapýtava, ha upéi umi téysto heʼíva ivaiha upe ajapóva. Avei romoĩ peteĩ fécha roñemongeta jey hag̃ua, ha chemokyreʼỹ anivéma hag̃ua apoko chejehe upe ára peve. Péro avei heʼi chéve ajejavyky jeýramo, ani amboguapyeterei chejehe ha ambohasavénte hag̃ua pe fécha romoĩvaʼekue.” Mbaʼépa ohechakuaa David? “Ñaikotevẽterei peteĩ ojepyʼapýva ñanderehe ha ñanepytyvõva jaheja hag̃ua ko mbaʼe.”c

[Nóta]

TÉYSTO OĨVA LA BÍBLIAPE

‘Emboyke umi mbaʼe mitãrusúpe omoakãrakúva. Eiko tekoporãme, jerovia, mborayhu ha pyʼaguapýpe, ha ejeheʼa umi Ñandejárare ojeroviáva rehe.’ (2 Timoteo 2:22)

PETEĨ KONSÉHO

Reñandu vove rejaposetereiha ko mbaʼe vai, eñemboʼe Ñandejárape ha ejerure chupe tomeʼẽ ndéve ‘ipuʼaka’ rejejokokuaa hag̃ua (2 Corintios 4:7, ÑÑB).

REIKUAÁPARAʼE?

Umi mbaʼe vai jajaposéva sapyʼaitépe ikatu ipuʼaka nderehe. Péro neakãguapýramo rejejokokuaáta, koʼýte reĩ jave neaño.

UMI MBAʼE AJAPÓTAVA!

Mbaʼépa ikatu ajapo ani hag̃ua apensa umi mbaʼe itieʼỹvare? ․․․․․

Mbaʼépa ikatu ajapo pono ajejavyky, añandúramo jepe ajaposeha ko mbaʼe? ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼérepa nemanduʼa meme vaʼerã Jehová ‘oheja reiha ñane rembiapo vaikue’? (Salmo 86:5.)

● Ñandejára voi ñandeapo jarekose hag̃uáicha rrelasión sexual, péro avei heʼi ñandéve jajejoko hag̃ua, ndahaʼéipa ojeroviágui jajejokokuaataha?

[Komentário oĩva páhina 182-pe]

“Ndajapovéi guive ko mbaʼe, tuicha chepyʼaguapyve, ha ndaipóri mbaʼeve iporãvéva upévagui”. (Sara)

[Taʼanga oĩva páhina 180-pe]

Sapyʼarei reʼáramo redipara aja, pyaʼeterei repuʼã ha resegi jey. Upéicha avei rejejavyky jeýramo, “repuʼã jey vaʼerã” ha eñehaʼã ponove oiko nderehe upéva

KAPÍTULO 26

Ha añenóramo hendive rovyʼaʼimi hag̃uánte?

“Heta mitãrusu ha mitãkuña ojepokuaa oñembojaruʼi ‘iñamígondi’ jahecha noñenóipa hendive una vénte jepe raʼe, ha oheka voi máva mávandipa ikatu ojapove upéva.” (Rosa)

“Oĩ mitãrusu opureáva voi ha heʼi orekoha ichíka ha ijyképe oñenoha avei heta mitãkuñándi.” (Jaime)

KOʼÁG̃A rupi heta mitãrusu ha mitãkuña oreko rrelasión sexual ohasa porãséguinte sapyʼaite. Oĩ katu pyʼỹinte oñenóva oñondive péro upéi heʼi: “Ore ningo oñoamígonte”. Haʼekuéra ndahaʼéi ku ojoayhúva, sapyʼaiténte ovyʼase ha ni nopensái omendávo ojuehe.

