Mbaʼépa ikatu jajapo ñañepyrũ hag̃ua japredika
1 Pe kongregasiónpe ñane ermanokuéra ombohovái opaichagua situasión. Upéicharõ jepe opavavénte peteĩcha oñeʼẽse Jehovágui omombaʼeguasu hag̃ua chupe (Sal. 79:13). Oĩ umi hasykatúva, térã iprovléma tuicháva, ha ndaikatúiva osẽ heta opredika. Upéicha ojehúramo ñandéve, mbaʼépa ikatu jajapo japredika hag̃ua pe jaikoha rupi?
2 Ñane rembiapokuéra apytépe. Jesús opredika pe oikoha rupi, otopahápe tapichakuéra oñemongeta hag̃ua. Oñeʼẽ Matéope ohasakuévo pe impuésto ojekovraha rupi, Zaquéope ohasakuévo pe táva oikoha rupi ha peteĩ samaritánape opytuʼu aja (Mat. 9:9; Luc. 19:1-5; Juan 4:6-10). Ñande avei ikatu ñañepyrũ japredika pe ñane rembiapo paʼũ rupi, ñañemongetávo ñande rapichakuérandi. Jaguerekóramo ñanendive peteĩ Biblia, ha ñande tratadokuéra, ñanekyreʼỹta ñañepyrũ hag̃ua ñañeʼẽ umi mbaʼe porã ñahaʼarõvagui (1 Ped. 3:15).
3 Ndépa ndaikatúi reguata, ha upévare ndaikatúi jepi resẽ repredika umi ogaha rupi? Eñehaʼãkena epredika nde doktórpe ou jave nderecha, térã umi enfermérape (Hech. 28:30, 31). Oĩramo umi mbaʼe ndejokóva jepi, ha ndaikatúi resẽ meme, reñehaʼãmapa reiporu pe teléfono repredika hag̃ua? Ikatu avei reskrivi kárta. Peteĩ ermána pyʼỹinte oskrivi ihentekuéra ndahaʼéiva Testígope. Oiporu umi téysto vívliko oporomokyreʼỹva ha omombeʼu umi mbaʼe ohasavaʼekue opredika aja.
4 Ñambaʼapohápe térã eskuélape. Ñañeʼẽséramo ñamombaʼeguasu hag̃ua Jehovápe ñañehaʼãta avei ñamosarambi Ñandejára Ñeʼẽ ñambaʼapohápe térã ñande eskuélape. Peteĩ puvlikadór oguerekóva ocho áño omombeʼu iklásepe peteĩ informasión oleevaʼekue jasýgui pe rrevísta ¡Despertad!-pe. Imboʼehára, oikuaa rire moõguipa onohẽ pe informasión, oipota ombohasa katuete chupe osẽ jave La Atalaya ha ¡Despertad! ipyahúva. Pe ñambaʼapohápe ñamoĩramo peteĩ lívro Mbaʼépa omboʼe la Biblia ñane irũnguéra ohecha hag̃uáme, ikatu oporanduse hikuái umi mbaʼe oikuaaséva, ha upéicha ñañepyrũkuaa japredika.
5 Ndépa mbaʼe ikatu rejapo reñepyrũ hag̃ua repredika pe reikoha rupi? Jajapopaitékena ikatúva guive ‘ñamombaʼeguasu’ hag̃ua Ñandejárape káda día, ha upéicha ñaikuaveʼẽ hag̃ua chupe peteĩ sakrifísio (Heb. 13:15).