“Ndaikuaaséi mbaʼeve”
1 Oĩ heta heʼíva ñandéve péicha japredika jave. Mbaʼépa ñanepytyvõta ani hag̃ua oguapy ñanderehe oĩramo nañanerenduséiva? Mbaʼépa ikatu jajapo umi ñande rapicha ohenduse hag̃ua pe marandu porã?
2 Javyʼa memékena. Jaikuaáramo mbaʼérepa heta vése oĩ nañanerenduséiva, javyʼa meméta japredika jave. Ikatu oĩ nomombaʼéiva Ñandejára Ñeʼẽ oñemboʼégui chupe jaikohague evolusión rupive térã okakuaahaguére umi Ñandejárare ojeroviaʼỹva apytépe. Hetápe avei omokangy ohechávo oĩha tovamokõi rrelihionkuéra apytépe. Oĩ nohenduséiva nosẽporãigui chupe mbaʼeve ha ndoikuaáigui mbaʼépa ikatu ohaʼarõ tenonderã gotyo (Efe. 2:12). Oĩ avei umi nopenáiva ñanderehe ojepyʼapýgui heta mbaʼére (Mat. 24:37-39).
3 Oĩramo jepe nañanerenduséiva, ñañeñandu porã japredika jave, jaikuaágui péicha ñamombaʼeguasuhañaína Jehovápe (1 Ped. 4:11). Ñamombeʼu meméramo pe marandu porã, jepe umi nohenduséivape, jajerovia mbaretevéta Jehová rehe. Ñañehaʼãmbaitevaʼerã jahecha Jehová ohechaháicha opavave ñande rapichápe. Haʼe niko ombyasyeterei umi tapicha oikovaʼekue Nínivepe, ndoikuaáire hikuái ‘ivaíva ha iporãva’ (Jon. 4:11). Tekotevẽtereíningo ñande rapicha oikuaa pe marandu porã oĩva. Upévare aníkena ñanekangýtei. Jahecha uvei mbaʼépa ikatu jajapo oñehenduseve hag̃ua pe marandu oĩva Ñandejára Ñeʼẽme.
4 Ñañeʼẽ umi mbaʼe oporopyʼapývare. Ñepyrũrã ikatu ñañeʼẽ umi mbaʼe oipyʼapyvévare umi héntepe ha upéi ñaporandukuaa mbaʼépa opensa hikuái umívare. Ñahendu chupekuéra ha upéi jahechauka mbaʼépa heʼi Ñandejára Ñeʼẽ umi mbaʼére. Oiko rire peteĩ mbaʼe ivaietereíva, peteĩ ermáno oho ovisita opavavépe hógape ha heʼi chupekuéra ombyasyetereiha pe oikovaʼekue. Haʼe omombeʼu: “Sapyʼaitérõ g̃uarã oñemongetáma chendive hikuái. Heta ndive añeʼẽ upe árape, ajepyʼapy rupi umi mbaʼe che rapichakuéra ohasávare”.
5 Jehová goviérno oipeʼapáta opaichagua provléma jahasavañaína koʼág̃a. Ñañehaʼãkena jahechakuaa mbaʼépa oipyʼapyve umi óga járape. Upéicharõ ikatúta jahechauka chupekuéra mbaʼépa heʼi Ñandejára Ñeʼẽ umi mbaʼére. Koʼág̃a nañanerendúiramo, ‘ág̃a upéinte ñanerendúne’ (Hech. 17:32).