Oiméramo ndetira avei upéva, katuete ijetuʼúne ndéve rejejoko hag̃ua (Jeremías 17:9). Jaime ningo heʼi voi: “Heta mitãkuña ni ndahesapirĩri heʼi hag̃ua chéve oñenoseha chendive. Péro napenái hesekuéra. Chéngo añehaʼã ajapo Ñandejára heʼíva, péro heta vése ijetuʼu formál chéve”. Jahechamína mbaʼéichapa la Biblia nepytyvõkuaa.

Ehechakuaavaʼerã oĩ vaiha

La Biblia ohechauka ndovaleiha peteĩ kuña ha kuimbaʼe oñeno oñondive omendaʼỹre. Ha heʼi voi umi ojapóva upéva ‘ndoikemoʼãiha Ñandejára rréinope’, ojapóramo jepe ojoayhúgui térã omakaneaségui reínte (1 Corintios 6:9, 10, BNP). Upéicharõ, tekotevẽterei repensa Jehová opensaháicha remboyke hag̃ua pe tekovai.

“Jaiko porãiteve ningo jajapóramo la Biblia heʼíva.” (Karen, Canadá.)

“Nde ru, nde sy, ne amigokuéra ha umi ermáno kongregasionpegua ohaʼarõiterei ndehegui. Upévare, repensavaʼerã mbaʼeichaitépa oñeñandu vaíta hikuái rejapórõ peteĩ mbaʼe ivaíva.” (Peter, Gran Bretaña.)

Rehechavaʼerã pe tekokyʼa Ñandejára ohechaháicha, péicha nembojeguarúta voi ha ‘reñemboykéta’ chugui, ijetuʼúramo jepe ndéve (Salmo 97:10, ÑÑB).

Ikatu relee: Génesis 39:7-9. Ejesarekomína mbaʼéichapa José ojehekýi pe tekovaígui. Mbaʼérepa ojapóraʼe upéicha?

Emombaʼevaʼerã umi mbaʼe regueroviáva

Pyʼỹinte jahecha mitãrusukuéra notĩriha odefende hag̃ua umi mbaʼe haʼekuéra opensáva oĩ porãha, umícha jave ndaipóri omokirirĩva chupekuéra. Nde avei kyhyjeʼỹme remombeʼuvaʼerã upe repensáva pe tekokyʼáre. Ñandejára voi heʼi ivaiha kuña ha kuimbaʼe oñeno oñondive omendaʼỹre. Upéicharõ aníkena retĩ reñeʼẽ hag̃ua ko mbaʼére.

“Ani rehaʼarõiterei ere hag̃ua mbaʼépa ndéve g̃uarã oĩ porã ha oĩ vai.” (Allen, Alemania.)

“Koléhiope umi mitãrusu oikuaa porã namakaneamoʼãiha hendivekuéra, ha reiete voi oikotaha che rapykuéri.” (Vicky, Estados Unidos.)

Reñeʼẽramo pyʼaguasúpe umi mbaʼe regueroviávare rehechaukáta reñakãrapuʼãha rehóvo (1 Corintios 14:20).

Ikatu relee: Proverbios 27:11. Rehechakuaápa ikatuha rembovyʼa Jehovápe reñehaʼãramo nderekoporã?

Ehechauka porã vaʼerã ndereguevimoʼãiha

Ere porãrõ jepe peteĩ mitãrusu térã peteĩ mitãkuñáme nereñenomoʼãiha hendive, haʼe ikatu opensa reñembohepynteha chugui.

“Reñatendevaʼerã reñeʼẽ ha reñemonde lája, mávarepa rejeheʼa ha mbaʼéichapa rejeporta. Upéicha enterove ohecháta nerekambiamoʼãiha upe erevaʼekue.” (Joy, Nigeria.)

“Rehechaukavaʼerã ni mbaʼevéicharõ ndereguevimoʼãiha. Oĩramo peteĩ mitãrusu onovilleáva nderehe ha oiko guaʼu omeʼẽse ndéve rregálo, ani rejagarra chugui. Cháke upéi heʼíta ndéve redeveha chupe.” (Laura, Gran Bretaña.)

Oipytyvõ haguéicha pe rréi Davídpe, Ñandejára katuete nepytyvõta avei reñehaʼãramo nderekopotĩ. David heʼivaʼekue voi Jehovápe: “Nde ndepyʼaporã ipyʼaporãva ndive” (Salmo 18:25, ÑÑB).

Ikatu relee: 2 Crónicas 16:9. Rehechaháicha, Jehová oipytyvõta umi oñehaʼãvape iñeʼẽrendu chupe.

Rehechamavaʼerã mbaʼépa ikatu oiko

La Biblia heʼi: “Oikokuaáva ohecha yvykua ha ojere chugui” (Proverbios 22:3). Upéicharõ, rehecháma vaʼerã mbaʼépa ikatu oiko, ha ani rehaʼarõ rejejopy vai raẽ.

“Ani rejeheʼa umi séxorente oñeʼẽva.” (Naomi, Japón.)

“Neremombeʼuguasuivaʼerã voi moõpa reiko ha ani remeʼẽ ape ha pépe ne teléfono número.” (Diana, Gran Bretaña.)

Epensamína: Mbaʼe rehépa reñeʼẽve? Mbaʼéichapa rejeporta? Mávapa ne amigokuéra? Moõ rupípa reiko jepi?. Reñatendevaʼerã koʼã mbaʼére, ani ág̃a nde voi rentendeka ótrope erekoseha rrelasión sexual.

Ikatu relee: Génesis 34:1, 2. Rehechakuaápa Dina osẽ vai hague oho rupi peteĩ lugár ndovaleihápe oho?

Jehovápe g̃uarã ndahaʼeiete vyrorei peteĩ kuña ha kuimbaʼe oñenóramo oñondive omendaʼỹre, ha nde avei repensavaʼerã upéicha. Reñehaʼãramo nderekopotĩ reime porãta Ñandejára renondépe, ndepyʼaguapýta ha entéronte nderrespetáta. Peteĩ mitãkuña hérava Carol heʼi voi: “Anína reheja avave oñembohory nderehe. Chakeko hetáma reñehaʼã pono rejapo ivaíva!”.

TÉYSTO OĨVA LA BÍBLIAPE

‘Peñehaʼãmbaite Ñandejára pendetopa hag̃ua pyʼaguapy ha tekopotĩme, ha ani pendetopa pejapohápe ivaíva.’ (2 Pedro 3:14, BNP)

PETEĨ KONSÉHO

Reñehaʼãvaʼerã nderekoporã (1 Pedro 3:3, 4). Upéicha umi hekopotĩva ojeheʼaséta avei nderehe.

REIKUAÁPARAʼE?

Ñandejára oipota umi omendáva ovyʼa oĩ jave oñondive. Péro umi hekokyʼáva opyta jepi oñembyasy upe rire.

UMI MBAʼE AJAPÓTAVA!

Cherekopotĩ hag̃ua José ojapo haguéicha, añehaʼãvaʼerã ajapo koʼã mbaʼe: ․․․․․

Ndaipotáiramo oiko cherehe Dínare oikovaʼekue, ajapovaʼerã koʼã mbaʼe: ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Ndetiráramo jepe, mbaʼérepa ivai kuña ha kuimbaʼe oĩ oñondive omendaʼỹre?

● Mbaʼépa rejapóta oĩramo heʼíva ndéve reñeno hag̃ua hendive?

[Komentário oĩva páhina 185-pe]

“Peteĩ vuéltape peteĩ mitãrusu cheañua lénto ha heʼi chéve oĩseha chendive una vénte jepe raʼe, upepete haʼe chupe: ‘Anivetéke repoko cherehe!’. Upéi amaña vai formál hese ha ahapa upégui”. (Elena)

[Taʼanga oĩva páhina 187-pe]

Nderekokyʼáramo remeʼẽ rei hína ne virginidad